Chapter 149

sāmba uvāca |
kiṃ pramāṇaṃ likheccakraṃ tatra padmaṃ ca kiṃ bhavet |
nemipradhyāranābhīnāṃ vibhāgaḥ kriyate katham || 1 ||
[Analyze grammar]

vāsudeva uvāca |
catuḥṣaṣṭyaṅgulaṃ cakraṃ kṛtvā vṛttaṃ pramāṇataḥ |
aṣṭāṅgulā bhavennemiḥ seyaṃ vibhavataḥ sadā || 2 ||
[Analyze grammar]

nābhikṣetraṃ tathaiva syātpadmaṃ tattriguṇaṃ bhavet |
arakṣetraṃ ca padmasya kaṇikākesarāṇi ca || 3 ||
[Analyze grammar]

kesarasya ca pādena śeṣapatrāṇi kalpayet |
patrasandhiśca pādāṅgaṃ kramāttatrāpi bhidyate || 4 ||
[Analyze grammar]

unnataṃ kamalaṃ tattu kuryānnābhyāṃ na saṃśayaḥ |
ākīrṇāḥ saṃvibhaktāśca kartavyāḥ pradhayaḥ kramāt || 5 ||
[Analyze grammar]

aṅgulasthūlamūlaṃ syādarāgraṃ triguṇaṃ tataḥ |
bhūmiḥ pītā bahirjñeyā karṇikākesarāṇi ca || 6 ||
[Analyze grammar]

sitaṃ nābhisthalaṃ tatra dvārāṇi parikalpayet |
hastamātraṃ bhavettasya tanmānaṃ dvārasannibham || 7 ||
[Analyze grammar]

śeṣaṃ raktaṃ samuddiṣṭaṃ saṃhatāḥ patrasandhayaḥ |
nābhinemyantare lekhāḥ sitāścāṅgulamānataḥ || 8 ||
[Analyze grammar]

sitaraktasitābhiśca samantādupaśobhitam |
kapolaṃ dvārapadmaṃ ca dvārakoṇe prakalpayet || 9 ||
[Analyze grammar]

caturdvāraṃ bhavedevamaindradvāraṃ prakalpayet |
aparāhṇe'tha pūrvāhṇe varuṇamāvāhayetsadā || 10 ||
[Analyze grammar]

dvārāṇyetāni saṃvartya yathoktavidhinā yajet |
yathoktā devatāḥ sarvāḥ svamantraireva bhaktitaḥ || 11 ||
[Analyze grammar]

cakramevaṃ samuddiṣṭaṃ yajanārthaṃ mayā tava |
yajñenānena sambaddho dīkṣitaścārkamaṇḍale |
itthaṃ me bhānunā pūrvamidamuktaṃ varānana || 12 ||
[Analyze grammar]

sāmba uvāca |
ke mantrāścakrayajñe'smindevatānāṃ prakīrtitāḥ |
yajñakramaśca kaḥ prokto rūpaṃ kiṃ ca pṛthakpṛthak || 13 ||
[Analyze grammar]

vāsudeva uvāca |
khaṣolkaṃ hadayādhyakṣaṃ pūrvokte kamale yajet |
karṇikāyāṃ daleṣvevamaṅgāni hṛdayādi ca || 14 ||
[Analyze grammar]

nāmamantrāścaturthyaṃtāsteṣāṃ pūrvoktakoṭayaḥ |
namaskāraśca sarvatra eṣa eva vidhiḥ smṛtaḥ || 15 ||
[Analyze grammar]

svāhāntā homakāle ca karmasvanyeṣu te punaḥ |
yathā karmāvasānāśca prayoktavyāḥ samāsataḥ || 16 ||
[Analyze grammar]

oṃ khaṣolkāya vidmahe divākarāya dhīmahi |
tannaḥ sūryaḥ pracodayāt || 17 ||
[Analyze grammar]

sāvitrī ca mahābāho caturviṃśākṣarā matā |
sarvatattvamayī puṇyā brahmagotrārkavallabhā || 18 ||
[Analyze grammar]

evaṃ mantrāḥ prayoktavyāḥ sarvakarmasvataṃdritaiḥ |
anyathā viphalaṃ karma bhavediha paratra ca || 19 ||
[Analyze grammar]

tasmātsarvaprayatnena mantrāñjñātvā vidhiṃ tathā |
yathāvatkarma tatkṛtvā sādhayedīpsitaṃ phalam || 20 ||
[Analyze grammar]

