Chapter 18

athāṣṭādaśaḥ paṭalaḥ ||
atha vakṣyāmi saṃkṣepāt pratiṣṭhāvidhimuttamam |
vāstuyāgaṃ purā kṛtvā muhūrtte sthāpanaṃ bhavet || 1 ||
[Analyze grammar]

kṛtvā nāndīmukhaṃ śaktyā ṣaḍaṣṭau dvādaśāthavā |
bhojayed brāhmaṇān śāntān vaiṣṇavāṃstu viśeṣataḥ || 2 ||
[Analyze grammar]

dadyādvastrāṅgulīyādi hiraṇyaṃ ca svaśaktitaḥ |
prāsādasya tu sarvasya mārjanaṃ kārayettataḥ || 3 ||
[Analyze grammar]

tatācābhyantaraṃ darbhaiḥ saśalākaiḥ prayatnataḥ |
pañcagavyena gandhaiśca prokṣya mūlābhimantritaiḥ || 4 ||
[Analyze grammar]

homārthaṃ vālukābhistu prāsādasya samantataḥ |
kārayeccaturaśrāṇi sthaṇḍilāni yathākramam || 5 ||
[Analyze grammar]

dikṣu cāṣṭāsu kṛtvaivamaṣṭau ca kalaśān nyaset |
kusumodakasampūrṇān sapidhānān sapallavān || 6 ||
[Analyze grammar]

saptasaptavibhāgena garbhāgāre vibhājite |
brahmadevamanuṣyāṇāṃ piśācānāṃ padāni tu || 7 ||
[Analyze grammar]

madhyādārabhya yatnena kramād jñeyāni sarvataḥ |
brāhmaḥ pañcadaśāṃśaḥ syād devabhāgāstrayodaśa || 8 ||
[Analyze grammar]

ekādaśa navāṃśaśca śiṣṭayoḥ pṛṣṭhabhāgataḥ |
gamanaṃ trividhaṃ proktaṃ pṛṣṭhasaumyesabhedataḥ || 9 ||
[Analyze grammar]

kalpanīyaṃ yathānyāyaṃ dravyasaṃsthānayogataḥ |
sthitāsīnaśayānānāṃ sthānāni parikalpayet || 10 ||
[Analyze grammar]

brahmāṃśe madhyamaṃ tyaktvā dvitīyaṃ cāpi pṛṣṭhataḥ |
sthitaikaberabimbasya tṛtīyaṃ sthānamiṣyate || 11 ||
[Analyze grammar]

tribhakte dvāravistāratrisaptāṃśeṣu madhyame |
madhyārdhenottare sūtraṃ gamanārthaṃ prakalpayet || 12 ||
[Analyze grammar]

paścimottarasaṃyoge karṇasūtraṃ prakalpya tu |
bimbāṅguliyavenaiśe gamayed dviyavena vā || 13 ||
[Analyze grammar]

brahmabhāgaṃ parityajya sthānārcā sthāpyate yadi |
tanmaṇḍalādhipo rājā sthāpakaśca vinaśyati || 14 ||
[Analyze grammar]

kriyā ca niṣphalaiva syāt tasmādyatnena māpayet |
kiñcinmānuṣamāśritya kuryādāsanakarma ca || 15 ||
[Analyze grammar]

devamānuṣabhāgābhyāṃ kuryācca śayanaṃ budhaḥ |
arcanāpīṭhikā brāhme sthāpanā daivike yadā || 16 ||
[Analyze grammar]

mānuṣe'sya parīvārāḥ paiśāce tvāyudhāni ca |
kṛtvā pādaśilāsthānaṃ vṛttaṃ vā caturaśrakam || 17 ||
[Analyze grammar]

pādapīṭhasya cādhastāt tato brahmaśīlāṃ nyaset |
tvameva paramā śaktistvamevāsanadhārikā || 18 ||
[Analyze grammar]

