Chapter 114

bahūni nāma varṣāṇi gatasya sumahadvanam |
śṛṇomyahaṃ prītikaraṃ mama nāthasya kīrtanam || 1 ||
[Analyze grammar]

kalyāṇī bata gātheyaṃ laukikī pratibhāti me |
eti jīvantamānando naraṃ varṣaśatādapi || 2 ||
[Analyze grammar]

rāghavasya harīṇāṃ ca kathamāsīt samāgamaḥ |
kasmindeśe kimāśritya tattvamākhyāhi pṛcchataḥ || 3 ||
[Analyze grammar]

sa pṛṣṭo rājaputreṇa bṛsyāṃ samupaveśitaḥ |
ācacakṣe tataḥ sarvaṃ rāmasya caritaṃ vane || 4 ||
[Analyze grammar]

yathā pravrajito rāmo māturdatte vare tava |
yathā ca putraśokena rājā daśaratho mṛtaḥ || 5 ||
[Analyze grammar]

yathā dūtaistvamānītastūrṇaṃ rājagṛhāt prabho |
tvayāyodhyāṃ praviṣṭena yathā rājyaṃ na cepsitam || 6 ||
[Analyze grammar]

citrakūṭaṃ giriṃ gatvā rājyenāmitrakarśanaḥ |
nimantritastvayā bhrātā dharmamācaritā satām || 7 ||
[Analyze grammar]

sthitena rājño vacane yathā rājyaṃ visarjitam |
āryasya pāduke gṛhya yathāsi punarāgataḥ || 8 ||
[Analyze grammar]

sarvametanmahābāho yathāvadviditaṃ tava |
tvayi pratiprayāte tu yadvṛttaṃ tannibodha me || 9 ||
[Analyze grammar]

apayāte tvayi tadā samudbhrāntamṛgadvijam |
praviveśātha vijanaṃ sumahaddaṇḍakāvanam || 10 ||
[Analyze grammar]

teṣāṃ purastādbalavān gacchatāṃ gahane vane |
vinadan sumahānādaṃ virādhaḥ pratyadṛśyata || 11 ||
[Analyze grammar]

tamutkṣipya mahānādamūrdhvabāhumadhomukham |
nikhāte prakṣipanti sma nadantamiva kuñjaram || 12 ||
[Analyze grammar]

tat kṛtvā duṣkaraṃ karma bhrātarau rāmalakṣmaṇau |
sāyāhne śarabhaṅgasya ramyamāśramamīyatuḥ || 13 ||
[Analyze grammar]

śarabhaṅge divaṃ prāpte rāmaḥ satyaparākramaḥ |
abhivādya munīn sarvāñjanasthānamupāgamat || 14 ||
[Analyze grammar]

caturdaśasahasrāṇi rakṣasāṃ bhīmakarmaṇām |
hatāni vasatā tatra rāghaveṇa mahātmanā || 15 ||
[Analyze grammar]

tataḥ paścācchūrpaṇakhā rāmapārśvamupāgatā |
tato rāmeṇa saṃdiṣṭo lakṣmaṇaḥ sahasotthitaḥ || 16 ||
[Analyze grammar]

pragṛhya khaḍgaṃ ciccheda karṇanāse mahābalaḥ |
tatastenārditā bālā rāvaṇaṃ samupāgatā || 17 ||
[Analyze grammar]

rāvaṇānucaro ghoro mārīco nāma rākṣasaḥ |
lobhayāmāsa vaidehīṃ bhūtvā ratnamayo mṛgaḥ || 18 ||
[Analyze grammar]

sā rāmamabravīddṛṣṭvā vaidehī gṛhyatāmiti |
aho manoharaḥ kānta āśrame no bhaviṣyati || 19 ||
[Analyze grammar]

tato rāmo dhanuṣpāṇirdhāvantamanudhāvati |
sa taṃ jaghāna dhāvantaṃ śareṇānataparvaṇā || 20 ||
[Analyze grammar]

atha saumyā daśagrīvo mṛgaṃ yāte tu rāghave |
lakṣmaṇe cāpi niṣkrānte praviveśāśramaṃ tadā |
jagrāha tarasā sītāṃ grahaḥ khe rohiṇīmiva || 21 ||
[Analyze grammar]

trātukāmaṃ tato yuddhe hatvā gṛdhraṃ jaṭāyuṣam |
pragṛhya sītāṃ sahasā jagāmāśu sa rāvaṇaḥ || 22 ||
[Analyze grammar]

tatastvadbhutasaṃkāśāḥ sthitāḥ parvatamūrdhani |
sītāṃ gṛhītvā gacchantaṃ vānarāḥ parvatopamāḥ |
dadṛśurvismitāstatra rāvaṇaṃ rākṣasādhipam || 23 ||
[Analyze grammar]

