Yoga-sutra with Bhoja Vritti [sanskrit]
9,596 words
The Sanskrit edition of the Rājamārtaṇḍa or Bhojavṛtti by Bhojarāja.—This represents the commentary on the yoga aphorisms of Patañjali by King Bhoja who ruled in the 11th century. The material was typed by Suryansu Ray from a traditional old manuscript belonging to the family Guru.
Sūtra 2.26
tadevaṃ dṛśyasaṃyogasya svarūpaṃ kāraṇaṃ kāryaṃ cābhihitam | atha hānopāyakathanadvāreṇa upādeyakāraṇamāha —
vivekakhyātiraviplavā hānopāyaḥ || sādhana 26 ||
vṛttiḥ — anye guṇā anyaḥ puruṣa ityevaṃvidhasya vivekasya yā khyātiḥ prakhyā sā'sya hānasya dṛśyaduḥkhaparityāgasyopāyaḥ kāraṇam | kīdṛśī | aviplavā na vidyate viplavo vicchedo'ntarā'ntarā'bhyutthānarūpo yasyāḥ sā aviplavā | idamatra tātparyam — pratipakṣabhāvanābalādavidyāpralaye vinivṛttakartṛtvabhoktṛtvābhimānāyā rajastamomalānabhibhūtāyā buddherantarmukhā yā cicchāyāsaṃkrāntiḥ sā vivekakhyātirucyate | tasyāṃ ca santatatvena pravṛttāyāṃ satyāṃ dṛśyasyādhikāranivṛtterbhavatyeva kaivalyam || 26 ||