Chapter 7

nārāyaṇagiriṃ te tu garjanto rākṣasāmbudāḥ |
avarṣanniṣuvarṣeṇa varṣeṇādrimivāmbudāḥ || 1 ||
[Analyze grammar]

śyāmāvadātastairviṣṇurnīlairnaktaṃcarottamaiḥ |
vṛto'ñjanagirīvāsīdvarṣamāṇaiḥ payodharaiḥ || 2 ||
[Analyze grammar]

śalabhā iva kedāraṃ maśakā iva parvatam |
yathāmṛtaghaṭaṃ jīvā makarā iva cārṇavam || 3 ||
[Analyze grammar]

tathā rakṣodhanurmuktā vajrānilamanojavāḥ |
hariṃ viśanti sma śarā lokāstamiva paryaye || 4 ||
[Analyze grammar]

syandanaiḥ syandanagatā gajaiśca gajadhūrgatāḥ |
aśvārohāḥ sadaśvaiśca pādātāścāmbare carāḥ || 5 ||
[Analyze grammar]

rākṣasendrā girinibhāḥ śaraśaktyṛṣṭitomaraiḥ |
nirucchvāsaṃ hariṃ cakruḥ prāṇāyāma iva dvijam || 6 ||
[Analyze grammar]

niśācaraistudyamāno mīnairiva mahātimiḥ |
śārṅgamāyamya gātrāṇi rākṣasānāṃ mahāhave || 7 ||
[Analyze grammar]

śaraiḥ pūrṇāyatotsṛṣṭairvajravaktrairmanojavaiḥ |
ciccheda tilaśo viṣṇuḥ śataśo'tha sahasraśaḥ || 8 ||
[Analyze grammar]

vidrāvya śaravarṣaṃ taṃ varṣaṃ vāyurivotthitam |
pāñcajanyaṃ mahāśaṅkhaṃ pradadhmau puruṣottamaḥ || 9 ||
[Analyze grammar]

so'mbujo hariṇā dhmātaḥ sarvaprāṇena śaṅkharāṭ |
rarāsa bhīmanihrādo yugānte jalado yathā || 10 ||
[Analyze grammar]

śaṅkharājaravaḥ so'tha trāsayāmāsa rākṣasān |
mṛgarāja ivāraṇye samadāniva kuñjarān || 11 ||
[Analyze grammar]

na śekuraśvāḥ saṃsthātuṃ vimadāḥ kuñjarābhavan |
syandanebhyaścyutā yodhāḥ śaṅkharāvitadurbalāḥ || 12 ||
[Analyze grammar]

śārṅgacāpavinirmuktā vajratulyānanāḥ śarāḥ |
vidārya tāni rakṣāṃsi supuṅkhā viviśuḥ kṣitim || 13 ||
[Analyze grammar]

bhidyamānāḥ śaraiścānye nārāyaṇadhanuścyutaiḥ |
nipetū rākṣasā bhīmāḥ śailā vajrahatā iva || 14 ||
[Analyze grammar]

vraṇairvraṇakarārīṇāmadhokṣajaśarodbhavaiḥ |
asṛkkṣaranti dhārābhiḥ svarṇadhārāmivācalāḥ || 15 ||
[Analyze grammar]

śaṅkharājaravaścāpi śārṅgacāparavastathā |
rākṣasānāṃ ravāṃścāpi grasate vaiṣṇavo ravaḥ || 16 ||
[Analyze grammar]

sūryādiva karā ghorā ūrmayaḥ sāgarādiva |
parvatādiva nāgendrā vāryoghā iva cāmbudāt || 17 ||
[Analyze grammar]

tathā bāṇā vinirmuktāḥ śārṅgānnarāyaṇeritāḥ |
nirdhāvantīṣavastūrṇaṃ śataśo'tha sahasraśaḥ || 18 ||
[Analyze grammar]

śarabheṇa yathā siṃhāḥ siṃhena dviradā yathā |
dviradena yathā vyāghrā vyāghreṇa dvīpino yathā || 19 ||
[Analyze grammar]

dvīpinā ca yathā śvānaḥ śunā mārjārakā yathā |
mārjāreṇa yathā sarpāḥ sarpeṇa ca yathākhavaḥ || 20 ||
[Analyze grammar]

tathā te rākṣasā yuddhe viṣṇunā prabhaviṣṇunā |
dravanti drāvitāścaiva śāyitāśca mahītale || 21 ||
[Analyze grammar]

rākṣasānāṃ sahasrāṇi nihatya madhusūdanaḥ |
vārijaṃ nādayāmāsa toyadaṃ surarāḍiva || 22 ||
[Analyze grammar]

nārāyaṇaśaragrastaṃ śaṅkhanādasuvihvalam |
yayau laṅkāmabhimukhaṃ prabhagnaṃ rākṣasaṃ balam || 23 ||
[Analyze grammar]

prabhagne rākṣasabale nārāyaṇaśarāhate |
sumālī śaravarṣeṇa āvavāra raṇe harim || 24 ||
[Analyze grammar]

utkṣipya hemābharaṇaṃ karaṃ karamiva dvipaḥ |
rarāsa rākṣaso harṣāt sataḍittoyado yathā || 25 ||
[Analyze grammar]

sumālernardatastasya śiro jvalitakuṇḍalam |
ciccheda yanturaśvāśca bhrāntāstasya tu rakṣasaḥ || 26 ||
[Analyze grammar]

