Chapter 15

atha pañcadaśaḥ paṭalaḥ ||
atha vakṣyāmi saṃkṣepāt pratiṣṭhāpañkaṃ kramāt |
parameṣṭhyādibhirmantraiḥ kartavyaṃ tu viśeṣataḥ || 1 ||
[Analyze grammar]

sthāpanāstāpanā caiva tathā saṃsthāpanā punaḥ |
prasthāpanā ca pañcoktāḥ pratiṣṭhāpanayā saha || 2 ||
[Analyze grammar]

sthitāsīnaśayānānāṃ yānagasya calasya ca |
yā kriyā pañcadhā proktā sā pratiṣṭheti kīrtitā || 3 ||
[Analyze grammar]

sthāne saumyā bhavenmūrtiḥ saumyāgnaiyī tathāsane |
āgne'yī śayane'nyatra yathākāmaṃ tu kalpayet || 4 ||
[Analyze grammar]

sāttvikī rājasī cāpi tāmasī ca yathākramāt |
sitā raktā'sitā mūrtiḥ śyāmā sarvatra vā bhavet || 5 ||
[Analyze grammar]

sthitā tu daivikī mūrttiḥ parasya paramātmanaḥ |
kiñcinmānuṣasaṃyuktā tvāsīnā'nyā samocyate || 6 ||
[Analyze grammar]

sthāne tu vyāpako viṣṇurvyāpyavyāpaka āsane |
vyāpyastu śayane jñeyaḥ savanatrayadevatāḥ || 7 ||
[Analyze grammar]

pārśvayorbrahmarudrābhyāmarkendubhyāṃ tadantike |
pṛṣṭhe śriyā sarasvatyā śāntyā ratyā ca pārśvayoḥ || 8 ||
[Analyze grammar]

varāhahayaśīrṣābhyāṃ tatpṛṣṭhe daśabhiḥ sthiḥ |
pārśve'jabhṛgudakṣaiśca rudrāgnimanubhistathā || 9 ||
[Analyze grammar]

sanatkumāraskandābhyāṃ śrīsthānasthitasiddhibhiḥ |
āsīnaścāmakhyagrakarābhirdvādaśāvṛtaḥ || 10 ||
[Analyze grammar]

pradyumnenāniruddhena nābhipadmasthitena ca |
pañcabhiḥ śayito'grasthamārkaṇḍeyamahīyutaḥ || 11 ||
[Analyze grammar]

tridhoktānāṃ tu sarveṣāmeṣāmanyatamān kramāt |
yānagasya parīvārān yathākāmaṃ prakalpayet || 12 ||
[Analyze grammar]

tathā dhanurgadācakraśaṅkhāsiśaralāṅgalaiḥ |
kheṭakena ca padmena vṛtaḥ sādhāraṇairbhate || 13 ||
[Analyze grammar]

caturbhujaḥ sthito deva āsīno'ṣṭabhujo bhavet |
śayānasyecchayā yojyā bhujāḥ sarvatra vecchayā || 14 ||
[Analyze grammar]

pañcopaniṣadastvetāḥ susūkṣmā devaśaktayaḥ |
pañcatanmātraśabdena kīrttitā vedavādibhiḥ || 15 ||
[Analyze grammar]

pañcaitāḥ saṃhatā yasmācchaktayaḥ sarvahetavaḥ |
pañcabhiryukta evābhiḥ sa sargādau pravartate || 16 ||
[Analyze grammar]

nigrahānugrahau cāpi karotīśaḥ svato'kriyaḥ |
sthāpanādiṣu sarvatra pūrṇaiśvaryastu nānyathā || 17 ||
[Analyze grammar]

guṇapradhānato bhedāt saṃhatāsveva śaktiṣu |
vibhāgaḥ pañcadhā jñeyo naikaśaḥ pṛthagāsthiteḥ || 18 ||
[Analyze grammar]

vicitrakāryakaraṇasambandho bhogakāraṇam |
ityanye śaktayaścāsya sakāryakaraṇāstathā || 19 ||
[Analyze grammar]

ataḥ pratiṣṭhānipuṇairācāryaistantrapāragaiḥ |
saṃhatāstāḥ prayoktavyā bimbaiśvaryaprasiddhaye || 20 ||
[Analyze grammar]

sthāpanādivibhāgaḥ syād bimbavinyāsajo'pyataḥ |
prādhānyakhyāpanārthaiva bhedoktiriti tadvidaḥ || 21 ||
[Analyze grammar]

pañcaśaktimaye sūkṣme dehe sādhāraṇe punaḥ |
mūrttayastasya mūlāṅgaviśeṣād bahudhā smṛtāḥ || 22 ||
[Analyze grammar]

