Chapter 61

tacchrutvā bhāṣitaṃ tasya śatrughnasya mahātmanaḥ |
krodhamāhārayattīvraṃ tiṣṭha tiṣṭheti cābravīt || 1 ||
[Analyze grammar]

pāṇau pāṇiṃ viniṣpiṣya dantān kaṭakaṭāyya ca |
lavaṇo raghuśārdūlamāhvayāmāsa cāsakṛt || 2 ||
[Analyze grammar]

taṃ bruvāṇaṃ tathā vākyaṃ lavaṇaṃ ghoravikramam |
śatrughno deva śatrughna idaṃ vacanamabravīt || 3 ||
[Analyze grammar]

śatrughno na tadā jāto yadānye nirjitāstvayā |
tadadya bāṇābhihato vraja taṃ yamasādanam || 4 ||
[Analyze grammar]

ṛṣayo'pyadya pāpātmanmayā tvāṃ nihataṃ raṇe |
paśyantu viprā vidvāṃsastridaśā iva rāvaṇam || 5 ||
[Analyze grammar]

tvayi madbāṇanirdagdhe patite'dya niśācara |
puraṃ janapadaṃ cāpi kṣemametadbhaviṣyati || 6 ||
[Analyze grammar]

adya madbāhuniṣkrāntaḥ śaro vajranibhānanaḥ |
pravekṣyate te hṛdayaṃ padmamaṃśurivārkajaḥ || 7 ||
[Analyze grammar]

evamukto mahāvṛkṣaṃ lavaṇaḥ krodhamūrchitaḥ |
śatrughnorasi cikṣepa taṃ śūraḥ śatadhācchinat || 8 ||
[Analyze grammar]

taddṛṣṭvā viphalaṃ karma rākṣasaḥ punareva tu |
pādapān subahūn gṛhya śatrughne vyasṛjadbalī || 9 ||
[Analyze grammar]

śatrughnaścāpi tejasvī vṛkṣānāpatato bahūn |
tribhiścaturbhirekaikaṃ ciccheda nataparvabhiḥ || 10 ||
[Analyze grammar]

tato bāṇamayaṃ varṣaṃ vyasṛjad rākṣasorasi |
śatrughno vīryasaṃpanno vivyathe na ca rākṣasaḥ || 11 ||
[Analyze grammar]

tataḥ prahasya lavaṇo vṛkṣamutpāṭya līlayā |
śirasyabhyahanacchūraṃ srastāṅgaḥ sa mumoha vai || 12 ||
[Analyze grammar]

tasminnipatite vīre hāhākāro mahānabhūt |
ṛṣīṇāṃ deva saṃghānāṃ gandharvāpsarasāmapi || 13 ||
[Analyze grammar]

tamavajñāya tu hataṃ śatrughnaṃ bhuvi pātitam |
rakṣo labdhāntaramapi na viveśa svamālayam || 14 ||
[Analyze grammar]

nāpi śūlaṃ prajagrāha taṃ dṛṣṭvā bhuvi pātitam |
tato hata iti jñātvā tānbhakṣān samudāvahat || 15 ||
[Analyze grammar]

muhūrtāl labdhasaṃjñastu punastasthau dhṛtāyudhaḥ |
śatrughno rākṣasadvāri ṛṣibhiḥ saṃprapūjitaḥ || 16 ||
[Analyze grammar]

tato divyamamoghaṃ taṃ jagrāha śaramuttamam |
jvalantaṃ tejasā ghoraṃ pūrayantaṃ diśo daśa || 17 ||
[Analyze grammar]

vajrānanaṃ vajravegaṃ merumandara gauravam |
nataṃ parvasu sarveṣu saṃyugeṣvaparājitam || 18 ||
[Analyze grammar]

asṛkcandanadigdhāṅgaṃ cārupatraṃ patatriṇam |
dānavendrācalendrāṇāmasurāṇāṃ ca dāruṇam || 19 ||
[Analyze grammar]

taṃ dīptamiva kālāgniṃ yugānte samupasthite |
dṛṣṭvā sarvāṇi bhūtāni paritrāsamupāgaman || 20 ||
[Analyze grammar]

sadevāsuragandharvaṃ samuniṃ sāpsarogaṇam |
jagaddhi sarvamasvasthaṃ pitāmahamupasthitam || 21 ||
[Analyze grammar]

