Yoga Vasistha [sanskrit]

223,437 words | ISBN-10: 8171101519

The Sanskrit edition of the Yoga-vasistha including English translation and grammatical analysis. The Yogavasistha is a Hindu spiritual text written by Valmiki (who also authored the Ramayana) dealing with the philosophical topics from the Advaita-vedanta school. Chronologically it precedes the Ramayana.

Chapter XXIX

śrīvālmīkiruvāca |
ityākarṇayati svasthasamacetasi rāghave |
viśrānte svātmani svairaṃ paramānandamāgate || 2 ||
[Analyze grammar]

tatrastheṣu ca sarveṣu teṣūpaśamaśāliṣu |
rāghavasyātmaviśrānteḥ sthityarthaṃ vacanāmṛtam || 2 ||
[Analyze grammar]

virarāma munervāri sasyeṣvambudharādiva |
atha yāte muhūrtārdhe rāghave pratibodhite || 3 ||
[Analyze grammar]

punarāha tamevārthaṃ vasiṣṭho vadatāṃ varaḥ |
śrīvasiṣṭha uvāca |
rāma samyakprabuddho'si svātmānamasi labdhavān || 4 ||
[Analyze grammar]

evamevāvalambyārthaṃ tiṣṭha neha padaṃ kṛthāḥ |
idaṃ saṃsāracakraṃ hi nābhau saṃkalpamātrake || 5 ||
[Analyze grammar]

saṃrodhitāyāṃ vahanādraghunandana ruddhyate |
kṣobhitāyāṃ manonābhyāmidaṃ saṃsāracakrakam || 6 ||
[Analyze grammar]

prayatnādrodhitamapi pravahatyeva vegataḥ |
paraṃ pauruṣamāsthāya balaṃ prajñāṃ ca yuktitaḥ || 7 ||
[Analyze grammar]

nābhiṃ saṃsāracakrasya cittameva nirodhayet |
prajñāsaujanyayuktena śāstrasaṃvalitena ca || 8 ||
[Analyze grammar]

pauruṣeṇa na yatprāptaṃ na tatkvacana labhyate |
daivaikaparatāṃ tyaktvā bālabodhopakalpitām || 9 ||
[Analyze grammar]

nijaṃ prayatnamāśritya cittamādau nirodhayet |
āviriñcātpravṛttena bhrameṇājñānarūpiṇā || 10 ||
[Analyze grammar]

asadeva sadābhāsamidamālakṣyate'nagha |
ajñānabhramavistāramātrakākṛtayo'nagha || 11 ||
[Analyze grammar]

ime dehā bhramantīha sarvadharmātsamutthitāḥ |
saṃkalpaḥ punarastveva dehasyārthe kadācana || 12 ||
[Analyze grammar]

sukhaduḥkhavicāritvaṃ na kāryaṃ rāma dhīmatā |
duḥkhamlānamukhaḥ kledī prasannātkledavarjitāt || 13 ||
[Analyze grammar]

api citranarāddehanarastucchataraḥ smṛtaḥ |
ādhivyādhiparimlāne svayaṃ kledini nāśini || 14 ||
[Analyze grammar]

na tathā sthiratā dehe citrapuṃso yathā kila |
vināśito hi citrastho deho naśyati nānyathā || 15 ||
[Analyze grammar]

avaśyanāśo māṃsātmā svayaṃ deho vinaśyati |
pālitaḥ susthirāṃ śobhāmādatte citramānavaḥ || 16 ||
[Analyze grammar]

dehastu pālito'pyuccairnaśyatyeva na vardhate |
tena śreṣṭhaścitradeho nāyaṃ saṃkalpadehakaḥ || 17 ||
[Analyze grammar]

ye guṇāścitradehe hi na te saṃkalpadehake |
citradehādapi jaḍādyo'yaṃ tucchataraḥ kila || 18 ||
[Analyze grammar]

