Chapter 18

[English text for this chapter is available]

maitreya uvāca |
tadevamākarṇya jaleśabhāṣitaṃ |
mahāmanāstad vigaṇayya durmadaḥ |
harerviditvā gatimaṅga nāradād |
rasātalaṃ nirviviśe tvarānvitaḥ || 1 ||
[Analyze grammar]

dadarśa tatrābhijitaṃ dharādharaṃ |
pronnīyamāna avaniṃ agradaṃṣṭrayā |
muṣṇantamakṣṇā svaruco'ruṇaśriyā |
jahāsa cāho vanagocaro mṛgaḥ || 2 ||
[Analyze grammar]

āhainamehyajña mahīṃ vimuñca no |
rasaukasāṃ viśvasṛjeyamarpitā |
na svasti yāsyasyanayā mamekṣataḥ |
surādhamāsāditasūkarākṛte || 3 ||
[Analyze grammar]

tvaṃ naḥ sapat‍naiḥ abhavāya kiṃ bhṛto |
yo māyayā hantyasurān parokṣajit |
tvāṃ yogamāyābalamalpapauruṣaṃ |
saṃsthāpya mūḍha pramṛje suhṛcchucaḥ || 4 ||
[Analyze grammar]

tvayi saṃsthite gadayā śīrṇaśīrṣaṇi |
asmad‍bhujacyutayā ye ca tubhyam |
baliṃ haranti ṛṣayo ye ca devāḥ |
svayaṃ sarve na bhaviṣyantyamūlāḥ || 5 ||
[Analyze grammar]

sa tudyamāno'riduruktatomaraiḥ |
daṃṣṭrāgragāṃ gāṃ upalakṣya bhītām |
todaṃ mṛṣan niragād ambumadhyād |
grāhāhataḥ sakareṇuryathebhaḥ || 6 ||
[Analyze grammar]

taṃ niḥsarantaṃ salilād anudruto |
hiraṇyakeśo dviradaṃ yathā jhaṣaḥ |
karāladaṃṣṭro'śaninisvano'bravīd |
gatahriyāṃ kiṃ tvasatāṃ vigarhitam || 7 ||
[Analyze grammar]

sa gāṃ udastāt salilasya gocare |
vinyasya tasyāṃ adadhāt svasattvam |
abhiṣṭuto viśvasṛjā prasūnaiḥ |
āpūryamāṇo vibudhaiḥ paśyato'reḥ || 8 ||
[Analyze grammar]

parānuṣaktaṃ tapanīyopakalpaṃ |
mahāgadaṃ kāñcanacitradaṃśam |
marmāṇyabhīkṣṇaṃ pratudantaṃ duruktaiḥ |
pracaṇḍamanyuḥ prahasan taṃ babhāṣe || 9 ||
[Analyze grammar]

śrībhagavānuvāca |
satyaṃ vayaṃ bho vanagocarā mṛgā |
yuṣmadvidhānmṛgaye grāmasiṃhān |
na mṛtyupāśaiḥ pratimuktasya vīrā |
vikatthanaṃ tava gṛhṇantyabhadra || 10 ||
[Analyze grammar]

ete vayaṃ nyāsaharā rasaukasāṃ |
gatahriyo gadayā drāvitāste |
tiṣṭhāmahe'thāpi kathañcidājau |
stheyaṃ kva yāmo balinotpādya vairam || 11 ||
[Analyze grammar]

tvaṃ padrathānāṃ kila yūthapādhipo |
ghaṭasva no'svastaya āśvanūhaḥ |
saṃsthāpya cāsmān pramṛjāśru svakānāṃ |
yaḥ svāṃ pratijñāṃ nātipipartyasabhyaḥ || 12 ||
[Analyze grammar]

maitreya uvāca |
so'dhikṣipto bhagavatā pralabdhaśca ruṣā bhṛśam |
ājahārolbaṇaṃ krodhaṃ krīḍyamāno'hirāḍiva || 13 ||
[Analyze grammar]

sṛjan amarṣitaḥ śvāsān manyupracalitendriyaḥ |
āsādya tarasā daityo gadayā nyahanad harim || 14 ||
[Analyze grammar]

bhagavān tu gadāvegaṃ visṛṣṭaṃ ripuṇorasi |
avañcayat tiraścīno yogārūḍha ivāntakam || 15 ||
[Analyze grammar]

punargadāṃ svāṃ ādāya bhrāmayantaṃ abhīkṣṇaśaḥ |
abhyadhāvad hariḥ kruddhaḥ saṃrambhād daṣṭadacchadam || 16 ||
[Analyze grammar]

tataśca gadayārātiṃ dakṣiṇasyāṃ bhruvi prabhuḥ |
ājaghne sa tu tāṃ saumya gadayā kovido'hanat || 17 ||
[Analyze grammar]

evaṃ gadābhyāṃ gurvībhyāṃ haryakṣo harireva ca |
jigīṣayā susaṃrabdhau anyonyaṃ abhijaghnatuḥ || 18 ||
[Analyze grammar]

tayoḥ spṛdhostigmagadāhatāṅgayoḥ |
kṣatāsravaghrāṇavivṛddhamanyvoḥ |
vicitramārgāṃścaratorjigīṣayā |
vyabhādilāyāmiva śuṣmiṇormṛdhaḥ || 19 ||
[Analyze grammar]

daityasya yajñāvayavasya māyā |
gṛhītavārāhatanormahātmanaḥ |
kauravya mahyāṃ dviṣatorvimardanaṃ |
didṛkṣurāgād ṛṣibhirvṛtaḥ svarāṭ || 20 ||
[Analyze grammar]

āsannaśauṇḍīramapetasādhvasaṃ |
kṛtapratīkāramahāryavikramam |
vilakṣya daityaṃ bhagavān sahasraṇīḥ |
jagāda nārāyaṇamādisūkaram || 21 ||
[Analyze grammar]

brahmovāca |
eṣa te deva devānāṃ aṅghrimūlamupeyuṣām |
viprāṇāṃ saurabheyīṇāṃ bhūtānāṃ api anāgasām || 22 ||
[Analyze grammar]

āgaskṛd bhayakṛd duṣkṛd asmad rāddhavaro'suraḥ |
anveṣan apratiratho lokān aṭati kaṇṭakaḥ || 23 ||
[Analyze grammar]

mainaṃ māyāvinaṃ dṛptaṃ niraṅkuśamasattamam |
ākrīḍa bālavaddeva yathā'śīviṣamutthitam || 24 ||
[Analyze grammar]

na yāvadeṣa vardheta svāṃ velāṃ prāpya dāruṇaḥ |
svāṃ deva māyāṃ āsthāya tāvat jahyaghamacyuta || 25 ||
[Analyze grammar]

eṣā ghoratamā sandhyā lokacchambaṭkarī prabho |
upasarpati sarvātman surāṇāṃ jayamāvaha || 26 ||
[Analyze grammar]

adhunaiṣo'bhijinnāma yogo mauhūrtiko hyagāt |
śivāya nastvaṃ suhṛdāṃ āśu nistara dustaram || 27 ||
[Analyze grammar]

diṣṭyā tvāṃ vihitaṃ mṛtyuṃ ayaṃ āsāditaḥ svayam |
vikramyainaṃ mṛdhe hatvā lokān ādhehi śarmaṇi || 28 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
tṛtīyaskandhe aṣṭādaśo'dhyāyaḥ || 18 ||
[Analyze grammar]