sāmba uvāca |
ādityamaṇḍale dīkṣā kasya kāryā kathaṃ ca sā |
kadā kena kimarthaṃ ca kathayedaṃ mamākhilam || 21 ||
[Analyze grammar]

vāsudeva uvāca |
brāhmaṇaṃ kṣatriyaṃ vaiśyaṃ kulīnaṃ śūdrameva ca |
puruṣaṃ vā striyaṃ vāpi dīkṣayetsūryamaṇḍale || 22 ||
[Analyze grammar]

svayaṃ bhaktyopapannaśca praṇipatya guruṃ tathā |
gurustaṃ dīkṣayedvipraḥ kalpajñaḥ satyavākchuciḥ || 23 ||
[Analyze grammar]

ṣaṣṭhyāmagniṃ samādhāya pūrvoktavidhinā kramāt |
sampūjyārkaṃ tathā vahnau hutvā vai haviṣā ravim || 24 ||
[Analyze grammar]

śiṣyaṃ snātamathācāntaṃ khaṣolkākṛtivigraham |
svāṅgairālabhya cāṅgeṣu darbhavadbhistathākṣataiḥ || 25 ||
[Analyze grammar]

puṣpaiḥ sampūjya cāṅgāni deyaḥ kāryo balistathā |
ādityo varuṇo'rko'gniḥ sādhito hṛdayena ca || 26 ||
[Analyze grammar]

bhaved ghṛtaguḍakṣīraistandulaiśca1 pramāṇataḥ |
tribhirañjalibhirhutvā devāyāgnau hutaṃ punaḥ || 27 ||
[Analyze grammar]

dattvā śiṣṭāya muktvaivaṃ dattvānte dantadhāvanam |
kṣīraṃ vṛkṣodbhavaṃ tasmai dvādaśāṅgulasannibham || 28 ||
[Analyze grammar]

dantaśliṣṭe'panīte ca tena prācyāṃ kṣipettataḥ |
dantadhāvanamāsyaṃ ca tadā tasyopari kṣipet || 29 ||
[Analyze grammar]

maitrāvāruṇamīśānaṃ vakraṃ saumyasamāśritam |
praśastaṃ dantakāṣṭhasya mukhamanyatra ninditam || 30 ||
[Analyze grammar]

yāṃ diśaṃ dantakāṣṭhasya mukhaṃ paśyati tatpatim |
arcayettena śāṃtiḥ syādityuktaṃ bhānunā svayam || 31 ||
[Analyze grammar]

punastadvacanaṃ śrutvā aṅgairālabhya ca kramāt |
sampūjya locane tatra sañciṃtya parijapya ca || 32 ||
[Analyze grammar]

kārayitvā ca saṅkalpaṃ tathā cendriyasaṃyamam |
sthāpayeta svayaṃ cāpi varaṃ śrutvā samāhitaḥ || 33 ||
[Analyze grammar]

ācamya kṛtarakṣastu kṛtadravyādhivāsanaḥ |
hadayena nametprātaḥ snātvā hutvā hutāśanam || 34 ||
[Analyze grammar]

svapnaṃ pṛcchedyathā dṛṣṭaṃ śubhaṃ saṃvādayecca tam |
hadayenāśubhe dṛṣṭe śatahomaṃ samācaret || 35 ||
[Analyze grammar]

svapne paśyati harmyāṇi devatānāṃ hutāśanam |
nadīyānāni ramyāṇi udyānopavanāni ca || 36 ||
[Analyze grammar]

patrapuṣpaphalāḍhyāni kamalāni ca rājatam |
sampaśyati yadi svapne brāhmaṇaṃ vedapāragam || 37 ||
[Analyze grammar]

rājānaṃ śauryasampannaṃ dhanāḍhyaṃ kṣatriyottamam |
śuśrūṣaṇaparaṃ śūdraṃ yadi tattvārthamādiśet || 38 ||
[Analyze grammar]

praśastaṃ bhāṣaṇaṃ caiva yathāsambhavato matam |
etaiḥ sparśanameteṣāṃ śreṣṭhamārohaṇaṃ tataḥ || 39 ||
[Analyze grammar]

vāhanāni praśastāni prāsādaṃ nāvameva ca |
parvataṃ ca samāruhya vipulāṃ bhārgavīṃ bhajet || 40 ||
[Analyze grammar]