tairaśvairbhrāmyate bhrāntaiḥ sumālī rākṣaseśvaraḥ |
indriyāśvairyathā bhrāntairdhṛtihīno yathā naraḥ || 27 ||
[Analyze grammar]

mālī cābhyadravad yuddhe pragṛhya saśaraṃ dhanuḥ |
mālerdhanuścyutā bāṇāḥ kārtasvaravibhūṣitāḥ |
viviśurharimāsādya krauñcaṃ patrarathā iva || 28 ||
[Analyze grammar]

ardyamānaḥ śaraiḥ so'tha mālimuktaiḥ sahasraśaḥ |
cukṣubhe na raṇe viṣṇurjitendriya ivādhibhiḥ || 29 ||
[Analyze grammar]

atha maurvī svanaṃ kṛtvā bhagavānbhūtabhāvanaḥ |
mālinaṃ prati bāṇaughān sasarjāsigadādharaḥ || 30 ||
[Analyze grammar]

te mālidehamāsādya vajravidyutprabhāḥ śarāḥ |
pibanti rudhiraṃ tasya nāgā iva purāmṛtam || 31 ||
[Analyze grammar]

mālinaṃ vimukhaṃ kṛtvā mālimauliṃ harirbalāt |
rathaṃ ca sadhvajaṃ cāpaṃ vājinaśca nyapātayat || 32 ||
[Analyze grammar]

virathastu gadāṃ gṛhya mālī naktaṃcarottamaḥ |
āpupluve gadāpāṇirgiryagrādiva keṣarī || 33 ||
[Analyze grammar]

sa tayā garuḍaṃ saṃkhye īśānamiva cāntakaḥ |
lalāṭadeśe'bhyahanadvajreṇendro yathācalam || 34 ||
[Analyze grammar]

gadayābhihatastena mālinā garuḍo bhṛśam |
raṇāt parāṅmukhaṃ devaṃ kṛtavān vedanāturaḥ || 35 ||
[Analyze grammar]

parāṅmukhe kṛte deve mālinā garuḍena vai |
udatiṣṭhanmahānādo rakṣasāmabhinardatām || 36 ||
[Analyze grammar]

rakṣasāṃ nadatāṃ nādaṃ śrutvā harihayānujaḥ |
parāṅmukho'pyutsasarja cakraṃ mālijighāṃsayā || 37 ||
[Analyze grammar]

tat sūryamaṇḍalābhāsaṃ svabhāsā bhāsayannabhaḥ |
kālacakranibhaṃ cakraṃ māleḥ śīrṣamapātayat || 38 ||
[Analyze grammar]

tacchiro rākṣasendrasya cakrotkṛttaṃ vibhīṣaṇam |
papāta rudhirodgāri purā rāhuśiro yathā || 39 ||
[Analyze grammar]

tataḥ suraiḥ susaṃhṛṣṭaiḥ sarvaprāṇasamīritaḥ |
siṃhanādaravo muktaḥ sādhu deveti vādibhiḥ || 40 ||
[Analyze grammar]

mālinaṃ nihataṃ dṛṣṭvā sumālī malyavānapi |
sabalau śokasaṃtaptau laṅkāṃ prati vidhāvitau || 41 ||
[Analyze grammar]

garuḍastu samāśvastaḥ saṃnivṛtya mahāmanāḥ |
rākṣasāndrāvayāmāsa pakṣavātena kopitaḥ || 42 ||
[Analyze grammar]

nārāyaṇo'pīṣuvarāśanībhirvidārayāmāsa dhanuḥpramuktaiḥ |
naktaṃcarānmuktavidhūtakeśānyathāśanībhiḥ sataḍinmahendraḥ || 43 ||
[Analyze grammar]

bhinnātapatraṃ patamānaśastraṃ śarairapadhvastaviśīrṇadeham |
viniḥsṛtāntraṃ bhayalolanetraṃ balaṃ tadunmattanibhaṃ babhūva || 44 ||
[Analyze grammar]

siṃhārditānāmiva kuñjarāṇāṃ niśācarāṇāṃ saha kuñjarāṇām |
ravāśca vegāśca samaṃ babhūvuḥ purāṇasiṃhena vimarditānām || 45 ||
[Analyze grammar]

saṃchādyamānā haribāṇajālaiḥ svabāṇajālāni samutsṛjantaḥ |
dhāvanti naktaṃcarakālameghā vāyupraṇunnā iva kālameghāḥ || 46 ||
[Analyze grammar]

cakraprahārairvinikṛttaśīrṣāḥ saṃcūrṇitāṅgāśca gadāprahāraiḥ |
asiprahārairbahudhā vibhaktāḥ patanti śailā iva rākṣasendrāḥ || 47 ||
[Analyze grammar]

cakrakṛttāsyakamalā gadāsaṃcūrṇitorasaḥ |
lāṅgalaglapitagrīvā musalairbhinnamastakāḥ || 48 ||
[Analyze grammar]

ke ciccaivāsinā chinnāstathānye śaratāḍitāḥ |
nipeturambarāttūrṇaṃ rākṣasāḥ sāgarāmbhasi || 49 ||
[Analyze grammar]

tadāmbaraṃ vigalitahārakuṇḍalairniśācarairnīlabalāhakopamaiḥ |
nipātyamānairdadṛśe nirantaraṃ nipātyamānairiva nīlaparvataiḥ || 50 ||
[Analyze grammar]