tasminmāṃsamaye dehe kaivāsthā bhavato'nagha |
dīrghasaṃkalpadeho'yaṃ tasminnāsthā mahāmate || 19 ||
[Analyze grammar]

svapnasaṃkalpajāddehādapi tucchataro hyayam |
alpasaṃkalpajo dīrghaiḥ sukhaduḥkhairna gṛhyate || 20 ||
[Analyze grammar]

dīrghasaṃkalpajaścāyaṃ dīrghaduḥkhena duḥkhitaḥ |
deho hi saṃkalpamayo nāyamasti na vāsti naḥ || 21 ||
[Analyze grammar]

kiṃ vyarthametadarthaṃ hi mūḍho'yaṃ kleśabhājanam |
yathā citramaye puṃsi kṣate kṣīṇe na tatkṣatiḥ || 22 ||
[Analyze grammar]

tathā saṃkalpapuruṣe kṣate kṣīṇe na tatkṣatiḥ |
yathā manorājyamaye kṣate kṣīṇe na tatkṣatiḥ || 23 ||
[Analyze grammar]

yathā dvitīye śaśini kṣate kṣīṇe na tatkṣatiḥ |
yathā svapnasamārambhe kṣate kṣīṇe na tatkṣatiḥ || 24 ||
[Analyze grammar]

yathā nadyātapajale kṣate kṣīṇe na tatkṣatiḥ |
saṃkalpamātraracite prakṛtyaiva ca nāśini || 25 ||
[Analyze grammar]

tathā śarīrayantre'sminkṣate kṣīṇe na tatkṣatiḥ |
dīrghasvapnamaye hyasmiṃścittasaṃkalpakalpite || 26 ||
[Analyze grammar]

bhūṣite dūṣite dehe na hi kiṃciccitaḥ kṣatam |
na cidantamupāyāti nātmā calati rāghava || 27 ||
[Analyze grammar]

na brahma vikṛtiṃ yāti kiṃvā dehakṣaye kṣatam |
bhramaccakropariṣṭho hi pūrvacakropacakravat || 28 ||
[Analyze grammar]

yathā paśyati dikcakraṃ bhramadatyantamohitaḥ |
akasmādeva ruḍhena mithyājñānena valgatā || 29 ||
[Analyze grammar]

tatrasthena tathaivedaṃ dṛśyate dehacakrakam |
bhramitaṃ ca bhramadūpaṃ patadrūpaṃ prapātitam || 30 ||
[Analyze grammar]

hataṃ ca hanyamānaṃ ca dṛśyate dehacakrakam |
dhīratāmalamālambya ghanabhramamimaṃ tyajet || 31 ||
[Analyze grammar]

saṃkalpena kṛto deho mithyājñānena sannasan |
asatyena kṛtaṃ yasmānna tatsatyaṃ kadācana || 32 ||
[Analyze grammar]

asadabhyutthito deho rajjvāmiva bhujaṃgadhīḥ |
asatyāmeva satyāṃ ca karotyapi jagatkriyām || 33 ||
[Analyze grammar]

jaḍena rāma kriyate yanna tatkṛtamucyate |
kurvannapi tadā deho na kartā kvacideva hi || 34 ||
[Analyze grammar]

nirīho hi jaḍo deho nātmano'syābhivāñchitam |
kartā na kaścidevāto draṣṭā kevalamasya saḥ || 35 ||
[Analyze grammar]

yathā dīpo nivātasthaḥ svātmanyevāvatiṣṭhate |
sākṣivatsarvabhāveṣu tathā tiṣṭhejjagatsthitau || 36 ||
[Analyze grammar]

yathā divasakarmāṇi bhāskaraḥ svastha eva san |
karotyevamimāṃ rāma kuru pārthivasaṃsthitim || 37 ||
[Analyze grammar]

asminnasanmaye dehagṛhe śūnye samutthite |
sattāmupagate mithyābālakalpitayakṣavat || 38 ||
[Analyze grammar]

kuto'pyāgatya niḥsāraḥ sarvasajjanavarjitaḥ |
ahaṃkāraḥ kuvetālaḥ praviṣṭaścittanāmakaḥ || 39 ||
[Analyze grammar]

asya mā bhṛtyatāṃ gaccha tvamahaṃkāradurmateḥ |
asya bhṛtyatayā rāma nirayaḥ prāpyate phalam || 40 ||
[Analyze grammar]

svasaṃkalpavilāsena dehagehe durākṛtiḥ |
unmattacittavetālaḥ parivalgati līlayā || 41 ||
[Analyze grammar]

