Chapter 28

sumālinaṃ hataṃ dṛṣṭvā vasunā bhasmasātkṛtam |
vidrutaṃ cāpi svaṃ sainyaṃ lakṣayitvārditaṃ śaraiḥ || 1 ||
[Analyze grammar]

tataḥ sa balavān kruddho rāvaṇasya suto yudhi |
nivartya rākṣasān sarvānmeghanādo vyatiṣṭhata || 2 ||
[Analyze grammar]

sa rathenāgnivarṇena kāmagena mahārathaḥ |
abhidudrāva senāṃ tāṃ vanānyagniriva jvalan || 3 ||
[Analyze grammar]

tataḥ praviśatastasya vividhāyudhadhāriṇaḥ |
vidudruvurdiśaḥ sarvā devāstasya ca darśanāt || 4 ||
[Analyze grammar]

na tatrāvasthitaḥ kaścid raṇe tasya yuyutsataḥ |
sarvānāvidhya vitrastāndṛṣṭvā śakro'bhyabhāṣata || 5 ||
[Analyze grammar]

na bhetavyaṃ na gantavyaṃ nivartadhvaṃ raṇaṃ prati |
eṣa gacchati me putro yuddhārthamaparājitaḥ || 6 ||
[Analyze grammar]

tataḥ śakrasuto devo jayanta iti viśrutaḥ |
rathenādbhutakalpena saṃgrāmamabhivartata || 7 ||
[Analyze grammar]

tataste tridaśāḥ sarve parivārya śacīsutam |
rāvaṇasya sutaṃ yuddhe samāsādya vyavasthitāḥ || 8 ||
[Analyze grammar]

teṣāṃ yuddhaṃ mahadabhūt sadṛśaṃ devarakṣasām |
kṛte mahendraputrasya rākṣasendrasutasya ca || 9 ||
[Analyze grammar]

tato mātaliputre tu gomukhe rākṣasātmajaḥ |
sārathau pātayāmāsa śarān kāñcanabhūṣaṇān || 10 ||
[Analyze grammar]

śacīsutastvapi tathā jayantastasya sārathim |
taṃ caiva rāvaṇiṃ kruddhaḥ pratyavidhyad raṇājire || 11 ||
[Analyze grammar]

tataḥ kruddho mahātejā rakṣo visphāritekṣaṇaḥ |
rāvaṇiḥ śakraputraṃ taṃ śaravarṣairavākirat || 12 ||
[Analyze grammar]

tataḥ pragṛhya śastrāṇi sāravanti mahānti ca |
śataghnīstomarānprāsān gadākhaḍgaparaśvadhān |
sumahāntyadriśṛṅgāṇi pātayāmāsa rāvaṇiḥ || 13 ||
[Analyze grammar]

tataḥ pravyathitā lokāḥ saṃjajñe ca tamo mahat |
tasya rāvaṇaputrasya tadā śatrūnabhighnataḥ || 14 ||
[Analyze grammar]

tatastaddaivatabalaṃ samantāttaṃ śacīsutam |
bahuprakāramasvasthaṃ tatra tatra sma dhāvati || 15 ||
[Analyze grammar]

nābhyajānaṃstadānyonyaṃ śatrūn vā daivatāni vā |
tatra tatra viparyastaṃ samantāt paridhāvitam || 16 ||
[Analyze grammar]

etasminnantare śūraḥ pulomā nāma vīryavān |
daiteyastena saṃgṛhya śacīputro'pavāhitaḥ || 17 ||
[Analyze grammar]

gṛhītvā taṃ tu naptāraṃ praviṣṭaḥ sa mahodadhim |
mātāmaho'ryakastasya paulomī yena sā śacī || 18 ||
[Analyze grammar]

praṇāśaṃ dṛśya tu surā jayantasyātidāruṇam |
vyathitāścāprahṛṣṭāśca samantādvipradudruvuḥ || 19 ||
[Analyze grammar]

rāvaṇistvatha saṃhṛṣṭo balaiḥ parivṛtaḥ svakaiḥ |
abhyadhāvata devāṃstānmumoca ca mahāsvanam || 20 ||
[Analyze grammar]

dṛṣṭvā praṇāśaṃ putrasya rāvaṇeścāpi vikramam |
mātaliṃ prāha devendro rathaḥ samupanīyatām || 21 ||
[Analyze grammar]

sa tu divyo mahābhīmaḥ sajja eva mahārathaḥ |
upasthito mātalinā vāhyamāno manojavaḥ || 22 ||
[Analyze grammar]

tato meghā rathe tasmiṃstaḍidvanto mahāsvanāḥ |
agrato vāyucapalā gacchanto vyanadaṃstadā || 23 ||
[Analyze grammar]

