Chapter 11

sumālī varalabdhāṃstu jñātvā tān vai niśācarān |
udatiṣṭhadbhayaṃ tyaktvā sānugaḥ sa rasātalāt || 1 ||
[Analyze grammar]

mārīcaśca prahastaśca virūpākṣo mahodaraḥ |
udatiṣṭhan susaṃrabdhāḥ sacivāstasya rakṣasaḥ || 2 ||
[Analyze grammar]

sumālī caiva taiḥ sarvairvṛto rākṣasapuṃgavaiḥ |
abhigamya daśagrīvaṃ pariṣvajyedamabravīt || 3 ||
[Analyze grammar]

diṣṭyā te putrasaṃprāptaścintito'yaṃ manorathaḥ |
yastvaṃ tribhuvaṇaśreṣṭhāl labdhavān varamīdṛśam || 4 ||
[Analyze grammar]

yatkṛte ca vayaṃ laṅkāṃ tyaktvā yātā rasātalam |
tadgataṃ no mahābāho mahadviṣṇukṛtaṃ bhayam || 5 ||
[Analyze grammar]

asakṛttena bhagnā hi parityajya svamālayam |
vidrutāḥ sahitāḥ sarve praviṣṭāḥ sma rasātalam || 6 ||
[Analyze grammar]

asmadīyā ca laṅkeyaṃ nagarī rākṣasoṣitā |
niveśitā tava bhrātrā dhanādhyakṣeṇa dhīmatā || 7 ||
[Analyze grammar]

yadi nāmātra śakyaṃ syāt sāmnā dānena vānagha |
tarasā vā mahābāho pratyānetuṃ kṛtaṃ bhavet || 8 ||
[Analyze grammar]

tvaṃ ca laṅkeśvarastāta bhaviṣyasi na saṃśayaḥ |
sarveṣāṃ naḥ prabhuścaiva bhaviṣyasi mahābala || 9 ||
[Analyze grammar]

athābravīddaśagrīvo mātāmahamupasthitam |
vitteśo gururasmākaṃ nārhasyevaṃ prabhāṣitum || 10 ||
[Analyze grammar]

uktavantaṃ tathā vākyaṃ daśagrīvaṃ niśācaraḥ |
prahastaḥ praśritaṃ vākyamidamāha sakāraṇam || 11 ||
[Analyze grammar]

daśagrīva mahābāho nārhastvaṃ vaktumīdṛśam |
saubhrātraṃ nāsti śūrāṇāṃ śṛṇu cedaṃ vaco mama || 12 ||
[Analyze grammar]

aditiśca ditiścaiva bhaginyau sahite kila |
bhārye paramarūpiṇyau kaśyapasya prajāpateḥ || 13 ||
[Analyze grammar]

aditirjanayāmāsa devāṃstribhuvaṇeśvarān |
ditistvajanayaddaityān kaśyapasyātmasaṃbhavān || 14 ||
[Analyze grammar]

daityānāṃ kila dharmajña pureyaṃ savanārṇavā |
saparvatā mahī vīra te'bhavanprabhaviṣṇavaḥ || 15 ||
[Analyze grammar]

nihatya tāṃstu samare viṣṇunā prabhaviṣṇunā |
devānāṃ vaśamānītaṃ trailokyamidamavyayam || 16 ||
[Analyze grammar]

naitadeko bhavāneva kariṣyati viparyayam |
surairācaritaṃ pūrvaṃ kuruṣvaitadvaco mama || 17 ||
[Analyze grammar]

evamukto daśagrīvaḥ prahastena durātmanā |
cintayitvā muhūrtaṃ vai bāḍhamityeva so'bravīt || 18 ||
[Analyze grammar]

sa tu tenaiva harṣeṇa tasminnahani vīryavān |
vanaṃ gato daśagrīvaḥ saha taiḥ kṣaṇadācaraiḥ || 19 ||
[Analyze grammar]

trikūṭasthaḥ sa tu tadā daśagrīvo niśācaraḥ |
preṣayāmāsa dautyena prahastaṃ vākyakovidam || 20 ||
[Analyze grammar]

prahasta śīghraṃ gatvā tvaṃ brūhi nairṛtapuṃgavam |
vacanānmama vitteśaṃ sāmapūrvamidaṃ vacaḥ || 21 ||
[Analyze grammar]

