Chapter 44

teṣāṃ samupaviṣṭānāṃ sarveṣāṃ dīnacetasām |
uvāca vākyaṃ kākutstho mukhena pariśuṣyatā || 1 ||
[Analyze grammar]

sarve śṛṇuta bhadraṃ vo mā kurudhvaṃ mano'nyathā |
paurāṇāṃ mama sītāyāṃ yādṛśī vartate kathā || 2 ||
[Analyze grammar]

paurāpavādaḥ sumahāṃstathā janapadasya ca |
vartate mayi bībhatsaḥ sa me marmāṇi kṛntati || 3 ||
[Analyze grammar]

ahaṃ kila kule jāta ikṣvākūṇāṃ mahātmanām |
sītāṃ pāpasamācārāmānayeyaṃ kathaṃ pure || 4 ||
[Analyze grammar]

jānāsi hi yathā saumya daṇḍake vijane vane |
rāvaṇena hṛtā sītā sa ca vidhvaṃsito mayā || 5 ||
[Analyze grammar]

pratyakṣaṃ tava saumitre devānāṃ havyavāhanaḥ |
apāpāṃ maithilīmāha vāyuścākāśagocaraḥ || 6 ||
[Analyze grammar]

candrādityau ca śaṃsete surāṇāṃ saṃnidhau purā |
ṛṣīṇāṃ caiva sarveṣāmapāpāṃ janakātmajām || 7 ||
[Analyze grammar]

evaṃ śuddhasamācārā devagandharvasaṃnidhau |
laṅkādvīpe mahendreṇa mama haste niveśitā || 8 ||
[Analyze grammar]

antarātmā ca me vetti sītāṃ śuddhāṃ yaśasvinīm |
tato gṛhītvā vaidehīmayodhyāmahamāgataḥ || 9 ||
[Analyze grammar]

ayaṃ tu me mahān vādaḥ śokaśca hṛdi vartate |
paurāpavādaḥ sumahāṃstathā janapadasya ca || 10 ||
[Analyze grammar]

akīrtiryasya gīyeta loke bhūtasya kasya cit |
patatyevādhamāṃl lokānyāvacchabdaḥ sa kīrtyate || 11 ||
[Analyze grammar]

akīrtirnindyate daivaiḥ kīrtirdeveṣu pūjyate |
kīrtyarthaṃ ca samārambhaḥ sarva eva mahātmanām || 12 ||
[Analyze grammar]

apyahaṃ jīvitaṃ jahyāṃ yuṣmān vā puruṣarṣabhāḥ |
apavādabhayādbhītaḥ kiṃ punarjanakātmajām || 13 ||
[Analyze grammar]

tasmādbhavantaḥ paśyantu patitaṃ śokasāgare |
na hi paśyāmyahaṃ bhūyaḥ kiṃ cidduḥkhamato'dhikam || 14 ||
[Analyze grammar]

śvastvaṃ prabhāte saumitre sumantrādhiṣṭhitaṃ ratham |
āruhya sītāmāropya viṣayānte samutsṛja || 15 ||
[Analyze grammar]

gaṅgāyāstu pare pāre vālmīkeḥ sumahātmanaḥ |
āśramo divyasaṃkāśastamasātīramāśritaḥ || 16 ||
[Analyze grammar]

tatraināṃ vijane kakṣe visṛjya raghunandana |
śīghramāgaccha saumitre kuruṣva vacanaṃ mama || 17 ||
[Analyze grammar]

na cāsmi prativaktavyaḥ sītāṃ prati kathaṃ cana |
aprītiḥ paramā mahyaṃ bhavettu prativārite || 18 ||
[Analyze grammar]

śāpitāśca mayā yūyaṃ bhujābhyāṃ jīvitena ca |
ye māṃ vākyāntare brūyuranunetuṃ kathaṃ cana || 19 ||
[Analyze grammar]

mānayantu bhavanto māṃ yadi macchāsane sthitāḥ |
ito'dya nīyatāṃ sītā kuruṣva vacanaṃ mama || 20 ||
[Analyze grammar]

pūrvamukto'hamanayā gaṅgātīre mahāśramān |
paśyeyamiti tasyāśca kāmaḥ saṃvartyatāmayam || 21 ||
[Analyze grammar]

evamuktvā tu kākutstho bāṣpeṇa pihitekṣaṇaḥ |
praviveśa sa dharmātmā bhrātṛbhiḥ parivāritaḥ || 22 ||
[Analyze grammar]