devājñayā tvayā devi sthātavyamiha sarvadā |
iti vijñāpya tāṃ pūrvaṃ gandhapuṣpaiḥ prapūjitām || 19 ||
[Analyze grammar]

dhyātvorvī sthāpayedgartte mantreṇānena deśikaḥ |
sthitaṃ carācaraṃ yasyāṃ ratnānāṃ nidhiravyayaḥ || 20 ||
[Analyze grammar]

sā tvaṃ brahmaśilārūpā tiṣṭhātra dharaṇi sthirā |
evaṃ saṃsthāpya tāṃ būyo gandhapuṣpaiḥ prapūjya ca || 21 ||
[Analyze grammar]

ratnanyāsaṃ tataḥ kuryād vidhidṛṣṭena vartmanā |
garttāśca nimnāvaraṇāścatvāro vihitāḥ kramāt || 22 ||
[Analyze grammar]

madhyāntamaṣṭadikṣvaṣṭau nyastavyāni yathākramam |
teṣu bījāni ratnāni dhātulohāyudhāni ca || 23 ||
[Analyze grammar]

sarvadravyāṇi saṃyojya brahmasthāne tu vinyaset |
ye guṇāḥ prathitā viṣṇoraiśvaryāṣṭakasaṃjñayā || 24 ||
[Analyze grammar]

tāni ratnāni diksthāni nyāsakāle vicintayet |
vāyuvyomāntarasthāni yeṣāṃ bījāni te guṇāḥ || 25 ||
[Analyze grammar]

īśitvādikramāt samyak pūrvādyāśāsviha smṛtāḥ |
madhye tu praṇavo jñeyo guṇāṣṭakayutaḥ pumān || 26 ||
[Analyze grammar]

śodhayet pañcagavyena garttamaṣṭākṣareṇa tu |
prokṣayet gandhatoyaiśca dvādaśākṣaravidyayā || 27 ||
[Analyze grammar]

homakarma tataḥ kuryāt prāsādottarapārśvataḥ |
laukikaṃ cāgnimānīya śarāve'bhineva tataḥ || 28 ||
[Analyze grammar]

vaiṣṇavīkaraṇaṃ kuryāt saṃskṛtaṃ vahnimānayet |
aṣṭākṣareṇa juhuyādājyāhutisahasrakam || 29 ||
[Analyze grammar]

tataḥ samitsasraṃ ca dvādaśākṣaravidyayā |
hutvā'jyaṃ cātha gāyatryā ratnāni samupaspṛśet || 30 ||
[Analyze grammar]

ājyāhutisaṃhasraṃ vā gāyattryaivātra homayet |
athavā'ṣṭaśataṃ mukhyaṃ madhyamaṃ cādhamaṃ bhavet || 31 ||
[Analyze grammar]

tayā saṃspṛśya ratnāni gartteṣu viniveśayet |
na garttādadhikaṃ dravyaṃ na hīnaṃ ca prakalpayet || 32 ||
[Analyze grammar]

kvaciddravyasamaṃ gartaṃ kārayet kuśalo guruḥ |
aṣṭākṣarasya varṇaistu vyastaireva yathākramam || 33 ||
[Analyze grammar]

yavādīn dikṣu vinyasya madhye siddhārthakaṃ nyaset |
tato vajrādiratnāni padmarāgaṃ ca madhyataḥ || 34 ||
[Analyze grammar]

manaḥ śilādidhātūṃśca pārataṃ taṃ tathā nyaset |
suvarṇādīni dikṣvaṣṭau madhye padmaṃ hiraṇmayam || 35 ||
[Analyze grammar]

saṃspṛśed viṣṇugāyatrayā tato garttaṃ sadakṣiṇam |
bījādīnāmalābhe'pi tatsthāneṣu yathākramam || 36 ||
[Analyze grammar]