vṛttāyate ca prāsāde caturaśrāyate tu vā |
sthāpyaṃ śayanamanyatra sthitāsīnayiyāsavaḥ || 23 ||
[Analyze grammar]

yatra vā tatra vā kāle pratiṣṭhā muktaye kṛtā |
uttare tvayane kāryā śuklapakṣe ca muktaye || 24 ||
[Analyze grammar]

punarvasvaśvinīśroṇapuṣyahastottaratraye |
revatīrohiṇīsvātībharaṇīṣu ca śasyate || 25 ||
[Analyze grammar]

pratipacca dvitīyā ca pañcamī ca trayodaśī |
daśamī paurṇamāsī ca dvādaśī tithayastvimāḥ || 26 ||
[Analyze grammar]

somo bṛhaspatiścaiva bhārgavo'tha budhastathā |
ete saumyagrahā yojyā vārodayanirīkṣaṇaiḥ || 27 ||
[Analyze grammar]

saptamānnavamād vā'pi prāgeva syācchubhe'hani |
pañcamād vā'ṅkurāropastrikālokṣārcanānvitaḥ || 28 ||
[Analyze grammar]

trividhaṃ pātramuddiṣṭaṃ maṅgalāṅkuraropaṇe |
pālikā ghaṭikā caiva śarāvaśceti bhedataḥ || 29 ||
[Analyze grammar]

viṣṇubrahmaśivādhīśā nirdoṣāḥ sarvakarmasu |
pratyekaṃ dvādaśa grāhyāḥ pālikāḥ ṣoḍaśaiva vā || 30 ||
[Analyze grammar]

pañcaviṃśāṅguloccāstāstadvaktraṃ ṣoḍaśāṅgulam |
ṣaḍaṅgulaṃ catuṣkoccaṃ pīṭhaṃ tatsandhiraṅgulam || 31 ||
[Analyze grammar]

ghaṭikāmānamaṅgulyaḥ ṣoḍaśa dvādaśaiva vā |
pañca vaktrāṇi dikṣūrdhvaṃ mitāni caturaṅgulaiḥ || 32 ||
[Analyze grammar]

pālikāpīṭhavat pīṭhaṃ nālaṃ tu caturaṅgulam |
tālāsyoccaṃ śarāvaṃ tu caturaṅgulapīṭhakam || 33 ||
[Analyze grammar]

triṣaṅkttīkṛtya pātrāṇi sugupte sthāna uttare |
agnyādīśānaparyantaṃ sthāpayitvā prayatnataḥ || 34 ||
[Analyze grammar]

mṛdvālukākarīṣaistu pūritānyuttarottaram |
dūrvādibhiralaṃkṛtya dhānyakūrcasthitāni ca || 35 ||
[Analyze grammar]

yavamudgatilavrīhimāṣaśimbakulusthakān |
priyaṅgusarṣapaśyāmarājamāṣāḍhakīyutān || 36 ||
[Analyze grammar]

dvādaśākṣaramantreṇa kṣālayecca śubhānimān |
puṇyāhaṃ vācayitvā'dau brāhmaṇaiḥ svasti vāṃcya ca || 37 ||
[Analyze grammar]

aṣṭākṣareṇa bījāni kramāt teṣu vinikṣipet |
prādakṣiṇyena pūrvoktakramādavahito guruḥ || 38 ||
[Analyze grammar]

jitaṃ te puṇḍarīkākṣa namaste viśvabhāvana |
subrahmaṇya namaste'stu namaḥ puruṣa pūrvaja || 39 ||
[Analyze grammar]

tritārakanamo'ntena tenaivaṃ savanatraye |
kūrcapāṇiḥ kramāt siñced gandhahāridravāriṇā || 40 ||
[Analyze grammar]

devatānāmabhistāni gandhapuṣpaiśca pūjayet |
pātrāṇāṃ devatāḥ proktā bījānāmadhunā śṛṇu || 41 ||
[Analyze grammar]

yavasarṣamudgeṣu brahmā rudro hariḥ kramāt |
vāyuḥ pūjyastu niṣpāve skandaścaiva priyaṅguke || 42 ||
[Analyze grammar]

māṣeṣvindraḥ kulusthe'gniḥ śāliṣvarko yamastile |
varuṇo rājamāṣe śrīrāḍhakyāṃ śyāmagaḥ śaśī || 43 ||
[Analyze grammar]

maṇḍaleṣu sakūrceṣu pūjayitvā'ṣṭadikkramāt |
rātrīśebhyo baliṃ dadyāt pārṣadāntaṃ jalānvitam || 44 ||
[Analyze grammar]

