Chapter 69

bhuktvā tu bhāṣitaṃ vākyaṃ mama rāma śubhākṣaram |
prāñjaliḥ pratyuvācedaṃ sa svargī raghunandana || 1 ||
[Analyze grammar]

śṛṇu brahmanyathāvṛttaṃ mamaitat sukhaduḥkhayoḥ |
duratikramaṇīyaṃ hi yathā pṛcchasi māṃ dvija || 2 ||
[Analyze grammar]

purā vaidarbhako rājā pitā mama mahāyaśāḥ |
sudeva iti vikhyātastriṣu lokeṣu vīryavān || 3 ||
[Analyze grammar]

tasya putradvayaṃ brahmandvābhyāṃ strībhyāmajāyata |
ahaṃ śveta iti khyāto yavīyān suratho'bhavat || 4 ||
[Analyze grammar]

tataḥ pitari svaryāte paurā māmabhyaṣecayan |
tatrāhaṃ kṛtavān rājyaṃ dharmeṇa susamāhitaḥ || 5 ||
[Analyze grammar]

evaṃ varṣasahasrāṇi samatītāni suvrata |
rājyaṃ kārayato brahmanprajā dharmeṇa rakṣataḥ || 6 ||
[Analyze grammar]

so'haṃ nimitte kasmiṃścidvijñātāyurdvijottama |
kāladharmaṃ hṛdi nyasya tato vanamupāgamam || 7 ||
[Analyze grammar]

so'haṃ vanamidaṃ durgaṃ mṛgapakṣivivarjitam |
tapaścartuṃ praviṣṭo'smi samīpe sarasaḥ śubhe || 8 ||
[Analyze grammar]

bhrātaraṃ surathaṃ rājye abhiṣicya narādhipam |
idaṃ saraḥ samāsādya tapastaptaṃ mayā ciram || 9 ||
[Analyze grammar]

so'haṃ varṣasahasrāṇi tapastrīṇi mahāmune |
taptvā suduṣkaraṃ prāpto brahmalokamanuttamam || 10 ||
[Analyze grammar]

tato māṃ svargasaṃsthaṃ vai kṣutpipāse dvijottama |
bādhete paramodāra tato'haṃ vyathitendriyaḥ || 11 ||
[Analyze grammar]

gatvā tribhuvaṇaśreṣṭhaṃ pitāmahamuvāca ha |
bhagavanbrahmaloko'yaṃ kṣutpipāsāvivarjitaḥ || 12 ||
[Analyze grammar]

kasyeyaṃ karmaṇaḥ prāptiḥ kṣutpipāsāvaśo'smi yat |
āhāraḥ kaśca me deva tanme brūhi pitāmaha || 13 ||
[Analyze grammar]

pitāmahastu māmāha tavāhāraḥ sudevaja |
svādūni svāni māṃsāni tāni bhakṣaya nityaśaḥ || 14 ||
[Analyze grammar]

svaśarīraṃ tvayā puṣṭaṃ kurvatā tapa uttamam |
anuptaṃ rohate śveta na kadā cinmahāmate || 15 ||
[Analyze grammar]

dattaṃ na te'sti sūkṣmo'pi vane sattvaniṣevite |
tena svargagato vatsa bādhyase kṣutpipāsayā || 16 ||
[Analyze grammar]

sa tvaṃ supuṣṭamāhāraiḥ svaśarīramanuttamam |
bhakṣayasvāmṛtarasaṃ sā te tṛptirbhaviṣyati || 17 ||
[Analyze grammar]

yadā tu tadvanaṃ śveta agastyaḥ sumahānṛṣiḥ |
ākramiṣyati durdharṣastadā kṛcchādvimokṣyase || 18 ||
[Analyze grammar]

sa hi tārayituṃ saumya śaktaḥ suragaṇānapi |
kiṃ punastvāṃ mahābāho kṣutpipāsāvaśaṃ gatam || 19 ||
[Analyze grammar]

so'haṃ bhagavataḥ śrutvā devadevasya niścayam |
āhāraṃ garhitaṃ kurmi svaśarīraṃ dvijottama || 20 ||
[Analyze grammar]

bahūn varṣagaṇānbrahmanbhujyamānamidaṃ mayā |
kṣayaṃ nābhyeti brahmarṣe tṛptiścāpi mamottamā || 21 ||
[Analyze grammar]

tasya me kṛcchrabhūtasya kṛcchrādasmādvimokṣaya |
anyeṣāmagatirhyatra kumbhayonimṛte dvijam || 22 ||
[Analyze grammar]

idamābharaṇaṃ saumya tāraṇārthaṃ dvijottama |
pratigṛhṇīṣva brahmarṣe prasādaṃ kartumarhasi || 23 ||
[Analyze grammar]

tasyāhaṃ svargiṇo vākyaṃ śrutvā duḥkhasamanvitam |
tāraṇāyopajagrāha tadābharaṇamuttamam || 24 ||
[Analyze grammar]

mayā pratigṛhīte tu tasminnābharaṇe śubhe |
mānuṣaḥ pūrvako deho rājarṣeḥ sa nanāśa ha || 25 ||
[Analyze grammar]

pranaṣṭe tu śarīre'sau rājarṣiḥ parayā mudā |
tṛptaḥ pramudito rājā jagāma tridivaṃ punaḥ || 26 ||
[Analyze grammar]

tenedaṃ śakratulyena divyamābharaṇaṃ mama |
tasminnimitte kākutstha dattamadbhutadarśanam || 27 ||
[Analyze grammar]