Chapter LII

śrīvasiṣṭha uvāca |
sa tāṃ viveśa dharmātmā gandhamādanakandarām |
citrabhramaṇasaṃprāptāmaliḥ padmakuṭīmiva || 1 ||
[Analyze grammar]

samādhānonmukhatayā praviśansa vyarājata |
sargavyāpāraviratāvātmapuryāmivābjajaḥ || 2 ||
[Analyze grammar]

cakārāsanamamlānaiḥ patrairantasvagucchakam |
mṛdumeghavidhirvṛndamambhodamiva tatra saḥ || 3 ||
[Analyze grammar]

sa tatprastārayāmāsa pṛṣṭhe cāru mṛgājinam |
nīlaratnataṭe merustārāsāramivāmbaram || 4 ||
[Analyze grammar]

sa tatropāviśadvṛttīścetasastanutāṃ nayan |
antaḥśuddhavapuḥ śrṛṅge vṛṣya mūka ivāmbudaḥ || 5 ||
[Analyze grammar]

buddhavatsudṛḍhaṃ baddhapadmāsana udaṅmukhaḥ |
pārṣṇibhyāṃ vṛṣaṇau dhṛtvā cakāra brāhmamañjalim || 6 ||
[Analyze grammar]

vāsanābhyaḥ samāhṛtya manomṛgamupaplutam |
nirvikalpasamādhyarthaṃ cakāremāṃ vicāraṇām || 7 ||
[Analyze grammar]

ayi mūrkha manaḥ ko'rthastava saṃsāravṛttibhiḥ |
dhīmanto na niṣevante paryante duḥkhadāṃ kriyām || 8 ||
[Analyze grammar]

anudhāvati yo bhogāṃstyaktvā śamarasāyanam |
saṃtyajya mandāravanaṃ sa yāti viṣajaṅgalam || 9 ||
[Analyze grammar]

yadi yāsi mahīrandhraṃ brahmalokamathāpi vā |
tanna nirvāṇamāyāsi vinopaśamanāmṛtam || 10 ||
[Analyze grammar]

āśāśatāvapūrṇatve tvamevaṃ sarvaduḥkhadam |
tyajya yāhi paraṃ śreyaḥ paramekāntasundaram || 11 ||
[Analyze grammar]

imā vicitrāḥ kalanā bhāvābhāvamayātmikāḥ |
duḥkhāyaiva tavogrāya na sukhāya kadācana || 12 ||
[Analyze grammar]

śabdādikābhiretābhiḥ kiṃ mūrkha hatavṛttibhiḥ |
bhramasyavirataṃ vyarthaṃ meghe maṇḍūkikā yathā || 13 ||
[Analyze grammar]

manomaṇḍūkike vyarthamiyantaṃ kālamandhayā |
bhramantyā bhuvanaṃ kṣipraṃ kiṃ samāsāditaṃ tvayā || 14 ||
[Analyze grammar]

yasmātkiṃcidavāpnoṣi yasminvahasi nirvṛtim |
tasmiṃścetaḥ śame mūrkha nānubadhnāsi kiṃ padam || 15 ||
[Analyze grammar]

āgatya śrotratāṃ mūrkha vyarthotthānopabṛṃhitām |
dhiyā śabdānusāriṇyā mṛgavanmā kṣayaṃ vraja || 16 ||
[Analyze grammar]

tvaktāmāgatya duḥkhāya sparśonmukhatayā dhiyā |
mūrkha mā baddhatāmehi gajīlubdhagajendravat || 17 ||
[Analyze grammar]

rasanābhāvamāgatya garddhenāndha durandhasām |
mā nāśamehi baḍiśapiṇḍīlampaṭamatsyavat || 18 ||
[Analyze grammar]

cākṣuṣīṃ vṛttimāśritya prabhārūpacayonmukhīm |
mā gaccha dagdhatāṃ mugdha kāntilubdhapataṅgavat || 19 ||
[Analyze grammar]

ghrāṇamārgamupāśritya śarīrāmbhojakoṭare |
gandhonmukhatayā bandhaṃ mā tvaṃ saṃśraya bhṛṅgavat || 20 ||
[Analyze grammar]

kuraṅgālipataṅgebhamīnāstvekaikaśo hatāḥ |
sarvairyuktairanarthaistu vyāptasyājña kutaḥ sukham || 21 ||
[Analyze grammar]

he citta vāsanājālaṃ bandhāya bhavatohitam |
svātmanaḥ sahajaḥ phenastataḥ kukṛmiṇā yathā || 22 ||
[Analyze grammar]

