Chapter 113

ayodhyāṃ tu samālokya cintayāmāsa rāghavaḥ |
cintayitvā tato dṛṣṭiṃ vānareṣu nyapātayat || 1 ||
[Analyze grammar]

priyakāmaḥ priyaṃ rāmastatastvaritavikramam |
uvāca dhīmāṃstejasvī hanūmantaṃ plavaṃgamam || 2 ||
[Analyze grammar]

ayodhyāṃ tvarito gaccha kṣipraṃ tvaṃ plavagottama |
jānīhi kaccit kuśalī jano nṛpatimandire || 3 ||
[Analyze grammar]

śṛṅgaverapuraṃ prāpya guhaṃ gahanagocaram |
niṣādādhipatiṃ brūhi kuśalaṃ vacanānmama || 4 ||
[Analyze grammar]

śrutvā tu māṃ kuśalinamarogaṃ vigatajvaram |
bhaviṣyati guhaḥ prītaḥ sa mamātmasamaḥ sakhā || 5 ||
[Analyze grammar]

ayodhyāyāśca te mārgaṃ pravṛttiṃ bharatasya ca |
nivedayiṣyati prīto niṣādādhipatirguhaḥ || 6 ||
[Analyze grammar]

bharatastu tvayā vācyaḥ kuśalaṃ vacanānmama |
siddhārthaṃ śaṃsa māṃ tasmai sabhāryaṃ sahalakṣmaṇam || 7 ||
[Analyze grammar]

haraṇaṃ cāpi vaidehyā rāvaṇena balīyasā |
sugrīveṇa ca saṃvādaṃ vālinaśca vadhaṃ raṇe || 8 ||
[Analyze grammar]

maithilyanveṣaṇaṃ caiva yathā cādhigatā tvayā |
laṅghayitvā mahātoyamāpagāpatimavyayam || 9 ||
[Analyze grammar]

upayānaṃ samudrasya sāgarasya ca darśanam |
yathā ca kāritaḥ setū rāvaṇaśca yathā hataḥ || 10 ||
[Analyze grammar]

varadānaṃ mahendreṇa brahmaṇā varuṇena ca |
mahādevaprasādācca pitrā mama samāgamam || 11 ||
[Analyze grammar]

jitvā śatrugaṇān rāmaḥ prāpya cānuttamaṃ yaśaḥ |
upayāti samṛddhārthaḥ saha mitrairmahābalaḥ || 12 ||
[Analyze grammar]

etacchrutvā yamākāraṃ bhajate bharatastataḥ |
sa ca te veditavyaḥ syāt sarvaṃ yaccāpi māṃ prati || 13 ||
[Analyze grammar]

jñeyāḥ sarve ca vṛttāntā bharatasyeṅgitāni ca |
tattvena mukhavarṇena dṛṣṭyā vyābhāṣaṇena ca || 14 ||
[Analyze grammar]

sarvakāmasamṛddhaṃ hi hastyaśvarathasaṃkulam |
pitṛpaitāmahaṃ rājyaṃ kasya nāvartayenmanaḥ || 15 ||
[Analyze grammar]

saṃgatyā bharataḥ śrīmān rājyenārthī svayaṃ bhavet |
praśāstu vasudhāṃ sarvāmakhilāṃ raghunandanaḥ || 16 ||
[Analyze grammar]

tasya buddhiṃ ca vijñāya vyavasāyaṃ ca vānara |
yāvanna dūraṃ yātāḥ smaḥ kṣipramāgantumarhasi || 17 ||
[Analyze grammar]

iti pratisamādiṣṭo hanūmānmārutātmajaḥ |
mānuṣaṃ dhārayan rūpamayodhyāṃ tvarito yayau || 18 ||
[Analyze grammar]

laṅghayitvā pitṛpathaṃ bhujagendrālayaṃ śubham |
gaṅgāyamunayorbhīmaṃ saṃnipātamatītya ca || 19 ||
[Analyze grammar]

