Chapter 24

nivartamānaḥ saṃhṛṣṭo rāvaṇaḥ sa durātmavān |
jahre pathi narendrarṣidevagandharvakanyakāḥ || 1 ||
[Analyze grammar]

darśanīyāṃ hi yāṃ rakṣaḥ kanyāṃ strīṃ vātha paśyati |
hatvā bandhujanaṃ tasyā vimāne saṃnyaveśayat || 2 ||
[Analyze grammar]

tatra pannagayakṣāṇāṃ mānuṣāṇāṃ ca rakṣasām |
daityānāṃ dānavānāṃ ca kanyā jagrāha rāvaṇaḥ || 3 ||
[Analyze grammar]

dīrghakeśyaḥ sucārvaṅgyaḥ pūrṇacandranibhānanāḥ |
śokāyattāstaruṇyaśca samastā stananamritāḥ || 4 ||
[Analyze grammar]

tulyamagnyarciṣāṃ tatra śokāgnibhayasaṃbhavam |
pravepamānā duḥkhārtā mumucurbāṣpajaṃ jalam || 5 ||
[Analyze grammar]

tāsāṃ niśvasamānānāṃ niśvasaiḥ saṃpradīpitam |
agnihotramivābhāti saṃniruddhāgnipuṣpakam || 6 ||
[Analyze grammar]

kā ciddadhyau suduḥkhārtā hanyādapi hi māmayam |
smṛtvā mātṝḥ pitṝnbhrātṝnputrān vai śvaśurānapi |
duḥkhaśokasamāviṣṭā vilepuḥ sahitāḥ striyaḥ || 7 ||
[Analyze grammar]

kathaṃ nu khalu me putraḥ kariṣyati mayā vinā |
kathaṃ mātā kathaṃ bhrātā nimagnāḥ śokasāgare || 8 ||
[Analyze grammar]

hā kathaṃ nu kariṣyāmi bhartāraṃ daivataṃ vinā |
mṛtyo prasīda yāce tvāṃ naya māṃ yamasādanam || 9 ||
[Analyze grammar]

kiṃ nu me duṣkṛtaṃ karma kṛtaṃ dehāntare purā |
tato'smi dharṣitānena patitā śokasāgare || 10 ||
[Analyze grammar]

na khalvidānīṃ paśyāmi duḥkhasyāntamihātmanaḥ |
aho dhinmānuṣāṃl lokānnāsti khalvadhamaḥ paraḥ || 11 ||
[Analyze grammar]

yaddurbalā balavatā bāndhavā rāvaṇena me |
uditenaiva sūryeṇa tārakā iva nāśitāḥ || 12 ||
[Analyze grammar]

aho subalavad rakṣo vadhopāyeṣu rajyate |
aho durvṛttamātmānaṃ svayameva na budhyate || 13 ||
[Analyze grammar]

sarvathā sadṛśastāvadvikramo'sya durātmanaḥ |
idaṃ tvasadṛśaṃ karma paradārābhimarśanam || 14 ||
[Analyze grammar]

yasmādeṣa parakhyāsu strīṣu rajyati durmatiḥ |
tasmāddhi strīkṛtenaiva vadhaṃ prāpsyati vāraṇaḥ || 15 ||
[Analyze grammar]

śaptaḥ strībhiḥ sa tu tadā hatatejāḥ suniṣprabha |
pativratābhiḥ sādhvībhiḥ sthitābhiḥ sādhu vartmani || 16 ||
[Analyze grammar]

evaṃ vilapamānāsu rāvaṇo rākṣasādhipaḥ |
praviveśa purīṃ laṅkāṃ pūjyamāno niśācaraiḥ || 17 ||
[Analyze grammar]

tato rākṣasarājasya svasā paramaduḥkhitā |
pādayoḥ patitā tasya vaktumevopacakrame || 18 ||
[Analyze grammar]

tataḥ svasāramutthāpya rāvaṇaḥ parisāntvayan |
abravīt kimidaṃ bhadre vaktumarhasi me drutam || 19 ||
[Analyze grammar]

sā bāṣpapariruddhākṣī rākṣasī vākyamabravīt |
hatāsmi vidhavā rājaṃstvayā balavatā kṛtā || 20 ||
[Analyze grammar]

ete viryāttvayā rājandaityā vinihatā raṇe |
kālakeyā iti khyātā mahābalaparākramāḥ || 21 ||
[Analyze grammar]

tatra me nihato bhartā garīyāñjīvitādapi |
sa tvayā dayitastatra bhrātrā śatrusamena vai || 22 ||
[Analyze grammar]

yā tvayāsmi hatā rājan svayameveha bandhunā |
duḥkhaṃ vaidhavyaśabdaṃ ca dattaṃ bhokṣyāmyahaṃ tvayā || 23 ||
[Analyze grammar]

nanu nāma tvayā rakṣyo jāmātā samareṣvapi |
taṃ nihatya raṇe rājan svayameva na lajjase || 24 ||
[Analyze grammar]

evamuktastayā rakṣo bhaginyā krośamānayā |
abravīt sāntvayitvā tāṃ sāmapūrvamidaṃ vacaḥ || 25 ||
[Analyze grammar]

alaṃ vatse viṣādena na bhetavyaṃ ca sarvaśaḥ |
mānadānaviśeṣaistvāṃ toṣayiṣyāmi nityaśaḥ || 26 ||
[Analyze grammar]

yuddhe pramatto vyākṣipto jayakāṅkṣī kṣipañ śarān |
nāvagacchāmi yuddheṣu svānparān vāpyahaṃ śubhe |
tenāsau nihataḥ saṃkhye mayā bhartā tava svasaḥ || 27 ||
[Analyze grammar]

asmin kāle tu yat prāptaṃ tat kariṣyāmi te hitam |
bhrāturaiśvaryasaṃsthasya kharasya bhava pārśvataḥ || 28 ||
[Analyze grammar]

caturdaśānāṃ bhrātā te sahasrāṇāṃ bhaviṣyati |
prabhuḥ prayāṇe dāne ca rākṣasānāṃ mahaujasām || 29 ||
[Analyze grammar]

tatra mātṛṣvasuḥ putro bhrātā tava kharaḥ prabhuḥ |
bhaviṣyati sadā kurvanyadvakṣyasi vacaḥ svayam || 30 ||
[Analyze grammar]

śīghraṃ gacchatvayaṃ śūro daṇḍakānparirakṣitum |
dūṣaṇo'sya balādhyakṣo bhaviṣyati mahābalaḥ || 31 ||
[Analyze grammar]

sa hi śapto vanoddeśaḥ kruddhenośanasā purā |
rākṣasānāmayaṃ vāso bhaviṣyati na saṃśayaḥ || 32 ||
[Analyze grammar]

evamuktvā daśagrīvaḥ sainyaṃ tasyādideśa ha |
caturdaśa sahasrāṇi rakṣasāṃ kāmarūpiṇām || 33 ||
[Analyze grammar]

sa taiḥ sarvaiḥ parivṛto rākṣasairghoradarśanaiḥ |
kharaḥ saṃprayayau śīghraṃ daṇḍakānakutobhayaḥ || 34 ||
[Analyze grammar]

sa tatra kārayāmāsa rājyaṃ nihatakaṇṭakam |
sā ca śūrpaṇakhā prītā nyavasaddaṇḍakāvane || 35 ||
[Analyze grammar]