śālimuktāharītālasuvarṇāni nyased budhaḥ |
puṇyāhaṃ vācayet pūrvaṃ vaiṣṇavaiḥ saha mantravit || 37 ||
[Analyze grammar]

ratnanyāsaṃ tataḥ kṛtvā piṇḍikāṃ tatra vinyaset |
praṇīya vaiṣṇavaṃ vahnimaiśānyāṃ mūlavidyayā || 38 ||
[Analyze grammar]

juhuyāt samidho brāhmīḥ sahasraṃ śatameva vā |
aṣṭottaramathājyena gāyattryā viṣṇusaṃjñayā || 39 ||
[Analyze grammar]

mūrtiśaktibhiraṅgaiśca ghṛtameva yatākramam |
hutvā ca śaktito vidvān śāntitoyaṃ samāharet || 40 ||
[Analyze grammar]

tataścāgniṃ samānīya vaiṣṇavairmantravittamaiḥ |
hotavyamaṣṭadikṣvevaṃ samidbhirmūlavidyayā || 41 ||
[Analyze grammar]

palāśakhadirāśvatthaplakṣanyagrodhajāstathā |
kāśmaryo rohitāścaiva bilvodumbarajāḥ kramāt || 42 ||
[Analyze grammar]

dvādaśāṅgulamānāstāḥ samidhastu prakīrtitāḥ |
kaniṣṭhikāpramāṇāśca pṛthagaṣṭasahasrikāḥ || 43 ||
[Analyze grammar]

evaṃ kṛtvā diśāhomaṃ śāntivāri samāharet |
vaiṣṇave tāmrapātre tu sarvakumbhopasaṃbhṛtam || 44 ||
[Analyze grammar]

śatavāraṃ tu mūlena mantrayitvā'tha deśikaḥ |
aṣṭākṣarasya varṇaistu pūrayitvā pradakṣiṇam || 45 ||
[Analyze grammar]

praṇavena tu sampūjya gandhapuṣpairyathākramam |
karaguptaṃ tadādāya sapidhānaṃ savastrakam || 46 ||
[Analyze grammar]

dhyātvā'tra paramaṃ viṣṇuṃ tejorūpamanāmayam |
karmārcāyāstato mūrdhni siñcedomityudāharan || 47 ||
[Analyze grammar]

siktvā tu pratimāmūrdhni sarvatīrthamayaṃ jalam |
visṛjṭaya vāsasī pūrve vastrābhyāṃ chādayet punaḥ || 48 ||
[Analyze grammar]

gandhapuṣpādibhiḥ samyag yathāvibhavamarcayet |
uttiṣṭheti samutthāpya śaṅkhadundubhiniḥsvanaiḥ || 49 ||
[Analyze grammar]

pratimāmānayed vidvān prāsādasya pradakṣiṇam |
ato deveti sūktena mūrtipaiḥ sahito guruḥ || 50 ||
[Analyze grammar]

dvāradeśeṃ ca dattvā'rghyaṃ muhūrte śobhane tataḥ |
praveśayet prayatnena prāsādaṃ deśikottamaḥ || 51 ||
[Analyze grammar]

praveśyāntaryathā kiñcidadhaścorghvaṃ na saṃspṛśet |
pīṭhaṃ pradakṣiṇīkṛtya tataḥ sarveṇa vinyaset || 52 ||
[Analyze grammar]

dhyāyeśca paramaṃ viṣṇuṃ niṣkalaṃ mantravittamaḥ |
sulagne sthāpayed dhyātvā sarvatattvamayaṃ sudhīḥ || 53 ||
[Analyze grammar]

lokānugrahahetvarthaṃ sthirībhava sukhāya naḥ |
sānnidhyaṃ hi sadā deva pratyahaṃ parivardhaya || 54 ||
[Analyze grammar]

mā bhūt prajāvirodho'smin yajamānaḥ samṛddhayatām |
sabhūpālaṃ tathā rāṣṭraṃ sarvopadravavarjitam || 55 ||
[Analyze grammar]

