Chapter 81

tathoktavati rāme tu tasya janma tadadbhutam |
uvāca lakṣmaṇo bhūyo bharataśca mahāyaśāḥ || 1 ||
[Analyze grammar]

sā priyā somaputrasya saṃvatsaramathoṣitā |
akarot kiṃ naraśreṣṭha tattvaṃ śaṃsitumarhasi || 2 ||
[Analyze grammar]

tayostadvākyamādhuryaṃ niśamya paripṛcchatoḥ |
rāmaḥ punaruvācemāṃ prajāpatisute kathām || 3 ||
[Analyze grammar]

puruṣatvaṃ gate śūre budhaḥ paramabuddhimān |
saṃvartaṃ paramodāramājuhāva mahāyaśāḥ || 4 ||
[Analyze grammar]

cyavanaṃ bhṛguputraṃ ca muniṃ cāriṣṭaneminam |
pramodanaṃ modakaraṃ tato durvāsasaṃ munim || 5 ||
[Analyze grammar]

etān sarvān samānīya vākyajñastattvadarśinaḥ |
uvāca sarvān suhṛdo dhairyeṇa susamāhitaḥ || 6 ||
[Analyze grammar]

ayaṃ rājā mahābāhuḥ kardamasya ilaḥ sutaḥ |
jānītainaṃ yathā bhūtaṃ śreyo hyasya vidhīyatām || 7 ||
[Analyze grammar]

teṣāṃ saṃvadatāmeva tamāśramamupāgamat |
kardamaḥ sumahātejā dvijaiḥ saha mahātmabhiḥ || 8 ||
[Analyze grammar]

pulastyaśca kratuścaiva vaṣaṭkārastathaiva ca |
oṃkāraśca mahātejāstamāśramamupāgaman || 9 ||
[Analyze grammar]

te sarve hṛṣṭamanasaḥ parasparasamāgame |
hitaiṣiṇo bāhli pateḥ pṛthagvākyamathābruvan || 10 ||
[Analyze grammar]

kardamastvabravīdvākyaṃ sutārthaṃ paramaṃ hitam |
dvijāḥ śṛṇuta madvākyaṃ yacchreyaḥ pārthivasya hi || 11 ||
[Analyze grammar]

nānyaṃ paśyāmi bhaiṣajyamantareṇa vṛṣadhvajam |
nāśvamedhāt paro yajñaḥ priyaścaiva mahātmanaḥ || 12 ||
[Analyze grammar]

tasmād yajāmahe sarve pārthivārthe durāsadam |
kardamenaivamuktāstu sarva eva dvijarṣabhāḥ |
rocayanti sma taṃ yajñaṃ rudrasyārādhanaṃ prati || 13 ||
[Analyze grammar]

saṃvartasya tu rājarṣiḥ śiṣyaḥ parapuraṃjayaḥ |
marutta iti vikhyātastaṃ yajñaṃ samupāharat || 14 ||
[Analyze grammar]

tato yajño mahānāsīdbudhāśramasamīpataḥ |
rudraśca paramaṃ toṣamājagāma mahāyaśāḥ || 15 ||
[Analyze grammar]

atha yajñasamāptau tu prītaḥ paramayā mudā |
umāpatirdvijān sarvānuvācedamilāṃ prati || 16 ||
[Analyze grammar]

prīto'smi hayamedhena bhaktyā ca dvijasattamāḥ |
asya bāhlipateścaiva kiṃ karomi priyaṃ śubham || 17 ||
[Analyze grammar]

tathā vadati deveśe dvijāste susamāhitāḥ |
prasādayanti deveśaṃ yathā syāt puruṣastvilā || 18 ||
[Analyze grammar]

tataḥ prītamanā rudraḥ puruṣatvaṃ dadau punaḥ |
ilāyai sumahātejā dattvā cāntaradhīyata || 19 ||
[Analyze grammar]

nivṛtte hayamedhe tu gate cādarśanaṃ hare |
yathāgataṃ dvijāḥ sarve agacchandīrghadarśinaḥ || 20 ||
[Analyze grammar]

rājā tu bāhlimutsṛjya madhyadeśe hyanuttamam |
niveśayāmāsa puraṃ pratiṣṭhānaṃ yaśaskaram || 21 ||
[Analyze grammar]

śaśabindustu rājāsīdbāhlyāṃ parapuraṃjayaḥ |
pratiṣṭhāna ilo rājā prajāpatisuto balī || 22 ||
[Analyze grammar]

sa kāle prāptavāṃl lokamilo brāhmamanuttamam |
ailaḥ purūravā rājā pratiṣṭhānamavāptavān || 23 ||
[Analyze grammar]

īdṛśo hyaśvamedhasya prabhāvaḥ puruṣarṣabhau |
strībhūtaḥ pauruṣaṃ lebhe yaccānyadapi durlabham || 24 ||
[Analyze grammar]