Appendix 1 - Dattātreyayogaśāstra (select verses)

[Full title: Dattātreyayogaśāstra: Select verses from Mallinson draft critical edition—20 February 2024]

12 aṅgeṣu mātṛkānyāsapūrvaṃ mantraṃ japet sudhīḥ |
ekena cāpi siddhiḥ syān mantrayogaḥ sa ucyate ||
14 alpabuddhir imaṃ yogaṃ sevate sādhakādhamaḥ |
mantrayogo hy ayaṃ prokto yogānām adhamaḥ smṛtaḥ ||
15 layayogaś cittalayāt saṃketais tu prajāyate |
ādināthena saṃketāḥ sārdhakoṭiḥ prakīrtitāḥ ||
21 tiṣṭhan gacchan svapan bhuñjan dhyāyec chūnyam aharniśam |
ayam eko hi saṃketa ādināthena bhāṣitaḥ ||
22 nāsāgradṛṣṭhimātreṇa aparaḥ parikīrtitaḥ |
śiraḥpāścātyabhāgasya dhyānaṃ mṛtyuṃ jayo'paraḥ ||
23 bhrūmadhyadṛṣṭimātreṇa paraḥ saṃketa ucyate |
†līlā† vibhūtilepaś ca uttamaḥ parikīrtitaḥ ||
24 svasya dakṣiṇapādasya aṅguṣṭhe laya uttamaḥ |
uttānaśavavad bhūmau śayanaṃ cottamottamaḥ ||
25 śithilo nirjane deśe kuryāc cet siddham āpnuyāt |
evaṃ ca bahusaṃketān kathayām āsa śaṅkaraḥ ||
26 saṃketair bahubhiś cānyair yaś cittasya layo bhavet |
sa eva layayogaḥ syād haṭhayogam ataḥ śṛṇu ||
33 laghvāhāras tu teṣv eko mukhyo bhavati nāpare |
ahiṃsā niyameṣv ekā mukhyā bhavati sāmkṛte ||
41 brāhmaṇaḥ śramaṇo vāpi bauddho vāpy ārhato'pi vā |
kāpāliko vā cārvākaḥ śraddhayā sahitaḥ sudhīḥ ||
42 yogābhyāsarato nityaṃ sarvasiddhim avāpnuyāt |
kriyāyuktasya siddhiḥ syād akriyasya kathaṃ bhavet ||
43 na śāstrapāthamātreṇa yogasiddhiḥ prajāyate |
muṇḍito daṇḍadhārī vā kāṣāyavasano'pi vā ||
44 nārāyaṇavado vāpi jaṭilo bhasmalepanaḥ |
namaḥśivāyavākyo vā bāhyārcāpujako'pi vā ||
45 sthānadvādaśapuṇḍro vā mālābhir bahubhūṣitaḥ |
kriyāvihīno vā krūraḥ kathaṃ siddhim avāpnuyāt ||
46 na veṣadhāraṇaṃ siddheḥ kāraṇaṃ na ca tatkathā |
kriyaiva kāraṇaṃ siddheḥ satyam eva tu sāṃkṛte ||
47 śiśnodarārthaṃ yogasya kathayā veṣadhāriṇaḥ |
anuṣṭhānavihīnās tu vañcayanti janān kila ||
60 tato dakṣiṇahastasya aṅguṣṭhena ca piṅgalām |
nirudhya pūrayed vāyum iḍayā ca śanaiḥ sudhīḥ ||
68cd śarīralaghutā dīptir jaṭharāgnivivardhanam ||
69 kṛśatvaṃ ca śarīrasya tadā jāyeta niścitam |
tadā varjyāni vakṣyāmi yogavighnakarāṇi tu ||
70 lavaṇaṃ sarṣapaś cāmlam uṣṇaṃ rūkṣaṃ ca tīkṣṇakam |
atīva bhojanaṃ tyājyaṃ strīsaṃgaṃ gamanaṃ bahu ||
71ab agnisevā tu saṃtyajyā dhūrtagoṣṭhīś ca saṃtyajet |
83cd kandarpasya yathā rūpaṃ tathā tasyāpi yoginaḥ |
84 tasmin kāle mahāvighno yoginaḥ syāt pramādataḥ |
tadrūpavaśagā nāryaḥ kāṃkṣante tasya saṃgamam ||
85 yadi saṅgaṃ karoty evaṃ bindus tasya vinaśyati |
āyuḥkṣayo bindunāśād asāmarthyaṃ ca jāyate ||
86 tasmāt strīṇāṃ saṅgavarjaṃ kuryād abhyāsam ādarāt |
yogino'ṅge sugandhiḥ syāt satataṃ bindudhāraṇāt ||
87ab tasmāt sarvaprayatnena bindū rakṣyo hi yoginā |
94 indriyāṇīndriyārthebhyo yat pratyāharati sphuṭam |
yogī kumbhakam āsthāya pratyāhāraḥ sa ucyate ||
95 yad yat paśyati cakṣurbhyāṃ tat tad ātmeti bhāvayet |
