Chapter 83

ārtānāṃ rākṣasīnāṃ tu laṅkāyāṃ vai kule kule |
rāvaṇaḥ karuṇaṃ śabdaṃ śuśrāva pariveditam || 1 ||
[Analyze grammar]

sa tu dīrghaṃ viniśvasya muhūrtaṃ dhyānamāsthitaḥ |
babhūva paramakruddho rāvaṇo bhīmadarśanaḥ || 2 ||
[Analyze grammar]

saṃdaśya daśanairoṣṭhaṃ krodhasaṃraktalocanaḥ |
rākṣasairapi durdarśaḥ kālāgniriva mūrchitaḥ || 3 ||
[Analyze grammar]

uvāca ca samīpasthān rākṣasān rākṣaseśvaraḥ |
bhayāvyaktakathāṃstatra nirdahanniva cakṣuṣā || 4 ||
[Analyze grammar]

mahodaraṃ mahāpārśvaṃ virūpākṣaṃ ca rākṣasaṃ |
śīghraṃ vadata sainyāni niryāteti mamājñayā || 5 ||
[Analyze grammar]

tasya tadvacanaṃ śrutvā rākṣasāste bhayārditāḥ |
codayāmāsuravyagrān rākṣasāṃstānnṛpājñayā || 6 ||
[Analyze grammar]

te tu sarve tathetyuktvā rākṣasā ghoradarśanāḥ |
kṛtasvastyayanāḥ sarve rāvaṇābhimukhā yayuḥ || 7 ||
[Analyze grammar]

pratipūjya yathānyāyaṃ rāvaṇaṃ te mahārathāḥ |
tasthuḥ prāñjalayaḥ sarve bharturvijayakāṅkṣiṇaḥ || 8 ||
[Analyze grammar]

athovāca prahasyaitān rāvaṇaḥ krodhamūrchitaḥ |
mahodaramahāpārśvau virūpākṣaṃ ca rākṣasaṃ || 9 ||
[Analyze grammar]

adya bāṇairdhanurmuktairyugāntādityasaṃnibhaiḥ |
rāghavaṃ lakṣmaṇaṃ caiva neṣyāmi yamasādhanam || 10 ||
[Analyze grammar]

kharasya kumbhakarṇasya prahastendrajitostathā |
kariṣyāmi pratīkāramadya śatruvadhādaham || 11 ||
[Analyze grammar]

naivāntarikṣaṃ na diśo na nadyo nāpi sāgaraḥ |
prakāśatvaṃ gamiṣyanti madbāṇajaladāvṛtāḥ || 12 ||
[Analyze grammar]

adya vānarayūthānāṃ tāni yūthāni bhāgaśaḥ |
dhanuḥsamudrādudbhūtairmathiṣyāmi śarormibhiḥ || 13 ||
[Analyze grammar]

vyākośapadmacakrāṇi padmakesaravarcasām |
adya yūthataṭākāni gajavat pramathāmyaham || 14 ||
[Analyze grammar]

saśarairadya vadanaiḥ saṃkhye vānarayūthapāḥ |
maṇḍayiṣyanti vasudhāṃ sanālairiva paṅkalaiḥ || 15 ||
[Analyze grammar]

adya yuddhapracaṇḍānāṃ harīṇāṃ drumayodhinām |
muktenaikeṣuṇā yuddhe bhetsyāmi ca śataṃśatam || 16 ||
[Analyze grammar]

hato bhartā hato bhrātā yāsāṃ ca tanayā hatāḥ |
vadhenādya ripostāsāṃ karmomyasrapramārjanam || 17 ||
[Analyze grammar]

adya madbāṇanirbhinnaiḥ prakīrṇairgatacetanaiḥ |
karomi vānarairyuddhe yatnāvekṣyatalāṃ mahīm || 18 ||
[Analyze grammar]

adya gomāyavo gṛdhrā ye ca māṃsāśino'pare |
sarvāṃstāṃstarpayiṣyāmi śatrumāṃsaiḥ śarārditaiḥ || 19 ||
[Analyze grammar]

kalpyatāṃ me rathaśīghraṃ kṣipramānīyatāṃ dhanuḥ |
anuprayāntu māṃ yuddhe ye'vaśiṣṭā niśācarāḥ || 20 ||
[Analyze grammar]

tasya tadvacanaṃ śrutvā mahāpārśvo'bravīdvacaḥ |
balādhyakṣān sthitāṃstatra balaṃ saṃtvaryatāmiti || 21 ||
[Analyze grammar]

