Chapter 30

[English text for this chapter is available]

atha triṃśo'dhyāyaḥ |
śrīrājovāca |
tato mahābhāgavata uddhave nirgate vanam |
dvāravatyāṃ kimakarodbhagavānbhūtabhāvanaḥ || 1 ||
[Analyze grammar]

brahmaśāpopasaṃsṛṣṭe svakule yādavarṣabhaḥ |
preyasīṃ sarvanetrāṇāṃ tanuṃ sa kathamatyajat || 2 ||
[Analyze grammar]

pratyākraṣṭuṃ nayanamabalā yatra lagnaṃ na śekuḥ |
karṇāviṣṭaṃ na sarati tato yatsatāmātmalagnam |
yacchrīrvācāṃ janayati ratiṃ kiṃ nu mānaṃ kavīnāṃ |
dṛṣṭvā jiṣṇoryudhi rathagataṃ yacca tatsāmyamīyuḥ || 3 ||
[Analyze grammar]

śrī ṛṣiruvāca |
divi bhuvyantarikṣe ca mahotpātānsamutthitān |
dṛṣṭvāsīnānsudharmāyāṃ kṛṣṇaḥ prāha yadūnidam || 4 ||
[Analyze grammar]

śrībhagavānuvāca |
ete ghorā mahotpātā dvārvatyāṃ yamaketavaḥ |
muhūrtamapi na stheyamatra no yadupuṅgavāḥ || 5 ||
[Analyze grammar]

striyo bālāśca vṛddhāśca śaṅkhoddhāraṃ vrajantvitaḥ |
vayaṃ prabhāsaṃ yāsyāmo yatra pratyaksarasvatī || 6 ||
[Analyze grammar]

tatrābhiṣicya śucaya upoṣya susamāhitāḥ |
devatāḥ pūjayiṣyāmaḥ snapanālepanārhaṇaiḥ || 7 ||
[Analyze grammar]

brāhmaṇāṃstu mahābhāgānkṛtasvastyayanā vayam |
gobhūhiraṇyavāsobhirgajāśvarathaveśmabhiḥ || 8 ||
[Analyze grammar]

vidhireṣa hyariṣṭaghno maṅgalāyanamuttamam |
devadvijagavāṃ pūjā bhūteṣu paramo bhavaḥ || 9 ||
[Analyze grammar]

iti sarve samākarṇya yaduvṛddhā madhudviṣaḥ |
tatheti naubhiruttīrya prabhāsaṃ prayayū rathaiḥ || 10 ||
[Analyze grammar]

tasminbhagavatādiṣṭaṃ yadudevena yādavāḥ |
cakruḥ paramayā bhaktyā sarvaśreyopabṛṃhitam || 11 ||
[Analyze grammar]

tatastasminmahāpānaṃ papurmaireyakaṃ madhu |
diṣṭavibhraṃśitadhiyo yaddravairbhraśyate matiḥ || 12 ||
[Analyze grammar]

mahāpānābhimattānāṃ vīrāṇāṃ dṛptacetasām |
kṛṣṇamāyāvimūḍhānāṃ saṅgharṣaḥ sumahānabhūt || 13 ||
[Analyze grammar]

yuyudhuḥ krodhasaṃrabdhā velāyāmātatāyinaḥ |
dhanurbhirasibhirbhallairgadābhistomararṣṭibhiḥ || 14 ||
[Analyze grammar]

patatpatākai rathakuñjarādibhiḥ kharoṣṭragobhirmahiṣairnarairapi |
mithaḥ sametyāśvataraiḥ sudurmadā nyahanśarairdadbhiriva dvipā vane || 15 ||
[Analyze grammar]

pradyumnasāmbau yudhi rūḍhamatsarāv |
akrūrabhojāvaniruddhasātyakī |
subhadra saṅgrāmajitau sudāruṇau |
gadau sumitrāsurathau samīyatuḥ || 16 ||
[Analyze grammar]

