Chapter 98

te dūtā rāmavākyena coditā laghuvikramāḥ |
prajagmurmadhurāṃ śīghraṃ cakrurvāsaṃ na cādhvani || 1 ||
[Analyze grammar]

tatastribhiraho rātraiḥ saṃprāpya madhurāmatha |
śatrughnāya yathāvṛttamācakhyuḥ sarvameva tat || 2 ||
[Analyze grammar]

lakṣmaṇasya parityāgaṃ pratijñāṃ rāghavasya ca |
putrayorabhiṣekaṃ ca paurānugamanaṃ tathā || 3 ||
[Analyze grammar]

kuśasya nagarī ramyā vindhyaparvatarodhasi |
kuśāvatīti nāmnā sā kṛtā rāmeṇa dhīmatā || 4 ||
[Analyze grammar]

śrāvitā ca purī ramyā śrāvatīti lavasya ca |
ayodhyāṃ vijanāṃ caiva bharataṃ rāghavānugam || 5 ||
[Analyze grammar]

evaṃ sarvaṃ nivedyāśu śatrughnāya mahātmane |
viremuste tato dūtāstvara rājanniti bruvan || 6 ||
[Analyze grammar]

śrutvā taṃ ghorasaṃkāśaṃ kulakṣayamupasthitam |
prakṛtīstu samānīya kāñcanaṃ ca purohitam || 7 ||
[Analyze grammar]

teṣāṃ sarvaṃ yathāvṛttamākhyāya raghunandanaḥ |
ātmanaśca viparyāsaṃ bhaviṣyaṃ bhrātṛbhiḥ saha || 8 ||
[Analyze grammar]

tataḥ putradvayaṃ vīraḥ so'bhyaṣiñcannarādhipaḥ |
subāhurmadhurāṃ lebhe śatrughātī ca vaidiśam || 9 ||
[Analyze grammar]

dvidhākṛtvā tu tāṃ senāṃ mādhurīṃ putrayordvayoḥ |
dhanadhānyasamāyuktau sthāpayāmāsa pārthivau || 10 ||
[Analyze grammar]

tato visṛjya rājānaṃ vaidiśe śatrughātinam |
jagāma tvarito'yodhyāṃ rathenaikena rāghavaḥ || 11 ||
[Analyze grammar]

sa dadarśa mahātmānaṃ jvalantamiva pāvakam |
kṣaumasūkṣmāmbaradharaṃ munibhiḥ sārdhamakṣayaiḥ || 12 ||
[Analyze grammar]

so'bhivādya tato rāmaṃ prāñjaliḥ prayatendriyaḥ |
uvāca vākyaṃ dharmajño dharmamevānucintayan || 13 ||
[Analyze grammar]

kṛtvābhiṣekaṃ sutayoryuktaṃ rāghavayordhanaiḥ |
tavānugamane rājan viddhi māṃ kṛtaniścayam || 14 ||
[Analyze grammar]

na cānyadatra vaktavyaṃ dustaraṃ tava śāsanam |
tyaktuṃ nārhasi māṃ vīra bhaktimantaṃ viśeṣataḥ || 15 ||
[Analyze grammar]

tasya tāṃ buddhimaklībāṃ vijñāya raghunandanaḥ |
bāḍhamityeva śatrughnaṃ rāmo vacanamabravīt || 16 ||
[Analyze grammar]

tasya vākyasya vākyānte vānarāḥ kāmarūpiṇaḥ |
ṛkṣarākṣasasaṃghāśca samāpeturanekaśaḥ || 17 ||
[Analyze grammar]

devaputrā ṛṣisutā gandharvāṇāṃ sutāstathā |
rāma kṣayaṃ viditvā te sarva eva samāgatāḥ || 18 ||
[Analyze grammar]

te rāmamabhivādyāhuḥ sarva eva samāgatāḥ |
tavānugamane rājan saṃprāptāḥ sma mahāyaśaḥ || 19 ||
[Analyze grammar]

yadi rāma vināsmābhirgacchestvaṃ puruṣarṣabha |
yamadaṇḍamivodyamya tvayā sma vinipātitāḥ || 20 ||
[Analyze grammar]

evaṃ teṣāṃ vacaḥ śrutvā ṛṣkavānararakṣasām |
vibhīṣaṇamathovāca madhuraṃ ślakṣṇayā girā || 21 ||
[Analyze grammar]

yāvat prajā dhariṣyanti tāvattvaṃ vai vibhīṣaṇa |
rākṣasendra mahāvīrya laṅkāsthaḥ svaṃ dhariṣyasi || 22 ||
[Analyze grammar]

prajāḥ saṃrakṣa dharmeṇa nottaraṃ vaktumarhasi || 23 ||
[Analyze grammar]

tamevamuktvā kākutstho hanūmantamathābravīt |
jīvite kṛtabuddhistvaṃ mā pratijñāṃ vilopaya || 24 ||
[Analyze grammar]

matkathāḥ pracariṣyanti yāval loke harīśvara |
tāvattvaṃ dhārayanprāṇānpratijñāmanupālaya || 25 ||
[Analyze grammar]

tathaivamuktvā kākutsthaḥ sarvāṃstānṛkṣavānarān |
mayā sārdhaṃ prayāteti tadā tān rāghavo'bravīt || 26 ||
[Analyze grammar]