Chapter 115

śrutvā tu paramānandaṃ bharataḥ satyavikramaḥ |
hṛṣṭamājñāpayāmāsa śatrughnaṃ paravīrahā || 1 ||
[Analyze grammar]

daivatāni ca sarvāṇi caityāni nagarasya ca |
sugandhamālyairvāditrairarcantu śucayo narāḥ || 2 ||
[Analyze grammar]

rājadārāstathāmātyāḥ sainyāḥ senāgaṇāṅganāḥ |
abhiniryāntu rāmasya draṣṭuṃ śaśinibhaṃ mukham || 3 ||
[Analyze grammar]

bharatasya vacaḥ śrutvā śatrughnaḥ paravīrahā |
viṣṭīranekasāhasrīścodayāmāsa vīryavān || 4 ||
[Analyze grammar]

samīkuruta nimnāni viṣamāṇi samāni ca |
sthānāni ca nirasyantāṃ nandigrāmāditaḥ param || 5 ||
[Analyze grammar]

siñcantu pṛthivīṃ kṛtsnāṃ himaśītena vāriṇā |
tato'bhyavakiraṃstvanye lājaiḥ puṣpaiśca sarvataḥ || 6 ||
[Analyze grammar]

samucchritapatākāstu rathyāḥ puravarottame |
śobhayantu ca veśmāni sūryasyodayanaṃ prati || 7 ||
[Analyze grammar]

sragdāmamuktapuṣpaiśca sugandhaiḥ pañcavarṇakaiḥ |
rājamārgamasaṃbādhaṃ kirantu śataśo narāḥ || 8 ||
[Analyze grammar]

mattairnāgasahasraiśca śātakumbhavibhūṣitaḥ |
apare hemakakṣyābhiḥ sagajābhiḥ kareṇubhiḥ |
niryayustvarayā yuktā rathaiśca sumahārathāḥ || 9 ||
[Analyze grammar]

tato yānānyupārūḍhāḥ sarvā daśarathastriyaḥ |
kausalyāṃ pramukhe kṛtvā sumitrāṃ cāpi niryayuḥ || 10 ||
[Analyze grammar]

aśvānāṃ khuraśabdena rathanemisvanena ca |
śaṅkhadundubhinādena saṃcacāleva medinī || 11 ||
[Analyze grammar]

kṛtsnaṃ ca nagaraṃ tattu nandigrāmamupāgamat |
dvijātimukhyairdharmātmā śreṇīmukhyaiḥ sanaigamaiḥ || 12 ||
[Analyze grammar]

mālyamodaka hastaiśca mantribhirbharato vṛtaḥ |
śaṅkhabherīninādaiśca bandibhiścābhivanditaḥ || 13 ||
[Analyze grammar]

āryapādau gṛhītvā tu śirasā dharmakovidaḥ |
pāṇḍuraṃ chatramādāya śuklamālyopaśobhitam || 14 ||
[Analyze grammar]

śukle ca vālavyajane rājārhe hemabhūṣite |
upavāsakṛśo dīnaścīrakṛṣṇājināmbaraḥ || 15 ||
[Analyze grammar]

bhrāturāgamanaṃ śrutvā tat pūrvaṃ harṣamāgataḥ |
pratyudyayau tadā rāmaṃ mahātmā sacivaiḥ saha || 16 ||
[Analyze grammar]

samīkṣya bharato vākyamuvāca pavanātmajam |
kaccinna khalu kāpeyī sevyate calacittatā |
na hi paśyāmi kākutsthaṃ rāmamāryaṃ paraṃtapam || 17 ||
[Analyze grammar]

athaivamukte vacane hanūmānidamabravīt |
arthaṃ vijñāpayanneva bharataṃ satyavikramam || 18 ||
[Analyze grammar]

sadā phalān kusumitān vṛkṣānprāpya madhusravān |
bharadvājaprasādena mattabhramaranāditān || 19 ||
[Analyze grammar]

tasya caiṣa varo datto vāsavena paraṃtapa |
sasainyasya tadātithyaṃ kṛtaṃ sarvaguṇānvitam || 20 ||
[Analyze grammar]

nisvanaḥ śrūyate bhīmaḥ prahṛṣṭānāṃ vanaukasām |
manye vānarasenā sā nadīṃ tarati gomatīm || 21 ||
[Analyze grammar]

rajovarṣaṃ samudbhūtaṃ paśya vālukinīṃ prati |
manye sālavanaṃ ramyaṃ lolayanti plavaṃgamāḥ || 22 ||
[Analyze grammar]

tadetaddṛśyate dūrādvimalaṃ candrasaṃnibham |
vimānaṃ puṣpakaṃ divyaṃ manasā brahmanirmitam || 23 ||
[Analyze grammar]

rāvaṇaṃ bāndhavaiḥ sārdhaṃ hatvā labdhaṃ mahātmanā |
dhanadasya prasādena divyametanmanojavam || 24 ||
[Analyze grammar]

etasminbhrātarau vīrau vaidehyā saha rāghavau |
sugrīvaśca mahātejā rākṣasendro vibhīṣaṇaḥ || 25 ||
[Analyze grammar]

