Chapter 65

tathā tu karuṇaṃ tasya dvijasya paridevitam |
śuśrāva rāghavaḥ sarvaṃ duḥkhaśokasamanvitam || 1 ||
[Analyze grammar]

sa duḥkhena susaṃtapto mantriṇaḥ samupāhvayat |
vasiṣṭhaṃ vāmadevaṃ ca bhrātṝṃśca sahanaigamān || 2 ||
[Analyze grammar]

tato dvijā vasiṣṭhena sārdhamaṣṭau praveśitāḥ |
rājānaṃ devasaṃkāśaṃ vardhasveti tato'bruvan || 3 ||
[Analyze grammar]

mārkaṇḍeyo'tha maudgalyo vāmadevaśca kāśyapaḥ |
kātyāyano'tha jābālirgautamo nāradastathā || 4 ||
[Analyze grammar]

ete dvijarṣabhāḥ sarve āganeṣūpaveśitāḥ |
mantriṇo naigamāścaiva yathārhamanukūlataḥ || 5 ||
[Analyze grammar]

teṣāṃ samupaviṣṭānāṃ sarveṣāṃ dīptatejasām |
raghavaḥ sarvamācaṣṭe dvijo yasmāt praroditi || 6 ||
[Analyze grammar]

tasya tadvacanaṃ śrutvā rājño dīnasya nāradaḥ |
pratyuvāca śubhaṃ vākyamṛṣīṇāṃ saṃnidhau nṛpam || 7 ||
[Analyze grammar]

śṛṇu rājanyathākāle prāpto'yaṃ bālasaṃkṣayaḥ |
śrutvā kartavyatāṃ vīra kuruṣva raghunandana || 8 ||
[Analyze grammar]

purā kṛtayuge rāma brāhmaṇā vai tapasvinaḥ |
abrāhmaṇastadā rājanna tapasvī kathaṃ cana || 9 ||
[Analyze grammar]

tasminyuge prajvalite brahmabhūte anāvṛte |
amṛtyavastadā sarve jajñire dīrghadarśinaḥ || 10 ||
[Analyze grammar]

tatastretāyugaṃ nāma mānavānāṃ vapuṣmatām |
kṣatriyā yatra jāyante pūrveṇa tapasānvitāḥ || 11 ||
[Analyze grammar]

vīryeṇa tapasā caiva te'dhikāḥ pūrvajanmani |
mānavā ye mahātmānastasmiṃstretāyuge yuge || 12 ||
[Analyze grammar]

brahmakṣatraṃ tu tat sarvaṃ yat pūrvamaparaṃ ca yat |
yugayorubhayorāsīt samavīryasamanvitam || 13 ||
[Analyze grammar]

apaśyantastu te sarve viśeṣamadhikaṃ tataḥ |
sthāpanaṃ cakrire tatra cāturvarṇyasya sarvataḥ || 14 ||
[Analyze grammar]

adharmaḥ pādamekaṃ tu pātayat pṛthivītale |
adharmeṇa hi saṃyuktāstena mandābhavandvijāḥ || 15 ||
[Analyze grammar]

tataḥ prāduṣkṛtaṃ pūrvamāyuṣaḥ pariniṣṭhitam |
śubhānyevācaraṃl lokāḥ satyadharmaparāyaṇāḥ || 16 ||
[Analyze grammar]

tretāyuge tvavartanta brāhmaṇāḥ kṣatriyaśca ye |
tapo'tapyanta te sarve śuśrūṣāmapare janāḥ || 17 ||
[Analyze grammar]

sa dharmaḥ paramasteṣāṃ vaiśyaśūdramathāgamat |
pūjāṃ ca sarvavarṇānāṃ śūdrāścakrurviśeṣataḥ || 18 ||
[Analyze grammar]

tataḥ pādamadharmasya dvitīyamavatārayat |
tato dvāparasaṃkhyā sā yugasya samajāyata || 19 ||
[Analyze grammar]

tasmindvāparasaṃkhye tu vartamāne yugakṣaye |
adharmaścānṛtaṃ caiva vavṛdhe puruṣarṣabha || 20 ||
[Analyze grammar]

tasmindvāparasaṃkhyāte tapo vaiśyān samāviśat |
na śūdro labhate dharmamugraṃ taptaṃ nararṣabha || 21 ||
[Analyze grammar]

hīnavarṇo naraśreṣṭha tapyate sumahattapaḥ |
bhaviṣyā śūdrayonyāṃ hi tapaścaryā kalau yuge || 22 ||
[Analyze grammar]

adharmaḥ paramo rāma dvāpare śūdradhāritaḥ |
sa vai viṣayaparyante tava rājanmahātapāḥ |
śūdrastapyati durbuddhistena bālavadho hyayam || 23 ||
[Analyze grammar]

yo hyadharmamakāryaṃ vā viṣaye pārthivasya hi |
karoti rājaśārdūla pure vā durmatirnaraḥ |
kṣipraṃ hi narakaṃ yāti sa ca rājā na saṃśayaḥ || 24 ||
[Analyze grammar]

sa tvaṃ puruṣaśārdūla mārgasva viṣayaṃ svakam |
duṣkṛtaṃ yatra paśyethāstatra yatnaṃ samācara || 25 ||
[Analyze grammar]

evaṃ te dharmavṛddhiśca nṛṇāṃ cāyurvivardhanam |
bhaviṣyati naraśreṣṭha bālasyāsya ca jīvitam || 26 ||
[Analyze grammar]