palalaṃ rajanīcūrṇaṃ salājaṃ dadhisaktukam |
bhūtakrūrabaliṃ dadyāt pūrvaṃ bhūtapraharṣaṇam || 45 ||
[Analyze grammar]

dvitīyaṃ paitṛkaṃ caiva dadyāt satilataṇḍulam |
dhānoḍumbikalājaistu tato yakṣabaliṃ haret || 46 ||
[Analyze grammar]

nālikerapayassaktuśālipiṣṭavimiśritam |
caturthaṃ niśi vai dadyāt tato nāgabaliṃ budhaḥ || 47 ||
[Analyze grammar]

pañcamaṃ tu baliṃ dadyāt brāhmaṃ padmākṣatairyutam |
carumā'pūpayuktena ṣaṣṭhaṃ śaivabaliṃ haret || 48 ||
[Analyze grammar]

gulānnaṃ vaiṣṇavaṃ caiva saptamaṃ tadanantaram |
pāyasaṃ kṛsaraṃ dadyādaṣṭamaṃ navamaṃ tathā || 49 ||
[Analyze grammar]

śuddhavāsāḥ śucirbhūtvā niyatātmā haviṣyabhuk |
pratirātraṃ baliṃ dadyāt tataḥ snānaṃ samācaret || 50 ||
[Analyze grammar]

prātaḥ karmadine dattvā paścāt karmaṇi yojayet |
praviśet gururevātra nānyaḥ ko'pi kathañcana || 51 ||
[Analyze grammar]

ucchiṣṭādyaśubhaṃ sarvaṃ varjayecca prayatnataḥ |
adattvā tu baliṃ tatra na kuryāt pālikākriyām || 52 ||
[Analyze grammar]

balyadāne tu naiṣphalyāt sarvathā'ṅkuraropaṇam |
balinā saha kartavyaṃ prayatnād diśikottamaiḥ || 53 ||
[Analyze grammar]

maṇḍape stambhamūleṣu dhānyayukteṣu vinyaset |
karmārambheṣu pātrāṇi samyagrūḍhāṅkurāṇi tu || 54 ||
[Analyze grammar]

śyāmeṣu dravyanāśaḥ syād rakteṣu kalaho dhruvam |
tiryaggateṣu rogaḥ syādaprarūḍhe mṛtirbhavet || 55 ||
[Analyze grammar]

śubhaṃ pīteṣu śukleṣu sameṣūrdhveṣvṛjuṣvapi |
tasmāt sarvaprayatnena sadā rakṣyāṇyatandritaiḥ || 56 ||
[Analyze grammar]

yadā'ṅkurāṇi rohanti tadāprabhṛti nityaśaḥ |
mārjanaṃ grāmavīthīnāṃ kṛtvā'sicya samantataḥ || 57 ||
[Analyze grammar]

nāstikonmattapāṣaṇḍipatitādīkṣitāśucīn |
tato nirvāsya yatnena yāgadravyāṇi saṃharet || 58 ||
[Analyze grammar]

prāsādasyāgrataḥ kṛtvā maṇḍapaṃ caturaśrakam |
caturdvāraṃ vitānādiśobhitaṃ suparicchadam || 59 ||
[Analyze grammar]

toraṇānyatha catvāri pañcahastocchritāni ca |
dhvajānaṣṭau patākāśca navamaṃ tārkṣyalakṣaṇam || 60 ||
[Analyze grammar]

prāsādavistarotsedhān daśadvārāyataṃ dhvajam |
ghaṭā haimādayo grāhyā mārttikā vā navāḥ śubhāḥ || 61 ||
[Analyze grammar]

lohajaṃ ca mahat pātraṃ kumbhaṃ droṇavahaṃ tathā |
prasthodvahāni catvāri carusthālīśca śobhanāḥ || 62 ||
[Analyze grammar]

ājyasthālīṃ praṇītāṃ ca samiddarbhakuśāṃstathā |
sauvarmarājate cānye pātre dve prasṛtodvahe || 63 ||
[Analyze grammar]

arghyādyarthāni cānyāni lauhānyabjanibhāni ca |
āyudhāni tathānyāni jātihemamayāni ca || 64 ||
[Analyze grammar]

kūrmaṃ garuḍamabjaṃ tu ratnāni vividhāni ca |
lohān dhātūṃśca bījāni darvīsruvajuhūsrucaḥ || 65 ||
[Analyze grammar]

mṛttikāghaṭikāḥ sūtrarajāṃsi kusumāni ca |
gandhaguggulutailāni dadhikṣīragulaṃ madhu || 66 ||
[Analyze grammar]

