Chapter LXII

śrīvasiṣṭha uvāca |
paramāṇunimeṣāṇāṃ lakṣāṃśakalanāsvapi |
jagatkalpasahasrāṇi satyānīva vibhāntyalam || 1 ||
[Analyze grammar]

teṣvapyantastathaivāntaḥ paramāṇukaṇaṃ prati |
bhrāntirevamanantāho iyamityavabhāsate || 2 ||
[Analyze grammar]

vahantīmāḥ parāḥ sattāḥ śāntāḥ sargaparamparāḥ |
saliladravatevāntaḥsphuṭāvartavivartikā || 3 ||
[Analyze grammar]

mithyātmikaiva sargaśrīrbhavatīha mahāmarau |
tīradrumalatonmuktapuṣpālīva taraṅgiṇī || 4 ||
[Analyze grammar]

svapnendrajālapuravatsaṃkathehāpurādrivat |
saṃkalpavadasatyaiva bhāti sargānubhūtibhūḥ || 5 ||
[Analyze grammar]

śrīrāma uvāca |
ekātmaikatayaivaṃ hi jāte samyagvicāraṇāt |
nirvikalpātmavijñāne pare jñānavatāṃ vara || 6 ||
[Analyze grammar]

kimarthamiha tiṣṭhanti dehāstattvavidāmapi |
daivenaiva samākrāntā daivamatra ca kiṃ bhavet || 7 ||
[Analyze grammar]

śrīvasiṣṭha uvāca |
astīha niyatirbrāhmī cicchaktiḥ spandarūpiṇī |
avaśyabhavitavyaikasattā sakalakalpagā || 8 ||
[Analyze grammar]

ādisarge hi niyatirbhāvavaicitryamakṣayam |
anenetthaṃ sadā bhāvyamiti saṃpadyate param || 9 ||
[Analyze grammar]

mahāsatteti kathitā mahācitiriti smṛtā |
mahāśaktiriti khyātā mahādṛṣṭiriti sthitā || 10 ||
[Analyze grammar]

mahākriyeti gaditā mahodbhava iti smṛtā |
mahāspanda iti prauḍhā mahātmaikatayoditā || 11 ||
[Analyze grammar]

tṛṇānīva jagantyevamiti daityāḥ surā iti |
iti nāgā iti nagā ityākalpaṃ kṛtāsthitiḥ || 12 ||
[Analyze grammar]

kadācidbrahmasattāyā vyabhicāro'numīyate |
citramākāśakośe ca nānyathā niyateḥ sthitiḥ || 13 ||
[Analyze grammar]

viriñcayādyātmabhirbuddhairbodhāyāviditātmanām |
brahmātmaiva sā niyatiḥ sargo'yamiti kathyate || 14 ||
[Analyze grammar]

acalaṃ calavaddṛṣṭaṃ brahmāpūrya vyavasthitaḥ |
anādimadhyaparyantaṃ sargo vṛkṣa ivāmbare || 15 ||
[Analyze grammar]

pāṣāṇodaralekhaughanyāyenātmani tiṣṭhatā |
brahmaṇā niyatiḥ sargo buddho'bodhavateva kham || 16 ||
[Analyze grammar]

dehe yathāṅgino'ṅgādi dṛśyate citsvabhāvataḥ |
brahmaṇā padmajatvena niyatyādyaṅgakaṃ tathā || 17 ||
[Analyze grammar]

eṣā daivamiti proktā sarvaṃ sakalakālagam |
padārthamalamākramya śuddhā ciditi saṃsthitā || 18 ||
[Analyze grammar]

spanditavyaṃ padārthena bhāvyaṃ vā bhoktṛtāpadam |
anenetthamanenetthamavaśyamiti daivadhīḥ || 19 ||
[Analyze grammar]

eṣaiva puruṣaspandastṛṇagulmādi cākhilam |
eṣaiva sarvabhūtādi jagatkālakriyādi vā || 20 ||
[Analyze grammar]

anayā pauruṣī sattā sattāsyāḥ pauruṣeṇa ca |
lakṣyate bhuvanaṃ yāvaddve ekātmatayaiva hi || 21 ||
[Analyze grammar]

nareṇa pauruṣeṇaiva kārye sattātmake ubhe |
īdṛśyetena niyatirevaṃ niyatipauruṣe || 22 ||
[Analyze grammar]

praṣṭavyo'haṃ tvayā rāma daivapauruṣanirṇayaḥ |
maduktaṃ pauruṣaṃ pālyaṃ tvayeti niyatiḥ sthitā || 23 ||
[Analyze grammar]

bhojayiṣyati māṃ daivamiti daivaparāyaṇaḥ |
yattiṣṭhatyakriyo maunaṃ niyatereṣa niścayaḥ || 24 ||
[Analyze grammar]

na syādbuddhirna karmāṇi na vikārādi nākṛtiḥ |
kevalaṃ tvitthamākalpaṃ sthityā bhāvyamiti sthitāḥ || 25 ||
[Analyze grammar]

avaśyaṃbhavitavyaiṣā tvidamitthamiti sthitiḥ |
na śakyate laṅghayitumapi rudrādibuddhibhiḥ || 26 ||
[Analyze grammar]

pauruṣaṃ na parityājyametāmāśritya dhīmatā |
pauruṣeṇaiva rūpeṇa niyatirhi niyāmikā || 27 ||
[Analyze grammar]

apauruṣaṃ hi niyatiḥ pauruṣaṃ saiva sargagā |
niṣphalā'pauruṣākārā saphalā pauruṣātmikā || 28 ||
[Analyze grammar]

niyatyā mūkatāmetya niṣpauruṣatayā'kriyam |
yastiṣṭhati prāṇamarutspandastasya kva gacchati || 29 ||
[Analyze grammar]

atha prāṇakriyārodhamapi kṛtvā virāmadam |
yadi tiṣṭhati tatsādhurmukta eva kimucyate || 30 ||
[Analyze grammar]

pauruṣaikātmatā śreyo mokṣo'tyantamakartṛtā |
ābhyāṃ tu sabalaḥ pakṣo nirduḥkhaiva mahātmanām || 31 ||
[Analyze grammar]

niyatirbrahmasattābhā tasyāṃ cetpariṇamyate |
nūnaṃ paramaśuddhākhyaṃ tatprāptaiva parāgatiḥ || 32 ||
[Analyze grammar]

etairniyatyādimahāvilāsaibrahmaiva visphūrjati sarvagātmā |
tṛṇādivallītarugulmajālaiḥ satteva toyasya dharāntarasthā || 33 ||
[Analyze grammar]