śūnyaṃ dehagṛhaṃ prāpya cittayakṣeṇa tatkṛtam |
bhītā yena mahānto'pi samādhiniyatāḥ sthitāḥ || 42 ||
[Analyze grammar]

cittavetālamudvāsya svaśarīrakamandirāt |
saṃsāraśūnyanagare na bibheti kadācana || 43 ||
[Analyze grammar]

cittabhūtābhibhūte'sminye śarīragṛhe ratāḥ |
citramadyāpi te kasmāddhaṭitā ātmavatsthitāḥ || 44 ||
[Analyze grammar]

graste cittapiśācena dehasadmani ye mṛtāḥ |
piśācasyeva yā buddhirnāpiśācasya rāghava || 41 ||
[Analyze grammar]

ahaṃkārabṛhadyakṣagṛhe dagdhaśarīrake |
viharannāsthayā sādho na tu vai tatkila sthiram || 46 ||
[Analyze grammar]

ahaṃkārānucaratāṃ tyaktvā vitatayā dhiyā |
ahaṃkārāsmṛtiṃ prāpya svātmaivāśvavalambyatām || 47 ||
[Analyze grammar]

ahaṃkārapiśācena grastā ye nirayaiṣiṇaḥ |
teṣāṃ mohamadāndhānāṃ na mitrāṇi na bāndhavāḥ || 48 ||
[Analyze grammar]

ahaṃkāropahatayā buddhyā yā kriyate kriyā |
viṣavallyā iva phalaṃ tasyāḥ syānmaraṇātmakam || 49 ||
[Analyze grammar]

vivekadhairyahīnena svāhaṃkāramahotsavaḥ |
mūrkheṇālambito yena naṣṭamevāśu viddhi tam || 50 ||
[Analyze grammar]

ahaṃkārapiśācena varākā ye vaśīkṛtāḥ |
ta ete narakāgnīnāṃ rāghavendhanatāṃ gatāḥ || 51 ||
[Analyze grammar]

ahaṃkārorago yasya parisphūrjati koṭare |
svadehapādapo'dhīrairacireṇa nipātyate || 52 ||
[Analyze grammar]

ahaṃkārapiśāco'smindehe tiṣṭhatu yātu vā |
tvamenamālokaya mā manasā mahatāṃ vara || 53 ||
[Analyze grammar]

avadhūto hyavajñātaścetasaiva tiraskṛtaḥ |
ahaṃkārapiśācaste neha kiṃcitkariṣyati || 54 ||
[Analyze grammar]

dehālaye sphuratyasmin rāma cittapiśācake |
asyānantavilāsasya kimivāgatamātmanaḥ || 55 ||
[Analyze grammar]

cittayakṣābhibhūtānāṃ yāḥ puṃsāṃ vitatāpadaḥ |
śakyante parisaṃkhyātuṃ na tā varṣaśatairapi || 56 ||
[Analyze grammar]

hā hā mṛto'smi dagdho'smītyetā vai duḥkhavṛttayaḥ |
ahaṃkārapiśācasya śaktayo'nyasya nānagha || 57 ||
[Analyze grammar]

sarvago'pi yathākāśaḥ saṃbandho neha kenacit |
sarvago'pi tathaivātmā nāhaṃkāreṇa saṃgataḥ || 58 ||
[Analyze grammar]

yatkaroti yadādatte dehayantramidaṃ calam |
vātarajjuyutaṃ rāma tadahaṃkāraceṣṭitam || 59 ||
[Analyze grammar]

vṛkṣotpattau yathā heturakartrapi kilāmbaram |
ātmasaṃsthastathehātmā cittaceṣṭāsu kāraṇam || 60 ||
[Analyze grammar]

