Chapter XLIX

śrīvasiṣṭha uvāca |
atha kānanamadhyasthaṃ cumbitāmbudamaṇḍalam |
madhyāhnakhinnasūryāśvasevitaskandhamaṇḍalam || 1 ||
[Analyze grammar]

vitānamiva dikkukṣidīrghaṃ viṭapabāhubhiḥ |
ālokayantaṃ kakubho vikāsikusumekṣaṇaiḥ || 2 ||
[Analyze grammar]

vātāvadhūlitānalpabhramadbhramarakuntalam |
pramārjayantamāśānāṃ mukhaṃ pallavapāṇibhiḥ || 3 ||
[Analyze grammar]

kacchairuruguḍḍacchācchamañjarīpuñjakañjaraiḥ |
āsyairiva satāmbūlairhasantaṃ vanamālikāḥ || 4 ||
[Analyze grammar]

latāvilasitollāsaiḥ puṣpakesaradhūlibhiḥ |
ābaddhamaṇḍalābhogaṃ pūrṇendumiva dīptibhiḥ || 5 ||
[Analyze grammar]

saṃkaṭaṃ viṭapāvalyā kuñjakūjaccakorayā |
channayā siddhavīthyeva jagaduccatayā śritam || 6 ||
[Analyze grammar]

skandhapīṭhopaviṣṭānāṃ lambamānaiḥ kalāpinām |
kalāpaiḥ śobhitaṃ vyoma sendracāpairivāmbudaiḥ || 7 ||
[Analyze grammar]

magnonmagnaiḥ pratiskandhamāśritaiścamaraiḥ sitaiḥ |
pūrṇaṃ muhurdṛṣṭanaṣṭaiḥ saṃvatsaramivendubhiḥ || 8 ||
[Analyze grammar]

kapiñjalakulālāpaiḥ kalakokilakūjitaiḥ |
jīvaṃjīvavirāvaiśca pragāyantamivocchritaiḥ || 9 ||
[Analyze grammar]

kādambakakadambaiśca kulāyakṛtakelibhiḥ |
svargakoṭaraviśrāntaiḥ siddhairjagadivāvṛtam || 10 ||
[Analyze grammar]

pravālacalahastābhiralinetrābhirāśritam |
apsarobhiriva svargaṃ mañjarībhiritastataḥ || 11 ||
[Analyze grammar]

sendracāpavilāsena kumudotkarareṇunā |
mañjarīpiñjarāśyāmaṃ vidyutvantamivāmbudam || 12 ||
[Analyze grammar]

sahasrabhujaśākhākhyaṃ pūritākāśakoṭaram |
viśvarūpamivonnṛttaṃ candrārkakṛtakuṇḍalam || 13 ||
[Analyze grammar]

tale niṣaṇṇanāgendraṃ vyomni tārāgaṇākulam |
latāpuṣpamayaṃ madhye khamaṇḍalamivāparam || 14 ||
[Analyze grammar]

pitāmahamivāśeṣaśailakānanaśālinam |
phalapallavapuṣpāṇāṃ kośamekamivāvanau || 15 ||
[Analyze grammar]

dadhānaṃ kalikājālaṃ sthagitaṃ puṣpadhūlibhiḥ |
kaccheṣvarkakaracchannatārājālamivāmbaram || 16 ||
[Analyze grammar]

vilolavihagaiḥ skandhaiḥ kulāyakulasaṃkulaiḥ |
valitaṃ bhūtalaṃ loke pūrṇairjanapadairiva || 17 ||
[Analyze grammar]

mañjarīsupatākāḍhyaṃ latāmaṇḍalamaṇḍitam |
puṣpamaṅkoladhavalaṃ puṣpaprakarapūritam || 18 ||
[Analyze grammar]

kūjaccakorabhramaraśukakokilasārikam |
ghanastabakasaṃchannakuharogragavākṣakam || 19 ||
[Analyze grammar]

saṃcaratpakṣibahulaṃ janamantharakoṭaram |
sarvāsāṃ vanadevīnāmantaḥpuramivottamam || 20 ||
[Analyze grammar]

kūjadbhṛṅgataraṅgaughaiḥ puṣpakesararājibhiḥ |
rājamānaṃ patantībhiḥ saridbhiriva parvatam || 21 ||
[Analyze grammar]

bhramadbhiḥ puṣpapatraughairmandavātavilāsibhiḥ |
vardhamānairvṛtaskandhaṃ śubhrābhrairiva bhūdharam || 22 ||
[Analyze grammar]

mātaṅgakaṭaghṛṣṭena jānustabdhena pīṭhinā |
ābhoginā baddhapadaṃ taruṇeva mahācalam || 23 ||
[Analyze grammar]

vicitravarṇapakṣāṇāṃ skandhakoṭaracāriṇām |
vṛtaṃ khagānāṃ vṛndena bhūtānāmiva śārṅgiṇam || 24 ||
[Analyze grammar]

stabakāṅgulijālena lolenābhinayakriyām |
diśantamiva vallīnāṃ pravṛttānāṃ vanānilaiḥ || 25 ||
[Analyze grammar]

kaścideva nivāso me nārthināmiti tuṣṭitaḥ |
nṛtyantamiva bahvāḍhyalatāvalayavalganaiḥ || 26 ||
[Analyze grammar]

latākāntaikakāntatvācchṛṅgārarasanirbharam |
kākalyeva pragāyantaṃ mattālinijaniḥsvanaiḥ || 27 ||
[Analyze grammar]

ādaronmuktakusumaṃ siddhānāṃ vyomacāriṇām |
svāgatānīva kurvāṇaṃ kokilālikulāravaiḥ || 28 ||
[Analyze grammar]

latāpuṣpaphalollāsaṃ prāntapañcamahīruhām |
vihasantamivācchābhiḥ puṣpakuḍmaladīptibhiḥ || 29 ||
[Analyze grammar]

pārijātamivājetumūrdhvagaiḥ khagamaṇḍalaiḥ |
vyomāntarābhidhāvantamalamuddhatakandharam || 30 ||
[Analyze grammar]

madhyabhāgasphurattuṅgaiḥ stabakairghanapaṅktibhiḥ |
sahasrākṣatvamatulairjetumindramivodyatam || 31 ||
[Analyze grammar]

kvacitkusumagucchācchaphaṇāmaṇigaṇāvṛtam |
pātālādutthitaṃ śeṣamiva vyomadidṛkṣayā || 32 ||
[Analyze grammar]

rajasodbhūlitākāraṃ dvitīyamiva śaṃkaram |
chāyayā phalaśālinyā samastajanaśaṃkaram || 33 ||
[Analyze grammar]

nibiḍadalanivāhabhinnakośaiḥ kusumalatānavamaṇḍapairupetam |
puramiva gagane kadambavṛkṣaṃ khagakulanāgarasaṃkulaṃ dadarśa || 34 ||
[Analyze grammar]