Chapter 26

sa tu tatra daśagrīvaḥ saha sainyena vīryavān |
astaṃ prāpte dinakare nivāsaṃ samarocayat || 1 ||
[Analyze grammar]

udite vimale candre tulyaparvatavarcasi |
sa dadarśa guṇāṃstatra candrapādopaśobhitān || 2 ||
[Analyze grammar]

karṇikāravanairdivyaiḥ kadambagahanaistathā |
padminībhiśca phullābhirmandākinyā jalairapi || 3 ||
[Analyze grammar]

ghaṇṭānāmiva saṃnādaḥ śuśruve madhurasvanaḥ |
apsarogaṇasaṃghanāṃ gāyatāṃ dhanadālaye || 4 ||
[Analyze grammar]

puṣpavarṣāṇi muñcanto nagāḥ pavanatāḍitāḥ |
śailaṃ taṃ vāsayantīva madhumādhavagandhinaḥ || 5 ||
[Analyze grammar]

madhupuṣparajaḥpṛktaṃ gandhamādāya puṣkalam |
pravavau vardhayan kāmaṃ rāvaṇasya sukho'nilaḥ || 6 ||
[Analyze grammar]

geyāt puṣpasamṛddhyā ca śaityādvāyorguṇairgireḥ |
pravṛttāyāṃ rajanyāṃ ca candrasyodayanena ca || 7 ||
[Analyze grammar]

rāvaṇaḥ sumahāvīryaḥ kāmabāṇavaśaṃ gataḥ |
viniśvasya viniśvasya śaśinaṃ samavaikṣata || 8 ||
[Analyze grammar]

etasminnantare tatra divyapuṣpavibhūṣitā |
sarvāpsarovarā rambhā pūrṇacandranibhānanā || 9 ||
[Analyze grammar]

kṛtairviśeṣakairārdraiḥ ṣaḍartukusumotsavaiḥ |
nīlaṃ satoyameghābhaṃ vastraṃ samavaguṇṭhitā || 10 ||
[Analyze grammar]

yasya vaktraṃ śaśinibhaṃ bhruvau cāpanibhe śubhe |
ūrū karikarākārau karau pallavakomalau |
sainyamadhyena gacchantī rāvaṇenopalakṣitā || 11 ||
[Analyze grammar]

tāṃ samutthāya rakṣendraḥ kāmabāṇabalārditaḥ |
kare gṛhītvā gacchantīṃ smayamāno'bhyabhāṣata || 12 ||
[Analyze grammar]

kva gacchasi varārohe kāṃ siddhiṃ bhajase svayam |
kasyābhyudayakālo'yaṃ yastvāṃ samupabhokṣyate || 13 ||
[Analyze grammar]

tavānanarasasyādya padmotpalasugandhinaḥ |
sudhāmṛtarasasyeva ko'dya tṛptiṃ gamiṣyati || 14 ||
[Analyze grammar]

svarṇakumbhanibhau pīnau śubhau bhīru nirantarau |
kasyorasthalasaṃsparśaṃ dāsyataste kucāvimau || 15 ||
[Analyze grammar]

suvarṇacakrapratimaṃ svarṇadāmacitaṃ pṛthu |
adhyārokṣyati kaste'dya svargaṃ jaghanarūpiṇam || 16 ||
[Analyze grammar]

madviśiṣṭaḥ pumān ko'nyaḥ śakro viṣṇurathāśvinau |
māmatītya hi yasya tvaṃ yāsi bhīru na śobhanam || 17 ||
[Analyze grammar]

viśrama tvaṃ pṛthuśroṇi śilātalamidaṃ śubham |
trailokye yaḥ prabhuścaiva tulyo mama na vidyate || 18 ||
[Analyze grammar]

tadeṣa prāñjaliḥ prahvo yācate tvāṃ daśānanaḥ |
yaḥ prabhuścāpi bhartā ca trailokyasya bhajasva mām || 19 ||
[Analyze grammar]

evamuktābravīd rambhā vepamānā kṛtāñjaliḥ |
prasīda nārhase vaktumīdṛśaṃ tvaṃ hi me guruḥ || 20 ||
[Analyze grammar]

anyebhyo'pi tvayā rakṣyā prāpnuyāṃ dharṣaṇaṃ yadi |
dharmataśca snuṣā te'haṃ tattvametadbravīmi te || 21 ||
[Analyze grammar]

abravīttāṃ daśagrīvaścaraṇādhomukhīṃ sthitām |
sutasya yadi me bhāryā tatastvaṃ me snuṣā bhaveḥ || 22 ||
[Analyze grammar]

bāḍhamityeva sā rambhā prāha rāvaṇamuttaram |
dharmataste sutasyāhaṃ bhāryā rākṣasapuṃgava || 23 ||
[Analyze grammar]

putraḥ priyataraḥ prāṇairbhrāturvaiśravaṇasya te |
khyāto yastriṣu lokeṣu nalakūbara ityasau || 24 ||
[Analyze grammar]