śaradabhravadāgatya śuddhiṃ tyaktabhavāmayām |
yadi śāmyasi nirmūlaṃ tadananto jayastava || 23 ||
[Analyze grammar]

kṣayodayadaśādhātrīṃ paryantaparitāpinīm |
jānannapi jagatsṛṣṭiṃ na tyakṣyasi vinaṃkṣyasi || 24 ||
[Analyze grammar]

karomyatha kimarthaṃ vā tavaitadanuśāsanam |
vicāraṇavataḥ puṃsaścittamasti hi nānagha || 25 ||
[Analyze grammar]

yāvadajñānaghanatā tāvatpraghanacittatā |
yāvatprāvṛḍjaladatā tāvannīhārabhūritā || 26 ||
[Analyze grammar]

yāvadajñānatanutā tāvaccittasya tānavam |
prāvṛṭparikṣayo yāvattāvannīhārasaṃkṣayaḥ || 27 ||
[Analyze grammar]

yāvattānavamāyātaṃ śuddhaṃ cittaṃ vicārataḥ |
tāvattatkṣīṇamevāhaṃ manye śāradameghavat || 28 ||
[Analyze grammar]

anuśāsanametadyadasato naśyato'tha vā |
kriyate tannabhovāripavanāhananaiḥ samam || 29 ||
[Analyze grammar]

tasmātsaṃkṣīyamāṇatvāttyajāmi tvāmasanmayam |
maurkhyaṃ paramamevāhuḥ parityājyānuśāsanam || 30 ||
[Analyze grammar]

nirvikalpo'smi ciddīpo nirahaṃkāravāsanaḥ |
tvayāhaṃkārabījena na saṃbaddho'smyasanmaya || 31 ||
[Analyze grammar]

ayaṃ so'hamiti vyarthaṃ durdṛṣṭiravalambitā |
tvayā mūḍhavināśāya śaṅkāviṣaviṣūcikā || 32 ||
[Analyze grammar]

anantasyātmatattvasya tanvīti manasi sthitiḥ |
na saṃbhavati bilvāntarvāsitādantinoryathā || 33 ||
[Analyze grammar]

mahāśvabhrīva gambhīrā duḥkhadā vāsanāśritā |
tvayaiṣā bata citteti naināmanusarāmyaham || 34 ||
[Analyze grammar]

kaḥ kilāyaṃ mudhā moho bālasyevāvicāriṇaḥ |
ayaṃ so'hamiti bhrāntistvahaṃtāparikalpitā || 35 ||
[Analyze grammar]

pādāṅguṣṭhācchiro yāvatkaṇaśaḥ pravicāritam |
na labdho'sāvahaṃ nāma kaḥ syādahamiti sthitaḥ || 36 ||
[Analyze grammar]

bharitāśeṣadikkuñjaṃ yatsyāmekaṃ jagattraye |
saṃvedanamasaṃvedyaṃ sarvatravigatātmakam || 37 ||
[Analyze grammar]

dṛśyate yasya neyattā na nāma parikalpanā |
naikatā nānyataiveha na mahattā na cāṇutā || 38 ||
[Analyze grammar]

veda tattvāṃ svasaṃvedyamātataṃ duḥkhakāraṇam |
vivekajena bodhena tadidaṃ hanyase mayā || 39 ||
[Analyze grammar]

idaṃ māṃsamidaṃ raktamimānyasthīni dehake |
ime te śvāsamarutaḥ ko'sāvahamiti sthitaḥ || 40 ||
[Analyze grammar]

spando hi vātaśaktīnāmavabodho mahācitaḥ |
jarā mṛtiśca kāye'sminko'sāvahamiti sthitaḥ || 41 ||
[Analyze grammar]

māṃsamanyadasṛkcānyadasthīnyanyāni citta he |
bodho'nyaḥ spandanaṃ cānyatkosāvahamiti sthitaḥ || 42 ||
[Analyze grammar]

idaṃ ghrāṇamiyaṃ jihvā tvagiyaṃ śravaṇe ime |
idaṃ cakṣurasau sparśaḥ ko'sāvahamiti sthitaḥ || 43 ||
[Analyze grammar]

yathābhūtatayā nāhaṃ mano na tvaṃ na vāsanā |
ātmā śuddhacidābhāsaḥ kevalo'yaṃ vijṛmbhate || 44 ||
[Analyze grammar]

ahameveha sarvatra nāhaṃ kiṃcidapīha vā |
ityeva sanmayī dṛṣṭirnetaro vidyate kramaḥ || 45 ||
[Analyze grammar]

ciramajñānadhūrtena pothito'smi tvahaṃtayā |
vṛkeṇa dṛptenāṭavyāṃ labdhena paśupotakaḥ || 46 ||
[Analyze grammar]

diṣṭyedānīṃ parijñāto mayaivājñānataskaraḥ |
punarna saṃśrayāmyenaṃ svarūpārthāpahāriṇam || 47 ||
[Analyze grammar]

