Chapter 1

prāptarājyasya rāmasya rākṣasānāṃ vadhe kṛte |
ājagmurṛṣayaḥ sarve rāghavaṃ pratinanditum || 1 ||
[Analyze grammar]

kauśiko'tha yavakrīto raibhyaścyavana eva ca |
kaṇvo medhātitheḥ putraḥ pūrvasyāṃ diśi ye śritāḥ || 2 ||
[Analyze grammar]

svastyātreyaśca bhagavānnamuciḥ pramucustathā |
ājagmuste sahāgastyā ye śritā dakṣiṇāṃ diśam || 3 ||
[Analyze grammar]

pṛṣadguḥ kavaṣo dhaumyo raudreyaśca mahānṛṣiḥ |
te'pyājagmuḥ saśiṣyā vai ye śritāḥ paścimāṃ diśam || 4 ||
[Analyze grammar]

vasiṣṭhaḥ kaśyapo'thātrirviśvāmitro'tha gautamaḥ |
jamadagnirbharadvājaste'pi saptamaharṣayaḥ || 5 ||
[Analyze grammar]

saṃprāpyaite mahātmāno rāghavasya niveśanam |
viṣṭhitāḥ pratihārārthaṃ hutāśanasamaprabhāḥ || 6 ||
[Analyze grammar]

pratihārastatastūrṇamagastyavacanādatha |
samīpaṃ rāghavasyāśu praviveśa mahātmanaḥ || 7 ||
[Analyze grammar]

sa rāmaṃ dṛśya sahasā pūrṇacandrasamadyutim |
agastyaṃ kathayāmāsa saṃprātamṛṣibhiḥ saha || 8 ||
[Analyze grammar]

śrutvā prāptānmunīṃstāṃstu bālasūryasamaprabhān |
tadovāca nṛpo dvāḥsthaṃ praveśaya yathāsukham || 9 ||
[Analyze grammar]

dṛṣṭvā prāptānmunīṃstāṃstu pratyutthāya kṛtāñjaliḥ |
rāmo'bhivādya prayata āsanānyādideśa ha || 10 ||
[Analyze grammar]

teṣu kāñcanacitreṣu svāstīrṇeṣu sukheṣu ca |
yathārhamupaviṣṭāste āsaneṣv ṛṣipuṃgavāḥ || 11 ||
[Analyze grammar]

rāmeṇa kuśalaṃ pṛṣṭāḥ saśiṣyāḥ sapurogamāḥ |
maharṣayo vedavido rāmaṃ vacanamabruvan || 12 ||
[Analyze grammar]

kuśalaṃ no mahābāho sarvatra raghunandana |
tvāṃ tu diṣṭyā kuśalinaṃ paśyāmo hataśātravam || 13 ||
[Analyze grammar]

na hi bhāraḥ sa te rāma rāvaṇo rākṣaseśvaraḥ |
sadhanustvaṃ hi lokāṃstrīn vijayethā na saṃśayaḥ || 14 ||
[Analyze grammar]

diṣṭyā tvayā hato rāma rāvaṇaḥ putrapautravān |
diṣṭyā vijayinaṃ tvādya paśyāmaḥ saha bhāryayā || 15 ||
[Analyze grammar]

diṣṭyā prahasto vikaṭo virūpākṣo mahodaraḥ |
akampanaśca durdharṣo nihatāste niśācarāḥ || 16 ||
[Analyze grammar]

yasya pramāṇādvipulaṃ pramāṇaṃ neha vidyate |
diṣṭyā te samare rāma kumbhakarṇo nipātitaḥ || 17 ||
[Analyze grammar]

diṣṭyā tvaṃ rākṣasendreṇa dvandvayuddhamupāgataḥ |
devatānāmavadhyena vijayaṃ prāptavānasi || 18 ||
[Analyze grammar]

saṃkhye tasya na kiṃ cittu rāvaṇasya parābhavaḥ |
dvandvayuddhamanuprāpto diṣṭyā te rāvaṇirhataḥ || 19 ||
[Analyze grammar]

diṣṭyā tasya mahābāho kālasyevābhidhāvataḥ |
muktaḥ surariporvīra prāptaśca vijayastvayā || 20 ||
[Analyze grammar]

vismayastveṣa naḥ saumya saṃśrutyendrajitaṃ hatam |
avadhyaḥ sarvabhūtānāṃ mahāmāyādharo yudhi || 21 ||
[Analyze grammar]

dattvā puṇyāmimāṃ vīra saumyāmabhayadakṣiṇām |
diṣṭyā vardhasi kākutstha jayenāmitrakarśana || 22 ||
[Analyze grammar]

śrutvā tu vacanaṃ teṣāmṛṣīṇāṃ bhāvitātmanām |
vismayaṃ paramaṃ gatvā rāmaḥ prāñjalirabravīt || 23 ||
[Analyze grammar]

bhavantaḥ kumbhakarṇaṃ ca rāvaṇaṃ ca niśācaram |
atikramya mahāvīryau kiṃ praśaṃsatha rāvaṇim || 24 ||
[Analyze grammar]

mahodaraṃ prahastaṃ ca virūpākṣaṃ ca rākṣasaṃ |
atikramya mahāvīryān kiṃ praśaṃsatha rāvaṇim || 25 ||
[Analyze grammar]

kīdṛśo vai prabhāvo'sya kiṃ balaṃ kaḥ parākramaḥ |
kena vā kāraṇenaiṣa rāvaṇādatiricyate || 26 ||
[Analyze grammar]

śakyaṃ yadi mayā śrotuṃ na khalvājñāpayāmi vaḥ |
yadi guhyaṃ na cedvaktuṃ śrotumicchāmi kathyatām |
kathaṃ śakro jitastena kathaṃ labdhavaraśca saḥ || 27 ||
[Analyze grammar]