Chapter 31

[English text for this chapter is available]

bhagavataḥ paramadhāmagamanam |
śrīśuka uvāca |
atha tatrāgamad brahmā bhavānyā ca samaṃ bhavaḥ |
maheṃdrapramukhā devā munayaḥ saprajeśvarāḥ || 1 ||
[Analyze grammar]

pitaraḥ siddhagaṃdharvā vidyādharamahoragāḥ |
cāraṇā yakṣarakṣāṃsi kinnarāpsaraso dvijāḥ || 2 ||
[Analyze grammar]

draṣṭukāmā bhagavato niryāṇaṃ paramotsukāḥ |
gāyaṃtaśca gṛṇaṃtaśca śaureḥ karmāṇi janma ca || 3 ||
[Analyze grammar]

vavṛṣuḥ puṣpavarṣāṇi vimānāvalibhirnabhaḥ |
kurvaṃtaḥ saṅkulaṃ rājan bhaktyā paramayā yutāḥ || 4 ||
[Analyze grammar]

bhagavān pitāmahaṃ vīkṣya vibhūtīrātmano vibhuḥ |
saṃyojyātmani cātmānaṃ padmanetre nyamīlayat || 5 ||
[Analyze grammar]

lokābhirāmāṃ svatanuṃ dhāraṇā dhyāna maṅgalam |
yogadhāraṇayā'gneyyā dagdhvā dhāmāviśatsvakam || 6 ||
[Analyze grammar]

divi duṃdubhayo neduḥ petuḥ sumanasaśca khāt |
satyaṃ dharmo dhṛtirbhūmeḥ kīrtiḥ śrīścānu taṃ yayuḥ || 7 ||
[Analyze grammar]

devādayo brahmamukhyā na viśaṃtaṃ svadhāmani |
avijñātagatiṃ kṛṣṇaṃ dadṛśuścātivismitāḥ || 8 ||
[Analyze grammar]

saudāmanyā yathā'kāśe yāṃtyā hitvābhramaṇḍalam |
gatirna lakṣyate martyaiḥ tathā kṛṣṇasya daivataiḥ || 9 ||
[Analyze grammar]

brahmarudrādayaste tu dṛṣṭvā yogagatiṃ hareḥ |
vismitāstāṃ praśaṃsaṃtaḥ svaṃ svaṃ lokaṃ yayustadā || 10 ||
[Analyze grammar]

rājan parasya tanubhṛjjananāpyayehā |
māyāviḍambanamavehi yathā naṭasya |
sṛṣṭvātmanedamanuviśya vihṛtya cāṃte |
saṃhṛtya cātmamahinoparataḥ sa āste || 11 ||
[Analyze grammar]

martyena yo gurusutaṃ yamalokanītaṃ |
tvāṃ cānayaccharaṇadaḥ paramāstradagdham |
jigyeṃ'takāṃtakamapīśamasāvanīśaḥ |
kiṃ svāvane svaranayan mṛgayuṃ sadeham || 12 ||
[Analyze grammar]

tathāpyaśeṣasthitisambhavāpyayeṣu |
ananyaheturyadaśeṣaśaktidhṛk |
naicchat praṇetuṃ vapuratra śeṣitaṃ |
martyena kiṃ svasthagatiṃ pradarśayan || 13 ||
[Analyze grammar]

ya etāṃ prātarutthāya kṛṣṇasya padavīṃ parām |
prayataḥ kīrtayed bhaktyā tāmevāpnotyanuttamām || 14 ||
[Analyze grammar]

dāruko dvārakāmetya vasudevograsenayoḥ |
patitvā caraṇāvasraiḥ nyaṣiñcat kṛṣṇavicyutaḥ || 15 ||
[Analyze grammar]

kathayāmāsa nidhanaṃ vṛṣṇīnāṃ kṛtsnaśo nṛpa |
tacchrutvodvignahṛdayā janāḥ śokavirmūrcchitāḥ || 16 ||
[Analyze grammar]

tatra sma tvaritā jagmuḥ kṛṣṇaviśleṣavihvalāḥ |
vyasavaḥ śerate yatra jñātayo ghnaṃta ānanam || 17 ||
[Analyze grammar]

devakī rohiṇī caiva vasudevastathā sutau |
kṛṣṇarāmāvapaśyaṃtaḥ śokārtā vijahuḥ smṛtim || 18 ||
[Analyze grammar]

prāṇāṃśca vijahustatra bhagavad virahāturāḥ |
upaguhya patīṃstāta citāṃ āruruhuḥ striyaḥ || 19 ||
[Analyze grammar]

rāmapatnyaśca taddehaṃ upaguhyāgnimāviśan |
vasudevapat‍nyastad‍gātraṃ pradyumnādīn hareḥ snuṣāḥ |
kṛṣṇapatnyo'viśannagniṃ rukmiṇyādyāḥ tadātmikāḥ || 20 ||
[Analyze grammar]

arjunaḥ preyasaḥ sakhyuḥ kṛṣṇasya virahāturaḥ |
ātmānaṃ sāṃtvayāmāsa kṛṣṇagītaiḥ saduktibhiḥ || 21 ||
[Analyze grammar]

baṃdhūnāṃ naṣṭagotrāṇāṃ arjunaḥ sāṃparāyikam |
hatānāṃ kārayāmāsa yathāvad anupūrvaśaḥ || 22 ||
[Analyze grammar]

dvārakāṃ hariṇā tyaktāṃ samudro'plāvayat kṣaṇāt |
varjayitvā mahārāja śrīmad bhagavadālayam || 23 ||
[Analyze grammar]

nityaṃ sannihitastatra bhagavān madhusūdanaḥ |
smṛtyāśeṣāśubhaharaṃ sarvamaṅgalamaṅgalam || 24 ||
[Analyze grammar]

strībālavṛddhānādāya hataśeṣān dhanañjayaḥ |
iṃdraprasthaṃ samāveśya vajraṃ tatrābhyaṣecayat || 25 ||
[Analyze grammar]

śrutvā suhṛd vadhaṃ rājan arjunātte pitāmahāḥ |
tvāṃ tu vaṃśadharaṃ kṛtvā jagmuḥ sarve mahāpatham || 26 ||
[Analyze grammar]

ya etad devadevasya viṣṇoḥ karmāṇi janma ca |
kīrtayet śraddhayā martyaḥ sarvapāpaiḥ pramucyate || 27 ||
[Analyze grammar]

itthaṃ harerbhagavato rucirāvatāra |
vīryāṇi bālacaritāni ca śaṃtamāni |
anyatra ceha ca śrutāni gṛṇan manuṣyo |
bhaktiṃ parāṃ paramahaṃsagatau labheta || 28 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ ekādaśaskandhe ekatriṃśo'dhyāyaḥ || 31 ||
[Analyze grammar]