Chapter 13

atha lokeśvarotsṛṣṭā tatra kālena kena cit |
nidrā samabhavattīvrā kumbhakarṇasya rūpiṇī || 1 ||
[Analyze grammar]

tato bhrātaramāsīnaṃ kumbhakarṇo'bravīdvacaḥ |
nidrā māṃ bādhate rājan kārayasva mamālayam || 2 ||
[Analyze grammar]

viniyuktāstato rājñā śilpino viśvakarmavat |
akurvan kumbhakarṇasya kailāsasamamālayam || 3 ||
[Analyze grammar]

vistīrṇaṃ yojanaṃ śubhraṃ tato dviguṇamāyatam |
darśanīyaṃ nirābādhaṃ kumbhakarṇasya cakrire || 4 ||
[Analyze grammar]

sphāṭikaiḥ kāñcanaiścitraiḥ stambhaiḥ sarvatra śobhitam |
vaidūryakṛtaśobhaṃ ca kiṅkiṇījālakaṃ tathā || 5 ||
[Analyze grammar]

dantatoraṇavinyastaṃ vajrasphaṭikavedikam |
sarvartusukhadaṃ nityaṃ meroḥ puṇyāṃ guhāmiva || 6 ||
[Analyze grammar]

tatra nidrāṃ samāviṣṭaḥ kumbhakarṇo niśācaraḥ |
bahūnyabdasahasrāṇi śayāno nāvabudhyate || 7 ||
[Analyze grammar]

nidrābhibhūte tu tadā kumbhakarṇe daśānanaḥ |
devarṣiyakṣagandharvānbādhate sma sa nityaśaḥ || 8 ||
[Analyze grammar]

udyānāni vicitrāṇi nandanādīni yāni ca |
tāni gatvā susaṃkruddho bhinatti sma daśānanaḥ || 9 ||
[Analyze grammar]

nadīṃ gaja iva krīḍan vṛkṣān vāyuriva kṣipan |
nagān vajra iva sṛṣṭo vidhvaṃsayati nityaśaḥ || 10 ||
[Analyze grammar]

tathā vṛttaṃ tu vijñāya daśagrīvaṃ dhaneśvaraḥ |
kulānurūpaṃ dharmajña vṛttaṃ saṃsmṛtya cātmanaḥ || 11 ||
[Analyze grammar]

saubhrātradarśanārthaṃ tu dūtaṃ vaiśvaraṇastadā |
laṅkāṃ saṃpreṣayāmāsa daśagrīvasya vai hitam || 12 ||
[Analyze grammar]

sa gatvā nagarīṃ laṅkāmāsasāda vibhīṣaṇam |
mānitastena dharmeṇa pṛṣṭhaścāgamanaṃ prati || 13 ||
[Analyze grammar]

pṛṣṭvā ca kuśalaṃ rājño jñātīnapi ca bāndhavān |
sabhāyāṃ darśayāmāsa tamāsīnaṃ daśānanam || 14 ||
[Analyze grammar]

sa dṛṣṭvā tatra rājānaṃ dīpyamānaṃ svatejasā |
jayena cābhisaṃpūjya tūṣṇīmāsīnmuhūrtakam || 15 ||
[Analyze grammar]

tasyopanīte paryaṅke varāstaraṇasaṃvṛte |
upaviśya daśagrīvaṃ dūto vākyamathābravīt || 16 ||
[Analyze grammar]

rājan vadāmi te sarvaṃ bhrātā tava yadabravīt |
ubhayoḥ sadṛśaṃ saumya vṛttasya ca kulasya ca || 17 ||
[Analyze grammar]

sādhu paryāptametāvat kṛtaścāritrasaṃgrahaḥ |
sādhu dharme vyavasthānaṃ kriyatāṃ yadi śakyate || 18 ||
[Analyze grammar]

dṛṣṭaṃ me nandanaṃ bhagnamṛṣayo nihatāḥ śrutāḥ |
devānāṃ tu samudyogastvatto rājañ śrutaśca me || 19 ||
[Analyze grammar]

nirākṛtaśca bahuśastvayāhaṃ rākṣasādhipa |
aparāddhā hi bālyācca rakṣaṇīyāḥ svabāndhavāḥ || 20 ||
[Analyze grammar]

