Chapter 17

atha rājanmahābāhurvicaran sa mahītalam |
himavadvanamāsādya paricakrāma rāvaṇaḥ || 1 ||
[Analyze grammar]

tatrāpaśyata vai kanyāṃ kṛṣṭājinajaṭādharām |
ārṣeṇa vidhinā yuktāṃ tapantīṃ devatāmiva || 2 ||
[Analyze grammar]

sa dṛṣṭvā rūpasaṃpannāṃ kanyāṃ tāṃ sumahāvratām |
kāmamohaparītātmā papraccha prahasanniva || 3 ||
[Analyze grammar]

kimidaṃ vartase bhadre viruddhaṃ yauvanasya te |
na hi yuktā tavaitasya rūpasyeyaṃ pratikriyā || 4 ||
[Analyze grammar]

kasyāsi duhitā bhadre ko vā bhartā tavānaghe |
pṛcchataḥ śaṃsa me śīghraṃ ko vā hetustapo'rjane || 5 ||
[Analyze grammar]

evamuktā tu sā kanyā tenānāryeṇa rakṣasā |
abravīdvidhivat kṛtvā tasyātithyaṃ tapodhanā || 6 ||
[Analyze grammar]

kuśadhvajo nāma pitā brahmarṣirmama dhārmikaḥ |
bṛhaspatisutaḥ śrīmānbuddhyā tulyo bṛhaspateḥ || 7 ||
[Analyze grammar]

tasyāhaṃ kurvato nityaṃ vedābhyāsaṃ mahātmanaḥ |
saṃbhūtā vānmayī kanyā nāmnā vedavatī smṛtā || 8 ||
[Analyze grammar]

tato devāḥ sagandharvā yakṣarākṣasapannagāḥ |
te cāpi gatvā pitaraṃ varaṇaṃ rocayanti me || 9 ||
[Analyze grammar]

na ca māṃ sa pitā tebhyo dattavān rākṣaseśvara |
kāraṇaṃ tadvadiṣyāmi niśāmaya mahābhuja || 10 ||
[Analyze grammar]

pitustu mama jāmātā viṣṇuḥ kila surottamaḥ |
abhipretastrilokeśastasmānnānyasya me pitāḥ || 11 ||
[Analyze grammar]

dātumicchati dharmātmā tacchrutvā baladarpitaḥ |
śambhurnāma tato rājā daityānāṃ kupito'bhavat |
tena rātrau prasupto me pitā pāpena hiṃsitaḥ || 12 ||
[Analyze grammar]

tato me jananī dīnā taccharīraṃ piturmama |
pariṣvajya mahābhāgā praviṣṭā dahanaṃ saha || 13 ||
[Analyze grammar]

tato manorathaṃ satyaṃ piturnārāyaṇaṃ prati |
karomīti mamecchā ca hṛdaye sādhu viṣṭhitā || 14 ||
[Analyze grammar]

ahaṃ pretagatasyāpi kariṣye kāṅkṣitaṃ pituḥ |
iti pratijñāmāruhya carāmi vipulaṃ tapaḥ || 15 ||
[Analyze grammar]

etatte sarvamākhyātaṃ mayā rākṣasapuṃgava |
āśritāṃ viddhi māṃ dharmaṃ nārāyaṇapatīcchayā || 16 ||
[Analyze grammar]

vijñātastvaṃ hi me rājan gaccha paulastyanandana |
jānāmi tapasā sarvaṃ trailokye yaddhi vartate || 17 ||
[Analyze grammar]

so'bravīd rāvaṇastatra tāṃ kanyāṃ sumahāvratām |
avaruhya vimānāgrāt kandarpaśarapīḍitaḥ || 18 ||
[Analyze grammar]

avaliptāsi suśroṇi yasyāste matirīdṛśī |
vṛddhānāṃ mṛgaśāvākṣi bhrājate dharmasaṃcayaḥ || 19 ||
[Analyze grammar]

tvaṃ sarvaguṇasaṃpannā nārhase kartumīdṛśam |
trailokyasundarī bhīru yauvane vārdhakaṃ vidhim || 20 ||
[Analyze grammar]

kaśca tāvadasau yaṃ tvaṃ viṣṇurityabhibhāṣase |
vīryeṇa tapasā caiva bhogena ca balena ca |
na mayāsau samo bhadre yaṃ tvaṃ kāmayase'ṅgane || 21 ||
[Analyze grammar]

ma maivamiti sā kanyā tamuvāca niśācaram |
mūrdhajeṣu ca tāṃ rakṣaḥ karāgreṇa parāmṛśat || 22 ||
[Analyze grammar]

tato vedavatī kruddhā keśān hastena sācchinat |
uvācāgniṃ samādhāya maraṇāya kṛtatvarā || 23 ||
[Analyze grammar]

dharṣitāyāstvayānārya nedānīṃ mama jīvitam |
rakṣastasmāt pravekṣyāmi paśyataste hutāśanam || 24 ||
[Analyze grammar]

yasmāttu dharṣitā cāhamapāpā cāpyanāthavat |
tasmāttava vadhārthaṃ vai samutpatsyāmyahaṃ punaḥ || 25 ||
[Analyze grammar]

na hi śakyaḥ striyā pāpa hantuṃ tvaṃ tu viśeṣataḥ |
śāpe tvayi mayotsṛṣṭe tapasaśca vyayo bhavet || 26 ||
[Analyze grammar]

yadi tvasti mayā kiṃ cit kṛtaṃ dattaṃ hutaṃ tathā |
tena hyayonijā sādhvī bhaveyaṃ dharmiṇaḥ sutā || 27 ||
[Analyze grammar]

evamuktvā praviṣṭā sā jvalantaṃ vai hutāśanam |
papāta ca divo divyā puṣpavṛṣṭiḥ samantataḥ || 28 ||
[Analyze grammar]

pūrvaṃ krodhahataḥ śatruryayāsau nihatastvayā |
samupāśritya śailābhaṃ tava vīryamamānuṣam || 29 ||
[Analyze grammar]

evameṣā mahābhāgā martyeṣūtpadyate punaḥ |
kṣetre halamukhagraste vedyāmagniśikhopamā || 30 ||
[Analyze grammar]

eṣā vedavatī nāma pūrvamāsīt kṛte yuge |
tretāyugamanuprāpya vadhārthaṃ tasya rakṣasaḥ |
sītotpanneti sītaiṣā mānuṣaiḥ punarucyate || 31 ||
[Analyze grammar]