Chapter 36

tataḥ pitāmahaṃ dṛṣṭvā vāyuḥ putravadhārditaḥ |
śiśukaṃ taṃ samādāya uttasthau dhāturagrataḥ || 1 ||
[Analyze grammar]

calatkuṇḍalamaulisraktapanīyavibhūṣaṇaḥ |
pādayornyapatadvāyustisro'vasthāya vedhase || 2 ||
[Analyze grammar]

taṃ tu vedavidādyastu lambābharaṇaśobhinā |
vāyumutthāpya hastena śiśuṃ taṃ parimṛṣṭavān || 3 ||
[Analyze grammar]

spṛṣṭamātrastataḥ so'tha salīlaṃ padmajanmanā |
jalasiktaṃ yathā sasyaṃ punarjīvitamāptavān || 4 ||
[Analyze grammar]

prāṇavantamimaṃ dṛṣṭvā prāṇo gandhavaho mudā |
cacāra sarvabhūteṣu saṃniruddhaṃ yathāpurā || 5 ||
[Analyze grammar]

marudrogavinirmuktāḥ prajā vai muditābhavan |
śītavātavinirmuktāḥ padminya iva sāmbujāḥ || 6 ||
[Analyze grammar]

tatastriyugmastrikakuttridhāmā tridaśārcitaḥ |
uvāca devatā brahmā mārutapriyakāmyayā || 7 ||
[Analyze grammar]

bho mahendrāgnivaruṇadhaneśvaramaheśvarāḥ |
jānatāmapi tat sarvaṃ hitaṃ vakṣyāmi śrūyatām || 8 ||
[Analyze grammar]

anena śiśunā kāryaṃ kartavyaṃ vo bhaviṣyati |
dadatāsya varān sarve mārutasyāsya tuṣṭidān || 9 ||
[Analyze grammar]

tataḥ sahasranayanaḥ prītiraktaḥ śubhānanaḥ |
kuśe śayamayīṃ mālāṃ samutkṣipyedamabravīt || 10 ||
[Analyze grammar]

matkarotsṛṣṭavajreṇa hanurasya yathā kṣataḥ |
nāmnaiṣa kapiśārdūlo bhavitā hanumāniti || 11 ||
[Analyze grammar]

ahamevāsya dāsyāmi paramaṃ varamuttamam |
ataḥ prabhṛti vajrasya mamāvadhyo bhaviṣyati || 12 ||
[Analyze grammar]

mārtāṇḍastvabravīttatra bhagavāṃstimirāpahaḥ |
tejaso'sya madīyasya dadāmi śatikāṃ kalām || 13 ||
[Analyze grammar]

yadā tu śāstrāṇyadhyetuṃ śaktirasya bhaviṣyati |
tadāsya śāstraṃ dāsyāmi yena vāgmī bhaviṣyati || 14 ||
[Analyze grammar]

varuṇaśca varaṃ prādānnāsya mṛtyurbhaviṣyati |
varṣāyutaśatenāpi matpāśādudakādapi || 15 ||
[Analyze grammar]

yamo'pi daṇḍāvadhyatvamarogatvaṃ ca nityaśaḥ |
diśate'sya varaṃ tuṣṭa aviṣādaṃ ca saṃyuge || 16 ||
[Analyze grammar]

gadeyaṃ māmikā nainaṃ saṃyugeṣu vadhiṣyati |
ityevaṃ varadaḥ prāha tadā hyekākṣipiṅgalaḥ || 17 ||
[Analyze grammar]

matto madāyudhānāṃ ca na vadhyo'yaṃ bhaviṣyati |
ityevaṃ śaṃkareṇāpi datto'sya paramo varaḥ || 18 ||
[Analyze grammar]

sarveṣāṃ brahmadaṇḍānāmavadhyo'yaṃ bhaviṣyati |
dīrghāyuśca mahātmā ca iti brahmābravīdvacaḥ || 19 ||
[Analyze grammar]

viśvakarmā tu dṛṣṭvainaṃ bālasūryopamaṃ śiśum |
śilpināṃ pravaraḥ prāha varamasya mahāmatiḥ || 20 ||
[Analyze grammar]

vinirmitāni devānāmāyudhānīha yāni tu |
teṣāṃ saṃgrāmakāle tu avadhyo'yaṃ bhaviṣyati || 21 ||
[Analyze grammar]

tataḥ surāṇāṃ tu varairdṛṣṭvā hyenamalaṃkṛtam |
caturmukhastuṣṭamukho vāyumāha jagadguruḥ || 22 ||
[Analyze grammar]

amitrāṇāṃ bhayakaro mitrāṇāmabhayaṃkaraḥ |
ajeyo bhavitā te'tra putro mārutamārutiḥ || 23 ||
[Analyze grammar]

