Chapter 16

sūta uvāca |
prāpte saptadaśābde ca kṛṣṇāṃśe tatra cābhavat |
śṛṇu tvaṃ muniśārdūla dṛṣṭaṃ yadyogadarśanāt || 1 ||
[Analyze grammar]

ratnabhānau mṛte rājñi marudhanvamahīpatiḥ |
gajasenastadā vipra pṛthvīrājabhayāturaḥ || 2 ||
[Analyze grammar]

ārādhya pāvakaṃ devaṃ yajñadhyānavratārcanaiḥ |
dvādaśābdaṃ sadācāraḥ premabhaktyā hyatoṣayat || 3 ||
[Analyze grammar]

tadā prasanno bhagavānpāvakīyaṃ hayaṃ śubham |
dadau tasmai sutau cobhau kanyāṃ ca gajamuktikām || 4 ||
[Analyze grammar]

pāvakāste hi catvāraḥ samudbhūtā mahītale |
agnivarṇā mahāvīrāḥ sarvalakṣaṇalakṣitāḥ || 5 ||
[Analyze grammar]

aṣṭādaśavayobhūtāḥ sarve te munipuṃgava |
jātamātrā devasamāḥ sarvavidyāviśāradāḥ || 6 ||
[Analyze grammar]

aṣṭādaśābdavayasā sā kanyā varavarṇinī |
durgāyāśca varaṃ prāptā dharmāṃśastvāṃ variṣyati || 7 ||
[Analyze grammar]

śārdūlavaṃśī sa nṛpaḥ kṛtavānvai svayaṃvaram |
nānādeśyā nṛpāḥ prāptāḥ sutāyā rūpamohitāḥ || 8 ||
[Analyze grammar]

mārgaśīrṣe site pakṣe cāṣṭamyāṃ caṃdravāsare |
tasyāḥ svayaṃvaraścāsītsā nṛpānprati cāyayau || 9 ||
[Analyze grammar]

vidyudvarṇaṃ mukhaṃ tasyāścaṃcalāyāstathāgatam |
dṛṣṭvā mumoha dharmāṃśo balakhānirmahīpatiḥ || 10 ||
[Analyze grammar]

sāpi dṛṣṭvā ca taṃ vīraṃ mumoha gajamuktikā |
buddhvā tasmai dadau mālāṃ vaijayaṃtī śubhānanā || 11 ||
[Analyze grammar]

tārakādyāśca bhūpālāḥ sarvaśastrāstrasaṃyutāḥ |
rurudhuḥ sarvato vīraṃ te balātkanyakārthinaḥ || 12 ||
[Analyze grammar]

tathāvidhānnṛpāndṛṣṭvā bhūpānpaṃcaśatānbalī |
sa śīghraṃ khaṅgamutsṛjya śatabhūpaśirāṃsyahan || 13 ||
[Analyze grammar]

sarvato vadhyamānaṃ taṃ balakhāniṃ sa tārakaḥ |
tadbhujābhyāṃ dadau khaḍgaṃ sa tadaṃge dvidhābhavat || 14 ||
[Analyze grammar]

mahīrājasuto jyeṣṭho dṛṣṭvā khaḍgaṃ tathā gatam |
apovāha raṇācchūrastatpaścātte nṛpā yayuḥ || 15 ||
[Analyze grammar]

parājite nṛpabale balakhānirmahābalaḥ |
tāṃ kanyāṃ śibikārūḍhāṃ svagehaṃ so'nayadbalī || 16 ||
[Analyze grammar]

tāṃ gacchaṃtīṃ sutāṃ dṛṣṭvā gajaseno mahīpatiḥ |
mahīpatyājñayā prāpto jñātvā taṃ kṣatriyādhamam || 17 ||
[Analyze grammar]

jaṃbukaghnaṃ mahāvīraṃ māyayā tamamohayat |
jāte nidrāture vīre durgāyāḥ śāpamohite || 18 ||
[Analyze grammar]

nigaḍaistaṃ babaṃdhāśu dṛḍhairlohamayai ruṣā |
lohadurgaṃ ca saṃprāpya grāmarūpaṃ mahīpatiḥ || 19 ||
[Analyze grammar]