kṣemeṇa vṛddhimatulāṃ sukhamakṣayamaśnutām |
ityuktvā'gre paṭheccāsya viśvataścakṣurityṛcam || 56 ||
[Analyze grammar]

sajīvakaraṇaṃ kṛtvā pañcopaniṣadā kramāt |
śāntiṃ hutvā yatānyāyaṃ devaṃ tamabhiṣecayet || 57 ||
[Analyze grammar]

dhyātvā tu niṣkalaṃ viṣṇuṃ sakalaṃ bhāvayettataḥ |
ākāśaṃ tasya mūrtiḥ syāt pṛthivī tasya pīṭhikā || 58 ||
[Analyze grammar]

vigrahaṃ kalpayet tasya tejasaḥ paramāṇubhiḥ |
tejomayaṃ tato dhyātvā śaṅkhacakragadādharam || 59 ||
[Analyze grammar]

mantranyāsaṃ tataḥ kuryāt sargasthityantabhedataḥ |
tejomayaṃ tato dhyātvā sakalaṃ sakaleśvaram || 60 ||
[Analyze grammar]

nirudhya praṇavenātha vibhaktendriyavigraham |
sarvaśaktisamāyuktaṃ sarvāvayavasundaram || 61 ||
[Analyze grammar]

pītāmbarakirīṭādiprojjvalaṃ projjvalāyudham |
arcayet sakalīkṛtya sāṅgaṃ sāvaraṇaṃ tataḥ || 62 ||
[Analyze grammar]

darśayitvā'tha mudrāṃ ca praṇamed daṇḍavat kṣitau |
brahmādiparivārāṃstu svanāmnā'strāṇi vinyaset || 63 ||
[Analyze grammar]

arcayitvā svamudrāśca darśayet pārṣadān pṛthak |
pūjayitvā tato devaṃ praṇamyāñjalimudrayā || 64 ||
[Analyze grammar]

japedaṣṭaśataṃ mūlamanujñāpya tamīśvaram |
nirgamyābhimukho bhūtvā puṣpatoyādisaṃyutam || 65 ||
[Analyze grammar]

dvāri caṇḍaṃ pracaṇḍaṃ ca devadauvārikāvubhau |
namontena svanāmnā tu sthāpayitvā baliṃ haret || 66 ||
[Analyze grammar]

vainateyamanantaṃ ca gaṇeśaṃ dakṣiṇeśvaram |
lokapālāṃśca saṃsthāpya viṣvaksenaṃ ca pūjayet || 67 ||
[Analyze grammar]

lepye'dhivāsya karmārcāṃ praveśya suramandiram |
iyaṃ sā deva te mūrtiromityuktvā'tra vinyaset || 68 ||
[Analyze grammar]

jīvanyāsādi sarvaṃ tu kartavyamiha pūrvavat |
snānādīni tu karmāṇi karmārcāyāṃ prayojayet || 69 ||
[Analyze grammar]

tattvanyāsādi sarvaṃ tu mūlārcāyāmiti sthitiḥ |
viṣṇupāriṣadān sarvān balipīṭhe prakalpya tu || 70 ||
[Analyze grammar]

upaspṛśya kṛtanyāsaḥ pravisyāntargṛhaṃ sudhīḥ |
mūlamaṣṭaśataṃ japtvā devaṃ tamabhivādayet || 71 ||
[Analyze grammar]

stotrairnānāvidhaiḥ stutvā mahāpuruṣapūrvaṃkaiḥ |
praṇāmamudrayā paścādaṣṭāṅgaṃ praṇipatya ca || 72 ||
[Analyze grammar]

nṛttaṃ gītaṃ ca vādyaṃ ca vividhaṃ kārayet tataḥ |
tatrānivāritaṃ yatnādannādyaṃ cāpi kārayet || 73 ||
[Analyze grammar]

