Chapter 72

[English text for this chapter is available]

rājasūyopakrame pāṇḍavānāṃ digvijayaḥ bhīmena jarāsaṃdha vadhaśca |
śrīśuka uvāca |
ekadā tu sabhāmadhya āsthito munibhirvṛtaḥ |
brāhmaṇaiḥ kṣatriyairvaiśyaiḥ bhrātṛbhiśca yudhiṣṭhiraḥ || 1 ||
[Analyze grammar]

ācāryaiḥ kulavṛddhaiśca jñātisaṃbandhibāndhavaiḥ |
śrṛṇvatāmeva caiteṣāṃ ābhāṣyedamuvāca ha || 2 ||
[Analyze grammar]

śrīyudhiṣṭhira uvāca |
kraturājena govinda rājasūyena pāvanīḥ |
yakṣye vibhūtīrbhavataḥ tatsaṃpādaya naḥ prabho || 3 ||
[Analyze grammar]

tvatpāduke avirataṃ pari ye caranti |
dhyāyantyabhadranaśane śucayo gṛṇanti |
vindanti te kamalanābha bhavāpavargam |
āśāsate yadi ta āśiṣa īśa nānye || 4 ||
[Analyze grammar]

taddevadeva bhavataścaraṇāravinda |
sevānubhāvamiha paśyatu loka eṣaḥ |
ye tvāṃ bhajanti na bhajantyuta vobhayeṣāṃ |
niṣṭhāṃ pradarśaya vibho kurusṛñjayānām || 5 ||
[Analyze grammar]

na brahmaṇaḥ svaparabhedamatistava syāt |
sarvātmanaḥ samadṛśaḥ svasukhānubhūteḥ |
saṃsevatāṃ surataroriva te prasādaḥ |
sevānurūpamudayo na viparyayo'tra || 6 ||
[Analyze grammar]

śrībhagavānuvāca |
samyag vyavasitaṃ rājan bhavatā śatrukarśana |
kalyāṇī yena te kīrtiḥ lokān anubhaviṣyati || 7 ||
[Analyze grammar]

ṛṣīṇāṃ pitṛdevānāṃ suhṛdāmapi naḥ prabho |
sarveṣāmapi bhūtānāṃ īpsitaḥ kraturāḍayam || 8 ||
[Analyze grammar]

vijitya nṛpatīn sarvān kṛtvā ca jagatīṃ vaśe |
sambhṛtya sarvasambhārān āharasva mahākratum || 9 ||
[Analyze grammar]

ete te bhrātaro rājan lokapālāṃśasaṃbhavāḥ |
jito'smyātmavatā te'haṃ durjayo yo'kṛtātmabhiḥ || 10 ||
[Analyze grammar]

na kaścinmatparaṃ loke tejasā yaśasā śriyā |
vibhūtibhirvābhibhaved devo'pi kimu pārthivaḥ || 11 ||
[Analyze grammar]

śrīśuka uvāca |
niśamya bhagavadgītaṃ prītaḥ phullamukhāmbujaḥ |
bhrātṝn digvijaye'yuṅkta viṣṇutejopabṛṃhitān || 12 ||
[Analyze grammar]

sahadevaṃ dakṣiṇasyāṃ ādiśat saha sṛñjayaiḥ |
diśi pratīcyāṃ nakulaṃ udīcyāṃ savyasācinam |
prācyāṃ vṛkodaraṃ matsyaiḥ kekayaiḥ saha madrakaiḥ || 13 ||
[Analyze grammar]

te vijitya nṛpān vīrā ājahrurdigbhya ojasā |
ajātaśatrave bhūri draviṇaṃ nṛpa yakṣyate || 14 ||
[Analyze grammar]

śrutvājitaṃ jarāsandhaṃ nṛpaterdhyāyato hariḥ |
āhopāyaṃ tamevādya uddhavo yamuvāca ha || 15 ||
[Analyze grammar]

bhīmaseno'rjunaḥ kṛṣṇo brahmaliṅgadharāstrayaḥ |
jagmurgirivrajaṃ tāta bṛhadrathasuto yataḥ || 16 ||
[Analyze grammar]

te gatvā'tithyavelāyāṃ gṛheṣu gṛhamedhinam |
brahmaṇyaṃ samayāceran rājanyā brahmaliṅginaḥ || 17 ||
[Analyze grammar]

rājan viddhyatithīn prāptān arthino dūramāgatān |
tannaḥ prayaccha bhadraṃ te yad vayaṃ kāmayāmahe || 18 ||
[Analyze grammar]

kiṃ durmarṣaṃ titikṣūṇāṃ kiṃ akāryaṃ asādhubhiḥ |
kiṃ na deyaṃ vadānyānāṃ kaḥ paraḥ samadarśinām || 19 ||
[Analyze grammar]

yo'nityena śarīreṇa satāṃ geyaṃ yaśo dhruvam |
nācinoti svayaṃ kalpaḥ sa vācyaḥ śocya eva saḥ || 20 ||
[Analyze grammar]

hariścandro rantideva uñchavṛttiḥ śibirbaliḥ |
vyādhaḥ kapoto bahavo hyadhruveṇa dhruvaṃ gatāḥ || 21 ||
[Analyze grammar]

śrīśuka uvāca |
svarairākṛtibhistāṃstu prakoṣṭhairjyāhatairapi |
rājanyabandhūn vijñāya dṛṣṭapūrvānacintayat || 22 ||
[Analyze grammar]

rājanyabandhavo hyete brahmaliṅgāni bibhrati |
dadāni bhikṣitaṃ tebhya ātmānamapi dustyajam || 23 ||
[Analyze grammar]

balernu śrūyate kīrtiḥ vitatā dikṣvakalmaṣā |
aiśvaryād bhraṃśitasyāpi vipravyājena viṣṇunā || 24 ||
[Analyze grammar]