iyaṃ laṅkā purī rājan rākṣasānāṃ mahātmanām |
tvayā niveśitā saumya naitad yuktaṃ tavānagha || 22 ||
[Analyze grammar]

tadbhavānyadi sāmnaitāṃ dadyādatulavikrama |
kṛtā bhavenmama prītirdharmaścaivānupālitaḥ || 23 ||
[Analyze grammar]

ityuktaḥ sa tadā gatvā prahasto vākyakovidaḥ |
daśagrīvavacaḥ sarvaṃ vitteśāya nyavedayat || 24 ||
[Analyze grammar]

prahastādapi saṃśrutya devo vaiśravaṇo vacaḥ |
pratyuvāca prahastaṃ taṃ vākyaṃ vākyaviśāradaḥ || 25 ||
[Analyze grammar]

brūhi gaccha daśagrīvaṃ purī rājyaṃ ca yanmama |
tavāpyetanmahābāho bhuṅkṣvaitaddhatakaṇṭakam || 26 ||
[Analyze grammar]

sarvaṃ kartāsmi bhadraṃ te rākṣaseśa vaco'cirāt |
kiṃ tu tāvat pratīkṣasva pituryāvannivedaye || 27 ||
[Analyze grammar]

evamuktvā dhanādhyakṣo jagāma piturantikam |
abhivādya guruṃ prāha rāvaṇasya yadīpsitam || 28 ||
[Analyze grammar]

eṣa tāta daśagrīvo dūtaṃ preṣitavānmama |
dīyatāṃ nagarī laṅkā pūrvaṃ rakṣogaṇoṣitā |
mayātra yadanuṣṭheyaṃ tanmamācakṣva suvrata || 29 ||
[Analyze grammar]

brahmarṣistvevamukto'sau viśravā munipuṃgavaḥ |
uvāca dhanadaṃ vākyaṃ śṛṇu putra vaco mama || 30 ||
[Analyze grammar]

daśagrīvo mahābāhuruktavānmama saṃnidhau |
mayā nirbhartsitaścāsīdbahudhoktaḥ sudurmatiḥ || 31 ||
[Analyze grammar]

sa krodhena mayā cokto dhvaṃsasveti punaḥ punaḥ |
śreyo'bhiyuktaṃ dharmyaṃ ca śṛṇu putra vaco mama || 32 ||
[Analyze grammar]

varapradānasaṃmūḍho mānyāmānyaṃ sudurmatiḥ |
na vetti mama śāpācca prakṛtiṃ dāruṇāṃ gataḥ || 33 ||
[Analyze grammar]

tasmādgaccha mahābāho kailāsaṃ dharaṇīdharam |
niveśaya nivāsārthaṃ tyaja laṅkāṃ sahānugaḥ || 34 ||
[Analyze grammar]

tatra mandākinī ramyā nadīnāṃ pravarā nadī |
kāñcanaiḥ sūryasaṃkāśaiḥ paṅkajaiḥ saṃvṛtodakā || 35 ||
[Analyze grammar]

na hi kṣamaṃ tvayā tena vairaṃ dhanadarakṣasā |
jānīṣe hi yathānena labdhaḥ paramako varaḥ || 36 ||
[Analyze grammar]

evamukto gṛhītvā tu tadvacaḥ pitṛgauravāt |
sadāra pauraḥ sāmātyaḥ savāhanadhano gataḥ || 37 ||
[Analyze grammar]

prahastastu daśagrīvaṃ gatvā sarvaṃ nyavedayat |
śūnyā sā nagarī laṅkā triṃśadyojanamāyatā |
praviśya tāṃ sahāsmābhiḥ svadharmaṃ tatra pālaya || 38 ||
[Analyze grammar]

evamuktaḥ prahastena rāvaṇo rākṣasastadā |
viveśa nagarīṃ laṅkāṃ sabhrātā sabalānugaḥ || 39 ||
[Analyze grammar]

sa cābhiṣiktaḥ kṣaṇadācaraistadā niveśayāmāsa purīṃ daśānanaḥ |
nikāmapūrṇā ca babhūva sā purī niśācarairnīlabalāhakopamaiḥ || 40 ||
[Analyze grammar]

dhaneśvarastvatha pitṛvākyagauravānnyaveśayacchaśivimale girau purīm |
svalaṃkṛtairbhavanavarairvibhūṣitāṃ puraṃdarasyeva tadāmarāvatīm || 41 ||
[Analyze grammar]