Chapter XI

śrīvasiṣṭha uvāca |
punaḥpunaridaṃ rāma prabodhārthaṃ mayocyate |
abhyāsena vinā sādho nābhyudetyātmabhāvanā || 1 ||
[Analyze grammar]

ajñānametadbalavadavidyetaranāmakam |
janmāntarasahasrotthaṃ ghanaṃ sthitimupāgatam || 2 ||
[Analyze grammar]

sabāhyābhyantaraṃ sarvairindriyairanubhūyate |
bhāvābhāveṣu dehasya tenātighanatāṃ gatam || 3 ||
[Analyze grammar]

ātmajñānaṃ tu sarveṣāmindriyāṇāmagocaram |
sattāṃ kevalamāyāti manaḥṣaṣṭhendriyakṣaye || 4 ||
[Analyze grammar]

prollaṅghayendriyajāṃ vṛttiṃ yatsthitaṃ tatkathaṃ kila |
yāti pratyakṣatāṃ jantoḥ pratyakṣātītavṛttimat || 5 ||
[Analyze grammar]

tvamavidyālatāmetāṃ prarūḍhāṃ hṛdayadrume |
jñānābhyāsavilāsāsipātaiśchindhi svasiddhaye || 6 ||
[Analyze grammar]

yathā viharati jñātajñeyo janakabhūpatiḥ |
ātmajñānābhyāsaparastathā vihara rāghava || 7 ||
[Analyze grammar]

niścayo'yamabhūttasya kāryākāryavihāriṇaḥ |
jāgratastiṣṭhato vāpi tajjñānāṃ tena satyatā || 8 ||
[Analyze grammar]

niścayena hariryena vividhācārakāriṇā |
yoniṣvavataratyurvyāṃ tattajjñatvamudāhṛtam || 9 ||
[Analyze grammar]

niścayo yastrinetrasya kāntayā saha tiṣṭhataḥ |
brahmaṇo vāpyarāgasya sa te bhavatu rāghava || 10 ||
[Analyze grammar]

yo niścayaḥ suragurorvākpaterbhārgavasya ca |
divākarasya śaśinaḥ pavanasyānalasya ca || 11 ||
[Analyze grammar]

nāradasya pulastyasya mama cāṅgirasastathā |
pracetaso bhṛgoścaiva kratoratreḥ śukasya ca || 12 ||
[Analyze grammar]

anyeṣāmeva viprendra rājarṣīṇāṃ ca rāghava |
yo niścayo vimuktānāṃ jīvatāṃ te bhavatvasau || 13 ||
[Analyze grammar]

śrīrāma uvāca |
yenaite bhagavandhīrā niścayena mahādhiyaḥ |
viśokāḥ saṃsthitāstanme brahmanprabrūhi tattvataḥ || 14 ||
[Analyze grammar]

śrīvasiṣṭha uvāca |
rājaputra mahābāho viditākhilavedya he |
sphuṭaṃ śrṛṇu yathā pṛṣṭamayameṣāṃ hi niścayaḥ || 15 ||
[Analyze grammar]

yadidaṃ kiṃcidābhogi jagajjālaṃ pradṛśyate |
tatsarvamamalaṃ brahma bhavatyetadvyavasthitam || 16 ||
[Analyze grammar]

brahma cidbrahma bhuvanaṃ brahma bhūtaparamparāḥ |
brahmāhaṃ brahma macchatrurbrahma sanmitrabāndhavāḥ || 17 ||
[Analyze grammar]

brahma kālatrayaṃ tacca brahmaṇyeva vyavasthitam |
taraṅgamālayāmbhodhiryathātmani vivardhate || 18 ||
[Analyze grammar]

tathā padārthalakṣmyetthamidaṃ brahma vivardhate |
gṛhyate brahmaṇā brahma bhujyate brahma brahmaṇā || 19 ||
[Analyze grammar]

brahma brahmaṇi bṛṃhābhirbrahmaśaktyeva bṛṃhati |
brahma macchatrurūpaṃ me brahmaṇo'priyakṛdyadi || 20 ||
[Analyze grammar]

tadbrahmaṇi brahmaniṣṭhaṃ kimanyatkasyacitkṛtam |
rāgādīnāmavasthānaṃ kalpitānāṃ khavṛkṣavat || 21 ||
[Analyze grammar]

asaṃkalpena naṣṭānāṃ kaḥ prasaṅgo'tra vardhate |
brahmaṇyeva hi sarvasmiṃścaraṇaspandanādikam || 22 ||
[Analyze grammar]