ahaṃ tu himavatpṛṣṭhaṃ gato dharmamupāsitum |
raudraṃ vrataṃ samāsthāya niyato niyatendriyaḥ || 21 ||
[Analyze grammar]

tatra devo mayā dṛṣṭaḥ saha devyomayā prabhuḥ |
savyaṃ cakṣurmayā caiva tatra devyāṃ nipātitam || 22 ||
[Analyze grammar]

kā nviyaṃ syāditi śubhā na khalvanyena hetunā |
rūpaṃ hyanupamaṃ kṛtvā tatra krīḍati pārvatī || 23 ||
[Analyze grammar]

tato devyāḥ prabhāvena dagdhaṃ savyaṃ mamekṣaṇam |
reṇudhvastamiva jyotiḥ piṅgalatvamupāgatam || 24 ||
[Analyze grammar]

tato'hamanyadvistīrṇaṃ gatvā tasya girestaṭam |
pūrṇaṃ varṣaśatānyaṣṭau samavāpa mahāvratam || 25 ||
[Analyze grammar]

samāpte niyame tasmiṃstatra devo maheśvaraḥ |
prītaḥ prītena manasā prāha vākyamidaṃ prabhuḥ || 26 ||
[Analyze grammar]

prīto'smi tava dharmajña tapasānena suvrata |
mayā caitadvrataṃ cīrṇaṃ tvayā caiva dhanādhipa || 27 ||
[Analyze grammar]

tṛtīyaḥ puruṣo nāsti yaścaredvratamīdṛśam |
vrataṃ suduścaraṃ hyetanmayaivotpāditaṃ purā || 28 ||
[Analyze grammar]

tat sakhitvaṃ mayā sārdhaṃ rocayasva dhaneśvara |
tapasā nirjitatvāddhi sakhā bhava mamānagha || 29 ||
[Analyze grammar]

devyā dagdhaṃ prabhāvena yacca sāvyaṃ tavekṣaṇam |
ekākṣi piṅgaletyeva nāma sthāsyati śāśvatam || 30 ||
[Analyze grammar]

evaṃ tena sakhitvaṃ ca prāpyānujñāṃ ca śaṃkarāt |
āgamya ca śruto'yaṃ me tava pāpaviniścayaḥ || 31 ||
[Analyze grammar]

tadadharmiṣṭhasaṃyogānnivarta kuladūṣaṇa |
cintyate hi vadhopāyaḥ sarṣisaṃghaiḥ suraistava || 32 ||
[Analyze grammar]

evamukto daśagrīvaḥ kruddhaḥ saṃraktalocanaḥ |
hastāndantāṃś a saṃpīḍya vākyametaduvāca ha || 33 ||
[Analyze grammar]

vijñātaṃ te mayā dūta vākyaṃ yattvaṃ prabhāṣase |
naiva tvamasi naivāsau bhrātrā yenāsi preṣitaḥ || 34 ||
[Analyze grammar]

hitaṃ na sa mamaitaddhi bravīti dhanarakṣakaḥ |
maheśvarasakhitvaṃ tu mūḍha śrāvayase kila || 35 ||
[Analyze grammar]

na hantavyo gururjyeṣṭho mamāyamiti manyate |
tasya tvidānīṃ śrutvā me vākyameṣā kṛtā matiḥ || 36 ||
[Analyze grammar]

trīṃl lokānapi jeṣyāmi bāhuvīryamupāśritaḥ |
etanmuhūrtameṣo'haṃ tasyaikasya kṛte ca vai |
caturo lokapālāṃstānnayiṣyāmi yamakṣayam || 37 ||
[Analyze grammar]

evamuktvā tu laṅkeśo dūtaṃ khaḍgena jaghnivān |
dadau bhakṣayituṃ hyenaṃ rākṣasānāṃ durātmanām || 38 ||
[Analyze grammar]

tataḥ kṛtasvastyayano rathamāruhya rāvaṇaḥ |
trailokyavijayākāṅkṣī yayau tatra dhaneśvaraḥ || 39 ||
[Analyze grammar]