yad yaj jighrati nāsābhyāṃ tat tad ātmeti bhāvayet ||
96 jihvayā yad rasayati tat tad ātmeti bhāvayet |
tvacā yad yat saṃspṛśati tat tad ātmeti bhāvayet ||
97 evaṃ jñānendriyāṇāṃ tu tat tat saṃkhyān tu sādhayet |
yāmamātraṃ pratidinaṃ yogī yatnād atandritaḥ ||
108 vāyuḥ paricito yatnād agninā saha kuṇḍalīm |
bodhayitvā suṣumnāyāṃ praviśed anirodhataḥ ||
109 vāyunā saha cittaṃ ca praviśec ca mahāpatham |
mahāpathaṃ śmaśānaṃ ca suṣumnāpy ekam eva hi ||
110 nāmnā matāntare bhedaḥ phalabhedo na vidyate |
vartamānaṃ bhaviṣyaṃ ca bhūtārthaṃ cāpi vetty asau ||
111 yasya cittaṃ sapavanaṃ suṣumnāṃ praviśed iha |
bhāvyān anarthān vijñāya yogī rahasi yatnataḥ ||
112 pañcadhā dhāraṇaṃ kuryāt tat tad bhūtabhayāpaham |
pṛthivīdhāraṇaṃ vakṣye pārthivebhyo bhayāvaham ||
121 tato dṛḍhaśarīraḥ syān mṛtyus tasya na vidyate |
ity evaṃ pañcabhūtānāṃ dhāraṇāṃ yaḥ samabhyaset ||
122ab brahmaṇaḥ pralaye vāpi mṛtyus tasya na vidyate |
125cd vāyuṃ nirudhya medhāvī jīvanmukto bhaved dhruvam ||
126 samādhiḥ samatāvasthā jīvātmaparamātmanoḥ |
yadi svadeham utsraṣṭum icchā ced utsṛjet svayam ||
127 parabrahmāni līyeta tyaktvā karma śubhāśubham |
atha no cet samutsraṣṭuṃ svaśarīraṃ yadi priyam ||
128 sarvalokeṣu vicared aṇimādiguṇānvitaḥ |
kadā cit svecchayā devo bhūtvā svarge'pi saṃcaret ||
129 manuṣyo vāpi yakṣo vā svecchayā hi kṣaṇād bhavet |
siṃho vyāghro gajo vā syād icchayā jantutāṃ vrajet ||
130ab yatheṣṭam evaṃ vartate yogī vidvān maheśvaraḥ ||
146cd nityam abhyāsayuktasya jaṭharāgnivivardhate |
147 āhāro bahulas tasya saṃpādyaḥ sāṃkṛte dhruvam |
alpāhāro yadi bhavet agnir dehaṃ dahet kṣaṇāt ||
150cd atha vajrolīlakṣaṇam
vajrolīṃ kathayiṣyāmi gopitāṃ sarvayogibhiḥ |
151 atīvaitad rahasyaṃ hi na deyaṃ yasya kasya cit |
svaprāṇais tu samo yaḥ syāt tasyaiva kathayed dhruvam ||
152 svecchayā vartamāno'pi yogokta niyamair vinā |
vajroliṃ yo vijānāti sa yogī siddhibhājanaḥ ||
153 tatra vastudvayaṃ vakṣye durlabhaṃ yena kena cit |
labhyate yadi tasyaiva yogasiddhiḥ kare sthitā ||
154 kṣīraṃ caikaṃ dvitīyaṃ tu nārī ca vaśavartinī |
na saṃbhaved yadi kṣīraṃ tattulyaṃ kathayāmi te ||
155 pibed āṅgīrasaṃ kiṃ cid yadi kṣīraṃ na labhyate |
sāṃkṛtir uvāca āṅgīrasākhyaṃ kiṃ vastu bhagavan kathayasva me ||
156 dattātreyaḥ strīṇām āṅgirasaṃ yonau iḍāpānāt tu jāyate |
tat pibet puruṣo'bhyāsī yadi kṣīraṃ na labhyate ||
157 tathāpi tat kṣīraguṇaṃ kiṃcinmātram api dhruvam |
nārīdhatuṃ punaḥ kośe pibed ādarato bhṛṣam ||
158 kṣīrābhāve tadrasaṃ tu kṣīratulyaṃ bhaved dhruvam |
abhyāsaṃ śṛṇu vajrolyā vakṣyāmy atirahasyakam ||
159 sukhāni labhate nārī siddhiṃ ca puruṣo yathā |
nārīṃ ramyām adhaḥ sthāpya rahasye tu digaṃbarāṃ ||
160 svayaṃ digambaro bhutvā uttānāyās tathopari |
śayānaḥ kuṃbhakaṃ kuryāt kiṃcin namraḥ svayaṃ bahiḥ |
161 anynoyaṃ dṛḍham āliṅgya yonau śiśnaṃ na cārpayet |
mithaś cādharapānaṃ ca kuryād galaravādikam ||
