Chapter 22

sūta uvāca |
mahāvatyāṃ tu saṃprāpte kṛṣṇāṃśe balavattare |
maṃgalaṃ kṛtavānrājā tadā parimalo balī || 1 ||
[Analyze grammar]

puṣpavatyā tayā sārddhaṃ gītanṛtyaviśāradaḥ |
kṛṣṇāṃśaḥ pratyahaṃ gehe mumoha sakhibhiḥ saha || 2 ||
[Analyze grammar]

hemaṃtaśiśire vīro rahaḥ krīḍāṃ karoti vai |
yathā śakro'psarobhiśca tathaiva hyudayo balī || 3 ||
[Analyze grammar]

grāmyadharmaṃ na kṛtavānsarvasparśaviśāradaḥ |
ekadā nṛtyakrīḍāyāṃ devī puṣpavatī svayam || 4 ||
[Analyze grammar]

kṛṣṇāṃśaṃ vacanaṃ prāha pūrvajanmani ko bhavān |
iti śrutvodayo vīro vihasyovāca vai vacaḥ || 5 ||
[Analyze grammar]

nṛpohaṃ caṃdradāsaśca pūrvajanmani he priye |
bālyātprabhṛti me duḥkhaṃ prāptaṃ daivavinirmitam || 6 ||
[Analyze grammar]

śālagrāmaśilāpūjā pratyahaṃ vai mayā kṛtā |
tena puṇyaprabhāvena sārvabhaumo babhūva ha || 7 ||
[Analyze grammar]

mṛte'hani tu saṃprāpte śālagrāme mano dadhau |
sāyujyaṃ me hareścāsītsvayaṃ brahmaprasādataḥ || 8 ||
[Analyze grammar]

kalinā prārthito viṣṇuḥ kālātmā parameśvaraḥ |
svadehānmāṃ tu niṣkāsya bhūmau janimacīkarat || 9 ||
[Analyze grammar]

yadā yadā hi dharmasya glānirbhavati vai priye |
yugadharmasya maryādāsthāpanāya bhavāmyaham || 10 ||
[Analyze grammar]

satye tu mānasī pūjā devānāṃ tṛptihetave |
tretāyāṃ vahnipūjā ca yajñadānādikā kriyā || 11 ||
[Analyze grammar]

dvāpare mūrtipūjā ca devānāṃ vai priyaṃkarī |
kalau tu dāruṇe prāpte brahmapūjanamuttamam || 12 ||
[Analyze grammar]

ahaṃ haṃsaḥ satyayuge tretāyāṃ yajñapūruṣaḥ |
hiraṇyagarbhaśca priye dvāpare'haṃ sukhapradaḥ |
śālagrāmaḥ kalau prāpte devānāṃ tṛptaye hyaham || 13 ||
[Analyze grammar]

munayo devatāssarvāstathā pitṛgaṇāḥ priye |
sarve te tṛptimāyāṃti śālagrāmasya pūjanāt || 14 ||
[Analyze grammar]

dvijātibhistrivarṇaiśca pūjanaṃ caṃdanādikaiḥ |
śūdraiśca snānamātreṇa bhakti bhāvena pūjanam || 15 ||
[Analyze grammar]

mlecchaiśca darśanaṃ puṇyaṃ vinayādbhaktibhāvataḥ |
śālagrāmaḥ svayaṃ brahma saccidānaṃdavigrahaḥ |
tasya darśanamātreṇa kṣayaṃ yāsyaṃti vai malāḥ || 16 ||
[Analyze grammar]

iti te kathitaṃ devi yugamaryādamuttamam |
purā tvaṃ kasya tanayā satyaṃ kathaya me'ciram || 17 ||
[Analyze grammar]

puṣpavatyuvāca |
pūrvajanmani veśyāhaṃ caṃdrakāṃtiriti śrutā |
gānanṛtyādikaṃ vādyaṃ devasyāgre mayā kṛtam || 18 ||
[Analyze grammar]

tena puṇyaprabhāveṇa svargalokamupāgatā |
devaiśca prārthitā tatra rūpa yauvanaśālinī || 19 ||
[Analyze grammar]

brahmacaryaṃ na tatyāja svargaloke'pi vai hyaham |
tena puṇyaprabhāveṇa coṣā bāṇasutā'bhavam |
aniruddhaḥ svayaṃ brahma mama pāṇiṃ gṛhītavān || 20 ||
[Analyze grammar]

kalinā prārthito devo mama svāmī svahetave |
arcāvatāramāsādya mārkaṃḍeyasthalaṃ gataḥ || 21 ||
[Analyze grammar]

svaprasādasya mahimā darśitastena tatra vai |
atraiva sthitimaryādo dārurūpasya me pateḥ || 22 ||
[Analyze grammar]

ahaṃ tasyājñayā svāmiñjambukasya sutābhavam |
divyarūpasamāyuktā nāmnāhaṃ vijayaiṣiṇī || 23 ||
[Analyze grammar]

kṛtaṃ mamaiva maraṇaṃ tvadbhrātrā balakhāninā |
makaraṃdasya bhaginī bhūtvā tvāṃ patimāgatā || 24 ||
[Analyze grammar]