anye ca ye vai niśaṭholmukādayaḥ sahasrajicchatajidbhānumukhyāḥ |
anyonyamāsādya madāndhakāritā jaghnurmukundena vimohitā bhṛśam || 17 ||
[Analyze grammar]

dāśārhavṛṣṇyandhakabhojasātvatā |
madhvarbudā māthuraśūrasenāḥ |
visarjanāḥ kukurāḥ kuntayaśca |
mithastu jaghnuḥ suvisṛjya sauhṛdam || 18 ||
[Analyze grammar]

putrā ayudhyanpitṛbhirbhrātṛbhiśca |
svasrīyadauhitrapitṛvyamātulaiḥ |
mitrāṇi mitraiḥ suhṛdaḥ suhṛdbhir |
jñātīṃstvahanjñātaya eva mūḍhāḥ || 19 ||
[Analyze grammar]

śareṣu kṣīyamāṇeṣu bhajyamānesu dhanvasu |
śastreṣu kṣīyamāneṣu muṣṭibhirjahrurerakāḥ || 20 ||
[Analyze grammar]

tā vajrakalpā hyabhavanparighā muṣṭinā bhṛtāḥ |
jaghnurdviṣastaiḥ kṛṣṇena vāryamāṇāstu taṃ ca te || 21 ||
[Analyze grammar]

pratyanīkaṃ manyamānā balabhadraṃ ca mohitāḥ |
hantuṃ kṛtadhiyo rājannāpannā ātatāyinaḥ || 22 ||
[Analyze grammar]

atha tāvapi saṅkruddhāvudyamya kurunandana |
erakāmuṣṭiparighau carantau jaghnaturyudhi || 23 ||
[Analyze grammar]

brahmaśāpopasṛṣṭānāṃ kṛṣṇamāyāvṛtātmanām |
spardhākrodhaḥ kṣayaṃ ninye vaiṇavo'gniryathā vanam || 24 ||
[Analyze grammar]

evaṃ naṣṭeṣu sarveṣu kuleṣu sveṣu keśavaḥ |
avatārito bhuvo bhāra iti mene'vaśeṣitaḥ || 25 ||
[Analyze grammar]

rāmaḥ samudra velāyāṃ yogamāsthāya pauruṣam |
tatyāja lokaṃ mānuṣyaṃ saṃyojyātmānamātmani || 26 ||
[Analyze grammar]

rāmaniryāṇamālokya bhagavāndevakīsutaḥ |
niṣasāda dharopasthe tuṣṇīmāsādya pippalam || 27 ||
[Analyze grammar]

bibhraccaturbhujaṃ rūpaṃ bhrājiṣṇu prabhayā svayā |
diśo vitimirāḥ kurvanvidhūma iva pāvakaḥ || 28 ||
[Analyze grammar]

śrīvatsāṅkaṃ ghanaśyāmaṃ taptahāṭakavarcasam |
kauśeyāmbarayugmena parivītaṃ sumaṅgalam || 29 ||
[Analyze grammar]

sundarasmitavaktrābjaṃ nīlakuntalamaṇḍitam |
puṇḍarīkābhirāmākṣaṃ sphuranmakarakuṇḍalam || 30 ||
[Analyze grammar]

kaṭisūtrabrahmasūtra kirīṭakaṭakāṅgadaiḥ |
hāranūpuramudrābhiḥ kaustubhena virājitam || 31 ||
[Analyze grammar]

vanamālāparītāṅgaṃ mūrtimadbhirnijāyudhaiḥ |
kṛtvorau dakṣiṇe pādamāsīnaṃ paṅkajāruṇam || 32 ||
[Analyze grammar]

muṣalāvaśeṣāyaḥkhaṇḍa kṛteṣurlubdhako jarā |
mṛgāsyākāraṃ taccaraṇaṃ vivyādha mṛgaśaṅkayā || 33 ||
[Analyze grammar]