ūcuśca devadeveśaṃ varadaṃ prapitāmaham |
kaccil lokakṣayo deva prāpto vā yugasaṃkayaḥ || 22 ||
[Analyze grammar]

nedṛśaṃ dṛṣṭapūrvaṃ na śrutaṃ vā prapitāmaha |
devānāṃ bhayasaṃmoho lokānāṃ saṃkṣayaḥ prabho || 23 ||
[Analyze grammar]

teṣāṃ tadvacanaṃ śrutvā brahmā lokapitāmanaḥ |
bhayakāraṇamācaṣṭe devānāmabhayaṃkaraḥ || 24 ||
[Analyze grammar]

vadhāya lavaṇasyājau śaraḥ śatrughnadhāritaḥ |
tejasā yasya sarve sma saṃmūḍhāḥ surasattamāḥ || 25 ||
[Analyze grammar]

eṣo hi pūrvaṃ devasya lokakartuḥ sanātanaḥ |
śarastejomayo vatsā yena vai bhayamāgatam || 26 ||
[Analyze grammar]

eṣa vai kaiṭabhasyārthe madhunaśca mahāśaraḥ |
sṛṣṭo mahātmanā tena vadhārthaṃ daityayostayoḥ || 27 ||
[Analyze grammar]

evametaṃ prajānīdhvaṃ viṣṇostejomayaṃ śaram |
eṣā caiva tanuḥ pūrvā viṣṇostasya mahātmanaḥ || 28 ||
[Analyze grammar]

ito gacchatā paśyadhvaṃ vadhyamānaṃ mahātmanā |
rāmānujena vīreṇa lavaṇaṃ rākṣasottamam || 29 ||
[Analyze grammar]

tasya te devadevasya niśamya madhurāṃ giram |
ājagmuryatra yudhyete śatrughnalavaṇāv ubhau || 30 ||
[Analyze grammar]

taṃ śaraṃ divyasaṃkāśaṃ śatrughnakaradhāritam |
dadṛśuḥ sarvabhūtāni yugāntāgnimivotthitam || 31 ||
[Analyze grammar]

ākāśamāvṛtaṃ dṛṣṭvā devairhi raghunandanaḥ |
siṃhanādaṃ muhuḥ kṛtvā dadarśa lavaṇaṃ punaḥ || 32 ||
[Analyze grammar]

āhūtaśca tatastena śatrughnena mahātmanā |
lavaṇaḥ krodhasaṃyukto yuddhāya samupasthitaḥ || 33 ||
[Analyze grammar]

ākarṇāt sa vikṛṣyātha taddhanurdhanvināṃ varaḥ |
sa mumoca mahābāṇaṃ lavaṇasya mahorasi |
urastasya vidāryāśu praviveśa rasātalam || 34 ||
[Analyze grammar]

gatvā rasātalaṃ divyaṃ śaro vibudhapūjitaḥ |
punarevāgamattūrṇamikṣvākukulanandanam || 35 ||
[Analyze grammar]

śatrughnaśaranirbhinno lavaṇaḥ sa niśācaraḥ |
papāta sahasā bhūmau vajrāhata ivācalaḥ || 36 ||
[Analyze grammar]

tacca divyaṃ mahacchūlaṃ hate lavaṇarākṣase |
paśyatāṃ sarvabhūtānāṃ rudrasya vaśamanvagāt || 37 ||
[Analyze grammar]

ekeṣupātena bhayaṃ nihatya lokatrayasyāsya raghupravīraḥ |
vinirbabhāv udyatacāpabāṇastamaḥ praṇudyeva sahasraraśmiḥ || 38 ||
[Analyze grammar]