Appendix 4 - Yogabīja (select verses)

[Full title: Yogabīja: Select verses from Birch draft critical edition—3 February 2022]

8 anirvācya padaṃ vaktuṃ śakyate na surair api |
svātmaprakāśarūpaṃ tat kiṃ śāstreṇa prakāśyate ||
9 niṣkalaṃ nirmalaṃ śāntaṃ sarvātītaṃ nirāmayam |
tad eva jīvarūpeṇa puṇyapāpaphalair vṛtam ||
10 śrī devyuvāca paramātmapadaṃ nityaṃ tat kathaṃ jīvatāṃ gatam |
tattvātītaṃ mahādeva prasādāt kathayasva me ||
12 pañcātmakam abhūt piṇḍaṃ dhātūbaddhaguṇātmakam |
sukhaduḥkhaiḥ sadā yuktaṃ jīvabhāvanayākulam ||
13 tena jīvābhidhā proktā viśuddhe paramātmani |
kāmaḥ krodho bhayaṃ cintā lobho moho mado rujaḥ ||
14 jarā mṛtyuś ca kārpaṇyaṃ śokas tandrā kṣudhā tṛṣā |
dveṣo lajjā sukhaṃ duḥkhaṃ viṣādo harṣa eva ca ||
ebhir doṣair vinirmuktaḥ sa jīvaḥ śiva eva hi ||
16 tasmād doṣavināśārtham upāyaṃ kathayāmi te |
jñānaṃ ke cid vadanty atra kevalaṃ tan na siddhaye ||
17 yogahīnaṃ kathaṃ jñānaṃ mokṣadaṃ bhavat īśvari |
yogo'pi jñānahīnas tu na kṣamo mokṣakarmaṇi ||
18 devyuvāca ajñānād evo saṃsāro jñānād evo kim ucyate |
yogenaiva tu kiṃ kāryaṃ prasannagirayā vada ||
19 īśvara uvāca satyam etat tvayoktaṃ te kathayāmi sureśvari |
jñānasvarūpam evādau jñeyaṃ jñāne na sādhanam ||
20 ajñānaṃ kīdṛśaṃ ceti pravicāryaṃ vivekinā |
jñātaṃ yena nijaṃ rūpaṃ kaivalyaṃ paramaṃ śivam ||
21 asau doṣair vimuktaḥ kiṃ kāmakrodhabhayādibhiḥ |
sarva doṣair vṛto jīvo jñāne tu mucyate katham ||
22 devyuvāca svātmarūpaṃ yadā jñātaṃ pūrṇatvād vyāpakaṃ tadā |
kāmakrodhādi doṣaṇāṃ svarūpān nāsti bhinnatā ||
23 paścāt tasya vidhiḥ kiṃ ca niṣedho'pi kathaṃ bhavet |
vivekī sarvadā muktaḥ saṃsārabhramavarjitaḥ ||
24 īśvara uvāca paripūrṇasvarūpaṃ tat satyam etad varānane |
sakalaṃ niṣkalaṃ caiva pūrṇatvāc ca tad eva hi ||
25 kalanāsphūrtirūpeṇa saṃsārabhramatāṃ gatam |
niṣkalaṃ nirmalaṃ sākṣāt svarūpaṃ gaganopamam ||
26 utpattisthitisaṃhārasphūrtyajñānavivarjitam |
etad rūpaṃ samāyātaḥ sa kathaṃ mohasāgare ||
27 nimajjati varārohe tyaktvā vidyāṃ punaḥ punaḥ |
sukhaduḥkhādimoheṣu yathā saṃsāriṇāṃ sthitiḥ ||
28 tathā jñānī yadā tiṣṭhed vāsanāvāsitas tadā |
tayor nāsti viśeṣo'tra samā saṃsārabhāvanā ||
29 jñānaṃ ced īdṛśaṃ jātam ajñānaṃ kīdṛśaṃ punaḥ |
jñānaniṣṭho virakto'pi dharmajño vijitendriyaḥ |
vinā yogena devo'pi na mokṣaṃ labhate priye ||
30 devyuvāca anyat kiṃ cit paridhyeyaṃ jñānināṃ nāsti śaṅkara |
viraktātmaikaniṣṭhānāṃ kathaṃ mokṣo bhaven na tu ||
31 īśvara uvāca apakvāḥ paripakvāś ca dvividhā dehinaḥ smṛtāḥ |
apakvā yogahīnās tu pakvā yogena dehinaḥ ||
32 pakvaṃ yogāgninā deham ajaḍaṃ śokavarjitam |
jaḍaṃ tu pārthivaṃ jñeyam apakvaṃ duḥkhadaṃ bhavet ||
33 dhyānastho 'sau tathāpy evam indriyair vivaśo bhavet |