cāṃḍālāṃśca samāhūya kaṭhināṃstatravāsinaḥ |
vadhāyājñāpayāmāsa tasya daṃḍairanekaśaḥ || 20 ||
[Analyze grammar]

te raudrāstaṃ samābadhya tāḍayāmāsurūjjitāḥ |
tattāḍanāttadā nidrā tatraiva vilayaṃ gatā || 21 ||
[Analyze grammar]

dṛṣṭvā tatastu caṃḍālānbalakhāniratāḍayat |
talamuṣṭiprahāreṇa cāṃḍālā maraṇaṃ gatāḥ || 22 ||
[Analyze grammar]

mṛte paṃcaśate raudre taccheṣā dudruvurbhayāt |
kapāṭaṃ sudṛḍhaṃ kṛtvā nṛpāṃtikamupāyayuḥ || 23 ||
[Analyze grammar]

sa nṛpaḥ kāraṇaṃ jñātvā hastabaddho mahābalī |
uvāca tatra gatvāsau vacanaṃ kāryatatparaḥ || 24 ||
[Analyze grammar]

bhavānmahābalo vīra cāṃḍālairbaṃdhanaṃ gataḥ |
dasyubhirluṃṭhitastatra nidrāvaśyo vanaṃ gataḥ || 25 ||
[Analyze grammar]

matsutā bhavane prāptā diṣṭyā tvaṃ jīvitaṃ gataḥ |
udvāhya matsutāṃ śīghraṃ svagehaṃ yātumarhasi |
iti śrutvā priyaṃ vākyaṃ taṃ praśasya tathākarot || 26 ||
[Analyze grammar]

maṃḍape vedakarmāṇi vivāhārthaṃ cakāra saḥ |
jātāyāṃ maṃḍapārcāyāṃ patramāhlādahetave || 27 ||
[Analyze grammar]

tadājñayā likhitvāsau gajaseno'gnisevakaḥ |
uṣṭrārūḍhaṃ samāhūya śīghraṃ patramacodayat || 28 ||
[Analyze grammar]

balakhānervivāho'tra bhavānsainyasamanvitaḥ |
saṃprāpya yogyadravyāṇi bhuktvā tvaṃ tṛptimāvaha || 29 ||
[Analyze grammar]

ityukte niśi jātāyāṃ balakhānirmahābalaḥ |
bhojanaṃ kṛtavāṃstatra viṣajuṣṭaṃ nṛpārpitam || 30 ||
[Analyze grammar]

garalaṃ tena saṃbhuktaṃ na mamāra varācchubhāt |
tataḥ kāle ca saṃprāpte dṛṣṭvā mohatvamāgatam |
punarbabaṃdha nigaḍaistāḍayāmāsa vetasaiḥ || 31 ||
[Analyze grammar]

viṣadoṣamasṛkdvārānnissṛtaṃ sarvadehataḥ |
tadā bubodha balavānbhūpatiṃ prāha namradhīḥ || 32 ||
[Analyze grammar]

rājankimīdṛśaṃ jātaṃ tvatsainyaṃ tāḍane ratam |
sa āha bho mahāvīra matkule rītirīdṛśī |
yātanāṃ prathamaṃ prāpya tadanūdvāhito bhavet || 33 ||
[Analyze grammar]

ityukte sati bhūpāle gajamuktā samāgatā |
pitaraṃ prāha vacanaṃ ko'yaṃ tattāḍane gataḥ || 34 ||
[Analyze grammar]

nṛpaḥ prāha sute śīghraṃ yāhi tvaṃ nijamaṃdire |
kṛṣikaroyamāyāto dravyārthaṃ tāḍane gataḥ || 35 ||
[Analyze grammar]

iti śrutvā vaco ghoraṃ balakhānirmahābalaḥ |
chittvā tadbaṃdhanaṃ ghoraṃ khaḍgahastaḥ samāyayau || 36 ||
[Analyze grammar]

