Chapter 5

sukeśaṃ dhārmikaṃ dṛṣṭvā varalabdhaṃ ca rākṣasaṃ |
grāmaṇīrnāma gandharvo viśvāvasusamaprabhaḥ || 1 ||
[Analyze grammar]

tasya devavatī nāma dvitīyā śrīrivātmajā |
tāṃ sukeśāya dharmeṇa dadau dakṣaḥ śriyaṃ yathā || 2 ||
[Analyze grammar]

varadānakṛtaiśvaryaṃ sā taṃ prāpya patiṃ priyam |
āsīddevavatī tuṣṭā dhanaṃ prāpyeva nirdhanaḥ || 3 ||
[Analyze grammar]

sa tayā saha saṃyukto rarāja rajanīcaraḥ |
añjanādabhiniṣkrāntaḥ kareṇveva mahāgajaḥ || 4 ||
[Analyze grammar]

devavatyāṃ sukeśastu janayāmāsa rāghava |
trīṃstrinetrasamānputrān rākṣasān rākṣasādhipaḥ |
mālyavantaṃ sumāliṃ ca māliṃ ca balināṃ varam || 5 ||
[Analyze grammar]

trayo lokā ivāvyagrāḥ sthitāstraya ivāgnayaḥ |
trayo mantrā ivātyugrāstrayo ghorā ivāmayāḥ || 6 ||
[Analyze grammar]

trayaḥ sukeśasya sutāstretāgnisamavarcasaḥ |
vivṛddhimagamaṃstatra vyādhayopekṣitā iva || 7 ||
[Analyze grammar]

varaprāptiṃ pituste tu jñātvaiśvaryaṃ tato mahat |
tapastaptuṃ gatā meruṃ bhrātaraḥ kṛtaniścayāḥ || 8 ||
[Analyze grammar]

pragṛhya niyamān ghorān rākṣasā nṛpasattama |
viceruste tapo ghoraṃ sarvabhūtabhayāvaham || 9 ||
[Analyze grammar]

satyārjavadamopetaistapobhirbhuvi duṣkaraiḥ |
saṃtāpayantastrīṃl lokān sadevāsuramānuṣān || 10 ||
[Analyze grammar]

tato vibhuścaturvaktro vimānavaramāsthitaḥ |
sukeśaputrānāmantrya varado'smītyabhāṣata || 11 ||
[Analyze grammar]

brahmāṇaṃ varadaṃ jñātvā sendrairdevagaṇairvṛtam |
ūcuḥ prāñjalayaḥ sarve vepamānā iva drumāḥ || 12 ||
[Analyze grammar]

tapasārādhito deva yadi no diśase varam |
ajeyāḥ śatruhantārastathaiva cirajīvinaḥ |
prabhaviṣṇavo bhavāmeti parasparamanuvratāḥ || 13 ||
[Analyze grammar]

evaṃ bhaviṣyatītyuktvā sukeśatanayānprabhuḥ |
prayayau brahmalokāya brahmā brāhmaṇavatsalaḥ || 14 ||
[Analyze grammar]

varaṃ labdhvā tataḥ sarve rāma rātriṃcarāstadā |
surāsurānprabādhante varadānāt sunirbhayāḥ || 15 ||
[Analyze grammar]

tairvadhyamānāstridaśāḥ sarṣisaṃghāḥ sacāraṇāḥ |
trātāraṃ nādhigacchanti nirayasthā yathā narāḥ || 16 ||
[Analyze grammar]

atha te viśvakarmāṇaṃ śilpināṃ varamavyayam |
ūcuḥ sametya saṃhṛṣṭā rākṣasā raghusattama || 17 ||
[Analyze grammar]

gṛhakartā bhavāneva devānāṃ hṛdayepsitam |
asmākamapi tāvattvaṃ gṛhaṃ kuru mahāmate || 18 ||
[Analyze grammar]

himavantaṃ samāśritya meruṃ mandarameva vā |
maheśvaragṛhaprakhyaṃ gṛhaṃ naḥ kriyatāṃ mahat || 19 ||
[Analyze grammar]

viśvakarmā tatasteṣāṃ rākṣasānāṃ mahābhujaḥ |
nivāsaṃ kathayāmāsa śakrasyevāmarāvatīm || 20 ||
[Analyze grammar]

dakṣiṇasyodadhestīre trikūṭo nāma parvataḥ |
śikhare tasya śailasya madhyame'mbudasaṃnibhe |
śakunairapi duṣprāpe ṭaṅkacchinnacaturdiśi || 21 ||
[Analyze grammar]