ātmasaṃnidhimātreṇa sphuratyāttavapurmanaḥ |
dīpasaṃnidhimātreṇa kuḍyarūpamivāmalam || 61 ||
[Analyze grammar]

api viśliṣṭayo rāma nityamevātmacittayoḥ |
dyāvāpṛthivyoriva kaḥ saṃbandhaḥ prakaṭāndhayoḥ || 62 ||
[Analyze grammar]

capalaspandanerābhirātmaśaktibhirāvṛtam |
cittamātmeti maurkhyeṇa dṛśyate raghunandana || 63 ||
[Analyze grammar]

ātmā prakāśarūpo hi nityaḥ sarvagato vibhuḥ |
cittaṃ śaṭhamahaṃkāraṃ viddhi hārdaṃ bṛhattamaḥ || 64 ||
[Analyze grammar]

ātmāsi vastutastvaṃ hi sarvajño na mano bhṛśam |
dūre kuru manomohaṃ kimetenābhisaṃgataḥ || 65 ||
[Analyze grammar]

piśāco'pi mano rāma śūnyadehagṛhe sthitaḥ |
bhāvayatyeṣa duṣṭātmā maunamuttama saṃspṛśan || 66 ||
[Analyze grammar]

bhavapradamakalyāṇaṃ dhairyasarvasvahāriṇam |
manaḥpiśācamutsṛjya yo'si sa tvaṃ sthiro bhava || 67 ||
[Analyze grammar]

cittayakṣadṛḍhākrāntaṃ na śāstrāṇi na bāndhavāḥ |
śaknuvanti paritrātuṃ guravo na ca mānavam || 68 ||
[Analyze grammar]

saṃśāntacittavetālaṃ guruśāstrārthabāndhavāḥ |
śaknuvanti samuddhartuṃ svalpapaṅkānmṛgaṃ yathā || 69 ||
[Analyze grammar]

asmiñjagacchūnyapure sarvameva pradūṣitam |
dehagehaṃ pramattena cittayakṣeṇa valgatā || 70 ||
[Analyze grammar]

cittavetālavalitā samastā dehakhaṇḍajā |
iyaṃ jagadaraṇyānī śūnyā kasya na bhītaye || 71 ||
[Analyze grammar]

jagannagaryāmasyāṃ tu śāntacittapiśācakam |
dehagehaṃ katipayaiḥ sevyate sadbhireva yat || 72 ||
[Analyze grammar]

iha saṃśrūyate yā yā dik saiva raghunandana |
pramattamohavetālaiḥ pūrṇā dehaśmaśānakaiḥ || 73 ||
[Analyze grammar]

asyāṃ jagadaraṇyānyāṃ muhyantaṃ mugdhabālavat |
svayamārādhya dhairyāśamātmanātmānamuddharet || 74 ||
[Analyze grammar]

jagajjaradaraṇye'smiṃścaradbhūtamṛgavraje |
dhṛtiṃ tṛṇarasai rāma mā gaccha mṛgapotavat || 5 ||
[Analyze grammar]

asminmahītalāraṇye caranti mṛgapotakāḥ |
tvamajñānagajaṃ bhuktvā saiṃhīṃ vṛttimupāśraya || 76 ||
[Analyze grammar]

anye naramṛgā mugdhā jambūdvīpe svajaṅgale |
viharanti yathā rāma tathā mā viharānagha || 77 ||
[Analyze grammar]

atyalpakālaśiśire kardamālepadāyini |
na maṅktavyaṃ bandhurūpe mahiṣeṇeva palvale || 78 ||
[Analyze grammar]