śriyaṃ jihīrṣatendrasya viṣṇave dvijarūpiṇe |
jānannapi mahīṃ prādād vāryamāṇo'pi daityarāṭ || 25 ||
[Analyze grammar]

jīvatā brāhmaṇārthāya ko nvarthaḥ kṣatrabandhunā |
dehena patamānena nehatā vipulaṃ yaśaḥ || 26 ||
[Analyze grammar]

ityudāramatiḥ prāha kṛṣṇārjunavṛkodarān |
he viprā vriyatāṃ kāmo dadāmyātmaśiro'pi vaḥ || 27 ||
[Analyze grammar]

śrībhagavānuvāca |
yuddhaṃ no dehi rājendra dvandvaśo yadi manyase |
yuddhārthino vayaṃ prāptā rājanyā nānyakāṅkṣiṇaḥ || 28 ||
[Analyze grammar]

asau vṛkodaraḥ pārthaḥ tasya bhrātārjuno hyayam |
anayormātuleyaṃ māṃ kṛṣṇaṃ jānīhi te ripum || 29 ||
[Analyze grammar]

evamāvedito rājā jahāsoccaiḥ sma māgadhaḥ |
āha cāmarṣito mandā yuddhaṃ tarhi dadāmi vaḥ || 30 ||
[Analyze grammar]

na tvayā bhīruṇā yotsye yudhi viklavatejasā |
mathurāṃ svapurīṃ tyaktvā samudraṃ śaraṇaṃ gataḥ || 31 ||
[Analyze grammar]

ayaṃ tu vayasā tulyo nātisattvo na me samaḥ |
arjuno na bhaved yoddhā bhīmastulyabalo mama || 32 ||
[Analyze grammar]

ityuktvā bhīmasenāya prādāya mahatīṃ gadām |
dvitīyāṃ svayamādāya nirjagāma purād bahiḥ || 33 ||
[Analyze grammar]

tataḥ same khale vīrau saṃyuktāvitaretarau |
jaghnaturvajrakalpābhyāṃ gadābhyāṃ raṇadurmadau || 34 ||
[Analyze grammar]

maṇḍalāni vicitrāṇi savyaṃ dakṣiṇameva ca |
caratoḥ śuśubhe yuddhaṃ naṭayoriva raṅgiṇoḥ || 35 ||
[Analyze grammar]

tataścaṭacaṭāśabdo vajraniṣpeṣasannibhaḥ |
gadayoḥ kṣiptayo rājan dantayoriva dantinoḥ || 36 ||
[Analyze grammar]

te vai gade bhujajavena nipātyamāne |
anyonyatoṃ'sakaṭipādakarorujatrūn |
cūrṇībabhūvaturupetya yathārkaśākhe |
saṃyudhyatordviradayoriva dīptamanvyoḥ || 37 ||
[Analyze grammar]

itthaṃ tayoḥ prahatayorgadayornṛvīrau |
kruddhau svamuṣṭibhirayaḥsparaśairapiṣṭām |
śabdastayoḥ praharatoribhayorivāsīn |
nirghātavajraparuṣastalatāḍanotthaḥ || 38 ||
[Analyze grammar]

tayorevaṃ praharatoḥ samaśikṣābalaujasoḥ |
nirviśeṣamabhūd yuddhaṃ akṣīṇajavayornṛpa || 39 ||
[Analyze grammar]

evaṃ tayormahārāja yudhyatoḥ saptaviṃśatiḥ |
dināni niragaṃstatra suhṛdvan niśi tiṣṭhatoḥ || 40 ||
[Analyze grammar]

ekadā mātuleyaṃ vai prāha rājan vṛkodaraḥ |
na śakto'haṃ jarāsandhaṃ nirjetuṃ yudhi mādhava || 41 ||
[Analyze grammar]

śatrorjanmamṛtī vidvān jīvitaṃ ca jarākṛtam |
pārthamāpyāyayan svena tejasācintayaddhariḥ || 42 ||
[Analyze grammar]

sañcintyārivadhopāyaṃ bhīmasyāmoghadarśanaḥ |
darśayāmāsa viṭapaṃ pāṭayanniva saṃjñayā || 43 ||
[Analyze grammar]

tadvijñāya mahāsattvo bhīmaḥ praharatāṃ varaḥ |
gṛhītvā pādayoḥ śatruṃ pātayāmāsa bhūtale || 44 ||
[Analyze grammar]

ekaṃ pādaṃ padākramya dorbhyāmanyaṃ pragṛhya saḥ |
gudataḥ pāṭayāmāsa śākhamiva mahāgajaḥ || 45 ||
[Analyze grammar]

ekapādoruvṛṣaṇa kaṭipṛṣṭhastanāṃsake |
ekabāhvakṣibhrūkarṇe śakale dadṛśuḥ prajāḥ || 46 ||
[Analyze grammar]

hāhākāro mahānāsīt nihate magadheśvare |
pūjayāmāsaturbhīmaṃ parirabhya jayācyatau || 47 ||
[Analyze grammar]

sahadevaṃ tattanayaṃ bhagavānbhūtabhāvanaḥ |
abhyaṣiñcadameyātmā magadhānāṃ patiṃ prabhuḥ |
mocayāmāsa rājanyān saṃruddhā māgadhena ye || 48 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ daśamaskandhe uttarārdhe |
jarāsandha vadho nāma dvisaptatitamo'dhyāyaḥ || 72 ||
[Analyze grammar]