triṃśadyojanavistīrṇā svarṇaprākāratoraṇā |
mayā laṅketi nagarī śakrājñaptena nirmitā || 22 ||
[Analyze grammar]

tasyāṃ vasata durdharṣāḥ puryāṃ rākṣasasattamāḥ |
amarāvatīṃ samāsādya sendrā iva divaukasaḥ || 23 ||
[Analyze grammar]

laṅkādurgaṃ samāsādya rākṣasairbahubhirvṛtāḥ |
bhaviṣyatha durādharṣāḥ śatrūṇāṃ śatrusūdanāḥ || 24 ||
[Analyze grammar]

viśvakarmavacaḥ śrutvā tataste rāma rākṣasāḥ |
sahasrānucarā gatvā laṅkāṃ tāmavasanpurīm || 25 ||
[Analyze grammar]

dṛḍhaprākāraparikhāṃ haimairgṛhaśatairvṛtām |
laṅkāmavāpya te hṛṣṭā viharanti niśācarāḥ || 26 ||
[Analyze grammar]

narmadā nāma gandharvī nānādharmasamedhitā |
tasyāḥ kanyātrayaṃ hyāsīddhīśrīkīrtisamadyuti || 27 ||
[Analyze grammar]

jyeṣṭhakrameṇa sā teṣāṃ rākṣasānāmarākṣasī |
kanyāstāḥ pradadau hṛṣṭā pūrṇacandranibhānanāḥ || 28 ||
[Analyze grammar]

trayāṇāṃ rākṣasendrāṇāṃ tisro gandharvakanyakāḥ |
mātrā dattā mahābhāgā nakṣatre bhagadaivate || 29 ||
[Analyze grammar]

kṛtadārāstu te rāma sukeśatanayāḥ prabho |
bhāryābhiḥ saha cikrīḍurapsarobhirivāmarāḥ || 30 ||
[Analyze grammar]

tatra mālyavato bhāryā sundarī nāma sundarī |
sa tasyāṃ janayāmāsa yadapatyaṃ nibodha tat || 31 ||
[Analyze grammar]

vajramuṣṭirvirūpākṣo durmukhaścaiva rākṣasaḥ |
suptaghno yajñakopaśca mattonmattau tathaiva ca |
analā cābhavat kanyā sundaryāṃ rāma sundarī || 32 ||
[Analyze grammar]

sumālino'pi bhāryāsīt pūrṇacandranibhānanā |
nāmnā ketumatī nāma prāṇebhyo'pi garīyasī || 33 ||
[Analyze grammar]

sumālī janayāmāsa yadapatyaṃ niśācaraḥ |
ketumatyāṃ mahārāja tannibodhānupūrvaśaḥ || 34 ||
[Analyze grammar]

prahasto'kampanaiścaiva vikaṭaḥ kālakārmukaḥ |
dhūmrākśaścātha daṇḍaśca supārśvaśca mahābalaḥ || 35 ||
[Analyze grammar]

saṃhrādiḥ praghasaścaiva bhāsakarṇaśca rākṣasaḥ |
rākā puṣpotkaṭā caiva kaikasī ca śucismitā |
kumbhīnasī ca ityete sumāleḥ prasavāḥ smṛtāḥ || 36 ||
[Analyze grammar]

mālestu vasudā nāma gandharvī rūpaśālinī |
bhāryāsīt padmapatrākṣī svakṣī yakṣīvaropamā || 37 ||
[Analyze grammar]

sumāleranujastasyāṃ janayāmāsa yat prabho |
apatyaṃ kathyamānaṃ tanmayā tvaṃ śṛṇu rāghava || 38 ||
[Analyze grammar]

analaścānilaścaiva haraḥ saṃpātireva ca |
ete vibhīṣaṇāmātyā māleyāste niśācarāḥ || 39 ||
[Analyze grammar]

tatastu te rākṣasapuṃgavāstrayo niśācaraiḥ putraśataiśca saṃvṛtāḥ |
surān sahendrānṛṣināgadānavānbabādhire te balavīryadarpitāḥ || 40 ||
[Analyze grammar]

jagadbhramanto'nilavaddurāsadā raṇe ca mṛtyupratimāḥ samāhitāḥ |
varapradānādabhigarvitā bhṛśaṃ kratukriyāṇāṃ praśamaṃkarāḥ sadā || 41 ||
[Analyze grammar]