Chapter 81

sa praviśya sabhāṃ rājā dīnaḥ paramaduḥkhitaḥ |
niṣasādāsane mukhye siṃhaḥ kruddha iva śvasan || 1 ||
[Analyze grammar]

abravīcca tadā sarvānbalamukhyānmahābalaḥ |
rāvaṇaḥ prāñjalīn vākyaṃ putravyasanakarśitaḥ || 2 ||
[Analyze grammar]

sarve bhavantaḥ sarveṇa hastyaśvena samāvṛtāḥ |
niryāntu rathasaṃghaiśca pādātaiścopaśobhitāḥ || 3 ||
[Analyze grammar]

ekaṃ rāmaṃ parikṣipya samare hantumarhatha |
prahṛṣṭā śaravarṣeṇa prāvṛṭkāla ivāmbudāḥ || 4 ||
[Analyze grammar]

atha vāhaṃ śarair tīkṣṇairbhinnagātraṃ mahāraṇe |
bhavadbhiḥ śvo nihantāsmi rāmaṃ lokasya paśyataḥ || 5 ||
[Analyze grammar]

ityevaṃ rākṣasendrasya vākyamādāya rākṣasāḥ |
niryayuste rathaiḥ śīghraṃ nāgānīkaiśca saṃvṛtāḥ || 6 ||
[Analyze grammar]

sa saṃgrāmo mahābhīmaḥ sūryasyodayanaṃ prati |
rakṣasāṃ vānarāṇāṃ ca tumulaḥ samapadyata || 7 ||
[Analyze grammar]

te gadābhirvicitrābhiḥ prāsaiḥ khaḍgaiḥ paraśvadhaiḥ |
anyonyaṃ samare jaghnustadā vānararākṣasāḥ || 8 ||
[Analyze grammar]

mātaṃgarathakūlasya vājimatsyā dhvajadrumāḥ |
śarīrasaṃghāṭavahāḥ prasasruḥ śoṇitāpagāḥ || 9 ||
[Analyze grammar]

dhvajavarmarathānaśvānnānāpraharaṇāni ca |
āplutyāplutya samare vānarendrā babhañjire || 10 ||
[Analyze grammar]

keśān karṇalalāṭāṃśca nāsikāśca plavaṃgamāḥ |
rakṣasāṃ daśanaistīkṣṇairnakhaiścāpi vyakartayan || 11 ||
[Analyze grammar]

ekaikaṃ rākṣasaṃ saṃkhye śataṃ vānarapuṃgavāḥ |
abhyadhāvanta phalinaṃ vṛkṣaṃ śakunayo yathā || 12 ||
[Analyze grammar]

tathā gadābhirgurvībhiḥ prāsaiḥ khaḍgaiḥ paraśvadhaiḥ |
nirjaghnurvānarān ghorān rākṣasāḥ parvatopamāḥ || 13 ||
[Analyze grammar]

rākṣasairvadhyamānānāṃ vānarāṇāṃ mahācamūḥ |
śaraṇyaṃ śaraṇaṃ yātā rāmaṃ daśarathātmajam || 14 ||
[Analyze grammar]

tato rāmo mahātejā dhanurādāya vīryavān |
praviśya rākṣasaṃ sainyaṃ śaravarṣaṃ vavarṣa ha || 15 ||
[Analyze grammar]

praviṣṭaṃ tu tadā rāmaṃ meghāḥ sūryamivāmbare |
nābhijagmurmahāghoraṃ nirdahantaṃ śarāgninā || 16 ||
[Analyze grammar]

kṛtānyeva sughorāṇi rāmeṇa rajanīcarāḥ |
raṇe rāmasya dadṛśuḥ karmāṇyasukarāṇi ca || 17 ||
[Analyze grammar]

cālayantaṃ mahānīkaṃ vidhamantaṃ mahārathān |
dadṛśuste na vai rāmaṃ vātaṃ vanagataṃ yathā || 18 ||
[Analyze grammar]

chinnaṃ bhinnaṃ śarairdagdhaṃ prabhagnaṃ śastrapīḍitam |
balaṃ rāmeṇa dadṛśurna ramaṃ śīghrakāriṇam || 19 ||
[Analyze grammar]

praharantaṃ śarīreṣu na te paśyanti rāghavam |
indriyārtheṣu tiṣṭhantaṃ bhūtātmānamiva prajāḥ || 20 ||
[Analyze grammar]

eṣa hanti gajānīkameṣa hanti mahārathān |
eṣa hanti śaraistīkṣṇaiḥ padātīn vājibhiḥ saha || 21 ||
[Analyze grammar]

iti te rākṣasāḥ sarve rāmasya sadṛśān raṇe |
anyonyakupitā jaghnuḥ sādṛśyād rāghavasya te || 22 ||
[Analyze grammar]

na te dadṛśire rāmaṃ dahantamarivāhinīm |
mohitāḥ paramāstreṇa gāndharveṇa mahātmanā || 23 ||
[Analyze grammar]

te tu rāmasahasrāṇi raṇe paśyanti rākṣasāḥ |
punaḥ paśyanti kākutsthamekameva mahāhave || 24 ||
[Analyze grammar]

bhramantīṃ kāñcanīṃ koṭiṃ kārmukasya mahātmanaḥ |
alātacakrapratimāṃ dadṛśuste na rāghavam || 25 ||
[Analyze grammar]

śarīranābhi sattvārciḥ śarīraṃ nemikārmukam |
jyāghoṣatalanirghoṣaṃ tejobuddhiguṇaprabham || 26 ||
[Analyze grammar]

divyāstraguṇaparyantaṃ nighnantaṃ yudhi rākṣasān |
dadṛśū rāmacakraṃ tat kālacakramiva prajāḥ || 27 ||
[Analyze grammar]

anīkaṃ daśasāhasraṃ rathānāṃ vātaraṃhasām |
aṣṭādaśasahasrāṇi kuñjarāṇāṃ tarasvinām || 28 ||
[Analyze grammar]

caturdaśasahasrāṇi sārohāṇāṃ ca vājinām |
pūrṇe śatasahasre dve rākṣasānāṃ padātinām || 29 ||
[Analyze grammar]

divasasyāṣṭame bhāge śarairagniśikhopamaiḥ |
hatānyekena rāmeṇa rakṣasāṃ kāmarūpiṇām || 30 ||
[Analyze grammar]

te hatāśvā hatarathāḥ śrāntā vimathitadhvajāḥ |
abhipetuḥ purīṃ laṅkāṃ hataśeṣā niśācarāḥ || 31 ||
[Analyze grammar]

hatairgajapadātyaśvaistadbabhūva raṇājiram |
ākrīḍabhūmī rudrasya kruddhasyeva pinākinaḥ || 32 ||
[Analyze grammar]

tato devāḥ sagandharvāḥ siddhāśca paramarṣayaḥ |
sādhu sādhviti rāmasya tat karma samapūjayan || 33 ||
[Analyze grammar]

abravīcca tadā rāmaḥ sugrīvaṃ pratyanantaram |
etadastrabalaṃ divyaṃ mama vā tryambakasya vā || 34 ||
[Analyze grammar]

nihatya tāṃ rākṣasavāhinīṃ tu rāmastadā śakrasamo mahātmā |
astreṣu śastreṣu jitaklamaśca saṃstūyate devagaṇaiḥ prahṛṣṭaiḥ || 35 ||
[Analyze grammar]