Chapter 18

praviṣṭāyāṃ hutāśaṃ tu vedavatyāṃ sa rāvaṇaḥ |
puṣpakaṃ tat samāruhya paricakrāma medinīm || 1 ||
[Analyze grammar]

tato maruttaṃ nṛpatiṃ yajantaṃ saha daivataiḥ |
uśīrabījamāsādya dadarśa sa tu rākṣasaḥ || 2 ||
[Analyze grammar]

saṃvarto nāma brahmarṣirbhrātā sākṣādbṛhaspateḥ |
yājayāmāsa dharmajñaḥ sarvairbrahmagaṇairvṛtaḥ || 3 ||
[Analyze grammar]

dṛṣṭvā devāstu tad rakṣo varadānena durjayam |
tāṃ tāṃ yoniṃ samāpannāstasya dharṣaṇabhīravaḥ || 4 ||
[Analyze grammar]

indro mayūraḥ saṃvṛtto dharmarājastu vāyasaḥ |
kṛkalāso dhanādhyakṣo haṃso vai varuṇo'bhavat || 5 ||
[Analyze grammar]

taṃ ca rājānamāsādya rāvaṇo rākṣasādhipaḥ |
prāha yuddhaṃ prayacceti nirjito'smīti vā vada || 6 ||
[Analyze grammar]

tato marutto nṛpatiḥ ko bhavānityuvāca tam |
avahāsaṃ tato muktvā rākṣaso vākyamabravīt || 7 ||
[Analyze grammar]

akutūhalabhāvena prīto'smi tava pārthiva |
dhanadasyānujaṃ yo māṃ nāvagacchasi rāvaṇam || 8 ||
[Analyze grammar]

triṣu lokeṣu kaḥ so'sti yo na jānāti me balam |
bhrātaraṃ yena nirjitya vimānamidamāhṛtam || 9 ||
[Analyze grammar]

tato marutto nṛpatistaṃ rākṣasamathābravīt |
dhanyaḥ khalu bhavānyena jyeṣṭho bhrātā raṇe jitaḥ || 10 ||
[Analyze grammar]

nādharmasahitaṃ ślāghyaṃ na lokapratisaṃhitam |
karma daurātmyakaṃ kṛtvā ślāghase bhrātṛnirjayāt || 11 ||
[Analyze grammar]

kiṃ tvaṃ prākkevalaṃ dharmaṃ caritvā labdhavān varam |
śrutapūrvaṃ hi na mayā yādṛśaṃ bhāṣase svayam || 12 ||
[Analyze grammar]

tataḥ śarāsanaṃ gṛhya sāyakāṃśca sa pārthivaḥ |
raṇāya niryayau kruddhaḥ saṃvarto mārgamāvṛṇot || 13 ||
[Analyze grammar]

so'bravīt snehasaṃyuktaṃ maruttaṃ taṃ mahānṛṣiḥ |
śrotavyaṃ yadi madvākyaṃ saṃprahāro na te kṣamaḥ || 14 ||
[Analyze grammar]

māheśvaramidaṃ satramasamāptaṃ kulaṃ dahet |
dīkṣitasya kuto yuddhaṃ krūratvaṃ dīkṣite kutaḥ || 15 ||
[Analyze grammar]

saṃśayaśca raṇe nityaṃ rākṣasaścaiṣa durjayaḥ |
sa nivṛtto gurorvākyānmaruttaḥ pṛthivīpatiḥ |
visṛjya saśaraṃ cāpaṃ svastho makhamukho'bhavat || 16 ||
[Analyze grammar]

tatastaṃ nirjitaṃ matvā ghoṣayāmāsa vai śukaḥ |
rāvaṇo jitavāṃśceti harṣānnādaṃ ca muktavān || 17 ||
[Analyze grammar]

tānbhakṣayitvā tatrasthānmaharṣīnyajñamāgatān |
vitṛpto rudhiraisteṣāṃ punaḥ saṃprayayau mahīm || 18 ||
[Analyze grammar]

rāvaṇe tu gate devāḥ sendrāścaiva divaukasaḥ |
tataḥ svāṃ yonimāsādya tāni sattvānyathābruvan || 19 ||
[Analyze grammar]

harṣāttadābravīdindro mayūraṃ nīlabarhiṇam |
prīto'smi tava dharmajña upakārādvihaṃgama || 20 ||
[Analyze grammar]

mama netrasahasraṃ yattatte barhe bhaviṣyati |
varṣamāṇe mayi mudaṃ prāpsyase prītilakṣaṇam || 21 ||
[Analyze grammar]

nīlāḥ kila purā barhā mayūrāṇāṃ narādhipa |
surādhipādvaraṃ prāpya gatāḥ sarve vicitratām || 22 ||
[Analyze grammar]

dharmarājo'bravīd rāma prāgvaṃśe vāyasaṃ sthitam |
pakṣiṃstavāsmi suprītaḥ prītasya ca vacaḥ śṛṇu || 23 ||
[Analyze grammar]

yathānye vividhai rogaiḥ pīḍyante prāṇino mayā |
te na te prabhaviṣyanti mayi prīte na saṃśayaḥ || 24 ||
[Analyze grammar]

mṛtyutaste bhayaṃ nāsti varānmama vihaṃgama |
yāvattvāṃ na vadhiṣyanti narāstāvadbhaviṣyasi || 25 ||
[Analyze grammar]

ye ca madviṣayasthāstu mānavāḥ kṣudhayārditāḥ |
tvayi bhukte tu tṛptāste bhaviṣyanti sabāndhavāḥ || 26 ||
[Analyze grammar]

varuṇastvabravīddhaṃsaṃ gaṅgātoyavicāriṇam |
śrūyatāṃ prītisaṃyuktaṃ vacaḥ patraratheśvara || 27 ||
[Analyze grammar]

varṇo manoharaḥ saumyaścandramaṇḍalasaṃnibhaḥ |
bhaviṣyati tavodagraḥ śuklaphenasamaprabhaḥ || 28 ||
[Analyze grammar]

maccharīraṃ samāsādya kānto nityaṃ bhaviṣyasi |
prāpsyase cātulāṃ prītimetanme prītilakṣaṇam || 29 ||
[Analyze grammar]

haṃsānāṃ hi purā rāma na varṇaḥ sarvapāṇḍuraḥ |
pakṣā nīlāgrasaṃvītāḥ kroḍāḥ śaṣpāgranirmalāḥ || 30 ||
[Analyze grammar]

athābravīdvaiśravaṇaḥ kṛkalāsaṃ girau sthitam |
hairaṇyaṃ saṃprayacchāmi varṇaṃ prītistavāpyaham || 31 ||
[Analyze grammar]

sadravyaṃ ca śiro nityaṃ bhaviṣyati tavākṣayam |
eṣa kāñcanako varṇo matprītyā te bhaviṣyati || 32 ||
[Analyze grammar]

evaṃ dattvā varāṃstebhyastasminyajñotsave surāḥ |
nivṛtte saha rājñā vai punaḥ svabhavanaṃ gatāḥ || 33 ||
[Analyze grammar]