tena doṣeṇa tvadbhrātā yātanāṃ tīvramāgataḥ |
rājña innagaṭhasyaiva gehe gajapateḥ svayam |
ityuktvā maunamāsthāya reme patyā samaṃ mudā || 25 ||
[Analyze grammar]

holikāsamaye prāpte malanā snehaduḥkhitā |
sutāṃ caṃdrāvalīṃ ramyāṃ svapnāṃte sā dadarśa ha |
ruroda niśi duḥkhena svasutāsnehakātarā || 26 ||
[Analyze grammar]

tadodayo mahāvīro jñātvā rodana kāraṇam |
śūraiśca daśasāhasraissārddhaṃ bahudhanairyutaḥ |
ekākī prayayau vīro yatra caṃdrāvalīgṛham || 27 ||
[Analyze grammar]

mahīpatistu tacchatrurjñātvā kāraṇamuttamam |
paścājjagāma kāryārthī sa tu duryodhanāṃśakaḥ |
balīṭhāṭhamiti khyātaṃ grāmaṃ yādavapālitam || 28 ||
[Analyze grammar]

vīraseno nṛpastatra trilakṣabalasaṃyutaḥ |
aṣṭau sutāśca tasyāsanrūpayauvanaśālinaḥ || 29 ||
[Analyze grammar]

kāmasenaḥ prasenaśca mahāsenastathaiva ca |
sukhaseno rūpaseno viṣvakseno madhuvrataḥ |
madhupaśca kramājjātā yādavāṃśāśca yādavāḥ || 30 ||
[Analyze grammar]

tatra gatvā ca kṛṣṇāṃśassabhāyāṃ narakesarī |
daṃḍavatpraṇato bhūtvā vīrasenaṃ mahīpatim || 31 ||
[Analyze grammar]

malanālikhitaṃ patraṃ dattvā rājñe mahāmanāḥ |
daśabhāraṃ suvarṇasya punarvāsamacīkarat || 32 ||
[Analyze grammar]

vyaṃjanāni vicitrāṇi bhuktvā yādavasaṃyutaḥ |
caṃdrāvalīṃ samāgatya kuśalaṃ ca nyavedayat || 33 ||
[Analyze grammar]

premotsukā ca bhaginī kṛṣṇāṃśaṃ prāha duḥkhitā |
bhavāndvyabdavayā vīra tadāhaṃ ca vivāhitā || 34 ||
[Analyze grammar]

viṃśadabdastato jāto vismṛtā pitṛmātṛbhiḥ |
samarthena tvayā vīra saṃsmṛtā bhaginī svayam || 35 ||
[Analyze grammar]

adya me saphalaṃ janma jīvitaṃ saphalaṃ ca me |
baṃdhudarśanamātreṇa sarvaṃ ca saphalaṃ mama || 36 ||
[Analyze grammar]

prasannātmodayastatra bhaginīṃ prāha namradhīḥ |
jambukena gṛhaṃ sarvaṃ luṇṭhitaṃ balaśālinā || 37 ||
[Analyze grammar]

tasya duḥkhena bhūpālo bhayabhīto dinedine |
mahākaṣṭena vijayo jambukāccābhayo'bhavat || 38 ||
[Analyze grammar]

mahīrājastu balavānrurodha nagarīṃ mama |
mayā vivāhito bhrātā brahmā tatsutayā saha || 39 ||
[Analyze grammar]

punaśca siṃhaladvīpe jayaṃtārthe vayaṃ gatāḥ |
evaṃvidhāni duḥkhāni bahūni hyabhavanpituḥ || 40 ||
[Analyze grammar]

atastvāṃ prati suprītā vayaṃ bhaginikiṃkarāḥ |
mṛduvākyamiti śrutvā tadā caṃdrāvalī mudā || 41 ||
[Analyze grammar]

gehaṃ nivāsayāmāsa svakīyaṃ premavihvalā |
etasminnantare dhūrto mahīpatirupāyayau || 42 ||
[Analyze grammar]

sabhāyāṃ vīrasenasya rājñā tenaiva satkṛtaḥ |
vārtāṃtaraṃ samāsādya tamuvāca mahīpatiḥ || 43 ||
[Analyze grammar]

niṣkāsitāśca te sarve rājñāhlādādayaḥ khalāḥ |
caurito nṛpateḥ kośo hīnajātyairmahābalaiḥ || 44 ||
[Analyze grammar]

tadā tu kuṃṭhitāḥ sarve śirīṣākhyapure'vasan |
chidradarśī tu kṛṣṇāṃśo gehaṃ tava samāgataḥ || 45 ||
[Analyze grammar]

caṃdrāvalyāśca vai dolāṃ gṛhītvā sa gamiṣyati |
satyaṃ bravīmi bhūpāla nānyathā vacanaṃ mama || 46 ||
[Analyze grammar]

iti śrutvā vīraseno jñātvā tatsatyakāraṇam |
kāmasenaṃ samāhūya caṃdrāvalyāḥ patiṃ sutam || 47 ||
[Analyze grammar]

