Chapter 8

hanyamāne bale tasminpadmanābhena pṛṣṭhataḥ |
mālyavān saṃnivṛtto'tha velātiga ivārṇavaḥ || 1 ||
[Analyze grammar]

saṃraktanayanaḥ kopāccalanmaulirniśācaraḥ |
padmanābhamidaṃ prāha vacanaṃ paruṣaṃ tadā || 2 ||
[Analyze grammar]

nārāyaṇa na jānīṣe kṣatradharmaṃ sanātanam |
ayuddhamanaso bhagnānyo'smān haṃsi yathetaraḥ || 3 ||
[Analyze grammar]

parāṅmukhavadhaṃ pāpaṃ yaḥ karoti sureśvara |
sa hantā na gataḥ svargaṃ labhate puṇyakarmaṇām || 4 ||
[Analyze grammar]

yuddhaśraddhātha vā te'sti śaṅkhacakragadādhara |
ahaṃ sthito'smi paśyāmi balaṃ darśaya yattava || 5 ||
[Analyze grammar]

uvāca rākṣasendraṃ taṃ devarājānujo balī |
yuṣmatto bhayabhītānāṃ devānāṃ vai mayābhayam |
rākṣasotsādanaṃ dattaṃ tadetadanupālyate || 6 ||
[Analyze grammar]

prāṇairapi priyaṃ kāryaṃ devānāṃ hi sadā mayā |
so'haṃ vo nihaniṣyāmi rasātalagatānapi || 7 ||
[Analyze grammar]

devamevaṃ bruvāṇaṃ tu raktāmburuhalocanam |
śaktyā bibheda saṃkruddho rākṣasendro rarāsa ca || 8 ||
[Analyze grammar]

mālyavadbhujanirmuktā śaktirghaṇṭākṛtasvanā |
harerurasi babhrāja meghastheva śatahradā || 9 ||
[Analyze grammar]

tatastāmeva cotkṛṣya śaktiṃ śaktidharapriyaḥ |
mālyavantaṃ samuddiśya cikṣepāmburuhekṣaṇaḥ || 10 ||
[Analyze grammar]

skandotsṛṣṭeva sā śaktirgovindakaraniḥsṛtā |
kāṅkṣantī rākṣasaṃ prāyānmaholkevāñjanācalam || 11 ||
[Analyze grammar]

sā tasyorasi vistīrṇe hārabhāsāvabhāsite |
apatad rākṣasendrasya girikūṭa ivāśaniḥ || 12 ||
[Analyze grammar]

tayā bhinnatanutrāṇāḥ prāviśadvipulaṃ tamaḥ |
mālyavānpunarāśvastastasthau giririvācalaḥ || 13 ||
[Analyze grammar]

tataḥ kārṣṇāyasaṃ śūlaṃ kaṇṭakairbahubhiścitam |
pragṛhyābhyahanaddevaṃ stanayorantare dṛḍham || 14 ||
[Analyze grammar]

tathaiva raṇaraktastu muṣṭinā vāsavānujam |
tāḍayitvā dhanurmātramapakrānto niśācaraḥ || 15 ||
[Analyze grammar]

tato'mbare mahāñ śabdaḥ sādhu sādhviti cotthitaḥ |
āhatya rākṣaso viṣṇuṃ garuḍaṃ cāpyatāḍayat || 16 ||
[Analyze grammar]

vainateyastataḥ kruddhaḥ pakṣavātena rākṣasaṃ |
vyapohadbalavān vāyuḥ śuṣkaparṇacayaṃ yathā || 17 ||
[Analyze grammar]

dvijendrapakṣavātena drāvitaṃ dṛśya pūrvajam |
sumālī svabalaiḥ sārdhaṃ laṅkāmabhimukho yayau || 18 ||
[Analyze grammar]

pakṣavātabaloddhūto mālyavānapi rākṣasaḥ |
svabalena samāgamya yayau laṅkāṃ hriyā vṛtaḥ || 19 ||
[Analyze grammar]

evaṃ te rākṣasā rāma hariṇā kamalekṣaṇa |
bahuśaḥ saṃyuge bhagnā hatapravaranāyakāḥ || 20 ||
[Analyze grammar]

aśaknuvantaste viṣṇuṃ pratiyoddhuṃ bhayārditāḥ |
tyaktvā laṅkāṃ gatā vastuṃ pātālaṃ sahapatnayaḥ || 21 ||
[Analyze grammar]

sumālinaṃ samāsādya rākṣasaṃ raghunandana |
sthitāḥ prakhyātavīryāste vaṃśe sālakaṭaṅkaṭe || 22 ||
[Analyze grammar]

ye tvayā nihatāste vai paulastyā nāma rākṣasāḥ |
sumālī mālyavānmālī ye ca teṣāṃ puraḥsarāḥ |
sarva ete mahābhāga rāvaṇādbalavattarāḥ || 23 ||
[Analyze grammar]

na cānyo rakṣasāṃ hantā sureṣvapi puraṃjaya |
ṛte nārāyaṇaṃ devaṃ śaṅkhacakragadādharam || 24 ||
[Analyze grammar]

bhavānnārāyaṇo devaścaturbāhuḥ sanātanaḥ |
rākṣasān hantumutpanno ajeyaḥ prabhuravyayaḥ || 25 ||
[Analyze grammar]