śūrānpaṃcaśataṃ taṃ ca ruddhvā śastraiḥ samaṃtataḥ |
prajaghnatastu tānsarvānbalakhānirvyanāśayat || 37 ||
[Analyze grammar]

gajasena suto jyeṣṭhaḥ sūryadyutirupāgataḥ |
baddhvā punastaṃ balinaṃ gartamadhye samākṣipat || 38 ||
[Analyze grammar]

tathā gataṃ patiṃ dṛṣṭvā gajamuktā suduḥkhitā |
niśi tatra gatā devī dattvā dravyaṃ tu rakṣakān || 39 ||
[Analyze grammar]

patiṃ niṣkāsya rudatī vyajanaṃ pataye dadau |
rātraurātrau tathā prāptā vyatītaṃ pakṣamātrakam || 40 ||
[Analyze grammar]

etasminnaṃtare vīraścāhlādaḥ saptalakṣakaiḥ |
sainyaiḥ sahāyayau śīghraṃ śrutvā tatraiva kāraṇam || 41 ||
[Analyze grammar]

balakhānirgato garte rurodha nagarīṃ tadā |
gajaiḥ ṣoḍaśasāhasrairgajaseno raṇaṃ yayau || 42 ||
[Analyze grammar]

trilakṣaiśca hayaiḥ sārddhaṃ sūryadyutirupāyayau |
kāṃtāmalastadā prāptastrilakṣaiśca padātibhiḥ || 43 ||
[Analyze grammar]

tayoścāsīnmahadyuddhamahorātraṃ hi sainyayoḥ |
rakṣite tālanādye ca gajasenādyake tadā || 44 ||
[Analyze grammar]

dvitīye'hni samāyāte gajaseno mahābalaḥ |
prabhagnaṃ svabalaṃ dṛṣṭvā pāvakī'yaṃ samāruhat |
dāhayāmāsa tatsainyaṃ tālanādyaiśca pālitam || 45 ||
[Analyze grammar]

bhasmībhūtaṃ balaṃ dṛṣṭvā tālanaḥ śatrusammukhe |
gatvā bhallena bhūpālaṃ tāḍayāmāsa vegataḥ || 46 ||
[Analyze grammar]

mūrchitaṃ nṛpamājñāya sūryadyutirupāyayau |
pāvakīyaṃ samāruhya dāhayāmāsa tālanam || 47 ||
[Analyze grammar]

etasminnaṃtare śūrau devau cāhlādakṛṣṇakau |
babandhatū ruṣāviṣṭau sūryadyutimariṃdamam || 48 ||
[Analyze grammar]

subaddhaṃ bhrātaraṃ jñātvā hayaṃ kāṃtāmalo'ruhat |
devasiṃhaṃ ca saṃmohya kṛṣṇāṃśaṃ prati so'gamat |
gṛhītvā taṃ sa kṛṣṇāṃśaṃ tasya tejaḥ samāharat || 49 ||
[Analyze grammar]

saptalakṣabalaṃ sarvaṃ vahnibhūtamabhūttadā |
amaratvātsa āhlādastadā tu samajīvayat || 50 ||
[Analyze grammar]

gajasenasyārddhasainyaṃ taiśca sarvairvināśitam |
vijayaṃ nṛpatiḥ prāpya harṣito gehamāyayau || 51 ||
[Analyze grammar]

vahnibhūtaṃ ca kṛṣṇāṃśaṃ dṛṣṭvāhlādaḥ suduḥkhitaḥ |
durgāṃ devīṃ sa tuṣṭāva manasā raṇamūrddhani || 52 ||
[Analyze grammar]

tadā devī vacaḥ prāha vatsa te putra eva ca |
svargādāgatya sarvāṇi punarujjīvayiṣyati || 53 ||
[Analyze grammar]

ityukte vacane devyā indulo vāsavājñayā |
dvādaśābdasamaṃ rūpaṃ dhṛtvā vidyāviśāradaḥ |
vaḍavāmṛtamāruhya hayaṃ tatra samāgataḥ || 54 ||
[Analyze grammar]

tadaṅgāduddhṛtā vāhā meghā iva samantataḥ |
pāvakaṃ śamayāmāsustrayaste devatopamāḥ || 55 ||
[Analyze grammar]

