Chapter 96

tau tathā yudhyamānau tu samare rāmarāvaṇau |
dadṛśuḥ sarvabhūtāni vismitenāntarātmanā || 1 ||
[Analyze grammar]

ardayantau tu samare tayostau syandanottamau |
parasparavadhe yuktau ghorarūpau babhūvatuḥ || 2 ||
[Analyze grammar]

maṇḍalāni ca vīthīśca gatapratyāgatāni ca |
darśayantau bahuvidhāṃ sūtau sārathyajāṃ gatim || 3 ||
[Analyze grammar]

ardayan rāvaṇaṃ rāmo rāghavaṃ cāpi rāvaṇaḥ |
gativegaṃ samāpannau pravartana nivartane || 4 ||
[Analyze grammar]

kṣipatoḥ śarajālāni tayostau syandanottamau |
ceratuḥ saṃyugamahīṃ sāsārau jaladāviva || 5 ||
[Analyze grammar]

darśayitvā tadā tau tu gatiṃ bahuvidhāṃ raṇe |
parasparasyābhimukhau punareva ca tasthatuḥ || 6 ||
[Analyze grammar]

dhuraṃ dhureṇa rathayorvaktraṃ vaktreṇa vājinām |
patākāśca patākābhiḥ sameyuḥ sthitayostadā || 7 ||
[Analyze grammar]

rāvaṇasya tato rāmo dhanurmuktaiḥ śitaiḥ śaraiḥ |
caturbhiścaturo dīptān hayānpratyapasarpayat || 8 ||
[Analyze grammar]

sa krodhavaśamāpanno hayānāmapasarpaṇe |
mumoca niśitānbāṇān rāghavāya niśācaraḥ || 9 ||
[Analyze grammar]

so'tividdho balavatā daśagrīveṇa rāghavaḥ |
jagāma na vikāraṃ ca na cāpi vyathito'bhavat || 10 ||
[Analyze grammar]

cikṣepa ca punarbāṇān vajrapātasamasvanān |
sārathiṃ vajrahastasya samuddiśya niśācaraḥ || 11 ||
[Analyze grammar]

mātalestu mahāvegāḥ śarīre patitāḥ śarāḥ |
na sūkṣmamapi saṃmohaṃ vyathāṃ vā pradaduryudhi || 12 ||
[Analyze grammar]

tayā dharṣaṇayā kroddho mātalerna tathātmanaḥ |
cakāra śarajālena rāghavo vimukhaṃ ripum || 13 ||
[Analyze grammar]

viṃśatiṃ triṃśataṃ ṣaṣṭiṃ śataśo'tha sahasraśaḥ |
mumoca rāghavo vīraḥ sāyakān syandane ripoḥ || 14 ||
[Analyze grammar]

gadānāṃ musalānāṃ ca parighāṇāṃ ca nisvanaiḥ |
śarāṇāṃ puṅkhavātaiśca kṣubhitāḥ saptasāgarāḥ || 15 ||
[Analyze grammar]

kṣubdhānāṃ sāgarāṇāṃ ca pātālatalavāsinaḥ |
vyathitāḥ pannagāḥ sarve dānavāśca sahasraśaḥ || 16 ||
[Analyze grammar]

cakampe medinī kṛtsnā saśailavanakānanā |
bhāskaro niṣprabhaścābhūnna vavau cāpi mārutaḥ || 17 ||
[Analyze grammar]

tato devāḥ sagandharvāḥ siddhāśca paramarṣayaḥ |
cintāmāpedire sarve sakiṃnaramahoragāḥ || 18 ||
[Analyze grammar]

svasti gobrāhmaṇebhyo'stu lokāstiṣṭhantu śāśvatāḥ |
jayatāṃ rāghavaḥ saṃkhye rāvaṇaṃ rākṣaseśvaram || 19 ||
[Analyze grammar]

tataḥ kruddho mahābāhū raghūṇāṃ kīrtivardhanaḥ |
saṃdhāya dhanuṣā rāmaḥ kṣuramāśīviṣopamam |
rāvaṇasya śiro'cchindacchrīmajjvalitakuṇḍalam || 20 ||
[Analyze grammar]

tacchiraḥ patitaṃ bhūmau dṛṣṭaṃ lokaistribhistadā |
tasyaiva sadṛśaṃ cānyad rāvaṇasyotthitaṃ śiraḥ || 21 ||
[Analyze grammar]

tat kṣipraṃ kṣiprahastena rāmeṇa kṣiprakāriṇā |
dvitīyaṃ rāvaṇaśiraśchinnaṃ saṃyati sāyakaiḥ || 22 ||
[Analyze grammar]

chinnamātraṃ ca tacchīrṣaṃ punaranyat sma dṛśyate |
tadapyaśanisaṃkāśaiśchinnaṃ rāmeṇa sāyakaiḥ || 23 ||
[Analyze grammar]

evameva śataṃ chinnaṃ śirasāṃ tulyavarcasām |
na caiva rāvaṇasyānto dṛśyate jīvitakṣaye || 24 ||
[Analyze grammar]

tataḥ sarvāstravidvīraḥ kausalyānandivardhanaḥ |
mārgaṇairbahubhiryuktaścintayāmāsa rāghavaḥ || 25 ||
[Analyze grammar]

mārīco nihato yaistu kharo yaistu sudūṣaṇaḥ |
krañcāraṇye virādhastu kabandho daṇḍakā vane || 26 ||
[Analyze grammar]

ta ime sāyakāḥ sarve yuddhe pratyayikā mama |
kiṃ nu tat kāraṇaṃ yena rāvaṇe mandatejasaḥ || 27 ||
[Analyze grammar]

iti cintāparaścāsīdapramattaśca saṃyuge |
vavarṣa śaravarṣāṇi rāghavo rāvaṇorasi || 28 ||
[Analyze grammar]

rāvaṇo'pi tataḥ kruddho rathastho rākṣaseśvaraḥ |
gadāmusalavarṣeṇa rāmaṃ pratyardayad raṇe || 29 ||
[Analyze grammar]

devadānavayakṣāṇāṃ piśācoragarakṣasām |
paśyatāṃ tanmahad yuddhaṃ sarvarātramavartata || 30 ||
[Analyze grammar]

naiva ratriṃ na divasaṃ na muhūrtaṃ na cakṣaṇam |
rāmarāvaṇayoryuddhaṃ virāmamupagacchati || 31 ||
[Analyze grammar]