tato harṣasamudbhūto nisvano divamaspṛśat |
strībālayuvavṛddhānāṃ rāmo'yamiti kīrtitaḥ || 26 ||
[Analyze grammar]

rathakuñjaravājibhyaste'vatīrya mahīṃ gatāḥ |
dadṛśustaṃ vimānasthaṃ narāḥ somamivāmbare || 27 ||
[Analyze grammar]

prāñjalirbharato bhūtvā prahṛṣṭo rāghavonmukhaḥ |
svāgatena yathārthena tato rāmamapūjayat || 28 ||
[Analyze grammar]

manasā brahmaṇā sṛṣṭe vimāne lakṣmaṇāgrajaḥ |
rarāja pṛthudīrghākṣo vajrapāṇirivāparaḥ || 29 ||
[Analyze grammar]

tato vimānāgragataṃ bharato bhrātaraṃ tadā |
vavande praṇato rāmaṃ merusthamiva bhāskaram || 30 ||
[Analyze grammar]

āropito vimānaṃ tadbharataḥ satyavikramaḥ |
rāmamāsādya muditaḥ punarevābhyavādayat || 31 ||
[Analyze grammar]

taṃ samutthāpya kākutsthaścirasyākṣipathaṃ gatam |
aṅke bharatamāropya muditaḥ pariṣaṣvaje || 32 ||
[Analyze grammar]

tato lakṣmaṇamāsādya vaidehīṃ ca paraṃtapaḥ |
abhyavādayata prīto bharato nāma cābravīt || 33 ||
[Analyze grammar]

sugrīvaṃ kaikayī putro jāmbavantaṃ tathāṅgadam |
maindaṃ ca dvividaṃ nīlamṛṣabhaṃ caiva sasvaje || 34 ||
[Analyze grammar]

te kṛtvā mānuṣaṃ rūpaṃ vānarāḥ kāmarūpiṇaḥ |
kuśalaṃ paryapṛcchanta prahṛṣṭā bharataṃ tadā || 35 ||
[Analyze grammar]

vibhīṣaṇaṃ ca bharataḥ sāntvayan vākyamabravīt |
diṣṭyā tvayā sahāyena kṛtaṃ karma suduṣkaram || 36 ||
[Analyze grammar]

śatrughnaśca tadā rāmamabhivādya salakṣmaṇam |
sītāyāścaraṇau paścādvavande vinayānvitaḥ || 37 ||
[Analyze grammar]

rāmo mātaramāsādya viṣaṇṇaṃ śokakarśitām |
jagrāha praṇataḥ pādau mano mātuḥ prasādayan || 38 ||
[Analyze grammar]

abhivādya sumitrāṃ ca kaikeyīṃ ca yaśasvinīm |
sa mātṝśca tadā sarvāḥ purohitamupāgamat || 39 ||
[Analyze grammar]

svāgataṃ te mahābāho kausalyānandavardhana |
iti prāñjalayaḥ sarve nāgarā rāmamabruvan || 40 ||
[Analyze grammar]

tanyañjalisahasrāṇi pragṛhītāni nāgaraiḥ |
ākośānīva padmāni dadarśa bharatāgrajaḥ || 41 ||
[Analyze grammar]

pāduke te tu rāmasya gṛhītvā bharataḥ svayam |
caraṇābhyāṃ narendrasya yojayāmāsa dharmavit || 42 ||
[Analyze grammar]

abravīcca tadā rāmaṃ bharataḥ sa kṛtāñjaliḥ |
etatte rakṣitaṃ rājan rājyaṃ niryātitaṃ mayā || 43 ||
[Analyze grammar]

adya janma kṛtārthaṃ me saṃvṛttaśca manorathaḥ |
yastvāṃ paśyāmi rājānamayodhyāṃ punarāgatam || 44 ||
[Analyze grammar]

avekṣatāṃ bhavān kośaṃ koṣṭhāgāraṃ puraṃ balam |
bhavatastejasā sarvaṃ kṛtaṃ daśaguṇaṃ mayā || 45 ||
[Analyze grammar]

tathā bruvāṇaṃ bharataṃ dṛṣṭvā taṃ bhrātṛvatsalam |
mumucurvānarā bāṣpaṃ rākṣasaśca vibhīṣaṇaḥ || 46 ||
[Analyze grammar]

tataḥ praharṣādbharatamaṅkamāropya rāghavaḥ |
yayau tena vimānena sasainyo bharatāśramam || 47 ||
[Analyze grammar]

bharatāśramamāsādya sasainyo rāghavastadā |
avatīrya vimānāgrādavatasthe mahītale || 48 ||
[Analyze grammar]

abravīcca tadā rāmastadvimānamanuttamam |
vaha vaiśravaṇaṃ devamanujānāmi gamyatām || 49 ||
[Analyze grammar]

tato rāmābhyanujñātaṃ tadvimānamanuttamam |
uttarāṃ diśamuddiśya jagāma dhanadālayam || 50 ||
[Analyze grammar]

purohitasyātmasamasya rāghavo bṛhaspateḥ śakra ivāmarādhipaḥ |
nipīḍya pādau pṛthagāsane śubhe sahaiva tenopaviveśa vīryavān || 51 ||
[Analyze grammar]