bhogābhogā bahiṣkāryā āryasyānusaretpadam |
pravicārya mahārthaṃ svamekamātmānamāśrayet || 79 ||
[Analyze grammar]

apavitrasya tucchasya durbhagasya durākṛteḥ |
dehasyārthaṃ na maṅktavyaṃ cintācaṇḍī sudāruṇā || 80 ||
[Analyze grammar]

anyena racito deho yakṣeṇānyena saṃśritaḥ |
duḥkhamanyasya bhoktānyaścitreyaṃ maurkhyacakrikā || 81 ||
[Analyze grammar]

yathaikarūpā ghanatā dṛṣado'styātmanastathā |
sattāmātraikasāmānyāditarasyāpyasaṃbhavāt || 82 ||
[Analyze grammar]

yathopalasya ghanatā mānasādi tathātmanaḥ |
sattāmātrādabhinnatvādabhāvādasya saṃsthiteḥ || 83 ||
[Analyze grammar]

yathopalasyopalatā ghaṭasya ghaṭatā yathā |
sattāmātrādabhinnaiva mānasādi tathātmanaḥ || 84 ||
[Analyze grammar]

atremāmaparāṃ dṛṣṭiṃ mahāmohavināśinīm |
śṛṇu yā kathitā pūrvaṃ mama kailāsakandare || 85 ||
[Analyze grammar]

saṃsāraduḥkhaśāntyarthaṃ devenārdhendumaulinā |
astīndukarasaṃbhārabhāsuraḥ pārago divaḥ || 86 ||
[Analyze grammar]

kailāso nāma śailendro gaurīramaṇamandiram |
tatrāste bhagavāndevo haraścandrakalādharaḥ || 87 ||
[Analyze grammar]

taṃ pūjayanmahādevaṃ tasminneva girau purā |
kadācidavasaṃ gaṅgātaṭe viracitāśramaḥ || 88 ||
[Analyze grammar]

taporthaṃ tāpasācāre cirāya racitasthitiḥ |
siddhasaṃghātavalitaḥ kṛtaśāstrārthasaṃgrahaḥ || 89 ||
[Analyze grammar]

puṣpārthaṃ syūtapuṭikaḥ pustakavyūhasaṃgrahī |
evaṃguṇaviśiṣṭasya kailāsavanakuñjake || 90 ||
[Analyze grammar]

tapaḥ pracarato rāma mama kālo'tyavartata |
athaikadā kadācittu bahulasyāṣṭame dine || 91 ||
[Analyze grammar]

gate śrāvaṇapakṣasya rātryagre kṣayamāgate |
dikṣu saṃśāntarūpāsu kāṣṭhamaunasthitāsviva || 92 ||
[Analyze grammar]

khaḍgacchedyāndhakāreṣu kuñjeṣu gahaneṣu ca |
etasminnantare tatra yāmārdhe prathame gate || 93 ||
[Analyze grammar]

samādhiṃ tanutāṃ nītvā sthitohaṃ bāhyamagnadṛk |
apaśyaṃ kānane tejo jhaṭityeva samutthitam || 94 ||
[Analyze grammar]

śubhrābhraśatasaṃkāśaṃ candrabimbagaṇopamam |
prakaṭīkṛtadikkuñja tadālokya mayā smayāt || 95 ||
[Analyze grammar]

antaḥprakāśaśālinyā bahirdṛṣṭyāvalokitam |
yāvatpaśyāmi taṃ sānuṃ prāptaścandrakalādharaḥ || 96 ||
[Analyze grammar]

gaurīkarārpitakaro nandiprotsāritāgragaḥ |
śiṣyānsaṃbodhya tatrasthāngṛhītvārghyaṃ susaṃyataḥ || 97 ||
[Analyze grammar]

agamaṃ sumanāstasya dṛṣṭipūtamahaṃ puraḥ |
tatra puṣpāñjaliṃ dattvā dūrādeva trilocanaḥ || 98 ||
[Analyze grammar]