nānāvādyāni vādyanta stutayaśca samāhitāḥ |
nanṛtuścāpsaraḥsaṃghāḥ prayāte vāsave raṇam || 24 ||
[Analyze grammar]

rudrairvasubhirādityaiḥ sādhyaiśca samarudgaṇaiḥ |
vṛto nānāpraharaṇairniryayau tridaśādhipaḥ || 25 ||
[Analyze grammar]

nirgacchatastu śakrasya paruṣaṃ pavano vavau |
bhāskaro niṣprabhaścāsīnmaholkāśca prapedire || 26 ||
[Analyze grammar]

etasminnantare śūro daśagrīvaḥ pratāpavān |
āruroha rathaṃ divyaṃ nirmitaṃ viśvakarmaṇā || 27 ||
[Analyze grammar]

pannagaiḥ sumahākāyairveṣṭitaṃ lomaharṣaṇaiḥ |
yeṣāṃ niśvāsavātena pradīptamiva saṃyugam || 28 ||
[Analyze grammar]

daityairniśācaraiḥ śūrai rathaḥ saṃparivāritaḥ |
samarābhimukho divyo mahendramabhivartata || 29 ||
[Analyze grammar]

putraṃ taṃ vārayitvāsau svayameva vyavasthitaḥ |
so'pi yuddhādviniṣkramya rāvaṇiḥ samupāviśat || 30 ||
[Analyze grammar]

tato yuddhaṃ pravṛttaṃ tu surāṇāṃ rākṣasaiḥ saha |
śastrābhivarṣaṇaṃ ghoraṃ meghānāmiva saṃyuge || 31 ||
[Analyze grammar]

kumbhakarṇastu duṣṭātmā nānāpraharaṇodyataḥ |
nājñāyata tadā yuddhe saha kenāpyayudhyata || 32 ||
[Analyze grammar]

dantairbhujābhyāṃ padbhyāṃ ca śaktitomarasāyakaiḥ |
yena kenaiva saṃrabdhastāḍayāmāsa vai surān || 33 ||
[Analyze grammar]

tato rudrairmahābhāgaiḥ sahādityairniśācaraḥ |
prayuddhastaiśca saṃgrāme kṛttaḥ śastrairnirantaram || 34 ||
[Analyze grammar]

tatastad rākṣasaṃ sainyaṃ tridaśaiḥ samarudgaṇaiḥ |
raṇe vidrāvitaṃ sarvaṃ nānāpraharaṇaiḥ śitaiḥ || 35 ||
[Analyze grammar]

ke cidvinihatāḥ śastrairveṣṭanti sma mahītale |
vāhaneṣvavasaktāśca sthitā evāpare raṇe || 36 ||
[Analyze grammar]

rathānnāgān kharānuṣṭrānpannagāṃsturagāṃstathā |
śiṃśumārān varāhāṃśca piśācavadanāṃstathā || 37 ||
[Analyze grammar]

tān samāliṅgya bāhubhyāṃ viṣṭabdhāḥ ke ciducchritāḥ |
devaistu śastrasaṃviddhā mamrire ca niśācarāḥ || 38 ||
[Analyze grammar]

citrakarma ivābhāti sa teṣāṃ raṇasaṃplavaḥ |
nihatānāṃ pramattānāṃ rākṣasānāṃ mahītale || 39 ||
[Analyze grammar]

śoṇitodaka niṣyandākaṅkagṛdhrasamākulā |
pravṛttā saṃyugamukhe śastragrāhavatī nadī || 40 ||
[Analyze grammar]

etasminnantare kruddho daśagrīvaḥ pratāpavān |
nirīkṣya tadbalaṃ sarvaṃ daivatairvinipātitam || 41 ||
[Analyze grammar]

sa taṃ prativigāhyāśu pravṛddhaṃ sainyasāgaram |
tridaśān samare nighnañ śakramevābhyavartata || 42 ||
[Analyze grammar]

tataḥ śakro mahaccāpaṃ visphārya sumahāsvanam |
yasya visphāraghoṣeṇa svananti sma diśo daśa || 43 ||
[Analyze grammar]

tadvikṛṣya mahaccāpamindro rāvaṇamūrdhani |
nipātayāmāsa śarānpāvakādityavarcasaḥ || 44 ||
[Analyze grammar]

tathaiva ca mahābāhurdaśagrīvo vyavasthitaḥ |
śakraṃ kārmukavibhraṣṭaiḥ śaravarṣairavākirat || 45 ||
[Analyze grammar]

prayudhyatoratha tayorbāṇavarṣaiḥ samantataḥ |
nājñāyata tadā kiṃ cit sarvaṃ hi tamasā vṛtam || 46 ||
[Analyze grammar]