Chapter 35

apṛcchata tato rāmo dakṣiṇāśālayaṃ munim |
prāñjalirvinayopeta idamāha vaco'rthavat || 1 ||
[Analyze grammar]

atulaṃ balametābhyāṃ vālino rāvaṇasya ca |
na tvetau hanumadvīryaiḥ samāviti matirmama || 2 ||
[Analyze grammar]

śauryaṃ dākṣyaṃ balaṃ dhairyaṃ prājñatā nayasādhanam |
vikramaśca prabhāvaśca hanūmati kṛtālayāḥ || 3 ||
[Analyze grammar]

dṛṣṭvodadhiṃ viṣīdantīṃ tadaiṣa kapivāhinīm |
samāśvāsya kapīnbhūyo yojanānāṃ śataṃ plutaḥ || 4 ||
[Analyze grammar]

dharṣayitvā purīṃ laṅkāṃ rāvaṇāntaḥpuraṃ tathā |
dṛṣṭvā saṃbhāṣitā cāpi sītā viśvāsitā tathā || 5 ||
[Analyze grammar]

senāgragā mantrisutāḥ kiṃkarā rāvaṇātmajaḥ |
ete hanumatā tatra ekena vinipātitāḥ || 6 ||
[Analyze grammar]

bhūyo bandhādvimuktena saṃbhāṣitvā daśānanam |
laṅkā bhasmīkṛtā tena pāvakeneva medinī || 7 ||
[Analyze grammar]

na kālasya na śakrasya na viṣṇorvittapasya ca |
karmāṇi tāni śrūyante yāni yuddhe hanūmataḥ || 8 ||
[Analyze grammar]

etasya bāhuvīryeṇa laṅkā sītā ca lakṣmaṇaḥ |
prāpto mayā jayaścaiva rājyaṃ mitrāṇi bāndhavāḥ || 9 ||
[Analyze grammar]

hanūmānyadi me na syādvānarādhipateḥ sakhā |
pravṛttamapi ko vettuṃ jānakyāḥ śaktimānbhavet || 10 ||
[Analyze grammar]

kimarthaṃ vālī caitena sugrīvapriyakāmyayā |
tadā vaire samutpanne na dagdho vīrudho yathā || 11 ||
[Analyze grammar]

na hi veditavānmanye hanūmānātmano balam |
yaddṛṣṭavāñjīviteṣṭaṃ kliśyantaṃ vānarādhipam || 12 ||
[Analyze grammar]

etanme bhagavan sarvaṃ hanūmati mahāmune |
vistareṇa yathātattvaṃ kathayāmarapūjita || 13 ||
[Analyze grammar]

rāghavasya vacaḥ śrutvā hetuyuktamṛṣistataḥ |
hanūmataḥ samakṣaṃ tamidaṃ vacanamabravīt || 14 ||
[Analyze grammar]

satyametad raghuśreṣṭha yadbravīṣi hanūmataḥ |
na bale vidyate tulyo na gatau na matau paraḥ || 15 ||
[Analyze grammar]

amoghaśāpaiḥ śāpastu datto'sya ṛṣibhiḥ purā |
na veditā balaṃ yena balī sannarimardanaḥ || 16 ||
[Analyze grammar]

bālye'pyetena yat karma kṛtaṃ rāma mahābala |
tanna varṇayituṃ śakyamatibālatayāsya te || 17 ||
[Analyze grammar]

yadi vāsti tvabhiprāyastacchrotuṃ tava rāghava |
samādhāya matiṃ rāma niśāmaya vadāmyaham || 18 ||
[Analyze grammar]

sūryadattavarasvarṇaḥ sumerurnāma parvataḥ |
yatra rājyaṃ praśāstyasya keṣarī nāma vai pitā || 19 ||
[Analyze grammar]

tasya bhāryā babhūveṣṭā hyañjaneti pariśrutā |
janayāmāsa tasyāṃ vai vāyurātmajamuttamam || 20 ||
[Analyze grammar]

