Chapter 82

tāni nāgasahasrāṇi sārohāṇāṃ ca vājinām |
rathānāṃ cāgnivarṇānāṃ sadhvajānāṃ sahasraśaḥ || 1 ||
[Analyze grammar]

rākṣasānāṃ sahasrāṇi gadāparighayodhinām |
kāñcanadhvajacitrāṇāṃ śūrāṇāṃ kāmarūpiṇām || 2 ||
[Analyze grammar]

nihatāni śaraistīkṣṇaistaptakāñcanabhūṣaṇaiḥ |
rāvaṇena prayuktāni rāmeṇākliṣṭakarmaṇā || 3 ||
[Analyze grammar]

dṛṣṭvā śrutvā ca saṃbhrāntā hataśeṣā niśācarāḥ |
rākṣasyaśca samāgamya dīnāścintāpariplutāḥ || 4 ||
[Analyze grammar]

vidhavā hataputrāśca krośantyo hatabāndhavāḥ |
rākṣasyaḥ saha saṃgamya duḥkhārtāḥ paryadevayan || 5 ||
[Analyze grammar]

kathaṃ śūrpaṇakhā vṛddhā karālā nirṇatodarī |
āsasāda vane rāmaṃ kandarpamiva rūpiṇam || 6 ||
[Analyze grammar]

sukumāraṃ mahāsattvaṃ sarvabhūtahite ratam |
taṃ dṛṣṭvā lokavadhyā sā hīnarūpā prakāmitā || 7 ||
[Analyze grammar]

kathaṃ sarvaguṇairhīnā guṇavantaṃ mahaujasaṃ |
sumukhaṃ durmukhī rāmaṃ kāmayāmāsa rākṣasī || 8 ||
[Analyze grammar]

janasyāsyālpabhāgyatvāt palinī śvetamūrdhajā |
akāryamapahāsyaṃ ca sarvalokavigarhitam || 9 ||
[Analyze grammar]

rākṣasānāṃ vināśāya dūṣaṇasya kharasya ca |
cakārāpratirūpā sā rāghavasya pradharṣaṇam || 10 ||
[Analyze grammar]

tannimittamidaṃ vairaṃ rāvaṇena kṛtaṃ mahat |
vadhāya nītā sā sītā daśagrīveṇa rakṣasā || 11 ||
[Analyze grammar]

na ca sītāṃ daśagrīvaḥ prāpnoti janakātmajām |
baddhaṃ balavatā vairamakṣayaṃ rāghaveṇa ha || 12 ||
[Analyze grammar]

vaidehīṃ prārthayānaṃ taṃ virādhaṃ prekṣya rākṣasaṃ |
hatamekena rāmeṇa paryāptaṃ tannidarśanam || 13 ||
[Analyze grammar]

caturdaśasahasrāṇi rakṣasāṃ bhīmakarmaṇām |
nihatāni janasthāne śarairagniśikhopamaiḥ || 14 ||
[Analyze grammar]

kharaśca nihataḥ saṃkhye dūṣaṇastriśirāstathā |
śarairādityasaṃkāśaiḥ paryāptaṃ tannidarśanam || 15 ||
[Analyze grammar]

hato yojanabāhuśca kabandho rudhirāśanaḥ |
krodhārto vinadan so'tha paryāptaṃ tannidarśanam || 16 ||
[Analyze grammar]

jaghāna balinaṃ rāmaḥ sahasranayanātmajam |
bālinaṃ meghasaṃkāśaṃ paryāptaṃ tannidarśanam || 17 ||
[Analyze grammar]