gavyaṃ ghṛtaṃ ca homārthaṃ gomayaṃ mūtrameva ca |
kambalājinakhaṭvāśca śayanaṃ ca navaṃ śubham || 67 ||
[Analyze grammar]

upadhānadvayopetaṃ sakapolasthaladvayam |
śuklāstaraṇasaṃyuktaṃ vastrāṇi vividhāni ca || 68 ||
[Analyze grammar]

savatsāṃ kapilāṃ caukāṃ hemaśṛṅgīṃ payasvinīm |
surabhīśca catasro'nyā dohanāni śubhāni ca || 69 ||
[Analyze grammar]

kaṣāyārthastvacaścaiva homadravyāṇi sarvaśaḥ |
bhūṣaṇāni ca ramyāṇī cakrikāpallavāṃstathā || 70 ||
[Analyze grammar]

dūrvādyoṣadhijātāni phalāni madhurāṇi ca |
mūlānyudvarttanādīni haimaṃ yajñopavītakam || 71 ||
[Analyze grammar]

maṅgalāni śubhānyaṣṭau kuṇḍikāṃ vardhanīṃ tathā |
śuṣkendhanāni dīpāṃśca sūtraṃ dhānyāni taṇḍulān || 72 ||
[Analyze grammar]

caturvidhaṃ tathā vādyaṃ gāyakān narttakāṃstathā |
viprān vedavidaḥ śāntān vaiṣṇavāṃstu viśeṣataḥ || 73 ||
[Analyze grammar]

śabdanyāyanimittajñān prayogjñāṃśca vaidikān |
muhūrttajñāṃśca kālajñān vratino mantrapāṭhakān || 74 ||
[Analyze grammar]

yatīṃśca vimalajñānāṃstakṣakāṃśca viśeṣataḥ |
uktānuktaṃ ca yat sarvaṃ kārye dṛṣṭvā tadāharet || 75 ||
[Analyze grammar]

yāgopakaraṇaṃ sarvaṃ sthānādi ca viśeṣataḥ |
sarvaṃ bhogena duṣṭaṃ syāt tasmāt sarvaṃ navaṃ śubham || 76 ||
[Analyze grammar]

malakṣālanamātreṇa śuddhirbhavati laukikī |
devapūjāsu śāstroktaṃ snānaṃ syāt kāyaśodhanam || 77 ||
[Analyze grammar]

lokasaṃvyavahāreṣu dharmaśāsrāntareṣu ca |
vihitāḥ śuddhayo grāhyā viṣṇubhaktena dhīmatā || 78 ||
[Analyze grammar]

khananādīni duṣṭāyāḥ śodhanāni vidurbhuvaḥ |
śuddhāmapi tu yāgārthaṃ gomayenopalepayet || 79 ||
[Analyze grammar]

tad dhenujaṃ navaṃ bhūsthaṃ kṣīrādyapi sugālitam |
ghṛtaṃ vilīnamutpūtaṃ sugandhīṣṭaṃ viśeṣataḥ || 80 ||
[Analyze grammar]

gāṃ liptvā'streṇa saṃvidhya hastaṃ prakṣālya sammṛśet |
prokṣyākṣataiḥ sasiddhārthaiḥ kiret tat sthānaśodhanam || 81 ||
[Analyze grammar]

toyena sāmlakalkena tāmraṃ haimaṃ tu vāriṇā |
rājataṃ gṛhadhūmena palālāṅgārakeṇa vā || 82 ||
[Analyze grammar]

lojataṃ bhasmanā śudhyecchaṅkhādi lavaṇena ca |
mṛdā'dbhiḥ phalapātrāṇi dāravāṇi tu takṣaṇāt || 83 ||
[Analyze grammar]

pārthivāni tu dāhena navānyevādadīta vā |
lepagandhāpanodena śuddhiḥ sarvasya kīrttivā || 84 ||
[Analyze grammar]

sakūrce gandhapuṣpāḍhye jale tārābhimantrite |
dhyātvā mantramayaṃ jyotiḥ prokṣaṇaṃ dravyaśodhanam || 85 ||
[Analyze grammar]

akṣārākaluṣaṃ śuddhaṃ bhūri nadyādisambhavam |
surasaṃ durjanāspṛṣṭamambhaḥ syāt sarvakarmasu || 86 ||
[Analyze grammar]

lauhī pātravadarcā'pi śodhyā cūrṇaistu śailajā |
śodhanaṃ dāravasyaivaṃ citrasya malahānataḥ || 87 ||
[Analyze grammar]

mārjanaṃ maṇijānāṃ tu dhātujānāṃ tu śailavat |
evaṃ saṃśodhya saṃhṛtya sṛṣṭvā'ṅgaiḥ sakalīkṛtam || 88 ||
[Analyze grammar]

