Chapter 107

etacchrutvā śubhaṃ vākyaṃ rāghaveṇa subhāṣitam |
idaṃ śubhataraṃ vākyaṃ vyājahāra maheśvaraḥ || 1 ||
[Analyze grammar]

puṣkarākṣa mahābāho mahāvakṣaḥ paraṃtapa |
diṣṭyā kṛtamidaṃ karma tvayā śastrabhṛtāṃ vara || 2 ||
[Analyze grammar]

diṣṭyā sarvasya lokasya pravṛddhaṃ dāruṇaṃ tamaḥ |
apāvṛttaṃ tvayā saṃkhye rāma rāvaṇajaṃ bhayam || 3 ||
[Analyze grammar]

āśvāsya bharataṃ dīnaṃ kausalyāṃ ca yaśasvinīm |
kaikeyīṃ ca sumitrāṃ ca dṛṣṭvā lakṣmaṇamātaram || 4 ||
[Analyze grammar]

prāpya rājyamayodhyāyāṃ nandayitvā suhṛjjanam |
ikṣvākūṇāṃ kule vaṃśaṃ sthāpayitvā mahābala || 5 ||
[Analyze grammar]

iṣṭvā turagamedhena prāpya cānuttamaṃ yaśaḥ |
brāhmaṇebhyo dhanaṃ dattvā tridivaṃ gantumarhasi || 6 ||
[Analyze grammar]

eṣa rājā vimānasthaḥ pitā daśarathastava |
kākutstha mānuṣe loke gurustava mahāyaśāḥ || 7 ||
[Analyze grammar]

indralokaṃ gataḥ śrīmāṃstvayā putreṇa tāritaḥ |
lakṣmaṇena saha bhrātrā tvamenamabhivādaya || 8 ||
[Analyze grammar]

mahādevavacaḥ śrutvā kākutsthaḥ sahalakṣmaṇaḥ |
vimānaśikharasthasya praṇāmamakarot pituḥ || 9 ||
[Analyze grammar]

dīpyamānaṃ svayāṃ lakṣmyā virajo'mbaradhāriṇam |
lakṣmaṇena saha bhrātrā dadarśa pitaraṃ prabhuḥ || 10 ||
[Analyze grammar]

harṣeṇa mahatāviṣṭo vimānastho mahīpatiḥ |
prāṇaiḥ priyataraṃ dṛṣṭvā putraṃ daśarathastadā || 11 ||
[Analyze grammar]

āropyāṅkaṃ mahābāhurvarāsanagataḥ prabhuḥ |
bāhubhyāṃ saṃpariṣvajya tato vākyaṃ samādade || 12 ||
[Analyze grammar]

na me svargo bahumataḥ saṃmānaśca surarṣibhiḥ |
tvayā rāma vihīnasya satyaṃ pratiśṛṇomi te || 13 ||
[Analyze grammar]

kaikeyyā yāni coktāni vākyāni vadatāṃ vara |
tava pravrājanārthāni sthitāni hṛdaye mama || 14 ||
[Analyze grammar]

tvāṃ tu dṛṣṭvā kuśalinaṃ pariṣvajya salakṣmaṇam |
adya duḥkhādvimukto'smi nīhārādiva bhāskaraḥ || 15 ||
[Analyze grammar]

tārito'haṃ tvayā putra suputreṇa mahātmanā |
aṣṭāvakreṇa dharmātmā tārito brāhmaṇo yathā || 16 ||
[Analyze grammar]

idānīṃ ca vijānāmi yathā saumya sureśvaraiḥ |
vadhārthaṃ rāvaṇasyeha vihitaṃ puruṣottamam || 17 ||
[Analyze grammar]

siddhārthā khalu kausalyā yā tvāṃ rāma gṛhaṃ gatam |
vanānnivṛttaṃ saṃhṛṣṭā drakṣyate śatrusūdana || 18 ||
[Analyze grammar]

siddhārthāḥ khalu te rāma narā ye tvāṃ purīṃ gatam |
jalārdramabhiṣiktaṃ ca drakṣyanti vasudhādhipam || 19 ||
[Analyze grammar]

anuraktena balinā śucinā dharmacāriṇā |
iccheyaṃ tvāmahaṃ draṣṭuṃ bharatena samāgatam || 20 ||
[Analyze grammar]

caturdaśasamāḥ saumya vane niryāpitāstvayā |
vasatā sītayā sārdhaṃ lakṣmaṇena ca dhīmatā || 21 ||
[Analyze grammar]

nivṛttavanavāso'si pratijñā saphalā kṛtā |
rāvaṇaṃ ca raṇe hatvā devāste paritoṣitāḥ || 22 ||
[Analyze grammar]

kṛtaṃ karma yaśaḥ ślāghyaṃ prāptaṃ te śatrusūdana |
bhrātṛbhiḥ saha rājyastho dīrghamāyuravāpnuhi || 23 ||
[Analyze grammar]

iti bruvāṇaṃ rājānaṃ rāmaḥ prāñjalirabravīt |
kuru prasādaṃ dharmajña kaikeyyā bharatasya ca || 24 ||
[Analyze grammar]

saputrāṃ tvāṃ tyajāmīti yaduktā kaikayī tvayā |
sa śāpaḥ kaikayīṃ ghoraḥ saputrāṃ na spṛśet prabho || 25 ||
[Analyze grammar]

sa tatheti mahārājo rāmamuktvā kṛtāñjalim |
lakṣmaṇaṃ ca pariṣvajya punarvākyamuvāca ha || 26 ||
[Analyze grammar]

rāmaṃ śuśrūṣatā bhaktyā vaidehyā saha sītayā |
kṛtā mama mahāprītiḥ prāptaṃ dharmaphalaṃ ca te || 27 ||
[Analyze grammar]

dharmaṃ prāpsyasi dharmajña yaśaśca vipulaṃ bhuvi |
rāme prasanne svargaṃ ca mahimānaṃ tathaiva ca || 28 ||
[Analyze grammar]

rāmaṃ śuśrūṣa bhadraṃ te sumitrānandavardhana |
rāmaḥ sarvasya lokasya śubheṣvabhirataḥ sadā || 29 ||
[Analyze grammar]

ete sendrāstrayo lokāḥ siddhāśca paramarṣayaḥ |
abhigamya mahātmānamarcanti puruṣottamam || 30 ||
[Analyze grammar]

etattaduktamavyaktamakṣaraṃ brahmanirmitam |
devānāṃ hṛdayaṃ saumya guhyaṃ rāmaḥ paraṃtapaḥ || 31 ||
[Analyze grammar]

avāptaṃ dharmacaraṇaṃ yaśaśca vipulaṃ tvayā |
rāmaṃ śuśrūṣatā bhaktyā vaidehyā saha sītayā || 32 ||
[Analyze grammar]

sa tathoktvā mahābāhurlakṣmaṇaṃ prāñjaliṃ sthitam |
uvāca rājā dharmātmā vaidehīṃ vacanaṃ śubham || 33 ||
[Analyze grammar]

kartavyo na tu vaidehi manyustyāgamimaṃ prati |
rāmeṇa tvadviśuddhyarthaṃ kṛtametaddhitaiṣiṇā || 34 ||
[Analyze grammar]

na tvaṃ subhru samādheyā patiśuśrūvaṇaṃ prati |
avaśyaṃ tu mayā vācyameṣa te daivataṃ param || 35 ||
[Analyze grammar]

iti pratisamādiśya putrau sītāṃ tathā snuṣām |
indralokaṃ vimānena yayau daśaratho jvalan || 36 ||
[Analyze grammar]