nirduḥkho duḥkhayogyasya nāhaṃ tasya na caiṣa me |
kaścidbhavati śailasya tatstha eva yathāmbudaḥ || 48 ||
[Analyze grammar]

bhūtvā tvahamidaṃ vacmi vedmi tiṣṭhāmi yāmi ca |
ātmāvalokanenāhamanahaṃkāratāṃ gataḥ || 49 ||
[Analyze grammar]

nūnamevāhamevaite manye jñāścakṣurādayaḥ |
yāntu tiṣṭhantu vā dehe mamaite tu na kiṃcana || 50 ||
[Analyze grammar]

kaṣṭaṃ ko'yamahaṃ nāma kathaṃ kenopakalpitaḥ |
jagadbālakavetālastālottālātulākṛtiḥ || 51 ||
[Analyze grammar]

etāvantaṃ ciraṃ kālaṃ vyarthamāluṭhito'vaṭe |
ahamatra tṛṇonmukte duradrau hariṇo yathā || 52 ||
[Analyze grammar]

svārthamālokane cakṣuryaditūnmukhatāṃ gatam |
tadahaṃ nāma kosau syādyo'sminduḥkhe na mohitaḥ || 53 ||
[Analyze grammar]

sparśanāya nije tattve yadi jātā tvagunmukhī |
tatkoyaṃ syādahaṃ nāma kupiśāca ivoditaḥ || 54 ||
[Analyze grammar]

raseṣvabhiniṣaṇṇe'sminsvakrame rasanendriye |
ahaṃ mṛṣṭabhugityeṣa kutastyaḥ kutsito bhramaḥ || 55 ||
[Analyze grammar]

śabdaśaktiṃ gate śrotre varāke svārthapīḍite |
tadahaṃkāraduḥkhasya nirbījasya ka āgamaḥ || 56 ||
[Analyze grammar]

ātmabharitvena nije ghrāṇe svaṃ gandhamāgate |
ahaṃ ghrāteti yo mātā taṃ cauraṃ naiva vedmyaham || 57 ||
[Analyze grammar]

mṛgatṛṣṇākrameṇaiṣā bhāvanā vyarthabhāvinī |
bhāvastasyāmasatyāyāṃ yaḥ so'yamiti saṃbhramaḥ || 58 ||
[Analyze grammar]

vāsanāhīnamapyetaccakṣurādīndriyaiḥ svataḥ |
pravartate bahiḥ svārthe vāsanā nātra kāraṇam || 59 ||
[Analyze grammar]

vāsanārahitaṃ karma kriyate nanu citta he |
kevalaṃ nānubhūyante sukhaduḥkhadṛśo'gragāḥ || 60 ||
[Analyze grammar]

tasmānmūrkhāṇīndriyāṇi tyaktvāntarvāsanāṃ nijām |
kurudhvaṃ karma he sarvaṃ na duḥkhaṃ samavāpsyatha || 61 ||
[Analyze grammar]

bhavadbhireva duḥkhāya vāsanāvāsitā mudhā |
bālaiḥ paṅkakrīḍanakaṃ vināśeneva khinnatā || 62 ||
[Analyze grammar]

vāsanādyā dṛśaḥ sarvā vyatiriktāstu nātmanaḥ |
jalādiva taraṅgādyā jñasyaivānyasya nānagha || 63 ||
[Analyze grammar]

tṛṣṇayaiva vinaṣṭāḥ stha vyarthamindriyabālakāḥ |
kośakārakukṛmayastantuneva svayaṃbhuvā || 64 ||
[Analyze grammar]

tṛṣṇayaiveha luṭhatha jarāmaraṇasaṃkaṭe |
bhramadṛṣṭyeva śikharipathikāḥ śvabhrabhūmiṣu || 65 ||
[Analyze grammar]

vāsanaiveha bhavatāṃ heturekatra bandhane |
rajjuḥ śūnyāśayaprotā muktānāmātatā yathā || 66 ||
[Analyze grammar]

kalpanāmātrakalitā satyaiṣā hi na vastutaḥ |
asaṃkalpanamātreṇa dātreṇeva vilūyate || 67 ||
[Analyze grammar]

eṣā hi bhavatāmeva vimohāya kṣayāya ca |
vātalekheva dīpānāṃ sphuratāmapi tejasām || 68 ||
[Analyze grammar]

he citta sarvendriyakośa tasmātsarvendriyairaikyamupetya nūnam |
ālokya cātmānamasatsvarūpaṃ nirvāṇamevāmalabodhamāssva || 69 ||
[Analyze grammar]

viṣayaviṣaviṣūcikāmanantāṃ nipuṇamahaṃsthitivāsanāmapāsya |
abhimataparihāramantrayuktyā bhava vibhavo bhagavānbhiyāmabhūmiḥ || 70 ||
[Analyze grammar]