pītvā surāṃ samudraṃ ca dadhyājyaṃ kṣīrameva ca |
somaṃ māṃsaṃ havirbhuktvā kāśyapīṃ labhate naraḥ || 41 ||
[Analyze grammar]

labdhvā vastrāṇi ratnāni vividhābharaṇāni ca |
vāhanāni mahīṃ gāśca dhānyopakaraṇāni ca || 42 ||
[Analyze grammar]

samṛddhimāpnuyātkiñcitsvapnānāṃ darśanaṃ śubham |
śubhakarmānugaṃ yacca tatsarvaṃ śubhamucyate || 43 ||
[Analyze grammar]

tasmādanyadaniṣṭaṃ syāttasmādyuktā pratikriyā |
kramādālikhya saptamyāṃ tatra sampūjya bhāskaram |
tarpayitvā dvijāñcchiṣṭānānamya pūrvavadgurum |
sṛṣṭikrameṇa bhṛtyarthaṃ muktyarthaṃ nānyathā bhavet || 45 ||
[Analyze grammar]

divākaraṃ samālabhya puruṣo'tha yathākramam |
sarvagraheṣu tattveṣu yathāvattanniyojayet || 46 ||
[Analyze grammar]

viśuddheṣu viśuddhaṃ taṃ dhyātvā cādityavatkramāt |
niyojayetpṛthivyāśca tataḥ prabhṛti sarvaśaḥ || 47 ||
[Analyze grammar]

ādityamaṇḍalaṃ śuddhaṃ sarvamuktaṃ niyojayet |
evaṃ tu manasā dhyātvā juhuyāccaiva taṃ śatam || 48 ||
[Analyze grammar]

sarvairmantraiḥ kramādevaṃ dīkṣā proktā varāparā |
kṛtvaiva puṣpapātaṃ tu tasminnādityamaṇḍale || 49 ||
[Analyze grammar]

baddhvāsyamañjalau puṣpaṃ kṛtvā dattvā ca mantritam |
kṣipedvai kulaśuddhyarthaṃ nāmārthaṃ ca viśeṣataḥ || 50 ||
[Analyze grammar]

yatra tatpatitaṃ puṇyaṃ tasya tatkulamādiśet |
nāma cādityasaṃyuktamityuktaṃ bhānunā svayam || 51 ||
[Analyze grammar]

sampūjya śrāvayettatra samayānarkabhāṣitān |
prātaḥ sāyaṃ madhyāhne raverabhimukhaḥ sthitaḥ || 52 ||
[Analyze grammar]

upasthānaṃ sadā kuryādarcanaṃ ca sadā naraḥ |
adṛṣṭvārkaṃ na bhoktavyaṃ divā rātrau hutāśanam || 53 ||
[Analyze grammar]

dṛṣṭvā bhoktavyamarkākhyaṃ na bhoktavyaṃ kadācana |
na ca padyā spṛśettadvannāsanaṃ parivarjayet || 54 ||
[Analyze grammar]

na laṅghyā pratimācchāyā na laṅghyāstithayaḥ kvacit |
nakṣatrāṇi grahā yogā māsā māsādhipāśca ye || 55 ||
[Analyze grammar]

ayane ṛtavaḥ pakṣāstathaiva divasāni ca |
kālaḥ saṃvatsaraścāpi yaḥ kaścitkāla ucyate || 56 ||
[Analyze grammar]

abhivandyaḥ sa sarvo'pi namasyaḥ pūjya eva ca |
tasmātkālādhipaḥ sūryaḥ svayaṃ kālaśca paṭhyate || 57 ||
[Analyze grammar]

jyotirgaṇasya sarvasya sthāvarāsthāvarasya ca |
cetanācetanasyāpi sarvātmā yaḥ prakīrtitaḥ || 58 ||
[Analyze grammar]

stutyo vandyaḥ sadā pūjyastvayāyaṃ sarvathā nṛpa |
manasā karmaṇā vācā devanindāṃ parityajet || 59 ||
[Analyze grammar]

preṣayitvā1 ca nirmālyaṃ tadaśvebhyo nivedayet |
prakṣālya hastau pādau ca namaskuryāddivākaram || 60 ||
[Analyze grammar]

ityeṣā paramā dīkṣā tava saṃkṣepato mayā |
bhuktimuktikarī cāpi kathitā pravibhāgataḥ || 61 ||
[Analyze grammar]