sphurati brahma sakalaṃ sukhitāduḥkhite kutaḥ |
brahma brahmaṇi saṃtṛptaṃ brahma brahmaṇi saṃsthitam || 23 ||
[Analyze grammar]

sphurati brahmaṇi brahma nāhamasmītarātmakaḥ |
ghaṭo brahma paṭo brahma brahmāhamidamātatam || 24 ||
[Analyze grammar]

ato rāgavirāgāṇāṃ mṛṣeva kalaneha kā |
maraṇabrahmaṇi svairaṃ dehabrahmaṇi saṃgate || 25 ||
[Analyze grammar]

duḥkhitānāma kaiva syādrajjusarpabhramopamā |
saṃbhogādau sukhaṃ brahmaṇyāsthite dehabrahmaṇi || 26 ||
[Analyze grammar]

saṃpannametanma iti mudhā syātkalanā kutaḥ |
vīcyambhasoḥ spandavatorna tvanyadambuno yathā || 27 ||
[Analyze grammar]

tvattāmatte tathā na sto brahmaṇi spandarūpiṇi |
yathāvartamṛte toye na kiṃcinmriyate kvacit || 28 ||
[Analyze grammar]

mṛtibrahmatvamāyāte dehabrahmaṇi vai tathā |
yathā calācale toye tvattāmatte na tiṣṭhataḥ || 29 ||
[Analyze grammar]

tathā jaḍājaḍe rūpe na sthite paramātmani |
kaṭakatvaṃ yathā hemno yathāvarto jalasya ca || 30 ||
[Analyze grammar]

tadatadbhāvarūpeyaṃ tathā prakṛtirātmanaḥ |
idaṃ hi jīvabhūtātma jaḍarūpamidaṃ bhavet || 31 ||
[Analyze grammar]

ityajñānātmano moho naca jñānātmanaḥ kvacit |
ajñasya duḥkhaughamayaṃ jñasyānandamayaṃ jagat || 32 ||
[Analyze grammar]

andhaṃ bhuvanamandhasya prakāśaṃ tu sacakṣuṣaḥ |
jagadekātmakaṃ jñasya mūrkhasyātīva duḥkhadam || 33 ||
[Analyze grammar]

śiśoriva sphuradyakṣā niśā puṃsastu kevalā |
asminbrahmaghaṭe nityamekasminsarvataḥ sthite || 34 ||
[Analyze grammar]

na kiṃcinmriyate nāma na ca kiṃcana jīvati |
yathollāsavilāseṣu na naśyati na jāyate || 35 ||
[Analyze grammar]

taraṅgādimahāmbhodhau bhūtavṛndaṃ tathātmani |
idaṃ nāstīdamastīti bhrāntirnāmātmanātmani || 36 ||
[Analyze grammar]

śaktirnirhetukaivāntaḥ sphurati sphaṭikāṃśuvat |
jagacchaktyātmanātmaiva brahma svātmani saṃsthitam || 37 ||
[Analyze grammar]

taraṅgakaṇajālena payasīva payo ghanam |
śarīranāśena kathaṃ brahmaṇo mṛtadhīrbhavet || 38 ||
[Analyze grammar]

brahmaṇo vyatiriktaṃ hi na śarīrādi vidyate |
payaso vyatirekeṇa taraṅgādi mahārṇave || 39 ||
[Analyze grammar]

yaḥ kaṇo yā ca kaṇikā yā vīciryastaraṅgakaḥ |
yaḥ pheno yā ca laharī tadyathā vāri vāriṇi || 40 ||
[Analyze grammar]

yo deho yā ca kalanā yaddṛśyaṃ yau kṣayākṣayau |
yā bhāvaracanā yo'rthastayā tadbrahma brahmaṇi || 41 ||
[Analyze grammar]

saṃsthānaracanā citrā brahmaṇaḥ kanakādiva |
nānyarūpā vimūḍhānāṃ mṛṣaiva dvitvabhāvanā || 42 ||
[Analyze grammar]

mano buddhirahaṃkārastanmātrāṇīndriyāṇi ca |
brahmaiva sarvaṃ nānātma sukhaṃ duḥkhaṃ na vidyate || 43 ||
[Analyze grammar]

ayaṃ so'hamidaṃ cittamityādyarthotthayā girā |
śabdapratiśraveṇādrāvivātmātmani jṛmbhate || 44 ||
[Analyze grammar]

brahmaivājñātamajñatvamabhyāgatamiva sthitam |
tathā hi dṛśyate svapne cetasātmātmanātmanaḥ || 45 ||
[Analyze grammar]