ṛśyamūke vasañ śaile dīno bhagnamanorathaḥ |
sugrīvaḥ sthāpito rājye paryāptaṃ tannidarśanam || 18 ||
[Analyze grammar]

dharmārthasahitaṃ vākyaṃ sarveṣāṃ rakṣasāṃ hitam |
yuktaṃ vibhīṣaṇenoktaṃ mohāttasya na rocate || 19 ||
[Analyze grammar]

vibhīṣaṇavacaḥ kuryād yadi sma dhanadānujaḥ |
śmaśānabhūtā duḥkhārtā neyaṃ laṅkā purī bhavet || 20 ||
[Analyze grammar]

kumbhakarṇaṃ hataṃ śrutvā rāghaveṇa mahābalam |
priyaṃ cendrajitaṃ putraṃ rāvaṇo nāvabudhyate || 21 ||
[Analyze grammar]

mama putro mama bhrātā mama bhartā raṇe hataḥ |
ityevaṃ śrūyate śabdo rākṣasānāṃ kule kule || 22 ||
[Analyze grammar]

rathāścāśvāśca nāgāśca hatāḥ śatasahasraśaḥ |
raṇe rāmeṇa śūreṇa rākṣasāśca padātayaḥ || 23 ||
[Analyze grammar]

rudro vā yadi vā viṣṇurmahendro vā śatakratuḥ |
hanti no rāmarūpeṇa yadi vā svayamantakaḥ || 24 ||
[Analyze grammar]

hatapravīrā rāmeṇa nirāśā jīvite vayam |
apaśyantyo bhayasyāntamanāthā vilapāmahe || 25 ||
[Analyze grammar]

rāmahastāddaśagrīvaḥ śūro dattavaro yudhi |
idaṃ bhayaṃ mahāghoramutpannaṃ nāvabudhyate || 26 ||
[Analyze grammar]

na devā na ca gandharvā na piśācā na rākṣasāḥ |
upasṛṣṭaṃ paritrātuṃ śaktā rāmeṇa saṃyuge || 27 ||
[Analyze grammar]

utpātāścāpi dṛśyante rāvaṇasya raṇe raṇe |
kathayiṣyanti rāmeṇa rāvaṇasya nibarhaṇam || 28 ||
[Analyze grammar]

pitāmahena prītena devadānavarākṣasaiḥ |
rāvaṇasyābhayaṃ dattaṃ mānuṣebhyo na yācitam || 29 ||
[Analyze grammar]

tadidaṃ mānuṣānmanye prāptaṃ niḥsaṃśayaṃ bhayam |
jīvitāntakaraṃ ghoraṃ rakṣasāṃ rāvaṇasya ca || 30 ||
[Analyze grammar]

pīḍyamānāstu balinā varadānena rakṣasā |
dīptaistapobhirvibudhāḥ pitāmahamapūjayan || 31 ||
[Analyze grammar]

devatānāṃ hitārthāya mahātmā vai pitāmahaḥ |
uvāca devatāḥ sarvā idaṃ tuṣṭo mahadvacaḥ || 32 ||
[Analyze grammar]

adya prabhṛti lokāṃstrīn sarve dānavarākṣasāḥ |
bhayena prāvṛtā nityaṃ vicariṣyanti śāśvatam || 33 ||
[Analyze grammar]

daivataistu samāgamya sarvaiścendrapurogamaiḥ |
vṛṣadhvajastripurahā mahādevaḥ prasāditaḥ || 34 ||
[Analyze grammar]

prasannastu mahādevo devānetadvaco'bravīt |
utpatsyati hitārthaṃ vo nārī rakṣaḥkṣayāvahā || 35 ||
[Analyze grammar]

eṣā devaiḥ prayuktā tu kṣud yathā dānavānpurā |
bhakṣayiṣyati naḥ sītā rākṣasaghnī sarāvaṇān || 36 ||
[Analyze grammar]

rāvaṇasyāpanītena durvinītasya durmateḥ |
ayaṃ niṣṭānako ghoraḥ śokena samabhiplutaḥ || 37 ||
[Analyze grammar]

taṃ na paśyāmahe loke yo naḥ śaraṇado bhavet |
rāghaveṇopasṛṣṭānāṃ kāleneva yugakṣaye || 38 ||
[Analyze grammar]

itīva sarvā rajanīcarastriyaḥ parasparaṃ saṃparirabhya bāhubhiḥ |
viṣedurārtātibhayābhipīḍitā vineduruccaiśca tadā sudāruṇam || 39 ||
[Analyze grammar]