dattārghyeṇa mayā devaḥ saṃpraṇamyābhivanditaḥ |
tataścandraprabhāsakhyā ṛjvyā śītalayā tayā || 99 ||
[Analyze grammar]

dṛśā sarvārtihāriṇyā ciramasmyāspadīkṛtaḥ |
puṣpasānūpaviṣṭāya tasmai trailokyasākṣiṇe || 1 ||
[Analyze grammar]

arghyaṃ puṣpaṃ tathā pādyamabhyupetyārpitaṃ mayā |
mandārapuṣpāñjalayo vikīrṇā bahavaḥ puraḥ || 101 ||
[Analyze grammar]

nānāvidhernamaskāraiḥ stotraiścābhyarcitaḥ śivaḥ |
tato bhagavatī gaurī tādṛśyaiva saparyayā || 102 ||
[Analyze grammar]

saṃpūjitā sakhīyuktā gaṇamaṇḍalikā tathā |
pūjānte pūrṇaśītāṃśuraśmiśītalayā girā || 103 ||
[Analyze grammar]

tatropaviṣṭaṃ provāca māmardhendukalādharaḥ |
brahmanpraśamaśālinyaḥ prāptaviśrāntayaḥ pade || 104 ||
[Analyze grammar]

kaccitkalyāṇakāriṇyaḥ saṃvidaste sthitāḥ pare |
kaccittapaste nirvighnaṃ kalyāṇamanuvartate || 105 ||
[Analyze grammar]

kaccitprāpyamanuprāptaṃ kaccicchāmyanti bhītayaḥ |
evaṃvādini deveśe sarvalokaikakāriṇi || 106 ||
[Analyze grammar]

girānunayaśālinyā mayoktaṃ raghunandana |
tryakṣānusmṛtikalyāṇavatāmiha maheśvara || 107 ||
[Analyze grammar]

na kiṃcidapi duṣprāpaṃ na ca kāścana bhītayaḥ |
tvadanusmaraṇānandaparighūrṇitacetasām || 108 ||
[Analyze grammar]

na te santi jagatkośe praṇamanti na ye punaḥ |
te deśāste janapadāstā diśaste ca parvatāḥ || 109 ||
[Analyze grammar]

tvadanusmaraṇaikāntadhiyo yatra sthitā janāḥ |
phalaṃ bhūtasya puṇyasya vartamānasya secanam || 110 ||
[Analyze grammar]

tanoti caiṣyato bījaṃ tvadanusmaraṇaṃ prabho |
jñānāmṛtaikakalaśo dhṛtijyotsnāniśākaraḥ || 111 ||
[Analyze grammar]

apavargapuradvāraṃ tvadanusmaraṇaṃ prabho |
tvadanusmaraṇodāracintāmaṇimatā mayā || 112 ||
[Analyze grammar]

sarvāsāmāpadāṃ mūrdhni dattaṃ bhūtapate padam |
ityuktvā suprasannaṃ taṃ bhagavantaṃ maheśvaram || 113 ||
[Analyze grammar]

avocaṃ praṇato bhūtvā yadrāma tadidaṃ śṛṇu |
bhagavaṃstvatprasādena pūrṇā me sakalā diśaḥ || 114 ||
[Analyze grammar]

kiṃtu pṛcchāmi deveśa saṃdehe tatra nirṇayam |
brūhi prasannayā buddhyā tyaktodvegamanāmayam || 115 ||
[Analyze grammar]

sarvapāpakṣayakaraṃ sarvakalyāṇavardhanam |
devārcanavidhānaṃ tatkīdṛśaṃ bhavati prabho || 116 ||
[Analyze grammar]