abhāvitaṃ brahmatayā brahmājñānamalaṃ bhavet |
abhāvitaṃ hematayā yathā hema ca mṛdbhavet || 46 ||
[Analyze grammar]

svayaṃ prabhurmahātmaiva brahma brahmavido viduḥ |
aparijñātamajñānamajñānāmiti kathyate || 47 ||
[Analyze grammar]

jñātaṃ brahmatayā brahma brahmaiva bhavati kṣaṇāt |
jñātaṃ hematayā hema hemaiva bhavati kṣaṇāt || 48 ||
[Analyze grammar]

brahmātmā sarvaśaktirhi tadyathā bhāvayatyalam |
nirhetukaḥ svayaṃ śaktyā tattathāśu prapaśyati || 49 ||
[Analyze grammar]

akarmakartṛkaraṇamakāraṇamanāmayam |
svayaṃprabhuṃ mahātmānaṃ brahma brahmavido viduḥ || 50 ||
[Analyze grammar]

aparijñātamajñānāmajñānamiti kathyate |
parijñātaṃ bhavejjñānamajñānaparināśanam || 51 ||
[Analyze grammar]

bandhurevāparijñāto hyabandhuriti kathyate parijñāto bhavedbandhurabandhubhramanāśanāt || 52 ||
[Analyze grammar]

idaṃ tvayuktamityantarjñāte sodeti bhāvanā |
yasmādayuktādvairasyādyayā kila virajyate || 93 ||
[Analyze grammar]

dvaitaṃ tvasatyamityantarjñāte sodeti bhāvanā |
tasmādvaitācca vairasyādyayā kila virajyate || 54 ||
[Analyze grammar]

ayaṃ nāhamiti jñāte sphuṭe sodeti bhāvanā |
mithyāhaṃkāratā tasmādyayā nūnaṃ virajyate || 55 ||
[Analyze grammar]

brahmaivāhamiti jñāne satye sodeti bhāvanā |
tasminsatye nije rūpe yathāntaḥ parilīyate || 56 ||
[Analyze grammar]

sati vistāraje tasminbrahmedamiti vedmyaham |
tvamahaṃtvādibādhe tatsadityādi jagadgatam || 57 ||
[Analyze grammar]

satyaṃ sarvaprakārāḍhyaṃ brahmedamiti vedmyaham |
na me duḥkhaṃ na karmāṇi na me moho na vāñchitam || 58 ||
[Analyze grammar]

samaḥ svastho viśoko'smi brahmāhamiti satyatā |
kalākalaṅkamukto'smi sarvamasmi nirāmayaḥ || 59 ||
[Analyze grammar]

na tyajāmi na vāñchāmi brahmāhamiti satyatā |
ahaṃ raktamahaṃ māṃsamahamasthīnyahaṃ vapuḥ || 60 ||
[Analyze grammar]

cidahaṃ cetanaṃ cāhaṃ brahmāhamiti satyatā |
dyaurahaṃ khamahaṃ sārkamahamāśā bhuvo'pyaham || 61 ||
[Analyze grammar]

ahaṃ ghaṭapaṭākāro brahmāhamiti satyatā |
ahaṃ tṛṇamahaṃ corvī gulmo'haṃ kānanādyaham || 62 ||
[Analyze grammar]

śailasāgarasārtho'haṃ brahmaikatvaṃ kila sthitam |
ādānadānasaṃkocapūrvikā bhūtaśaktayaḥ || 63 ||
[Analyze grammar]

sarvameva cidātmāsmi brahmaṇyātatarūpadhṛk |
latāgulmāṅkurādīnāmahaṃsaṃbhavanaiṣiṇām || 64 ||
[Analyze grammar]

cidātmāntargataṃ śāntaṃ paraṃ brahma rasātmakam |
yasminsarvaṃ yataḥ sarvaṃ yatsarvaṃ sarvataśca yat || 65 ||
[Analyze grammar]

yo mataḥ sarva ekātmā paraṃ brahmeti niścayaḥ |
cidātmā brahma satsatyamṛtaṃ jña iti nāmabhiḥ || 66 ||
[Analyze grammar]

procyate sarvagaṃ tattvaṃ cinmātraṃ cetyavarjitam |
ābhāsamātramamalaṃ sarvabhūtātmabodhakam || 67 ||
[Analyze grammar]

sarvatrāvasthitaṃ śāntaṃ cidbrahmetyanubhūyate |
manobuddhīndriyavrātasamastakalanānvitam || 68 ||
[Analyze grammar]

bhedaṃ tyaktvā svamābhāsaṃ cidbrahmāhamanāmayam |
śabdādīnāmaśeṣāṇāṃ kāraṇānāṃ jagatsthiteḥ || 69 ||
[Analyze grammar]

tattvāvakāśakaṃ svacchaṃ cidbrahmāsmi na me kṣayaḥ |
anāratagalatsvacchaciddhārāgahanātmakam || 70 ||
[Analyze grammar]