vacanaṃ prāha bhoḥ putra baṃdhanaṃ kuru tasya vai |
iti śrutvā kāmaseno viṣamādāya dāruṇam || 48 ||
[Analyze grammar]

bhojanāya dadau tasyai jñātvā candrāvalī tadā |
bhrāturaṃtikamāsādya pātramādāya sā yayau || 49 ||
[Analyze grammar]

kāmasenaśca kupito gṛhītvā daṃḍavetasam |
svapriyāṃ tāḍayāmāsa sa dṛṣṭvā taṃ tadākupat || 50 ||
[Analyze grammar]

gṛhītvā bhujayostaṃ vai baṃdhanāya samudyataḥ |
baṃdhanatvaṃ gate putre vīraseno mahābalaḥ || 51 ||
[Analyze grammar]

putrānājñāpayāmāsa tasya baṃdhanahetave |
etasminnaṃtare vīro dolāmādāya satvaram || 52 ||
[Analyze grammar]

senāmadhye samāgamya mahadyudamacīkarat |
ekato daśasāhasrāstrilakṣāstu tathaikataḥ |
ahorātramabhūdyuddhaṃ dāruṇaṃ romaharṣaṇam || 53 ||
[Analyze grammar]

hatā lakṣaṃ mahāśūrā udayena mahābalāḥ |
śeṣāḥ pradudruvussarve yādavā bhayakātarāḥ || 54 ||
[Analyze grammar]

dṛṣṭvā parājitaṃ sainyaṃ sapta putrā mahābalāḥ |
svāngajāṃśca samāruhya kṛṣṇāṃśaṃ rurudhū ruṣā || 55 ||
[Analyze grammar]

sa vīro biṃdulārūḍho bhūmau kṛtvā gajāsanān |
teṣāmastrāṇi saṃcchidya badhnāti baladarpitaḥ || 56 ||
[Analyze grammar]

iti śrutvā vīrasenaḥ sūryabhaktiparāyaṇaḥ |
sauramastraṃ samādāya tasya sainyamadāhayat |
tenāstreṇaiva kṛṣṇāṃśaḥ sahayo mūrcchito bhuvi || 57 ||
[Analyze grammar]

vīrasenastu taṃ baddhvā mocayitvā sutānvadhūm |
svagehamāgatastṛrṇaṃ nānāvādyānyavādayat || 58 ||
[Analyze grammar]

hataroṣāstadā vīrāḥ kṛṣṇāṃśasya yayurdiśaḥ |
hetuṃ parimalasyāgre sarvamūcustadāditaḥ || 59 ||
[Analyze grammar]

mahīpatiṃ mahādhūrtaṃ matvā rājābravīdidam |
gaccha tvaṃ malanāputra lakṣasainyasamanvitaḥ || 60 ||
[Analyze grammar]

baddhvā svabhaginīkāṃtaṃ svabaṃdhuṃ mocayāśu vai |
iti śrutvā ca sa suto lakṣasenāsamanvitaḥ || 61 ||
[Analyze grammar]

śīghraṃ gatvā ca nagarīṃ rurodha balavānruṣā |
yuddhī bhūte bale tasminvīraseno nṛpottamaḥ |
sauramastramupādāya dāhanārthaṃ samudyataḥ || 62 ||
[Analyze grammar]

sajjībhūte tadastre tu brahmānaṃdo mahābalaḥ |
brahmāstreṇaiva sa śaraṃ vārayāmāsa vai ruṣā || 63 ||
[Analyze grammar]

dṛṣṭvā bhayānvito bhūpastameva śaraṇaṃ yayau |
brahmānaṃdastu taṃ bhūpaṃ vacanaṃ prāha nirbhayaḥ || 64 ||
[Analyze grammar]

dhūrtavākyena he bhūpa madbaṃdhurbādhitastvayā |
avadhyā ca sadā nārī tvatsutastāmatāḍayat |
atastvaṃ bhaginīyuktaṃ svasutaṃ dehi me nṛpa || 65 ||
[Analyze grammar]

iti śrutvā ca nṛpatirvacanaṃ prāha namradhīḥ |
matsutā ca gṛhe nāsti kāmasenaṃ gṛhāṇa bhoḥ || 66 ||
[Analyze grammar]

ityuktvā vīrasenaśca sutaṃ caṃdrāvalīṃ tathā |
dattvā tasmai prasannātmā tatprasthānamakārayat || 67 ||
[Analyze grammar]

brahmānando'pi balavānkṛṣṇāṃśena samanvitaḥ |
senayāśītisāhasryā yayau sārddhaṃ mahāvatīm || 68 ||
[Analyze grammar]

malanā svasutaṃ dṛṣṭvā premavihvalakaṃpitā |
snāpayitvāśrudhārābhirdvijātibhyo dadau dhanam || 69 ||
[Analyze grammar]

iti te kathitaṃ vipra kṛṣṇāṃśacaritaṃ śubham |
śṛṇvatāṃ kalipāpaghnaṃ kathayiṣyāmi vai punaḥ || 70 ||
[Analyze grammar]