ācāryaṃ pūjayet paścād dakṣiṇābhiḥ samūrtipam |
yāgopayogi yad dravyaṃ sarvaṃ cāsmai nivedayet || 74 ||
[Analyze grammar]

vaiṣṇavān pūjayet paścād yathāvibhavavistaram |
lākṣā sarjarasaḥ śaṅkhaḥ sikatā kuruvindakaḥ || 75 ||
[Analyze grammar]

puraṃ hiṅgulakaṃ boḷā phalakvāthena bandhanam |
vimalādyaṣṭakaṃ peṣyaṃ dravadravyamanugrahāḥ || 76 ||
[Analyze grammar]

navaśaktimayo bandho lakṣmīmādhavayorbhavet |
evaṃ kṛtvā'ṣṭabandhaṃ tu ghṛtādyaiḥ pañcaśaktibhiḥ || 77 ||
[Analyze grammar]

kāsyahṛdguhyapādeṣu kuryād dūrvābhirarpaṇam |
tataḥ sampūjya saṃhṛtya darbhairvastraiśca veṣṭayet || 78 ||
[Analyze grammar]

tithihomastu kartavyastathā tithyadhipasya ca |
ṛkṣahomo vārahomastaddevatyaśca mantriṇā || 79 ||
[Analyze grammar]

muhūrtadevatāhomo grahahomastathāparaḥ |
sampātaṃ yojayet tatra kalaśe tu punaḥ punaḥ || 80 ||
[Analyze grammar]

gururmūttidharaiḥ sārdhaṃ sampūjya kalaśaṃ tataḥ |
gṛhītvā snāpayed devaṃ kṛtvā puṇyāhamaṅgalam || 81 ||
[Analyze grammar]

vāditraśaṅkhanādaiśca jayaśabdaiśca saṃyutam |
vaiṣṇavaiśca tadā sūktairjayaśabdaiśca nādayet || 82 ||
[Analyze grammar]

gandhapuṣpaiśca vasvaiśca dhūpadīpaiśca pūjayet |
caturvidhaṃ nivedyaṃ ca tato devāya kalpayet || 83 ||
[Analyze grammar]

baliṃ ca vikired yatnād brāhmaṇaiḥ svasti vācayet |
evaṃ kṛte'tra tithyṛkṣavārarāśigrahodbhavāḥ || 84 ||
[Analyze grammar]

naśyanti sakalā doṣāstasmāt kāryaṃ tu sarvathā |
yajamānaṃ tataḥ paścād viṣṇukumbhajalena tu || 85 ||
[Analyze grammar]

snāpayitvā'rcanaṃ kuryādācāryaḥ svayameva ca |
tataḥ sa guruṇā sārdhaṃ patnyā putraistathā'nujaiḥ || 86 ||
[Analyze grammar]

sitavastradharo bhaktyā devaṃ tamabhivādayet |
tridhā kṛtvā'tmano vittaṃ bhāgaṃ devāya kalpayet || 87 ||
[Analyze grammar]

bhāgaṃ bhāryāsutādīnāṃ bhāgamācāryadakṣiṇām |
prītidānaṃ ca dātavyaṃ pūjopakaraṇāni ca || 88 ||
[Analyze grammar]

yo dadāti tadā kiñcit sarvaṃ buhaphalaṃ bhavet |
dhūpadīpādi saṃsthāpya devāgāraṃ tu ghaṭṭayet || 89 ||
[Analyze grammar]

noddhāṭayet tataḥ paścāt trīṇyahāni tu kaścana |
dakṣiṇānnādyahomaistu pūjā tatra vidhīyate || 90 ||
[Analyze grammar]

mantrasya prīṇanaṃ kuryāt sthāpite puruṣottame |
ghṛtena payasā dadhnā śuddhatoyena vā sakṛt || 91 ||
[Analyze grammar]