niyamya tāny ato gāḍhaṃ tathāpy anyaiḥ prabodhyate ||
34 śītoṣṇasukhaduḥkhādyair vyādibhir mānavais tathā |
anyair nānāvidhair jīvaiḥ śastrāgnijalamārutaiḥ |
śarīraṃ pīḍyate tais tu cittaṃ saṃkṣobhyate tataḥ ||
35 tathā prāṇavipattau tu kṣobham āyāti mārutaḥ |
tato duḥkhaśatair vyāptaṃ cittaṃ prakṣubhyate nṛṇām ||
39 ahaṃkṛtir yadā yasya naṣṭā bhavati tasya vai |
dehaṃ tu bhavate naṣṭaṃ vyādhayas tasya kiṃ punaḥ ||
40 jalāgniśastraghātādibādhā kasya bhaviṣyati |
yathā yathā parikṣīṇā puṣṭā cāhaṃkṛtir bhavet ||
41 tena mānena naśyanti pravartante rujādikāḥ |
kāraṇena vinā kāryaṃ na kadā cana vidyate |
ahaṃkāraṃ vinā tadvad dehe duḥkhaṃ kathaṃ bhavet ||
44 īśvara uvāca śarīreṇa jitāḥ sarve śarīraṃ yogibhir jitam |
tat kathaṃ kurute teṣāṃ sukhaduḥkhādikaṃ phalam ||
45 indriyāṇi mano buddhiḥ kāmakrodhādikaṃ jitam |
tenaiva vijitaṃ sarvaṃ nāsau kenāpi bādhyate ||
46 mahābhūtāni tattvāni saṃhṛtāni krameṇa ca |
saptadhātumayaṃ dehaṃ dagdhaṃ yogāgninā śanaiḥ ||
47 daivataiś ca na lakṣyeta yogadehaṃ mahābalaṃ |
bhedabandhair vinirmuktaṃ nānāśaktidharaṃ param ||
48 yathākāśaṃ tathā deham ākāśād api nirmalam |
sūkṣmāt sūkṣmatataraṃ dehaṃ sthūlāt sthūlaṃ jaḍāj jaḍam ||
49 icchārūpo hi yogīndraḥ svatantro hy ajarāmaraḥ |
krīḍate triṣu lokeṣu līlayā yatra kutra cit ǁ
50 acintyaśaktimān yogī nānārūpāṇi dhārayet |
saṃharec ca punas tāni svecchayā vijitendriyaḥ ||
51 maraṇaṃ tasya kiṃ devi pṛcchasīndusamānane |
nāsau maraṇam āpnoti punar yogabalena tu ||
52 puraiva mṛta evāsau mṛtasya maraṇaṃ kutaḥ |
maraṇaṃ yatra sarveṣāṃ tatra jīvaty^[1] asau sukhī ||
53 yatra jīvanti mūḍhās tu tatrāsau mriyate sadā |
kartavyaṃ tu na tasyāsti kṛtena na vilipyate |
jīvanmuktaḥ sadā svasthaḥ sarvadoṣavivarjitaḥ ||
54 viraktā jñāninaś cānye dehena vijitāḥ sadā |
te kathaṃ yogibhis tulyā māṃsapiṇḍāḥ kudehinaḥ ||
66 prāṇāpānasamāyogāc candrasūryaikyatā bhavet |
saptadhātumayaṃ deham agninā jarate dhruvam ||
67 vyādhayas tasya naśyanti chedaghātādikās tathā |
tathāsau paramākāśarūpo dehy avatiṣṭhate ||
68 kiṃ punar bahunoktena maraṇaṃ nāsti tasya vai |
dehīva dṛśyate loke dagdhakarpūravad yathā ||
70 nānavidhair vicārais tu na sādhyaṃ jāyate manaḥ |
tasmāt tasya jayopāyaḥ prāṇāyāmo hi nānyathā ||
80 evaṃ tu dvandvajālasya saṃyogo yoga ucyate |
adhunā saṃpravakṣyāmi yogābhyāsasya lakṣaṇam ||
81 marujjayo yasya siddhaḥ sevayet taṃ guruṃ sadā |
guruvakraprasādena kuryāt prāṇajayaṃ budhaḥ |
82 nirudhya mārutaṃ gāḍhaṃ śakticālanayuktitaḥ |
aṣṭadhākuṭilībhūtām ṛjvīṃ kuryāt tu kuṇḍalīm ||
83 etad eva paraṃ guyhaṃ kathitaṃ tu mayā tava |
vajrasanagato nitya māsārdhaṃ tu samabhyaset ||
84 vāyunā jvalito vahniḥ kuṇḍalīm dahate'niśaṃ |