rāvaṇotsādanārthāni rāmaprītikarāṇi ca |
romaharṣakarāṇyeṣa kartā karmāṇi saṃyuge || 24 ||
[Analyze grammar]

evamuktvā tamāmantrya mārutaṃ te'maraiḥ saha |
yathāgataṃ yayuḥ sarve pitāmahapurogamāḥ || 25 ||
[Analyze grammar]

so'pi gandhavahaḥ putraṃ pragṛhya gṛhamānayat |
añjanāyāstamākhyāya varaṃ dattaṃ viniḥsṛtaḥ || 26 ||
[Analyze grammar]

prāpya rāma varāneṣa varadānabalānvitaḥ |
balenātmani saṃsthena so'pūryata yathārṇavaḥ || 27 ||
[Analyze grammar]

balenāpūryamāṇo hi eṣa vānarapuṃgavaḥ |
āśrameṣu maharṣīṇāmaparādhyati nirbhayaḥ || 28 ||
[Analyze grammar]

srugbhāṇḍānagnihotraṃ ca valkalānāṃ ca saṃcayān |
bhagnavicchinnavidhvastān suśāntānāṃ karotyayam || 29 ||
[Analyze grammar]

sarveṣāṃ brahmadaṇḍānāmavadhyaṃ brahmaṇā kṛtam |
jānanta ṛṣayastaṃ vai kṣamante tasya nityaśaḥ || 30 ||
[Analyze grammar]

yadā keṣariṇā tveṣa vāyunā sāñjanena ca |
pratiṣiddho'pi maryādāṃ laṅghayatyeva vānaraḥ || 31 ||
[Analyze grammar]

tato maharṣayaḥ kruddhā bhṛgvaṅgirasavaṃśajāḥ |
śepurenaṃ raghuśreṣṭha nātikruddhātimanyavaḥ || 32 ||
[Analyze grammar]

bādhase yat samāśritya balamasmānplavaṃgama |
taddīrghakālaṃ vettāsi nāsmākaṃ śāpamohitaḥ || 33 ||
[Analyze grammar]

tatastu hṛtatejaujā maharṣivacanaujasā |
eṣo śramāṇi nātyeti mṛdubhāvagataścaran || 34 ||
[Analyze grammar]

atha ṛkṣarajā nāma vālisugrīvayoḥ pitā |
sarvavānararājāsīttejasā iva bhāskaraḥ || 35 ||
[Analyze grammar]

sa tu rājyaṃ ciraṃ kṛtvā vānarāṇāṃ harīśvaraḥ |
tatastvarkṣarajā nāma kāladharmeṇa saṃgataḥ || 36 ||
[Analyze grammar]

tasminnastamite vālī mantribhirmantrakovidaiḥ |
pitrye pade kṛto rājā sugrīvo vālinaḥ pade || 37 ||
[Analyze grammar]

sugrīveṇa samaṃ tvasya advaidhaṃ chidravarjitam |
ahāryaṃ sakhyamabhavadanilasya yathāgninā || 38 ||
[Analyze grammar]

eṣa śāpavaśādeva na vedabalamātmanaḥ |
vālisugrīvayorvairaṃ yadā rāma samutthitam || 39 ||
[Analyze grammar]

na hyeṣa rāma sugrīvo bhrāmyamāṇo'pi vālinā |
vedayāno na ca hyeṣa balamātmani mārutiḥ || 40 ||
[Analyze grammar]

parākramotsāhamatipratāpaiḥ sauśīlyamādhuryanayānayaiśca |
gāmbhīryacāturyasuvīryadhairyairhanūmataḥ ko'pyadhiko'sti loke || 41 ||
[Analyze grammar]

asau purā vyākaraṇaṃ grahīṣyan sūryonmukhaḥ pṛṣṭhagamaḥ kapīndraḥ |
udyadgirerastagiriṃ jagāma granthaṃ mahaddhārayadaprameyaḥ || 42 ||
[Analyze grammar]

pravīvivikṣoriva sāgarasya lokāndidhakṣoriva pāvakasya |
lokakṣayeṣveva yathāntakasya hanūmataḥ sthāsyati kaḥ purastāt || 43 ||
[Analyze grammar]

eṣo'pi cānye ca mahākapīndrāḥ sugrīvamaindadvividāḥ sanīlāḥ |
satāratāreyanalāḥ sarambhāstvatkāraṇād rāma surairhi sṛṣṭāḥ || 44 ||
[Analyze grammar]

tadetat kathitaṃ sarvaṃ yanmāṃ tvaṃ paripṛcchasi |
hanūmato bālabhāve karmaitat kathitaṃ mayā || 45 ||
[Analyze grammar]

dṛṣṭaḥ saṃbhāṣitaścāsi rāma gacchamahe vayam |
evamuktvā gatāḥ sarve ṛṣayaste yathāgatam || 46 ||
[Analyze grammar]