162 viluṭhec ca sukhenaiva yāvat prasvedasaṃbhavaḥ |
yadi skhaled bahir vīryaṃ tataḥ svedena mardayet ||
163 jīrṇavastreṇa saṃmārjya tad vastraṃ rakṣayed budhaḥ |
yadi bindur na skhalati niṣṭhuraṃ tu yabhet bahiḥ ||
164 yonau śiśṇaṃ tu nārpyeta yāvad bindur bahiḥ patet |
evaṃ tu tridinaṃ kuryād ekaikaṃ vāram eva ca ||
165 tatas tu śaranālena phūtkāraṃ vajrakandare |
śanaiḥ śanaiḥ prakurvīta vāyusaṃcārakāraṇāt ||
166 tad bhage patitaṃ bindum abhyāsenordhvam āharet |
calitaṃ ca tathā bindum ūrdhvam ākṛṣya rakṣayet ||
167 evaṃ ca rakṣito bindur mṛtyuṃ jayati tattvataḥ |
maraṇaṃ bindupātena jīvanaṃ bindudhāraṇāt ||
168 sindūrasadṛśaṃ yonau strīṇām asti navaṃ rajaḥ |
tatrāvrato'py ayaṃ gacchet tad ābhyāsena rakṣayet ||
169 vajrolīm abhyasen nārī rajo rakṣārtham eva ca |
yadi nārī rajo rakṣed vajrolyā sā hi yoginī ||
170 atītānāgataṃ vetti khecarī vā bhaved dhruvam |
dehasiddhiṃ ca labhate vajrolyabhyāsayogataḥ ||
171 abhyāsasya kramaṃ vakṣye nārīṇāṃ ca śanaiḥ śanaiḥ |
yabhayen niṣṭhuraṃ puṃsāṃ bahiḥ śiśnena kevalam |
172 rajaḥ pūrita vīryaṃ taṃ †śiśnavīryaṃ† samāharet |
liṅgaṃ karābhyām ākuñcya maṇimātraṃ praveśayet ||
173 yāvan maṇipraveśaḥ syāt tāvad abhyāsam ācaret |
tataḥ paraṃ samarthā syād ūrdhvam ākuñcayed rajaḥ ||
174 tasyās tadā rajo nāśaṃ na gacchati na saṃśayaḥ |
tasyāḥ śarīre nādas tu bindu tām eva gacchati ||
175 sa bindus tad rajaś caiva ekībhūya svadehagau |
vajrolyābhyāsayogena sarvasiddhiḥ prajāyate ||
176 ayaṃ yogaḥ puṇyavatāṃ dhanyānāṃ tattvaśalinām |
nirmitsarāṇāṃ sidhyeta na tu mātsaryaśālinām ||
177 lajjāṃ vihāya varttavyo yogābhyāsas tu īdṛśaḥ |
iṣṭaiś ca puruṣaiḥ sārdham athavā yogavedibhiḥ ||
178 yo vettīmaṃ yogaśāstrāṃ sandhīm tena sahācaret |
ajñātayogaśāstreṇa vajrolīṃ strī tu nābhyaset ||
179 sarveṣām api yogānām ayaṃ yogaḥ sukhaṃkaraḥ |
tasmād ayaṃ vakṣyamāṇo bhoge bhukte'pi muktidaḥ ||
180 tasmāt puṇyavatām eva ayaṃ yogaḥ prasidhyati |
amarīṃ yaḥ piben nityaṃ nasyaṃ kurvan dine dine ||
181 vajrolīm abhyasec ceyam amarolīti kathyate |
pūrvoktajīrṇavastraṃ tu prakṣipec ca mite jale ||
182 tajjale bhasma saṃkṣipya dagdhagomayasaṃbhavam |
vajrolīmaithunād ūrdhvaṃ strīpuṃsor aṅgalepanam ||
183 āsīnayoḥ sukhenaiva muktavyāparayoḥ kṣaṇam |
sahajolīr iyaṃ proktā śraddheyā yogabhiḥ sadā ||
184 etaiḥ sarvair tu kathitair abhyaset kālakālataḥ |
tato bhaved rājayogo nāntarā bhavati dhruvam ||
185 na diṅmātreṇa siddhiḥ syāt abhyāsenaiva jāyate |
rājayogapadaṃ prāpya sarvasattvavaśaṃkaram ||
186 sarvaṃ kuryān na vā kuryād yathā ruciviceṣṭitam |
yadā tu rājayogena niṣpannā yoginaḥ kriyā ||
193 yaḥ saṃsmṛtyā munīnām api duritaharo yogasiddhipradaś ca
kāruṇyād yaḥ pravaktā sukhahṛdayahṛto yogaśāstrasya nāthaḥ |
tasyāhaṃ bhaktiśunyo'py akhilajanaguror bhakticintāmaṇer hi
dattātreyasya viṣṇoḥ padanalinayugaṃ nityam eva prapadye ||