ālokaḥ sumanomaunaṃ cidbrahmāsmyamṛtaṃ param |
anāratagaladrūpaṃ nityaṃ cānubhavāmṛtam || 71 ||
[Analyze grammar]

ahaniḥśeṣacakrāṇi cidbrahmāhamalepakam |
suṣuptasadṛśaṃ śāntamālokavimalātmakam || 72 ||
[Analyze grammar]

saṃbhogottamamābhāsaṃ cidbrahmāsmyapavāsanam |
khaṇḍādisvādusaṃvittirīṣanmātrā tu tiṣṭhati || 73 ||
[Analyze grammar]

cittādiṣvavabuddheṣu taddhi brahmāhamacyutaḥ |
kāntāsaṃsaktacittasya candre samudite sati || 74 ||
[Analyze grammar]

candrapratyayasattvātma cidbrahmāhamanāmayam |
bhūmiṣṭhanaradṛṣṭīnāṃ lagnānāṃ khe niśākare || 75 ||
[Analyze grammar]

yā khasthā nanu cicchaktistaccidbrahmāsti nirmalam |
sukhaduḥkhādikalanāvikalo nirmalastathā || 76 ||
[Analyze grammar]

satyānubhavarūpātma cidbrahmātmāsmi śāśvataḥ |
asaṃstutādhvagāloke manasyanyatra saṃsthite || 77 ||
[Analyze grammar]

yā pratītiranāgaskā taccidbrahmāsmi sarvagaḥ |
bhūvāryanilabījānāṃ saṃbandhe'ṅkurakarmasu || 78 ||
[Analyze grammar]

śaktirudgamanīyāntastaccidbrahmāhamātatam |
kharjūranimbabimbānāṃ svayamātmani tiṣṭhatām || 79 ||
[Analyze grammar]

yā svādasattā līnāntastadbrahma cidahaṃ samaḥ |
khedānandavimuktāntaḥ saṃvittirmananodayā || 80 ||
[Analyze grammar]

lābhālābhavidhau tulyā cidbrahmāsmi nirāmayam |
yāvadbhūmyarkametāvaddṛṣṭisūtraṃ yadātatam || 81 ||
[Analyze grammar]

tanmadhyasadṛśaṃ śāntaṃ nirmalaṃ cidahaṃ tatam |
jāgratyapi suṣupte'pi tatsvapne'pi tathoditam || 82 ||
[Analyze grammar]

turyaṃ rūpamanādyantaṃ cidbrahmāhamanāmayam |
puṃsāṃ kṣetraśatotthānāmikṣūṇāṃ svāduvatsthitam || 83 ||
[Analyze grammar]

sarveṣāmekarūpaṃ taccidbrahmāsmi samaḥ sthitaḥ |
sarvagā prakṛtā svaccharūpā bhānoriva prabhā || 84 ||
[Analyze grammar]

ālokakāriṇī kāntā cidbrahmedamahaṃ tatam |
saṃbhogānandalavavadamṛtāsvādaśaktivat || 85 ||
[Analyze grammar]

svānubhūtyaikamātraṃ yaccidbrahmāsmi tadavyayam |
protāṅgamapi guptāsyaṃ dehe tanturbise yathā || 86 ||
[Analyze grammar]

chede bhede sphuradrūpaṃ cidbrahmāhamanāmayam |
ākrāntabhuvanāpyabhramāleva spandaśālinī || 87 ||
[Analyze grammar]

durlakṣyāṇumayākārā cicchaktirahamātatā |
anubhūtimayāntasthā snehamātropalakṣitā || 88 ||
[Analyze grammar]

kṣīrāddhṛtasya satteva cidahaṃ kṣayavarjitā |
kaṭakāṅgadakeyūraracanā tadatanmayī || 89 ||
[Analyze grammar]

hemnīva saṃsthitā dehe cidbrahmātmāsmi sarvagaḥ |
padārthaughasya śailāderbahirantaśca sarvadā || 90 ||
[Analyze grammar]

