Chapter 59

atha rātryāṃ pravṛttāyāṃ śatrughno bhṛgunandanam |
papraccha cyavanaṃ vipraṃ lavaṇasya balābalam || 1 ||
[Analyze grammar]

śūlasya ca balaṃ brahman ke ca pūrvaṃ nipātitāḥ |
anena śūlamukhena dvandvayuddhamupāgatāḥ || 2 ||
[Analyze grammar]

tasya tadbhāṣitaṃ śrutvā śatrughnasya mahātmanaḥ |
pratyuvāca mahātejāścyavano raghunandanam || 3 ||
[Analyze grammar]

asaṃkhyeyāni karmāṇi yānyasya puruṣarṣabha |
ikṣvākuvaṃśaprabhave yadvṛttaṃ tacchṛṇuṣva me || 4 ||
[Analyze grammar]

ayodhyāyāṃ purā rājā yuvanāśvasuto balī |
māndhātā iti vikhyātastriṣu lokeṣu vīryavān || 5 ||
[Analyze grammar]

sa kṛtvā pṛthivīṃ kṛtsnāṃ śāsane pṛthivīpatiḥ |
suralokamatho jetumudyogamakaronnṛpaḥ || 6 ||
[Analyze grammar]

indrasya tu bhayaṃ tīvraṃ surāṇāṃ ca mahātmanām |
māndhātari kṛtodyoge devalokajigīṣayā || 7 ||
[Analyze grammar]

ardhāsanena śakrasya rājyārdhena ca pārthivaḥ |
vandyamānaḥ suragaṇaiḥ pratijñāmadhyarohata || 8 ||
[Analyze grammar]

tasya pāpamabhiprāyaṃ viditvā pākaśāsanaḥ |
sāntvapūrvamidaṃ vākyamuvāca yuvanāśvajam || 9 ||
[Analyze grammar]

rājā tvaṃ mānuṣe loke na tāvat puruṣarṣabha |
akṛtvā pṛthivīṃ vaśyāṃ devarājyamihecchasi || 10 ||
[Analyze grammar]

yadi vīra samagrā te medinī nikhilā vaśe |
devarājyaṃ kuruṣveha sabhṛtyabalavāhanaḥ || 11 ||
[Analyze grammar]

indramevaṃ bruvāṇaṃ tu māndhātā vākyamabravīt |
kva me śakra pratihataṃ śāsanaṃ pṛthivītale || 12 ||
[Analyze grammar]

tamuvāca sahasrākṣo lavaṇo nāma rākṣasaḥ |
madhuputro madhuvane nājñāṃ te kurute'nagha || 13 ||
[Analyze grammar]

tacchrutvā vipriyaṃ ghoraṃ sahasrākṣeṇa bhāṣitam |
vrīḍito'vāṅmukho rājā vyāhartuṃ na śaśāka ha || 14 ||
[Analyze grammar]

āmantrya tu sahasrākṣaṃ hriyā kiṃ cidavāṅmukhaḥ |
punarevāgamacchrīmānimaṃ lokaṃ nareśvaraḥ || 15 ||
[Analyze grammar]

sa kṛtvā hṛdaye'marṣaṃ sabhṛtyabalavāhanaḥ |
ājagāma madhoḥ putraṃ vaśe kartumaninditaḥ || 16 ||
[Analyze grammar]

sa kāṅkṣamāṇo lavaṇaṃ yuddhāya puruṣarṣabhaḥ |
dūtaṃ saṃpreṣayāmāsa sakāśaṃ lavaṇasya saḥ || 17 ||
[Analyze grammar]

sa gatvā vipriyāṇyāha bahūni madhunaḥ sutam |
vadantamevaṃ taṃ dūtaṃ bhakṣayāmāsa rākṣasaḥ || 18 ||
[Analyze grammar]

cirāyamāṇe dūte tu rājā krodhasamanvitaḥ |
ardayāmāsa tad rakṣaḥ śaravṛṣṭyā samantataḥ || 19 ||
[Analyze grammar]

tataḥ prahasya lavaṇaḥ śūlaṃ jagrāha pāṇinā |
vadhāya sānubandhasya mumocāyudhamuttamam || 20 ||
[Analyze grammar]

tacchūlaṃ dīpyamānaṃ tu sabhṛtyabalavāhanam |
bhasmīkṛtya nṛpaṃ bhūyo lavaṇasyāgamat karam || 21 ||
[Analyze grammar]

evaṃ sa rājā sumahān hataḥ sabalavāhanaḥ |
śūlasya ca balaṃ vīra aprameyamanuttamam || 22 ||
[Analyze grammar]

śvaḥ prabhāte tu lavaṇaṃ vadhiṣyasi na saṃśayaḥ |
agṛhītāyudhaṃ kṣipraṃ dhruvo hi vijayastava || 23 ||
[Analyze grammar]