śamībhūte tadā vahnau svamukhātsahayo mudā |
lālāmudvāhayāmāsa tayā te jīvitāstataḥ || 56 ||
[Analyze grammar]

jīvite saptalakṣe tu śamībhūte hi pāvake |
gajasenaḥ sutābhyāṃ ca prayātaḥ sarvatodiśam || 57 ||
[Analyze grammar]

lakṣaṃ sainyaṃ tu ye śiṣṭāste sarve'pi bhayāturāḥ |
dudruvurbhārgavaśreṣṭha divyarūpatvadhāriṇaḥ || 58 ||
[Analyze grammar]

kecitsaṃnyāsino bhūtvā kecidvai brahmacāriṇaḥ |
jīvatvaṃ prāptavantaste tathānye saṃkṣayaṃ gatāḥ || 59 ||
[Analyze grammar]

baddhvā tāngajasenādīṃstrīñchūrānsa ca tālanaḥ |
kṛṣṇāṃśena samāyukta iṃdradurgaṃ samāyayau || 60 ||
[Analyze grammar]

balakhāniṃ ca niṣkāsya tālanastadanaṃtaram |
pṛṣṭavān kāraṇaṃ sarvaṃ śrutvā tanmukhato vacaḥ |
tānvīrāṃstāḍayāmāsa vetasaiḥ staṃbhabaṃdhanaiḥ || 61 ||
[Analyze grammar]

gajamuktājñayā vipra senāpatarirudāradhīḥ |
tālanastānsamutsṛjya vivāhārthaṃ samāyayau |
balakhānirhayārūḍho gajamuktā ca maṃḍape || 62 ||
[Analyze grammar]

gajasenastadā divyairbhojanaistānabhojayat |
nivāsya lohadurge tānkapāṭaḥ sudṛḍhīkṛtaḥ |
lakṣaśūrānsa saṃsthāpya svayaṃ rudrapuraṃ yayau || 63 ||
[Analyze grammar]

te rātrau lohadurgeṣu hyuṣitvā yatnato balāt |
prabhāte ca kapāṭe na dvāraṃ dṛṣṭvā tadābravīt |
dvāramudghāṭayāśu tvaṃ no cetprāṇāṃstyajiṣyasi || 64 ||
[Analyze grammar]

iti senāpatiḥ śrutvā lakṣaśūrānsamādiśat |
nānāyatnaiśca haṃtavyāḥ śatravo bhayakāriṇaḥ || 65 ||
[Analyze grammar]

iti śrutvā tu te śūrāḥ śataghnyastaiḥ suropitāḥ |
ekaikaṃ kramaśo jaghnurvṛṃdaṃ te vairatatparāḥ || 66 ||
[Analyze grammar]

hate daśasahasre tu kṛṣṇāṃśo biṃdulaṃ hayam |
samāruhya jaghānāśu svakhaḍgena mahadbalam || 67 ||
[Analyze grammar]

hataśeṣā bhayārtāśca sahayāśītisammitāḥ |
iṃdradurgaṃ prati prāhuryathā jāto balakṣayaḥ || 68 ||
[Analyze grammar]

śrutvā bhayāturo rājā svasutābhyāṃ samanvitaḥ |
gajamuktāṃ puraskṛtya vahudravyasamanvitām |
svapāpaṃ kṣālayāmāsa dattvā kanyāṃ vidhānataḥ || 69 ||
[Analyze grammar]

ṣoḍaśoṣṭrāṇi svarṇāni gṛhītvāhlāda eva saḥ |
yayau svagehaṃ sahitaḥ putrabhrātṛsamanvitaḥ || 70 ||
[Analyze grammar]

saṃprāpte gehamāhlāde devī svarṇavatī svayam |
indulaṃ svāṃkamāropya lalāpa karuṇaṃ bahu || 71 ||
[Analyze grammar]

mṛtāhaṃ ca tvayā putra punarujjīvitā khalu |
dhanyāhaṃ kṛtakṛtyāsmi jayanta tava darśanāt || 72 ||
[Analyze grammar]

iti śrutvendulo vīro natvāha jananīṃ mudā |
anṛṇaṃ nādhigacchāmi tvatto mātaḥ kadācana || 73 ||
[Analyze grammar]

saṃprāpte gehamāhlāde rājā parimalaḥ sudhīḥ |
vādyāni vādayāmāsa viprebhyaśca dadau dhanam || 74 ||
[Analyze grammar]

iti śrībhaviṣye mahāpurāṇe pratisargaparvaṇi caturyugakhaṃḍāpaparaparyāye kaliyugīyetihāsasamuccaye ṣoḍaśo'dhyāyaḥ || 16 ||
[Analyze grammar]