Chapter 94

tamāpatantaṃ sahasā svanavantaṃ mahādhvajam |
rathaṃ rākṣasarājasya nararājo dadarśa ha || 1 ||
[Analyze grammar]

kṛṣṇavājisamāyuktaṃ yuktaṃ raudreṇa varcasā |
taḍitpatākāgahanaṃ darśitendrāyudhāyudham |
śaradhārā vimuñcantaṃ dhārāsāramivānbudam || 2 ||
[Analyze grammar]

taṃ dṛṣṭvā meghasaṃkāśamāpatantaṃ rathaṃ ripoḥ |
girervajrābhimṛṣṭasya dīryataḥ sadṛśasvanam |
uvāca mātaliṃ rāmaḥ sahasrākṣasya sārathim || 3 ||
[Analyze grammar]

mātale paśya saṃrabdhamāpatantaṃ rathaṃ ripoḥ |
yathāpasavyaṃ patatā vegena mahatā punaḥ |
samare hantumātmānaṃ tathānena kṛtā matiḥ || 4 ||
[Analyze grammar]

tadapramādamātiṣṭha pratyudgaccha rathaṃ ripoḥ |
vidhvaṃsayitumicchāmi vāyurmeghamivotthitam || 5 ||
[Analyze grammar]

aviklavamasaṃbhrāntamavyagrahṛdayekṣaṇam |
raśmisaṃcāraniyataṃ pracodaya rathaṃ drutam || 6 ||
[Analyze grammar]

kāmaṃ na tvaṃ samādheyaḥ puraṃdararathocitaḥ |
yuyutsurahamekāgraḥ smāraye tvāṃ na śikṣaye || 7 ||
[Analyze grammar]

parituṣṭaḥ sa rāmasya tena vākyena mātaliḥ |
pracodayāmāsa rathaṃ surasārathisattamaḥ || 8 ||
[Analyze grammar]

apasavyaṃ tataḥ kurvan rāvaṇasya mahāratham |
cakrotkṣiptena rajasā rāvaṇaṃ vyavadhūnayat || 9 ||
[Analyze grammar]

tataḥ kruddho daśagrīvastāmravisphāritekṣaṇaḥ |
rathapratimukhaṃ rāmaṃ sāyakairavadhūnayat || 10 ||
[Analyze grammar]

dharṣaṇāmarṣito rāmo dhairyaṃ roṣeṇa laṅghayan |
jagrāha sumahāvegamaindraṃ yudhi śarāsanam |
śarāṃśca sumahātejāḥ sūryaraśmisamaprabhān || 11 ||
[Analyze grammar]

tadupoḍhaṃ mahad yuddhamanyonyavadhakāṅkṣiṇoḥ |
parasparābhimukhayordṛptayoriva siṃhayoḥ || 12 ||
[Analyze grammar]

tato devāḥ sagandharvāḥ siddhāśca paramarṣayaḥ |
samīyurdvairathaṃ draṣṭuṃ rāvaṇakṣayakāṅkṣiṇaḥ || 13 ||
[Analyze grammar]

samutpeturathotpātā dāruṇā lomaharṣaṇāḥ |
rāvaṇasya vināśāya rāghavasya jayāya ca || 14 ||
[Analyze grammar]

vavarṣa rudhiraṃ devo rāvaṇasya rathopari |
vātā maṇḍalinastīvrā apasavyaṃ pracakramuḥ || 15 ||
[Analyze grammar]

mahadgṛdhrakulaṃ cāsya bhramamāṇaṃ nabhastale |
yena yena ratho yāti tena tena pradhāvati || 16 ||
[Analyze grammar]

saṃdhyayā cāvṛtā laṅkā japāpuṣpanikāśayā |
dṛśyate saṃpradīteva divase'pi vasuṃdharā || 17 ||
[Analyze grammar]

sanirghātā maholkāśca saṃpraceturmahāsvanāḥ |
viṣādayantyo rakṣāṃsi rāvaṇasya tadāhitāḥ || 18 ||
[Analyze grammar]

rāvaṇaśca yatastatra pracacāla vasuṃdharā |
rakṣasāṃ ca praharatāṃ gṛhītā iva bāhavaḥ || 19 ||
[Analyze grammar]

tāmrāḥ pītāḥ sitāḥ śvetāḥ patitāḥ sūryaraśmayaḥ |
dṛśyante rāvaṇasyāṅge parvatasyeva dhātavaḥ || 20 ||
[Analyze grammar]

gṛdhrairanugatāścāsya vamantyo jvalanaṃ mukhaiḥ |
praṇedurmukhamīkṣantyaḥ saṃrabdhamaśivaṃ śivāḥ || 21 ||
[Analyze grammar]

pratikūlaṃ vavau vāyū raṇe pāṃsūn samutkiran |
tasya rākṣasarājasya kurvandṛṣṭivilopanam || 22 ||
[Analyze grammar]

nipeturindrāśanayaḥ sainye cāsya samantataḥ |
durviṣahya svanā ghorā vinā jaladharasvanam || 23 ||
[Analyze grammar]

diśaśca pradiśaḥ sarvā babhūvustimirāvṛtāḥ |
pāṃsuvarṣeṇa mahatā durdarśaṃ ca nabho'bhavat || 24 ||
[Analyze grammar]

kurvantyaḥ kalahaṃ ghoraṃ sārikāstadrathaṃ prati |
nipetuḥ śataśastatra dāruṇā dāruṇasvanāḥ || 25 ||
[Analyze grammar]

jaghanebhyaḥ sphuliṅgāṃśca netrebhyo'śrūṇi saṃtatam |
mumucustasya turagāstulyamagniṃ ca vāri ca || 26 ||
[Analyze grammar]

evaṃ prakārā bahavaḥ samutpātā bhayāvahāḥ |
rāvaṇasya vināśāya dāruṇāḥ saṃprajajñire || 27 ||
[Analyze grammar]

rāmasyāpi nimittāni saumyāni ca śivāni ca |
babhūvurjayaśaṃsīni prādurbhūtāni sarvaśaḥ || 28 ||
[Analyze grammar]

tato nirīkṣyātmagatāni rāghavo raṇe nimittāni nimittakovidaḥ |
jagāma harṣaṃ ca parāṃ ca nirvṛtiṃ cakāra yuddhe'bhyadhikaṃ ca vikramam || 29 ||
[Analyze grammar]