Chapter 105

tato vaiśravaṇo rājā yamaścāmitrakarśanaḥ |
sahasrākṣo mahendraśca varuṇaśca paraṃtapaḥ || 1 ||
[Analyze grammar]

ṣaḍardhanayanaḥ śrīmānmahādevo vṛṣadhvajaḥ |
kartā sarvasya lokasya brahmā brahmavidāṃ varaḥ || 2 ||
[Analyze grammar]

ete sarve samāgamya vimānaiḥ sūryasaṃnibhaiḥ |
āgamya nagarīṃ laṅkāmabhijagmuśca rāghavam || 3 ||
[Analyze grammar]

tataḥ sahastābharaṇānpragṛhya vipulānbhujān |
abruvaṃstridaśaśreṣṭhāḥ prāñjaliṃ rāghavaṃ sthitam || 4 ||
[Analyze grammar]

kartā sarvasya lokasya śreṣṭho jñānavatāṃ varaḥ |
upekṣase kathaṃ sītāṃ patantīṃ havyavāhane |
kathaṃ devagaṇaśreṣṭhamātmānaṃ nāvabudhyase || 5 ||
[Analyze grammar]

ṛtadhāmā vasuḥ pūrvaṃ vasūnāṃ ca prajāpatiḥ |
tvaṃ trayāṇāṃ hi lokānāmādikartā svayaṃprabhuḥ || 6 ||
[Analyze grammar]

rudrāṇāmaṣṭamo rudraḥ sādhyānāmapi pañcamaḥ |
aśvinau cāpi te karṇau candrasūryau ca cakṣuṣī || 7 ||
[Analyze grammar]

ante cādau ca lokānāṃ dṛśyase tvaṃ paraṃtapa |
upekṣase ca vaidehīṃ mānuṣaḥ prākṛto yathā || 8 ||
[Analyze grammar]

ityukto lokapālaistaiḥ svāmī lokasya rāghavaḥ |
abravīttridaśaśreṣṭhān rāmo dharmabhṛtāṃ varaḥ || 9 ||
[Analyze grammar]

ātmānaṃ mānuṣaṃ manye rāmaṃ daśarathātmajam |
yo'haṃ yasya yataścāhaṃ bhagavāṃstadbravītu me || 10 ||
[Analyze grammar]

iti bruvāṇaṃ kākutsthaṃ brahmā brahmavidāṃ varaḥ |
abravīcchṛṇu me rāma satyaṃ satyaparākrama || 11 ||
[Analyze grammar]

bhavānnārāyaṇo devaḥ śrīmāṃścakrāyudho vibhuḥ |
ekaśṛṅgo varāhastvaṃ bhūtabhavyasapatnajit || 12 ||
[Analyze grammar]

akṣaraṃ brahmasatyaṃ ca madhye cānte ca rāghava |
lokānāṃ tvaṃ paro dharmo viṣvaksenaścaturbhujaḥ || 13 ||
[Analyze grammar]

śārṅgadhanvā hṛṣīkeśaḥ puruṣaḥ puruṣottamaḥ |
ajitaḥ khaḍgadhṛgviṣṇuḥ kṛṣṇaścaiva bṛhadbalaḥ || 14 ||
[Analyze grammar]

senānīrgrāmaṇīśca tvaṃ buddhiḥ sattvaṃ kṣamā damaḥ |
prabhavaścāpyayaśca tvamupendro madhusūdanaḥ || 15 ||
[Analyze grammar]

indrakarmā mahendrastvaṃ padmanābho raṇāntakṛt |
śaraṇyaṃ śaraṇaṃ ca tvāmāhurdivyā maharṣayaḥ || 16 ||
[Analyze grammar]

sahasraśṛṅgo vedātmā śatajihvo maharṣabhaḥ |
tvaṃ yajñastvaṃ vaṣaṭkārastvamoṃkāraḥ paraṃtapa || 17 ||
[Analyze grammar]

prabhavaṃ nidhanaṃ vā te na viduḥ ko bhavāniti |
dṛśyase sarvabhūteṣu brāhmaṇeṣu ca goṣu ca || 18 ||
[Analyze grammar]

dikṣu sarvāsu gagane parvateṣu vaneṣu ca |
sahasracaraṇaḥ śrīmāñ śataśīrṣaḥ sahasradhṛk || 19 ||
[Analyze grammar]

tvaṃ dhārayasi bhūtāni vasudhāṃ ca saparvatām |
ante pṛthivyāḥ salile dṛśyase tvaṃ mahoragaḥ || 20 ||
[Analyze grammar]

trīṃl lokāndhārayan rāma devagandharvadānavān |
ahaṃ te hṛdayaṃ rāma jihvā devī sarasvatī || 21 ||
[Analyze grammar]

devā gātreṣu lomāni nirmitā brahmaṇā prabho |
nimeṣaste'bhavad rātrirunmeṣaste'bhavaddivā || 22 ||
[Analyze grammar]

saṃskārāste'bhavan vedā na tadasti tvayā vinā |
jagat sarvaṃ śarīraṃ te sthairyaṃ te vasudhātalam || 23 ||
[Analyze grammar]

agniḥ kopaḥ prasādaste somaḥ śrīvatsalakṣaṇa |
tvayā lokāstrayaḥ krāntāḥ purāṇe vikramaistribhiḥ || 24 ||
[Analyze grammar]

mahendraśca kṛto rājā baliṃ baddhvā mahāsuram |
sītā lakṣmīrbhavān viṣṇurdevaḥ kṛṣṇaḥ prajāpatiḥ || 25 ||
[Analyze grammar]

vadhārthaṃ rāvaṇasyeha praviṣṭo mānuṣīṃ tanum |
tadidaṃ naḥ kṛtaṃ kāryaṃ tvayā dharmabhṛtāṃ vara || 26 ||
[Analyze grammar]

nihato rāvaṇo rāma prahṛṣṭo divamākrama |
amoghaṃ balavīryaṃ te amoghaste parākramaḥ || 27 ||
[Analyze grammar]

amoghāste bhaviṣyanti bhaktimantaśca ye narāḥ |
ye tvāṃ devaṃ dhruvaṃ bhaktāḥ purāṇaṃ puruṣottamam || 28 ||
[Analyze grammar]

ye narāḥ kīrtayiṣyanti nāsti teṣāṃ parābhavaḥ || 29 ||
[Analyze grammar]