śṛṅgaverapuraṃ prāpya guhamāsādya vīryavān |
sa vācā śubhayā hṛṣṭo hanūmānidamabravīt || 20 ||
[Analyze grammar]

sakhā tu tava kākutstho rāmaḥ satyaparākramaḥ |
sasītaḥ saha saumitriḥ sa tvāṃ kuśalamabravīt || 21 ||
[Analyze grammar]

pañcamīmadya rajanīmuṣitvā vacanānmuneḥ |
bharadvājābhyanujñātaṃ drakṣyasyadyaiva rāghavam || 22 ||
[Analyze grammar]

evamuktvā mahātejāḥ saṃprahṛṣṭatanūruhaḥ |
utpapāta mahāvego vegavānavicārayan || 23 ||
[Analyze grammar]

so'paśyad rāmatīrthaṃ ca nadīṃ vālukinīṃ tathā |
gomatīṃ tāṃ ca so'paśyadbhīmaṃ sālavanaṃ tathā || 24 ||
[Analyze grammar]

sa gatvā dūramadhvānaṃ tvaritaḥ kapikuñjaraḥ |
āsasāda drumānphullānnandigrāmasamīpajān || 25 ||
[Analyze grammar]

krośamātre tvayodhyāyāścīrakṛṣṇājināmbaram |
dadarśa bharataṃ dīnaṃ kṛśamāśramavāsinam || 26 ||
[Analyze grammar]

jaṭilaṃ maladigdhāṅgaṃ bhrātṛvyasanakarśitam |
phalamūlāśinaṃ dāntaṃ tāpasaṃ dharmacāriṇam || 27 ||
[Analyze grammar]

samunnatajaṭābhāraṃ valkalājinavāsasaṃ |
niyataṃ bhāvitātmānaṃ brahmarṣisamatejasaṃ || 28 ||
[Analyze grammar]

pāduke te puraskṛtya śāsantaṃ vai vasuṃdharām |
caturvarṇyasya lokasya trātāraṃ sarvato bhayāt || 29 ||
[Analyze grammar]

upasthitamamātyaiśca śucibhiśca purohitaiḥ |
balamukhyaiśca yuktaiśca kāṣāyāmbaradhāribhiḥ || 30 ||
[Analyze grammar]

na hi te rājaputraṃ taṃ cīrakṛṣṇājināmbaram |
parimoktuṃ vyavasyanti paurā vai dharmavatsalāḥ || 31 ||
[Analyze grammar]

taṃ dharmamiva dharmajñaṃ devavantamivāparam |
uvāca prāñjalirvākyaṃ hanūmānmārutātmajaḥ || 32 ||
[Analyze grammar]

vasantaṃ daṇḍakāraṇye yaṃ tvaṃ cīrajaṭādharam |
anuśocasi kākutsthaṃ sa tvā kuśalamabravīt || 33 ||
[Analyze grammar]

priyamākhyāmi te deva śokaṃ tyakṣyasi dāruṇam |
asminmuhūrte bhrātrā tvaṃ rāmeṇa saha saṃgataḥ || 34 ||
[Analyze grammar]

nihatya rāvaṇaṃ rāmaḥ pratilabhya ca maithilīm |
upayāti samṛddhārthaḥ saha mitrairmahābalaiḥ || 35 ||
[Analyze grammar]

lakṣmaṇaśca mahātejā vaidehī ca yaśasvinī |
sītā samagrā rāmeṇa mahendreṇa śacī yathā || 36 ||
[Analyze grammar]

evamukto hanumatā bharataḥ kaikayīsutaḥ |
papāta sahasā hṛṣṭo harṣānmohaṃ jagāma ha || 37 ||
[Analyze grammar]

tato muhūrtādutthāya pratyāśvasya ca rāghavaḥ |
hanūmantamuvācedaṃ bharataḥ priyavādinam || 38 ||
[Analyze grammar]

aśokajaiḥ prītimayaiḥ kapimāliṅgya saṃbhramāt |
siṣeca bharataḥ śrīmān vipulairaśrubindubhiḥ || 39 ||
[Analyze grammar]

devo vā mānuṣo vā tvamanukrośādihāgataḥ |
priyākhyānasya te saumya dadāmi bruvataḥ priyam || 40 ||
[Analyze grammar]

gavāṃ śatasahasraṃ ca grāmāṇāṃ ca śataṃ param |
sakuṇḍalāḥ śubhācārā bhāryāḥ kanyāśca ṣoḍaśa || 41 ||
[Analyze grammar]

hemavarṇāḥ sunāsorūḥ śaśisaumyānanāḥ striyaḥ |
sarvābharaṇasaṃpannā saṃpannāḥ kulajātibhiḥ || 42 ||
[Analyze grammar]

niśamya rāmāgamanaṃ nṛpātmajaḥ kapipravīrasya tadādbhutopamam |
praharṣito rāmadidṛkṣayābhavat punaśca harṣādidamabravīdvacaḥ || 43 ||
[Analyze grammar]