śāliśūkasamābhāsaṃ prāsūtemaṃ tadāñjanā |
phalānyāhartukāmā vai niṣkrāntā gahane carā || 21 ||
[Analyze grammar]

eṣa māturviyogācca kṣudhayā ca bhṛśārditaḥ |
ruroda śiśuratyarthaṃ śiśuḥ śarabharāḍiva || 22 ||
[Analyze grammar]

tatodyantaṃ vivasvantaṃ japāpuṣpotkaropamam |
dadṛśe phalalobhācca utpapāta raviṃ prati || 23 ||
[Analyze grammar]

bālārkābhimukho bālo bālārka iva mūrtimān |
grahītukāmo bālārkaṃ plavate'mbaramadhyagaḥ || 24 ||
[Analyze grammar]

etasminplavamāne tu śiśubhāve hanūmati |
devadānavasiddhānāṃ vismayaḥ sumahānabhūt || 25 ||
[Analyze grammar]

nāpyevaṃ vegavān vāyurgaruḍo na manastathā |
yathāyaṃ vāyuputrastu kramate'mbaramuttamam || 26 ||
[Analyze grammar]

yadi tāvacchiśorasya īdṛśau gativikramau |
yauvanaṃ balamāsādya kathaṃ vego bhaviṣyati || 27 ||
[Analyze grammar]

tamanuplavate vāyuḥ plavantaṃ putramātmanaḥ |
sūryadāhabhayād rakṣaṃstuṣāracayaśītalaḥ || 28 ||
[Analyze grammar]

bahuyojanasāhasraṃ kramatyeṣa tato'mbaram |
piturbalācca bālyācca bhāskarābhyāśamāgataḥ || 29 ||
[Analyze grammar]

śiśureṣa tvadoṣajña iti matvā divākaraḥ |
kāryaṃ cātra samāyattamityevaṃ na dadāha saḥ || 30 ||
[Analyze grammar]

yameva divasaṃ hyeṣa grahītuṃ bhāskaraṃ plutaḥ |
tameva divasaṃ rāhurjighṛkṣati divākaram || 31 ||
[Analyze grammar]

anena ca parāmṛṣṭo rāma sūryarathopari |
apakrāntastatastrasto rāhuścandrārkamardanaḥ || 32 ||
[Analyze grammar]

sa indrabhavanaṃ gatvā saroṣaḥ siṃhikāsutaḥ |
abravīdbhrukuṭīṃ kṛtvā devaṃ devagaṇairvṛtam || 33 ||
[Analyze grammar]

bubhukṣāpanayaṃ dattvā candrārkau mama vāsava |
kimidaṃ tattvayā dattamanyasya balavṛtrahan || 34 ||
[Analyze grammar]

adyāhaṃ parvakāle tu jighṛkṣuḥ sūryamāgataḥ |
athānyo rāhurāsādya jagrāha sahasā ravim || 35 ||
[Analyze grammar]

sa rāhorvacanaṃ śrutvā vāsavaḥ saṃbhramānvitaḥ |
utpapātāsanaṃ hitvā udvahan kāñcanasrajam || 36 ||
[Analyze grammar]

tataḥ kailāsakūṭābhaṃ caturdantaṃ madasravam |
śṛṅgārakāriṇaṃ prāṃśuṃ svarṇaghaṇṭāṭṭahāsinam || 37 ||
[Analyze grammar]

indraḥ karīndramāruhya rāhuṃ kṛtvā puraḥsaram |
prāyād yatrābhavat sūryaḥ sahānena hanūmatā || 38 ||
[Analyze grammar]

athātirabhasenāgād rāhurutsṛjya vāsavam |
anena ca sa vai dṛṣṭa ādhāvañ śailakūṭavat || 39 ||
[Analyze grammar]

tataḥ sūryaṃ samutsṛjya rāhumevamavekṣya ca |
utpapāta punarvyoma grahītuṃ siṃhikāsutam || 40 ||
[Analyze grammar]

utsṛjyārkamimaṃ rāma ādhāvantaṃ plavaṃgamam |
dṛṣṭvā rāhuḥ parāvṛtya mukhaśeṣaḥ parāṅmukhaḥ || 41 ||
[Analyze grammar]

indramāśaṃsamānastu trātāraṃ siṃhikāsutaḥ |
indra indreti saṃtrāsānmuhurmuhurabhāṣata || 42 ||
[Analyze grammar]

rāhorvikrośamānasya prāgevālakṣitaḥ svaraḥ |
śrutvendrovāca mā bhaiṣīrayamenaṃ nihanmyaham || 43 ||
[Analyze grammar]

airāvataṃ tato dṛṣṭvā mahattadidamityapi |
phalaṃ taṃ hastirājānamabhidudrāva mārutiḥ || 44 ||
[Analyze grammar]