saṃtaptā sāgninā jīvaśaktir trailokyamohinī ||
85 viśate vajradaṇḍe tu suṣumṇāvadanāntare |
vāyunā vahninā sārdhaṃ brahmagranthir vibhidhyate ||
86 viṣṇugranthiṃ tato bhittvā rudragranthau ca tiṣṭhati |
tatas tu kumbhayed gāḍhaṃ pūrayitvā punaḥ punaḥ ||
87 bhidyante granthayo vaṃśe taptalohaśalākayā |
tathaiva pṛṣṭhavaṃśe tu granthibhedas tu vāyunā ||
88 pipīlikā yatra lagnā kaṇḍūs tatra pravartate |
suṣumṇāyām tathābhyāsāt satataṃ vāyunā bhavet ||
89 rudragranthiṃ tato bhittvā padaṃ yāti śivātmakam |
sandrasuryau samau kṛtvā tatra yogaḥ pravartate ||
90 guṇatrayādatīto'sau granthitrayavibhedanāt |
śivaśaktisamāyogāj jāyate paramā sthitaḥ ||
suṣumṇā vakranālena pavanaṃ grasate sadā ||
93 mokṣamārge prasiddhā sā suṣumṇā viśvadhāriṇī |
yatra vai nirjitaḥ kālaś candrasuryanibandhanāt ||
96 recake kṣīṇatāṃ yāte pūrakaṃ poṣayet [*śoṣayet] sadā |
sa eva nāthasaṅketaḥ siddhasaṅketalakṣaṇaḥ ||
97ab guruprasādān marutaḥ susādhanaṃ tenaiva cittaṃ pavanena sādhitam |
101 anenābhyāsayogena nityam āsanabandhataḥ |
cittaṃ vilīnatām eti bindur no yāty adhas tathā ||
104 kathitaṃ tu tava prītyā etad abhyāsalakṣaṇam |
mantro haṭho layo rājā yoge'ntarbhūmikāḥ kramāt |
eka eva caturdhāyaṃ mahāyogo'bhidhīyate ||
108cd haṭhena grasyate jāḍyaṃ haṭhayogaḥ sa ucyate^[2] ||
109 jāḍyagrāsaṃ samādāya cittaṃ yāti vilīnatām |
pavanaḥ sthairyam āyāti layayogodaye sati ||
116 yogasiddhiṃ vinā dehaḥ pramādān naśyate yadā |
pūrvavāsanayā yuktaḥ śarīraṃ cānyad āpnuyāt ||
122 abhyāsasya phalaṃ devi kathayāmy adhunā sphuṭam |
ādau rāgāḥ praṇaśyanti paścāj jāḍyaṃ śarīrajam ||
123 tataḥ samarasībhūtvā candro varṣaty anāratam |
dhātūṃś ca grasate vahniḥ pavanena samantataḥ ||
124 mahānādāḥ pravartante mārdavaṃ yāti dehakam |
jitvā pṛthvyādikaṃ jāḍyaṃ khecaraḥ bhavate naraḥ ||
125 sarvajño'sau bhavet kāmarūpaḥ pavanavegavān |
krīḍate triṣu lokeṣu jāyante siddhayo'khilāḥ ||
126 kapūre līyamāne kiṃ kāṭhinyaṃ tatra vidyate |
ahaṃkārakṣaye tadvad dehe kaṭhinatā kutaḥ ||
127 īśvaraḥ sarvakartā ca svatantro viśvarūpavān |
jīvanmukto mahāyogī jāyate nātra saṃśayaḥ ||
136 svayam eva prajāyante lābhālābhavivarjite |
yogamārge tathaivehaṃ siddhijālaṃ pravartate ||
137 parikṣakaiḥ varṇikābhir hema ity ucyate yathā |
siddhibhir lakṣayet siddhaṃ jīvanmuktiṃ tathaiva ca ||
139 siddhibhiḥ parihīnaṃ ca naraṃ baddhaṃ tu lakṣayet |
ajarāmarapiṇḍo yo jīvanmuktaḥ sa eva hi ||
140 śvānakukkuṭakīṭādyā mṛtiṃ samprāpnuvanti vai |
teṣāṃ kiṃ piṇḍapātena muktir bhavati sundari ||
141 na bahiḥ prāṇa āyāti piṇḍasya patanaṃ kutaḥ |
piṇḍapātena yā muktiḥ sā muktir na tu gaṇyate ||
142 dehaṃ brahmatvam āyāti jalatāṃ saindhavaṃ yathā |
ananyatāṃ yadāyāti tadā muktasya lakṣaṇam ||