Chapter XII

śrīvasiṣṭha uvāca |
iti niścayavantaste mahānto vigatainasaḥ |
satyāḥ satye pade śānte same sukhamavasthitāḥ || 1 ||
[Analyze grammar]

iti pūrṇadhiyo dhīrāḥ samanīrāgacetasaḥ |
na nindanti na nandanti jīvitaṃ maraṇaṃ tathā || 2 ||
[Analyze grammar]

ityalakṣyacamatkārā nārāyaṇabhujā iva |
ṛjavaḥ skhalitākārā aparā iva meravaḥ || 3 ||
[Analyze grammar]

remire vanakhaṇḍeṣu dvīpeṣu nagareṣu ca |
devopavanamālāsu svargeṣu ca surā iva || 4 ||
[Analyze grammar]

bhremuḥ kusumapūrṇāsu dolāndolacalāsu ca |
vicitravanalekhāsu meruśrṛṅgaśikhāsu ca || 5 ||
[Analyze grammar]

cakrurvijitaśatrūṇi cāmaracchatravanti ca |
vicitrārthāni rājyāni citrācāramayāni ca || 6 ||
[Analyze grammar]

anujagmurimānsarvānnānācāraviceṣṭitān |
śrutismṛtyuditārambhāmitikartavyatāmiti || 7 ||
[Analyze grammar]

īdṛśīramaṇīyeṣu lalanāhāsyahāriṣu |
vihārāhāraramyeṣu bhogābhogeṣu bhūṣitāḥ || 8 ||
[Analyze grammar]

viviśuścārucūtāsu mandāravalitāsu ca |
apsarogītapūrṇāsu nandanodyānabhūmiṣu || 9 ||
[Analyze grammar]

sacarācarabhūteṣu viśrāntākhilajantuṣu |
yajñakriyākalāpeṣu gārhasthyeṣu yathākramam || 10 ||
[Analyze grammar]

terurhatagajendrāsu bhrāntabhūriśivāsu ca |
bherībhāṃkārabhīmāsu saṃgrāmārṇavavīthiṣu || 11 ||
[Analyze grammar]

tasthuḥ paruṣacittāsu hṛtavittoddhatāsu ca |
saṃrambhakṣobharaudrīṣu sarvāsu dvandvarītiṣu || 12 ||
[Analyze grammar]

manasteṣāṃ tu nīrāgamanupādhi gatabhramam |
asaktaṃ muktamāśāntaṃ paraṃ satvapadaṃ gatam || 13 ||
[Analyze grammar]

na mamajjuḥ kvacidapi saṃkaṭeṣu mahatsvapi |
mahadapyupayāteṣu kulaśalāḥ sarassviva || 14 ||
[Analyze grammar]

nollalāsa vilāsinyā śriyā paramakāntayā |
paripūrṇendulakṣmyeva jalarāśī raghūdvaha || 15 ||
[Analyze grammar]

na mamlau duḥkhaśokena grīṣmeṇeva vanasthalam |
jaharṣa ca na bhogaughairavaśyāyairivauṣadhīḥ || 16 ||
[Analyze grammar]

te hi kevalamavyagrāḥ kurvantaḥ kāmamañjarīḥ |
iṣṭāniṣṭaphalaṃ rāma nābhileṣurna tatyajuḥ || 17 ||
[Analyze grammar]

nodaguḥ kāryasaṃpattāvākrāntā nāstamāyayuḥ |
jahṛṣurna sukhaprāptau mamlurnaiva ca saṃkaṭe || 18 ||
[Analyze grammar]

mumuhurna vimoheṣu na mamajjurvipatkramaiḥ |
na jaharṣuḥ śubhaiḥ śokai rurudurna bhavāniva || 19 ||
[Analyze grammar]

prākṛtācārasaṃprāpte kurvantaḥ karma kevalam |
sthitā vigatasaṃrambhamaparā iva meravaḥ || 20 ||
[Analyze grammar]

tāṃ tvaṃ dṛṣṭimavaṣṭabhya rāghavā'ghavināśinīm |
anahaṃkṛtyahaṃkāro viharasva yathākramam || 21 ||
[Analyze grammar]

yathābhūtāmimāmeva paśyatsargaparamparām |
merusthito'bdhigambhīraḥ samamāssva gatabhramaḥ || 22 ||
[Analyze grammar]

cinmātraṃ sarvamevedamitthamābhāsatāṃ gatam |
neha satyamasatyaṃ vā kvacidasti na kiṃcana || 23 ||
[Analyze grammar]

mahattāmalamālambya tyaktvedamavahelayā |
asaktabuddhiḥ sarvatra bhava bhavya bhavakṣayī || 24 ||
[Analyze grammar]

kiṃ rodiṣi ghanodvegaṃ mūḍhavaccānuśocasi |
bhramasyudbhāntacittaśca saumyāvarte tṛṇaṃ yathā || 25 ||
[Analyze grammar]

śrīrāma uvāca |
aho na bhagavannūnaṃ samyagjātamalakṣayaḥ |
tvatprasādātprabuddho'smi sūryasaṅgādivāmbujam || 26 ||
[Analyze grammar]

bhrāntirastaṃ gatā nūnaṃ mihikā śaradīva me |
saṃśāntākhilasaṃdehaḥ kariṣye vacanaṃ tava || 27 ||
[Analyze grammar]

vyapagatamadamoho mānamātsaryamukta ścirataramuditātmā śāntaśokaścireṇa |
punarasukhamagacchansvacchayaikāntabuddhyā yadiha vadasi sādho tatkariṣye'viśaṅkaṃ || 28 ||
[Analyze grammar]