praviverśa tadā laṅkāṃ rāvaṇo lokarāvaṇaḥ || 24 ||
[Analyze grammar]

tāṃ suvarṇaparikrānte śubhe mahati veśmani |
praveśya maithilīṃ vākyaiḥ sāntvayāmāsa rāvaṇaḥ || 25 ||
[Analyze grammar]

nivartamānaḥ kākutstho dṛṣṭvā gṛdhraṃ pravivyathe || 26 ||
[Analyze grammar]

gṛdhraṃ hataṃ tadā dagdhvā rāmaḥ priyasakhaṃ pituḥ |
godāvarīmanucaran vanoddeśāṃśca puṣpitān |
āsedaturmahāraṇye kabandhaṃ nāma rākṣasaṃ || 27 ||
[Analyze grammar]

tataḥ kabandhavacanād rāmaḥ satyaparākramaḥ |
ṛśyamūkaṃ giriṃ gatvā sugrīveṇa samāgataḥ || 28 ||
[Analyze grammar]

tayoḥ samāgamaḥ pūrvaṃ prītyā hārdo vyajāyata |
itaretara saṃvādāt pragāḍhaḥ praṇayastayoḥ || 29 ||
[Analyze grammar]

rāmaḥ svabāhuvīryeṇa svarājyaṃ pratyapādayat |
vālinaṃ samare hatvā mahākāyaṃ mahābalam || 30 ||
[Analyze grammar]

sugrīvaḥ sthāpito rājye sahitaḥ sarvavānaraiḥ |
rāmāya pratijānīte rājaputryāstu mārgaṇam || 31 ||
[Analyze grammar]

ādiṣṭā vānarendreṇa sugrīveṇa mahātmanā |
daśakoṭyaḥ plavaṃgānāṃ sarvāḥ prasthāpitā diśaḥ || 32 ||
[Analyze grammar]

teṣāṃ no vipranaṣṭānāṃ vindhye parvatasattame |
bhṛśaṃ śokābhitaptānāṃ mahān kālo'tyavartata || 33 ||
[Analyze grammar]

bhrātā tu gṛdhrarājasya saṃpātirnāma vīryavān |
samākhyāti sma vasatiṃ sītāyā rāvaṇālaye || 34 ||
[Analyze grammar]

so'haṃ duḥkhaparītānāṃ duḥkhaṃ tajjñātināṃ nudan |
ātmavīryaṃ samāsthāya yojanānāṃ śataṃ plutaḥ || 35 ||
[Analyze grammar]

tatrāhamekāmadrākṣamaśokavanikāṃ gatām |
kauśeyavastrāṃ malināṃ nirānandāṃ dṛḍhavratām || 36 ||
[Analyze grammar]

tayā sametya vidhivat pṛṣṭvā sarvamaninditām |
abhijñānaṃ maṇiṃ labdhvā caritārtho'hamāgataḥ || 37 ||
[Analyze grammar]

mayā ca punarāgamya rāmasyākliṣṭakarmaṇaḥ |
abhijñānaṃ mayā dattamarciṣmān sa mahāmaṇiḥ || 38 ||
[Analyze grammar]

śrutvā tāṃ maithilīṃ hṛṣṭastvāśaśaṃse sa jīvitam |
jīvitāntamanuprāptaḥ pītvāmṛtamivāturaḥ || 39 ||
[Analyze grammar]

udyojayiṣyannudyogaṃ dadhre laṅkāvadhe manaḥ |
jighāṃsuriva lokāṃste sarvāṃl lokān vibhāvasuḥ || 40 ||
[Analyze grammar]

tataḥ samudramāsādya nalaṃ setumakārayat |
atarat kapivīrāṇāṃ vāhinī tena setunā || 41 ||
[Analyze grammar]

prahastamavadhīnnīlaḥ kumbhakarṇaṃ tu rāghavaḥ |
lakṣmaṇo rāvaṇasutaṃ svayaṃ rāmastu rāvaṇam || 42 ||
[Analyze grammar]

sa śakreṇa samāgamya yamena varuṇena ca |
surarṣibhiśca kākutstho varāṃl lebhe paraṃtapaḥ || 43 ||
[Analyze grammar]

sa tu dattavaraḥ prītyā vānaraiśca samāgataḥ |
puṣpakeṇa vimānena kiṣkindhāmabhyupāgamat || 44 ||
[Analyze grammar]

taṃ gaṅgāṃ punarāsādya vasantaṃ munisaṃnidhau |
avighnaṃ puṣyayogena śvo rāmaṃ draṣṭumarhasi || 45 ||
[Analyze grammar]

tataḥ sa satyaṃ hanumadvaco mahanniśamya hṛṣṭo bharataḥ kṛtāñjaliḥ |
uvāca vāṇīṃ manasaḥ praharṣiṇī cirasya pūrṇaḥ khalu me manorathaḥ || 46 ||
[Analyze grammar]