caturbhujaṃ taṃ puruṣaṃ dṛṣṭvā sa kṛtakilbiṣaḥ |
bhītaḥ papāta śirasā pādayorasuradviṣaḥ || 34 ||
[Analyze grammar]

ajānatā kṛtamidaṃ pāpena madhusūdana |
kṣantumarhasi pāpasya uttamaḥśloka me'nagha || 35 ||
[Analyze grammar]

yasyānusmaraṇaṃ nṛṇāmajñānadhvāntanāśanam |
vadanti tasya te viṣṇo mayāsādhu kṛtaṃ prabho || 36 ||
[Analyze grammar]

tanmā'śu jahi vaikuṇṭha pāpmānaṃ mṛgalubdhakam |
yathā punarahaṃ tvevaṃ na kuryāṃ sadatikramam || 37 ||
[Analyze grammar]

yasyātmayogaracitaṃ na vidurviriñco |
rudrādayo'sya tanayāḥ patayo girāṃ ye |
tvanmāyayā pihitadṛṣṭaya etadañjaḥ |
kiṃ tasya te vayamasadgatayo gṛṇīmaḥ || 38 ||
[Analyze grammar]

śrībhagavānuvāca |
mā bhairjare tvamuttiṣṭha kāma eṣa kṛto hi me |
yāhi tvaṃ madanujñātaḥ svargaṃ sukṛtināṃ padam || 39 ||
[Analyze grammar]

ityādiṣṭo bhagavatā kṛṣṇenecchāśarīriṇā |
triḥ parikramya taṃ natvā vimānena divaṃ yayau || 40 ||
[Analyze grammar]

dārukaḥ kṛṣṇapadavīmanvicchannadhigamya tām |
vāyuṃ tulasikāmodamāghrāyābhimukhaṃ yayau || 41 ||
[Analyze grammar]

taṃ tatra tigmadyubhirāyudhairvṛtaṃ |
hyaśvatthamūle kṛtaketanaṃ patim |
snehaplutātmā nipapāta pādayo |
rathādavaplutya sabāṣpalocanaḥ || 42 ||
[Analyze grammar]

apaśyatastvaccaraṇāmbujaṃ prabho dṛṣṭiḥ praṇaṣṭā tamasi praviṣṭā |
diśo na jāne na labhe ca śāntiṃ yathā niśāyāmuḍupe praṇaṣṭe || 43 ||
[Analyze grammar]

iti bruvati sūte vai ratho garuḍalāñchanaḥ |
khamutpapāta rājendra sāśvadhvaja udīkṣataḥ || 44 ||
[Analyze grammar]

tamanvagacchandivyāni viṣṇupraharaṇāni ca |
tenātivismitātmānaṃ sūtamāha janārdanaḥ || 45 ||
[Analyze grammar]

gaccha dvāravatīṃ sūta jñātīnāṃ nidhanaṃ mithaḥ |
saṅkarṣaṇasya niryāṇaṃ bandhubhyo brūhi maddaśām || 46 ||
[Analyze grammar]

dvārakāyāṃ ca na stheyaṃ bhavadbhiśca svabandhubhiḥ |
mayā tyaktāṃ yadupurīṃ samudraḥ plāvayiṣyati || 47 ||
[Analyze grammar]

svaṃ svaṃ parigrahaṃ sarve ādāya pitarau ca naḥ |
arjunenāvitāḥ sarva indra prasthaṃ gamiṣyatha || 48 ||
[Analyze grammar]

tvaṃ tu maddharmamāsthāya jñānaniṣṭha upekṣakaḥ |
manmāyāracitāmetāṃ vijñayopaśamaṃ vraja || 49 ||
[Analyze grammar]

ityuktastaṃ parikramya namaskṛtya punaḥ punaḥ |
tatpādau śīrṣṇyupādhāya durmanāḥ prayayau purīm || 50 ||
[Analyze grammar]