īśvara uvāca |
śṛṇu brahmavidāṃ śreṣṭha devārcanamanuttamam |
vadāmi mucyate yena kṛtena sakṛdeva hi || 117 ||
[Analyze grammar]

kaccidvetsi mahābāho devaḥ kaḥ syāditi dvija |
na devaḥ puṇḍarīkākṣo na ca devastrilocanaḥ || 118 ||
[Analyze grammar]

na devaḥ kamalodbhūto na devastridaśeśvaraḥ |
na devaḥ pavano nārko nānalo na niśākaraḥ || 119 ||
[Analyze grammar]

na brāhmaṇo nā'vanipo nāhaṃ na tvaṃ dvijottama |
na devo deharūpo hi na devaścittarūpadhṛk || 120 ||
[Analyze grammar]

na devaḥ kamalārūpī nāpi devo bhavenmatiḥ |
akṛtrimamanādyantaṃ devanaṃ deva ucyate || 121 ||
[Analyze grammar]

ākārādiparicchinne mite vastuni tatkutaḥ |
akṛtrimamanādyantaṃ devanaṃ cicchivaṃ viduḥ || 122 ||
[Analyze grammar]

tadeva devaśabdena kathyate tatprapūjayet |
tadevāsti yataḥ sarvaṃ sattāsattātmarūpadhṛk || 123 ||
[Analyze grammar]

ajñātaśivatattvānāmākārādyarcanaṃ kṛtam |
yojanādhvanyaśaktasya krośādhvā parikalpyate || 124 ||
[Analyze grammar]

iyattādiparicchinnaṃ rudrādeḥ prāpyate phalam |
akṛtrimamanādyantaṃ phalamānanda ātmanaḥ || 125 ||
[Analyze grammar]

akṛtrimaphalaṃ tyaktvā yaḥ kṛtrimaphalaṃ vrajet |
tyaktvā sa mandāravanaṃ kārañjaṃ yāti kānanam || 126 ||
[Analyze grammar]

bodhaḥ sāmyaṃ śama iti puṣpāṇyagrāṇi tatra ca |
śivaṃ cinmātramamalaṃ pūjyaṃ pūjyavido viduḥ || 127 ||
[Analyze grammar]

śamabodhādibhiḥ puṣpairdeva ātmā yadarcyate |
tattu devārcanaṃ viddhi nākārārcanamarcanam || 128 ||
[Analyze grammar]

ātmasaṃvittirūpaṃ tu tyaktvā devārcanaṃ janāḥ |
kṛtrimārcāsu ye saktāściraṃ kleśaṃ bhajanti te || 129 ||
[Analyze grammar]

jñātajñeyā hi ye santo bālakrīḍopamaṃ ca te |
ātmadhyānādṛte brahmankurvanto devapūjanam || 130 ||
[Analyze grammar]

ātmaiva devo bhagavāñchivaḥ paramakāraṇam |
jñānārcanenāvirataṃ pūjanīyaḥ sa sarvadā || 131 ||
[Analyze grammar]

tvametaccetanākāśamātmānaṃ jīvamavyayam |
svabhāvaṃ viddhi na tvanyaḥ pūjyaḥ pūjātmapūjanam || 132 ||
[Analyze grammar]

śrīvasiṣṭha uvāca |
cetanākāśamātrātma yathā jagadidaṃ prabho |
yathā taccetanasyaiva jīvāditvaṃ taducyatām || 133 ||
[Analyze grammar]

īśvara uvāca |
cidvyomaiva kilāstīha pārāvāravivarjitam |
sarvatrāsaṃbhavaccetyaṃ yatkalpānte'vaśiṣyate || 134 ||
[Analyze grammar]

yadyatsvayaṃ prakacati tasya svakacanasya tu |
svayaṃ yatspanditaṃ nāma tenedaṃ jagadityalam || 135 ||
[Analyze grammar]

ityevaṃ svapnapuravajjagadbhāti cidātmakam |
evaṃ cidvyomamātrātma jagadacchaṃ na bhittimat || 136 ||
[Analyze grammar]

atyantāsaṃbhavāccetyaṃ dṛśyaṃ cidvyomamātrakam |
cittvātkacati sargādau yattajjagaditi smṛtam || 137 ||
[Analyze grammar]

