Chapter 104

evamuktā tu vaidehī paruṣaṃ lomaharṣaṇam |
rāghaveṇa saroṣeṇa bhṛśaṃ pravyathitābhavat || 1 ||
[Analyze grammar]

sā tadaśrutapūrvaṃ hi jane mahati maithilī |
śrutvā bhartṛvaco rūkṣaṃ lajjayā vrīḍitābhavat || 2 ||
[Analyze grammar]

praviśantīva gātrāṇi svānyeva janakātmajā |
vākśalyaistaiḥ saśalyeva bhṛśamaśrūṇyavartayat || 3 ||
[Analyze grammar]

tato bāṣpaparikliṣṭaṃ pramārjantī svamānanam |
śanairgadgadayā vācā bhartāramidamabravīt || 4 ||
[Analyze grammar]

kiṃ māmasadṛśaṃ vākyamīdṛśaṃ śrotradāruṇam |
rūkṣaṃ śrāvayase vīra prākṛtaḥ prākṛtāmiva || 5 ||
[Analyze grammar]

na tathāsmi mahābāho yathā tvamavagacchasi |
pratyayaṃ gaccha me svena cāritreṇaiva te śape || 6 ||
[Analyze grammar]

pṛthak strīṇāṃ pracāreṇa jātiṃ tvaṃ pariśaṅkase |
parityajemāṃ śaṅkāṃ tu yadi te'haṃ parīkṣitā || 7 ||
[Analyze grammar]

yadyahaṃ gātrasaṃsparśaṃ gatāsmi vivaśā prabho |
kāmakāro na me tatra daivaṃ tatrāparādhyati || 8 ||
[Analyze grammar]

madadhīnaṃ tu yattanme hṛdayaṃ tvayi vartate |
parādhīneṣu gātreṣu kiṃ kariṣyāmyanīśvarā || 9 ||
[Analyze grammar]

sahasaṃvṛddhabhāvācca saṃsargeṇa ca mānada |
yadyahaṃ te na vijñātā hatā tenāsmi śāśvatam || 10 ||
[Analyze grammar]

preṣitaste yadā vīro hanūmānavalokakaḥ |
laṅkāsthāhaṃ tvayā vīra kiṃ tadā na visarjitā || 11 ||
[Analyze grammar]

pratyakṣaṃ vānarendrasya tvadvākyasamanantaram |
tvayā saṃtyaktayā vīra tyaktaṃ syājjīvitaṃ mayā || 12 ||
[Analyze grammar]

na vṛthā te śramo'yaṃ syāt saṃśaye nyasya jīvitam |
suhṛjjanaparikleśo na cāyaṃ niṣphalastava || 13 ||
[Analyze grammar]

tvayā tu naraśārdūla krodhamevānuvartatā |
laghuneva manuṣyeṇa strītvameva puraskṛtam || 14 ||
[Analyze grammar]

apadeśena janakānnotpattirvasudhātalāt |
mama vṛttaṃ ca vṛttajña bahu te na puraskṛtam || 15 ||
[Analyze grammar]

na pramāṇīkṛtaḥ pāṇirbālye bālena pīḍitaḥ |
mama bhaktiśca śīlaṃ ca sarvaṃ te pṛṣṭhataḥ kṛtam || 16 ||
[Analyze grammar]

evaṃ bruvāṇā rudatī bāṣpagadgadabhāṣiṇī |
abravīl lakṣmaṇaṃ sītā dīnaṃ dhyānaparaṃ sthitam || 17 ||
[Analyze grammar]

citāṃ me kuru saumitre vyasanasyāsya bheṣajam |
mithyāpavādopahatā nāhaṃ jīvitumutsahe || 18 ||
[Analyze grammar]

aprītasya guṇairbhartustyaktayā janasaṃsadi |
yā kṣamā me gatirgantuṃ pravekṣye havyavāhanam || 19 ||
[Analyze grammar]

evamuktastu vaidehyā lakṣmaṇaḥ paravīrahā |
amarṣavaśamāpanno rāghavānanamaikṣata || 20 ||
[Analyze grammar]

sa vijñāya manaśchandaṃ rāmasyākārasūcitam |
citāṃ cakāra saumitrirmate rāmasya vīryavān || 21 ||
[Analyze grammar]

adhomukhaṃ tato rāmaṃ śanaiḥ kṛtvā pradakṣiṇam |
upāsarpata vaidehī dīpyamānaṃ hutāśanam || 22 ||
[Analyze grammar]

praṇamya devatābhyaśca brāhmaṇebhyaśca maithilī |
baddhāñjalipuṭā cedamuvācāgnisamīpataḥ || 23 ||
[Analyze grammar]

yathā me hṛdayaṃ nityaṃ nāpasarpati rāghavāt |
tathā lokasya sākṣī māṃ sarvataḥ pātu pāvakaḥ || 24 ||
[Analyze grammar]

evamuktvā tu vaidehī parikramya hutāśanam |
viveśa jvalanaṃ dīptaṃ niḥsaṅgenāntarātmanā || 25 ||
[Analyze grammar]

janaḥ sa sumahāṃstatra bālavṛddhasamākulaḥ |
dadarśa maithilīṃ tatra praviśantīṃ hutāśanam || 26 ||
[Analyze grammar]

tasyāmagniṃ viśantyāṃ tu hāheti vipulaḥ svanaḥ |
rakṣasāṃ vānarāṇāṃ ca saṃbabhūvādbhutopamaḥ || 27 ||
[Analyze grammar]