dharmato yo bhavedvipraḥ kṣatriyo vīryato bhavet |
krodhād yaśca bhavedagniḥ kṣāntyā ca vasudhāsamaḥ || 25 ||
[Analyze grammar]

tasyāsmi kṛtasaṃketā lokapālasutasya vai |
tamuddiśya ca me sarvaṃ vibhūṣaṇamidaṃ kṛtam || 26 ||
[Analyze grammar]

yasya tasya hi nānyasya bhāvo māṃ prati tiṣṭhati |
tena satyena māṃ rājanmoktumarhasyariṃdama || 27 ||
[Analyze grammar]

sa hi tiṣṭhati dharmātmā sāmprataṃ matsamutsukaḥ |
tanna vighnaṃ sutasyeha kartumarhasi muñca mām || 28 ||
[Analyze grammar]

sadbhirācaritaṃ mārgaṃ gaccha rākṣasapuṃgava |
mānanīyo mayā hi tvaṃ lālanīyā tathāsmi te || 29 ||
[Analyze grammar]

evaṃ bruvāṇāṃ rambhāṃ tāṃ dharmārthasahitaṃ vacaḥ |
nirbhartsya rākṣaso mohāt pratigṛhya balādbalī |
kāmamohābhisaṃrabdho maithunāyopacakrame || 30 ||
[Analyze grammar]

sā vimuktā tato rambhā bhraṣṭamālyavibhūṣaṇā |
gajendrākrīḍamathitā nadīvākulatāṃ gatā || 31 ||
[Analyze grammar]

sā vepamānā lajjantī bhītā karakṛtāñjaliḥ |
nalakūbaramāsādya pādayornipapāta ha || 32 ||
[Analyze grammar]

tadavasthāṃ ca tāṃ dṛṣṭvā mahātmā nalakūbaraḥ |
abravīt kimidaṃ bhadre pādayoḥ patitāsi me || 33 ||
[Analyze grammar]

sā tu niśvasamānā ca vepamānātha sāñjaliḥ |
tasmai sarvaṃ yathātathyamākhyātumupacakrame || 34 ||
[Analyze grammar]

eṣa deva daśagrīvaḥ prāpto gantuṃ triviṣṭapam |
tena sainyasahāyena niśeha pariṇāmyate || 35 ||
[Analyze grammar]

āyāntī tena dṛṣṭāsmi tvatsakāśamariṃdama |
gṛhītvā tena pṛṣṭāsmi kasya tvamiti rakṣasā || 36 ||
[Analyze grammar]

mayā tu sarvaṃ yat satyaṃ taddhi tasmai niveditam |
kāmamohābhibhūtātmā nāśrauṣīttadvaco mama || 37 ||
[Analyze grammar]

yācyamāno mayā deva snuṣā te'hamiti prabho |
tat sarvaṃ pṛṣṭhataḥ kṛtvā balāttenāsmi dharṣitā || 38 ||
[Analyze grammar]

evaṃ tvamaparādhaṃ me kṣantumarhasi mānada |
na hi tulyaṃ balaṃ saumya striyāśca puruṣasya ca || 39 ||
[Analyze grammar]

evaṃ śrutvā tu saṃkruddhastadā vaiśvaraṇātmajaḥ |
dharṣaṇāṃ tāṃ parāṃ śrutvā dhyānaṃ saṃpraviveśa ha || 40 ||
[Analyze grammar]

tasya tat karma vijñāya tadā vaiśravaṇātmajaḥ |
muhūrtād roṣatāmrākṣastoyaṃ jagrāha pāṇinā || 41 ||
[Analyze grammar]

gṛhītvā salilaṃ divyamupaspṛśya yathāvidhi |
utsasarja tadā śāpaṃ rākṣasendrāya dāruṇam || 42 ||
[Analyze grammar]

akāmā tena yasmāttvaṃ balādbhadre pradharṣitā |
tasmāt sa yuvatīmanyāṃ nākāmāmupayāsyati || 43 ||
[Analyze grammar]

yadā tvakāmāṃ kāmārto dharṣayiṣyati yoṣitam |
mūrdhā tu saptadhā tasya śakalībhavitā tadā || 44 ||
[Analyze grammar]

tasminnudāhṛte śāpe jvalitāgnisamaprabhe |
devadundubhayo neduḥ puṣpavṛṣṭiśca khāccyutā || 45 ||
[Analyze grammar]

prajāpatimukhāścāpi sarve devāḥ praharṣitāḥ |
jñātvā lokagatiṃ sarvāṃ tasya mṛtyuṃ ca rakṣasaḥ || 46 ||
[Analyze grammar]

śrutvā tu sa daśagrīvastaṃ śāpaṃ romaharṣaṇam |
nārīṣu maithunaṃ bhāvaṃ nākāmāsvabhyarocayat || 47 ||
[Analyze grammar]