tasmātsvapnapurākāraṃ yadidaṃ bhāsate jagat |
tatra cidvyomamātrātmanyanyatā nāma kā kutaḥ || 138 ||
[Analyze grammar]

cinmātrameva girayaścinmātraṃ jagadambaram |
cinmātramātmā jīvaśca cinmātraṃ bhūtasaṃtatiḥ || 139 ||
[Analyze grammar]

cidvyomamātrāditaratsargādau sarvavedane |
bhinnasvarge pure vāpi kiṃ saṃbhavati kathyatām || 140 ||
[Analyze grammar]

ākāśaṃ paramākāśaṃ brahmākāśaṃ jagaccitiḥ |
iti paryāyanāmāni tatra pādapavṛkṣavat || 141 ||
[Analyze grammar]

evaṃ dvau svapnasaṃkalpamāyābhiḥ svanubhūyate |
tadā kila cidākāśameva bhāti jagattayā || 142 ||
[Analyze grammar]

yathaitatsaṃvidākāśaṃ svapne bhāti jagadvapuḥ |
tathedaṃ jāgradākhye'pi svapne bhāti tadeva naḥ || 143 ||
[Analyze grammar]

yathā svapnapure citkhaṃ varjayitvetaratkvacit |
na kiṃcitsaṃbhavatyevaṃ jāgratyevaṃ mahācitaḥ || 144 ||
[Analyze grammar]

yato na saṃbhavatyanyaccetyaṃ kiṃcittato'khilam |
cittaṃ saṃcetyamapyetadacetyaṃ sajjagatsthitam || 145 ||
[Analyze grammar]

paramākāśakalanaṃ trijagatsvayamutthitam |
svapnavadviddhi cidvyomni na tvetaddvaitavatsthitam || 146 ||
[Analyze grammar]

yathā cidvyomamātrātma svapne ghaṭapaṭādikam |
sargādāveva sargo'yaṃ tathā cidvyomamātrakam || 147 ||
[Analyze grammar]

śuddhasaṃvittimātratvādṛte'nyatsvapnapattane |
yathā na vidyate kiṃcittathāsminbhuvanatraye || 148 ||
[Analyze grammar]

yāḥ kāścana dṛśo ye ye bhāvābhāvāstrikālagāḥ |
sadeśakālacittāstatsarvaṃ cidvyomamātrakam || 149 ||
[Analyze grammar]

sa eṣa devaḥ kathito yaḥ paraḥ paramārthataḥ |
yastvaṃ so'hamaśeṣaṃ vā jagadeva ca yo'khilaḥ || 150 ||
[Analyze grammar]

sarvasya vastujātasya jagato'nyasya te mama |
deho hi cetanākāśe paramātmaiva netarat || 151 ||
[Analyze grammar]

saṃkalpane svapnapure śarīraṃ cidvyomato'nyanna yathāsti kiṃcit |
tatheha sarge prathamaikarsagānmune prabhṛtyasti na rūpamanyat || 152 ||
[Analyze grammar]

Other print editions:

Also see the following print editions of the Sanskrit text or (alternative) English translations of the Yoga Vasistha Chapter XXIX

Cover of edition (1891)

Yoga Vasistha English (four volumes)
by Vihari-Lala Mitra (1891)

Buy now!
Cover of Gujarati edition

Yoga Vasistha Maha Ramayana (Gujarati)
by Sahitya Sangam, Allahabad (0)

[યોગ વસિષ્ઠએ] 9788192776460.

Buy now!
Cover of edition (2019)

Vasishtha Rama Samvadam (Telugu)
by Ramakrishna Math, Hyderabad (2019)

Set of 4 Volumes; 9789383972142.

Buy now!
Cover of edition (2009)

The Yogavasistha (Hindi translation)
by Khemraj Shrikrishnadass (2009)

Set of 2 Volumes; Khemraj Edition.

Buy now!
Like what you read? Consider supporting this website: