Chapter 93

sa tu mohāt susaṃkruddhaḥ kṛtāntabalacoditaḥ |
krodhasaṃraktanayano rāvaṇo sūtamabravīt || 1 ||
[Analyze grammar]

hīnavīryamivāśaktaṃ pauruṣeṇa vivarjitam |
bhīruṃ laghumivāsattvaṃ vihīnamiva tejasā || 2 ||
[Analyze grammar]

vimuktamiva māyābhirastrairiva bahiṣkṛtam |
māmavajñāya durbuddhe svayā buddhyā viceṣṭase || 3 ||
[Analyze grammar]

kimarthaṃ māmavajñāya macchandamanavekṣya ca |
tvayā śatrusamakṣaṃ me ratho'yamapavāhitaḥ || 4 ||
[Analyze grammar]

tvayādya hi mamānārya cirakālasamārjitam |
yaśo vīryaṃ ca tejaśca pratyayaśca vināśitaḥ || 5 ||
[Analyze grammar]

śatroḥ prakhyātavīryasya rañjanīyasya vikramaiḥ |
paśyato yuddhalubdho'haṃ kṛtaḥ kāpuruṣastvayā || 6 ||
[Analyze grammar]

yastvaṃ rathamimaṃ mohānna codvahasi durmate |
satyo'yaṃ pratitarko me pareṇa tvamupaskṛtaḥ || 7 ||
[Analyze grammar]

na hīdaṃ vidyate karma suhṛdo hitakāṅkṣiṇaḥ |
ripūṇāṃ sadṛśaṃ caitanna tvayaitat svanuṣṭhitam || 8 ||
[Analyze grammar]

nivartaya rathaṃ śīghraṃ yāvannāpaiti me ripuḥ |
yadi vāpyuṣito'si tvaṃ smaryante yadi vā guṇāḥ || 9 ||
[Analyze grammar]

evaṃ paruṣamuktastu hitabuddhirabuddhinā |
abravīd rāvaṇaṃ sūto hitaṃ sānunayaṃ vacaḥ || 10 ||
[Analyze grammar]

na bhīto'smi na mūḍho'smi nopajapto'smi śatrubhiḥ |
na pramatto na niḥsneho vismṛtā na ca satkriyā || 11 ||
[Analyze grammar]

mayā tu hitakāmena yaśaśca parirakṣatā |
snehapraskannamanasā priyamityapriyaṃ kṛtam || 12 ||
[Analyze grammar]

nāsminnarthe mahārāja tvaṃ māṃ priyahite ratam |
kaścil laghurivānāryo doṣato gantumarhasi || 13 ||
[Analyze grammar]

śrūyatāmabhidhāsyāmi yannimittaṃ mayā rathaḥ |
nadīvega ivāmbhobhiḥ saṃyuge vinivartitaḥ || 14 ||
[Analyze grammar]

śramaṃ tavāvagacchāmi mahatā raṇakarmaṇā |
na hi te vīra saumukhyaṃ praharṣaṃ vopadhāraye || 15 ||
[Analyze grammar]

rathodvahanakhinnāśca ta ime rathavājinaḥ |
dīnā gharmapariśrāntā gāvo varṣahatā iva || 16 ||
[Analyze grammar]

nimittāni ca bhūyiṣṭhaṃ yāni prādurbhavanti naḥ |
teṣu teṣvabhipanneṣu lakṣayāmyapradakṣiṇam || 17 ||
[Analyze grammar]

deśakālau ca vijñeyau lakṣaṇānīṅgitāni ca |
dainyaṃ harṣaśca khedaśca rathinaśca balābalam || 18 ||
[Analyze grammar]

sthalanimnāni bhūmeśca samāni viṣamāṇi ca |
yuddhakālaśca vijñeyaḥ parasyāntaradarśanam || 19 ||
[Analyze grammar]

upayānāpayāne ca sthānaṃ pratyapasarpaṇam |
sarvametad rathasthena jñeyaṃ rathakuṭumbinā || 20 ||
[Analyze grammar]

tava viśrāmahetostu tathaiṣāṃ rathavājinām |
raudraṃ varjayatā khedaṃ kṣamaṃ kṛtamidaṃ mayā || 21 ||
[Analyze grammar]

na mayā svecchayā vīra ratho'yamapavāhitaḥ |
bhartṛsnehaparītena mayedaṃ yatkṛtaṃ vibho || 22 ||
[Analyze grammar]

ājñāpaya yathātattvaṃ vakṣyasyariniṣūdana |
tat kariṣyāmyahaṃ vīraṃ gatānṛṇyena cetasā || 23 ||
[Analyze grammar]

saṃtuṣṭastena vākyena rāvaṇastasya sāratheḥ |
praśasyainaṃ bahuvidhaṃ yuddhalubdho'bravīdidam || 24 ||
[Analyze grammar]

rathaṃ śīghramimaṃ sūta rāghavābhimukhaṃ kuru |
nāhatvā samare śatrūnnivartiṣyati rāvaṇaḥ || 25 ||
[Analyze grammar]

evamuktvā tatastuṣṭo rāvaṇo rākṣaseśvaraḥ |
dadau tasya śubhaṃ hyekaṃ hastābharaṇamuttamam || 26 ||
[Analyze grammar]

tato drutaṃ rāvaṇavākyacoditaḥ pracodayāmāsa hayān sa sārathiḥ |
sa rākṣasendrasya tato mahārathaḥ kṣaṇena rāmasya raṇāgrato'bhavat || 27 ||
[Analyze grammar]