tadāsya dhāvato rūpamairāvatajighṛkṣayā |
muhūrtamabhavadghoramindrāgnyoriva bhāsvaram || 45 ||
[Analyze grammar]

evamādhāvamānaṃ tu nātikruddhaḥ śacīpatiḥ |
hastāntenātimuktena kuliśenābhyatāḍayat || 46 ||
[Analyze grammar]

tato girau papātaiṣa indravajrābhitāḍitaḥ |
patamānasya caitasya vāmo hanurabhajyata || 47 ||
[Analyze grammar]

tasmiṃstu patite bāle vajratāḍanavihvale |
cukrodhendrāya pavanaḥ prajānāmaśivāya ca || 48 ||
[Analyze grammar]

viṇmūtrāśayamāvṛtya prajāsvantargataḥ prabhuḥ |
rurodha sarvabhūtāni yathā varṣāṇi vāsavaḥ || 49 ||
[Analyze grammar]

vāyuprakopādbhūtāni nirucchvāsāni sarvataḥ |
saṃdhibhirbhajyamānāni kāṣṭhabhūtāni jajñire || 50 ||
[Analyze grammar]

niḥsvadhaṃ nirvaṣaṭkāraṃ niṣkriyaṃ dharmavarjitam |
vāyuprakopāttrailokyaṃ nirayasthamivābabhau || 51 ||
[Analyze grammar]

tataḥ prajāḥ sagandharvāḥ sadevāsuramānuṣāḥ |
prajāpatiṃ samādhāvannasukhārtāḥ sukhaiṣiṇaḥ || 52 ||
[Analyze grammar]

ūcuḥ prāñjalayo devā darodaranibhodarāḥ |
tvayā sma bhagavan sṛṣṭāḥ prajānātha caturvidhāḥ || 53 ||
[Analyze grammar]

tvayā datto'yamasmākamāyuṣaḥ pavanaḥ patiḥ |
so'smānprāṇeśvaro bhūtvā kasmādeṣo'dya sattama || 54 ||
[Analyze grammar]

rurodha duḥkhaṃ janayannantaḥpura iva striyaḥ |
tasmāttvāṃ śaraṇaṃ prāptā vāyunopahatā vibho || 55 ||
[Analyze grammar]

vāyusaṃrodhajaṃ duḥkhamidaṃ no nuda śatruhan || 56 ||
[Analyze grammar]

etat prajānāṃ śrutvā tu prajānāthaḥ prajāpatiḥ |
kāraṇāditi tānuktvā prajāḥ punarabhāṣata || 57 ||
[Analyze grammar]

yasmin vaḥ kāraṇe vāyuścukrodha ca rurodha ca |
prajāḥ śṛṇudhvaṃ tat sarvaṃ śrotavyaṃ cātmanaḥ kṣamam || 58 ||
[Analyze grammar]

putrastasyāmareśena indreṇādya nipātitaḥ |
rāhorvacanamājñāya rājñā vaḥ kopito'nilaḥ || 59 ||
[Analyze grammar]

aśarīraḥ śarīreṣu vāyuścarati pālayan |
śarīraṃ hi vinā vāyuṃ samatāṃ yāti reṇubhiḥ || 60 ||
[Analyze grammar]

vāyuḥ prāṇāḥ sukhaṃ vāyurvāyuḥ sarvamidaṃ jagat |
vāyunā saṃparityaktaṃ na sukhaṃ vindate jagat || 61 ||
[Analyze grammar]

adyaiva ca parityaktaṃ vāyunā jagadāyuṣā |
adyaiveme nirucchvāsāḥ kāṣṭhakuḍyopamāḥ sthitāḥ || 62 ||
[Analyze grammar]

tad yāmastatra yatrāste māruto rukprado hi vaḥ |
mā vināśaṃ gamiṣyāma aprasādyāditeḥ sutam || 63 ||
[Analyze grammar]

tataḥ prajābhiḥ sahitaḥ prajāpatiḥ sadevagandharvabhujaṃgaguhyakaḥ |
jagāma tatrāsyati yatra mārutaḥ sutaṃ surendrābhihataṃ pragṛhya saḥ || 64 ||
[Analyze grammar]

tato'rkavaiśvānarakāñcanaprabhaṃ sutaṃ tadotsaṅgagataṃ sadāgateḥ |
caturmukho vīkṣya kṛpāmathākarot sadevasiddharṣibhujaṃgarākṣasaḥ || 65 ||
[Analyze grammar]