balādhyakṣāstu saṃrabdhā rākṣasāṃstān gṛhādgṛhāt |
codayantaḥ pariyayurlaṅkāṃ laghuparākramāḥ || 22 ||
[Analyze grammar]

tato muhūrtānniṣpetū rākṣasā bhīmavikramāḥ |
nardanto bhīmavadanā nānāpraharaṇairbhujaiḥ || 23 ||
[Analyze grammar]

asibhiḥ paṭṭasaiḥ śūlairgalābhirmusalairhalaiḥ |
śaktibhistīkṣṇadhārābhirmahadbhiḥ kūṭamudgaraiḥ || 24 ||
[Analyze grammar]

yaṣṭibhirvimalaiścakrairniśitaiśca paraśvadhaiḥ |
bhiṇḍipālaiḥ śataghnībhiranyaiścāpi varāyudhaiḥ || 25 ||
[Analyze grammar]

athānayanbalādhyakṣāścatvāro rāvaṇājñayā |
drutaṃ sūtasamāyuktaṃ yuktāṣṭaturagaṃ ratham || 26 ||
[Analyze grammar]

āruroha rathaṃ divyaṃ dīpyamānaṃ svatejasā |
rāvaṇaḥ sattvagāmbhīryāddārayanniva medinīm || 27 ||
[Analyze grammar]

rāvaṇenābhyanujñātau mahāpārśvamahodarau |
virūpākṣaśca durdharṣo rathānāruruhustadā || 28 ||
[Analyze grammar]

te tu hṛṣṭā vinardanto bhindanta iva medinīm |
nādaṃ ghoraṃ vimuñcanto niryayurjayakāṅkṣiṇaḥ || 29 ||
[Analyze grammar]

tato yuddhāya tejasvī rakṣogaṇabalairvṛtaḥ |
niryayāv udyatadhanuḥ kālāntakayamomapaḥ || 30 ||
[Analyze grammar]

tataḥ prajavanāśvena rathena sa mahārathaḥ |
dvāreṇa niryayau tena yatra tau rāmalakṣmaṇau || 31 ||
[Analyze grammar]

tato naṣṭaprabhaḥ sūryo diśaśca timirāvṛtāḥ |
dvijāśca nedurghorāśca saṃcacāla ca medinī || 32 ||
[Analyze grammar]

vavarṣa rudhiraṃ devaścaskhaluśca turaṃgamāḥ |
dhvajāgre nyapatadgṛdhro vineduścāśivaṃ śivāḥ || 33 ||
[Analyze grammar]

nayanaṃ cāsphuradvāmaṃ savyo bāhurakampata |
vivarṇavadanaścāsīt kiṃ cidabhraśyata svaraḥ || 34 ||
[Analyze grammar]

tato niṣpatato yuddhe daśagrīvasya rakṣasaḥ |
raṇe nidhanaśaṃsīni rūpāṇyetāni jajñire || 35 ||
[Analyze grammar]

antarikṣāt papātolkā nirghātasamanisvanā |
vineduraśivaṃ gṛdhrā vāyasairanunāditāḥ || 36 ||
[Analyze grammar]

etānacintayan ghorānutpātān samupasthitān |
niryayau rāvaṇo mohādvadhārthī kālacoditaḥ || 37 ||
[Analyze grammar]

teṣāṃ tu rathaghoṣeṇa rākṣasānāṃ mahātmanām |
vānarāṇāmapi camūryuddhāyaivābhyavartata || 38 ||
[Analyze grammar]

teṣāṃ sutumulaṃ yuddhaṃ babhūva kapirakṣasām |
anyonyamāhvayānānāṃ kruddhānāṃ jayamicchatām || 39 ||
[Analyze grammar]

tataḥ kruddho daśagrīvaḥ śaraiḥ kāñcanabhūṣaṇaiḥ |
vānarāṇāmanīkeṣu cakāra kadanaṃ mahat || 40 ||
[Analyze grammar]

nikṛttaśirasaḥ ke cid rāvaṇena valīmukhāḥ |
nirucchvāsā hatāḥ ke cit ke cit pārśveṣu dāritāḥ |
ke cidvibhinnaśirasaḥ ke ciccakṣurvivarjitāḥ || 41 ||
[Analyze grammar]

daśānanaḥ krodhavivṛttanetro yato yato'bhyeti rathena saṃkhye |
tatastatastasya śarapravegaṃ soḍhuṃ na śekurhariyūthapāste || 42 ||
[Analyze grammar]