śudhyatyasthāvaraṃ beraṃ sthāvaraṃ snapanādibhiḥ |
mārjanādeva śudhyanti kṣālanād vā kuśādayaḥ || 89 ||
[Analyze grammar]

sadarbhāsana āsīnaḥ pūjāsthānādadhaḥ sudhīḥ |
darbhapāṇiḥ sakūrcena vāriṇā mantratejasā || 90 ||
[Analyze grammar]

prokṣaṇācchodhayet sarvamātmānaṃ dāraṇādibhiḥ |
nyāsaśca praṇavo darbhāḥ praśastā mantraśodhane || 91 ||
[Analyze grammar]

āvṛttigaṇanaṃ mudrā dhyānaṃ ca parikīrtitam |
satyapriyahitairvāco jñānaṃ tuṣṭiśca cetasaḥ || 92 ||
[Analyze grammar]

sarveṣāmapi vijñeyā bhaktirekā viśodinī |
sthalajaṃ karavīrādi jalajaṃ kamalādi ca || 93 ||
[Analyze grammar]

avarjitaṃ navaṃ puṣpaṃ sugandhi vinivedayet |
yatkiñcit pītavarṇaṃ tu sitaṃ vā śucinā'hṛdatam || 94 ||
[Analyze grammar]

avastrāhṛtamamlānaṃ puṣpaṃ syād grāhyamāpādi |
sacchidraṃ mukulaṃ jīrṇaṃ patitaṃ pātravarjitam || 95 ||
[Analyze grammar]

bhuktaseṣamagandhaṃ ca keśakīṭādimiśritam |
puṣpamāpadyapi tyājyamarkapatragataṃ tathā || 96 ||
[Analyze grammar]

pratiṣiddhāni puṣpāṇi susnāto'pi yadi spṛśet |
snāyāt punaraśaktaścedupaspṛśyārcayet prabhum || 97 ||
[Analyze grammar]

svayaṃ patnyathavā putraḥ śiṣyo vā puṣpamāharet |
śuddhapāṇiḥ supātrasthaṃ pidhāyānātape nyaset || 98 ||
[Analyze grammar]

rātripuṣpairyajed rātrau divāpuṣpairdivā tathā |
āpatkāle yathāyogaṃ prāptakālaṃ tu śasyate || 99 ||
[Analyze grammar]

nirgandhamapi mandārapītakoraṇḍakādi yat |
praśastaṃ tadapi grāhyaṃ girikarṇyādivarjitam || 100 ||
[Analyze grammar]

dūrvāpāmārgabhadrāṇāṃ tṛlasīgandhapūrṇayoḥ |
tamālāśvatthabilvānāṃ śamyāḥ kuśapalāśayoḥ || 101 ||
[Analyze grammar]

patrāṇi dhātakībrāhmībhṛṅgāṇāmapi puṣpavat |
yavapriyaṅguniṣpāvamudgamāṣacaṇāṅkurān || 102 ||
[Analyze grammar]

susaṃbhṛtānalūnāgrān puṣpālābhe prakalpayet |
puṣpaṃ svārāmajaṃ mukhyaṃ madhyamaṃ vanyamāhṛtam || 103 ||
[Analyze grammar]

adhamaṃ krītamarcāyāṃ phalaṃ dātuḥ pratigrahe |
pṛthagvā saha vā piṣṭaiḥ sitāsrendurugāyasaiḥ || 104 ||
[Analyze grammar]

kṛtrimairvā'rcayad gandhaiḥ prāṇyaṅgarahitaiḥ śubhaiḥ |
sālasarjapurāṇāṃ vā dārusevyendvayorujām || 105 ||
[Analyze grammar]

dhūpamājyādisaṃyuktaṃ śubhe pātre nivedayet |
tailenājyena vā dīpaṃ dārusrehena vā'padi || 106 ||
[Analyze grammar]

sūtravarttiyutaṃ tadyādamukhāniladīpitam |
triḥ kṣālitairanutsvinnairamalaiḥ śālitaṇḍulaiḥ || 107 ||
[Analyze grammar]

śṛtaṃ ghṛtopadaṃśādiyutamannaṃ nivedayet |
kālapakvānyaduṣṭāni phalāni madhurāṇi ca || 108 ||
[Analyze grammar]

alābhe kevalaiḥ puṣpairjalairvā manasā'rcayet || 109 ||
[Analyze grammar]