sattāsāmānyarūpeṇa yā citso'hamalepakaḥ |
sarvāsāmanubhūtīnāmādarśo yo hyakṛtrimaḥ || 91 ||
[Analyze grammar]

agamyo malalekhānāṃ taccittattvamahaṃ mahat |
sarvasaṃkalpaphaladaṃ sarvatejaḥprakāśakam || 92 ||
[Analyze grammar]

sarvopādeyasīmāntaṃ cidātmānamupāsmahe |
sarvāvayavaviśrāntaṃ samastāvayavātigam || 93 ||
[Analyze grammar]

anāratakacadrūpaṃ cidātmānamupāsmahe |
ghaṭe paṭe taṭe kūpe spandamānaṃ sadā tanau || 94 ||
[Analyze grammar]

jāgratyapi suṣuptasthaṃ cidātmānamupāsmahe |
uṣṇamagnau hime śītaṃ mṛṣṭamanne śitaṃ kṣure || 95 ||
[Analyze grammar]

kṛṣṇaṃ dhvānte sitaṃ candre cidātmānamupāsmahe |
ālokaṃ bahirantasthaṃ sthitaṃ ca svātmavastuni || 96 ||
[Analyze grammar]

adūramapi dūrasthaṃ cidātmānamupāsmahe |
mādhuryādiṣu mādhuryaṃ tīkṣṇādiṣu ca tīkṣṇatām || 97 ||
[Analyze grammar]

gataṃ padārthajāteṣu cidātmānamupāsmahe |
jāgratsvapnasuṣupteṣu turyāturyātige pade || 98 ||
[Analyze grammar]

samaṃ sadaiva sarvatra cidātmānamupāsmahe |
praśāntasarvasaṃkalpaṃ vigatākhilakautukam || 99 ||
[Analyze grammar]

vigatāśeṣasaṃrambhaṃ cidātmānamupāsmahe |
niṣkautukaṃ nirārambhaṃ nirīhaṃ sarvameva ca || 100 ||
[Analyze grammar]

niraṃśaṃ nirahaṃkāraṃ cidātmānamupāsmahe |
sarvasyāntaḥsthitaṃ sarvamapyapāraikarūpiṇam || 101 ||
[Analyze grammar]

aparyantacidārambhaṃ cidātmānamupāgataḥ |
trailokyadehamuktānāṃ tantumunnatamātatam || 102 ||
[Analyze grammar]

pracārasaṃkocakaraṃ cidātmānamupāgataḥ |
līnamantarbahiḥsvāptānkroḍīkṛtya jagatkhagān || 103 ||
[Analyze grammar]

citraṃ bṛhajjālamiva cidātmānamupāgataḥ |
sarvaṃ yatredamastyeva nāstyeva ca manāgapi || 104 ||
[Analyze grammar]

sadasadrūpamekaṃ taṃ cidātmānamupāgataḥ |
paramapratyayaṃ pūrṇamāspadaṃ sarvasaṃpadām || 105 ||
[Analyze grammar]

sarvākāravihārasthaṃ cidātmānamupāgataḥ |
snehādhāramatho'śāntaṃ jaḍavātāhatibhramaiḥ || 106 ||
[Analyze grammar]

yuktaṃ muktaṃ ca ciddīpaṃ bahirantarupāsmahe |
hṛtsaraḥpadminīkandaṃ tantuṃ sarvāṅgasundaram || 107 ||
[Analyze grammar]

janatājīvanopāyaṃ cidātmānamupāgataḥ |
akṣīrārṇavasaṃbhūtamaśaśāṅkamupasthitam || 108 ||
[Analyze grammar]

ahāryamamṛtaṃ satyaṃ cidātmānamupāsmahe |
śabdarūparasasparśagandhairābhāsamāgatam || 109 ||
[Analyze grammar]

taireva rahitaṃ śāntaṃ cidātmānamupāgataḥ |
ākāśakośaviśadaṃ sarvalokasya rañjanam || 110 ||
[Analyze grammar]

na rañjanaṃ na cākāśaṃ cidātmānamupāgataḥ |
mahāmahimnā sahitaṃ rahitaṃ sarvabhūtibhiḥ |
kartṛtve vāpyakartāraṃ cidātmānamupāgataḥ || 111 ||
[Analyze grammar]

akhilamidamahaṃ mamaiva sarvaṃ tvahamapi nāhamathetaracca nāham |
iti viditavato jagatkṛtaṃ me sthiramathavāstu gatajvaro bhavāmi || 112 ||
[Analyze grammar]